حفظ البيانات؟ هل نسيت كلمة المرور؟ تسجيل عضوية جديدة

----------- اول رحله للمغرب -----------

-خالد- · 2013-05-19T13:54:02+00:00

:yess:اهلن:yess: اهلن:yess: يالله ان تحييني:D:D:D D: <== هذا الفيس بتشوفونها كثير احبه مادري ليش وانا اكتب احس اصابعي كنها باب حديد قديم تطلع اصوات الظاهر يبيلها تشحيمD: <=== مبطي ما كتب الولدD:D: المهم الموضوع هذا كتبته في منتدى ثاني عام 2009 وحبيت اجدد الموضوع بسبب انه قررت اروح المغرب في شهر 6 بعد غياب 7 سنين وحبيت اجدد الذكريات في احلى رحله بحياتي واطرح الموضوع من جديد وان شاءالله تنبسطون...D: طبعا كيف بداء التخطيط لها والمشاكل الي واجهنها في المغرب كلها راح اشرحه لكم (( لناطقين بغير النجديه تحميل ملف الترجمه اسفل الموضوعD:D:)) لالا امزح بترجم لكم D:D: بدا ذي بدا <== من زمان ونا ودي اقولها واطلق اللغه العربيه التي بداخليD:D: <== ترى ما يدري وش معنها بس اعجبتني :D المهم بداية التخطيط كان فوق دكه:D ( دكه = منطقه تشبه البلكونه بس ارضيه ) <== بيروح المغرب ويخطط لها فوق دكه والله من زين التخطيط :D:D في مزرعه عمي طبعا كانت عزيمه وجمعتني مع ولد خالتي الشرير واسمه بندر ومنها بداء التخطيط :D <== ما يجتمعون ذولا الا وراهم مشاكل :D:D طبعا كنا منسدحين اخر الليل في جو شاعري يتخلله اضواء النجوم المتلائلئه في كبد السماء:D وخيوط دخان معسل توت يخرج من شفتاي وتداعب وجنتاي <=== الا والله براطم قال شفتاي قال:D و بعض القطواه تدور علينا مادري شايفينا علبة تونه ولا افخاذ دجاج .. المهم طبعا في الجو الشاعري هذا بدينا نسولف ونطلع مافي جعبتنا من كذب تعرفون السوالف الصدقيه خلص قمنا نكذب على بعض يقالنا راعين رومنسيه و مناظرخلابه :D وانا اقوله الشروق احلى وهو يقولي الغروب احلى:D وفجاءه جاء طاري المغرب حسيت انه ضربني كهرب لدرجة انه لو امسك لمبه ولعت .. انا للحين ماينب عارف وش دخل المغرب في الشروق والغروب والدكه والقطاوه ؟ ما علينا المهم قالت له انا عندي هدف ولازم اسجله:D ااااقصد لازم احققه:D <== باين انه موب راعي كوره ابد :D:D قالي ولد خالتي وش هدفك؟ قلت دبل كيك خخخخ :D:D <== بدت البثاره عاد ( البثاره = مالقيت لها ترجمه بالقاموس العربي شكل اصلها يونانيD: ) <== توهق ما يعرف كيف يترجمها وصرفهاD: قلت له اني ابي اروح المغرب ابي اروح لديره الي كل الناس تتكلم عنها طبعا متى وكيف نروح المغرب وعلى ايش بنروح باخره ولا طائره شراعيهD: اهم شي اني بروح لو اجيب خريطه وحطها في الارض ووقف فوق المغرب بس اروح.D:D: بعدين جاء عمي فجاءه وهو الي يطلع السيف من غمده ويقولنا وجع وجع ثكلتكم امهاتكم تشيشون يا كلاب .... وحنا ما تشوف الا غبارنا حتى القطاوه سبقنها من السرعه... بعدين تفرقنا وبعد كم اسبوع نسيت الموضوع وفي يوما جميل مشرق تسمع فيه زقزقة العصافير واشعة