رد: بداية الزعطة,, رحلتي لأغادير + الرباط
الجزء الرابع
وصلت مطار كازا العصر وأخذت تاكسي مرسيدس ب 700 درهم للرباط, واتصالات مني واتصالات من الرباط لغاية ما وصلنا أكدال بشارع فرنسا, تم حجز استوديو بمنافعه بمبلغ 400 درهم + 100 شغالة, وصلت ولقيت المكان مجهز والثلاجه عامره والوضع مزيان لكن اللي بعص مزاجي ان الشغاله بتنام في نفس المكان, فقررت انتقل لشقه أكبر عشان اخذ راحتي أكثر.
وبالفعل عشان ندور شقه, ولقلة خبرتي في المغرب في ذاك الوقت اخذت شقه ب 1200 درهم في شارع فرنسا وفي الحقيقه الشقه كانت متواضعه جداً وقبلت فيها لان ايامي بالمغرب اصبحت قليلة, اخذت اغراضي من الاستوديو وتوجهت للشقه بمرافقة سائق خاص وجلست فيها ليلة, في اليوم الثاني صحيت على جرس الباب واتفاجأ بصاحبة الشقه جايه ومعاها واحد يشوف الشقه وانا ساكن فيها طبعا ما عجبني هالتصرف وكلمت صاحبة الشقه اني أبي أطلع خلاص وبروح اسكن في فندق طبعا ما عجبها الكلام وعيت ترجع باقي المبلغ لاني دفعت لثلاثة أيام 3600 درهم وكلمه مني وكلمه منها ودخلنا في نقاش حاد حول هذا الموضوع الى ان وافقت ترجع المبلغ, استلمت المبلغ ودخلت على الرجال وشرحت له الوضع ووضع الشقه, وفي هذي الاثناء حضر ضيف للرجال وتفاجأت أن اللي حضر هو نفسه لما , طبعا تم اللفاء .
اخذنا غرفتين الوحده ب 600 درهم وكانوا كونكتد رومز وحده بإسمي انا , سكنا وعينا خير, في العصر نروح نتمشى في الكورنيش وبالفعل إلتقيت فيه هناك واخذنا نتجول ونتمشى وسط هالعالم وما في احد يكلمنا او يتحرش فينا لاننا ماشين عدل ولما تمشي عدل يحتار عدوك فيك.
ثاني يوم اتفقت انا وصاحبي نروح لحمام مغربي واخذنا تاكسي من عند الفندق وودانا لأقرب حمام مغربي, دخلنا وتمصعنا وتم استخراج الملابس اللي كانت لازقه في جلدنا وطلعت من الحمام وانا بيغى علي من العطش والجوع ورحنا لمطعم لبناني ناسي اسمه واكل حتى الاشباع.
بالليل كنا نسهر في النايت كلوب في الفندق وكان جوه واعر بس مو مثل جو اماكن السهر بإغادير هناك الوضع غير بمعنى الكلمه.
قضيت في الفندق ليلتين وفي اخر ليلة حجزت تاكسي للمطار واتجهت لكازا ودخلت المطار ويوم وصلت للبوردنق ويقول حجزك انتظار لانك ما اكدت حجزك على الخطوط القطرية, يا رجل غير بدل انا حجزي اوكي من اول ما حجزت بالسعودية قال لان نظام الخطوط القطرية انك لازم تاكد الحجز في البلد اللي بتغادر منه, تواجهت مع واحد وضعه مثل وضعي واخذنا نلف في المطار بحثا عن اي خطوط ممكن نحجز عليها عشان نسافر لكن للأسف أغلب اللي لقيناها كانت في حدود 6000 درهم بزنس كلاس وانا لو عندي وقتها 6000 درهم ما مشيت من المغرب.
رجعت انا وصاحبي اللي تعرفت عليه لكازا وحجزنا في فندق ابو كلب عشان نرتاح وبالعصر نروح ناخذ لفه على المكاتب عل وعسى نلقى لنا دبره, ومن مكتب لمكتب ومن زنقع لزنقه الى ان شفنا مكتب وسط دواعيس وفيه وحده واتفقنا انها تشوف لنا حجز بالليل على الخطوط السعودية وبنفس تذاكرنا وكل واحد يدفع 500 درهم فرق ووافقنا بدون مناقشة, وتم الحجز والتوجه للمطار وقصينا البوردنق وارتحنا من المعاناة اللي واجهناها وسافرنا للسعودية وبيني وبينكم بسبب الاحداث اللي صادفتني كرهت المغرب بعض الشيء لكن كل ما حصل ما خلاني افقد عزيمتي للقيام بسفرة ثانية للمغرب بعد سفرتي بسنتين في عام 2006 لكازا وهذي لها تقرير خاص غير تقرير سفرة عام 2013 الواااااعره لمراكش واغادير وكازا.
وكل عام وانتم بألف خير وعيدكم مبارك.