الشمس الذهبي تداعب وجنتاي <==== اتحدى اذا يعرف وش قاعد يقول :D اتصل علي ولد خالتي قالي خالد ابشرك تراني حجزت على كازا:D حسيت يوم قالها انه خنقتني العبره من والوناسه واخذت عيناي تذرف الدموع فرحا كني ام عروسه فرحانه ان بنتها بتتزوج قالي حجزت انا وفهد:D <== وقتها حسيت اني مكامله لم يتم الرد عليها <== تشبيه قاتل:D مرت لحظات صمت .... انتظر يقول انا وانت وفهد ...رجعت وقلت له انت ومين ؟:D ( قلت يمكن انه قال اسمي بس ما سمعت زين ) قال انا وفهد !!! بعد كذى تاكدت ان اسمي مو موجود على قائمة المسافرين في متن الخطوط ؟؟ وقتها حسيت اني اي شي الا انسان ؟؟ قلت له بندر .. ضوء القمر .. دخان المعسل الي يداعب وجنتانا ... طيب ياخي عمي يوم يلحقنا بالعصى ؟؟ ما تذكرك بشي ذولي:ang: قلت له لعنبو بليسك ولد خالتك جحدتني على طول وهذا وحنا قضينا لليله شاعريه تحت اضواء القمر لين لعب فينا النامس من كثر التقرص حتى ان امي يوم شافتني تغطت عني تحسبني واحد ثاني والسبب النامس ( النامس = عباره عن ديناصور صغير مره:D يطير وتعض عضا مبرحا:D (الباعوض) ) <== لا بالله شرح لكم:D:D قالي احجز انت من الرياض قلت معصي انت وجهك انت احجز لي :ang: . تدري انه ممكن من الفرحه اقول لراعي الحجز ذهاب بدون عوده ما اقدر امسك نفسي:D طبعا هو في الشرقيه وعلى باله اني بطلع لحالي بطياره من الرياض وهو بيطلع من الشرقيه :D قايلكم ولد خالتي اشك انه يقرب لي:D عقب احداث المستشفيات الي صارت في السعوديه :D:D اذكر مره كنت انتاول انا وخالتي قدحا من القهوه بنكهة الهيل :D في اخر انهار من على شرفت الصاله:D <== اما شرفه يبيلها :D قلت لخالتي بقولك شي بخاطري:D .. انتم تاكدتو من بندر لا يكون غلطانين فيه مع واحد ثاني.؟؟:D:D عائلتنا كلنا عيونا زرق وشعورنا شقر وبيض :D وولدك ذا قزم ودوب وسود و وشعره فلافل :D:D بس الشهاده لله عيونه زرق كنه عيون قطط تنور اذا ضربها النور :D:D :D<=== يقول احس اني خربت نسل ولد خالتي بتوصيف ذا خخخخخ :D :ang:<== طبعا ما راح اقولكم ان خالتي سوت تحديد الكل وكل شي حولها صار يلحقني فناجيل ودلة القهوه وجوالها :D المهم قلت له احجز لي انت وراسك كنه قنديل البحر :D. مانيب رايح لحالي لو تنقز لكازا وترجع طبعا للحين باقي شهر على الرحله بس وكل الي سوينها اننا حجزنا على كازا تذاكر :D وش بنسوي هناك وين بنسكن في المطار ولا بس بنختم جوازتنا اننا جينا المغرب ونرجع للحين مافي شي واضح :D بعد كم يوم اتصل علي وقالي فيه مكتب يسوي حجوزات وسكن وكل ابو شي بس رح له وخذ منها 10 ايام سكن وتذاكر . قلت له طيب وفعلا سويت كل الامور من حجوزات وكل شي وحجزت السكن وخذت الفوتشر وانا البسمه من الوناسه ماخذه لفه على راسي كل من شفته اعطيه بسمه وضحكه :D <== احس ان نفسي مفتوحه ذاك الوقت لكل شي :D وكل يوم اصحى قبل اروح الجامعه اناظر التذاكر اسوي اعادة شحن لين تصير البطاريه ممتلئه :D:D حسيت اني في اذك الوقت جبت احسن الدرجات في الجامعه لدرجه اني بغيت اصير عميد الجامعه:D بعد كم يوم جاء اليوم الموعود .... الي هو يوم السفر جاء بندر وفهد لرياض :D <== بدى يذل ولد خالته وتعشينا وتفاجائنا ان فهد ما عنده ولا بدله ويبي يروح بثوب طبعا قلت لبندر : انت قلت له بنروح المغرب ولا بنروح مضارب الباديه ؟ والله وناخذه لسبلاش ونركض ركض في العربيه كل شي نحطه من زواد العجله الي فينا تفاجائنا عند الكاشير اننا ما جبنا له ولا جينز كل الي اخذنها تيشرتات :D تخيلو بس تيشيرت وسروال سنه في المغرب وقاعد يتمشى في الكرونيش:D <== ابو سروال وفنيله غزى المغرب :D وبعدين رحنا البيت نجهز الشنطه حقته طبعا شنطتي لها شهر جاهزه حتى انه صار عليها غبار :D :D وعلى طول ادق على ولد اختي اقوله تعال ودنا المطار طبعا الرحله الساعه 5 الفجر وحنا من الساعه 12 في المطار :D <=== لا عاد يسافرون ذولي ابد :D حتى ان حق البوردينق يقول عسى ماشر لو هي رحله لشرقيه ولا لجده كان ما جيتو الا قبل الاقلاع 5 دقايق :D طبعا مطار الملك فهد اخذنها رايح جاي يقالنا نضيع وقت حتى اني صرت مع الشرطي اكتب المخالفات حقت السيارات:D واعلمه اقوله شف ذا ماوقف زين عطه مخالفه :D جينا الساعه 3 ونص وكنا اول ناس طبعا وحاطين شناطنا عند المدخل بحكم انه ما كان فيه الا احنا حتى ان الطياره ما بعد طارت الظاهر من المغرب الي بتاخذنا :D بس تعرفون شي تتمناه وفجاءه لقيته متحقق :D:D خلصلنا امورنا كلها ورحنا عند البوابه ننتظر متى يقولون اقلطو لطياره :D وصلينا الفجر يوم خلصنا الا وهو يعلن عن موعد الرحله وتوكلنا على الله وركبنا الطياره...:D انتهاء الجزء الاول انتظرو الجزء الثاني واحداثه:D:D:D

-خالد-

مزعوط جديد

المشاركات: 12

تاريخ التسجيل: May 2013

2013-05-20, 11:45 AM

المشاركه #5

رد: ----------- اول رحله للمغرب -----------

اقتباس:

المشاركة الأصلية كتبت بواسطة جنوبية

ههههههههههههههههه

يسلمووووو التقرير حلو يا اللله كمل متابعك:Abu Ahmed (777):

:yess: اهلن :yess: اهلن :yess: جنوبيه

الله يسلمك ويسعدني تشريفك

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: ----------- اول رحله للمغرب -----------
الموضوع	آخر مشاركة
اول رحله للمغرب	2024-07-25 07:48 AM
اول رحله لي للمغرب	2017-08-15 12:30 AM
اكتب تاريخ اخر رحله للمغرب وكم مره رحت للمغرب	2017-04-26 02:05 AM
رحله جماعيه للمغرب	2011-02-28 11:59 AM

الساعة الآن 12:18 PM

جميع المواضيع و الردود لاتعبر بالضرورة عن رأي و توجهات الادارة و انما تعبر عن رأي كاتبها فقط

Ads Management Version 3.0.1 by Saeed Al-Atwi

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

----------- اول رحله للمغرب -----------

روابط سريعه