السلام عليكم ورحمة الله جميعاً


تقرير بسيط آمل أن يستفيد منه أعضاء هذا المنتدى وأن يكون رد لبعض الجميل ...

التقرير سوف يكون مقسم لثلاث اجزاء :

- ماقبل السفره وايضا شكر وعرفان لبعض الاعضاء ...
- كازا و أويـــلي من كازا ...
- مراكش الحمراء ونصائح ختاميه ...



بسم الله نبدأ ولكن قبل ذلك كنت اتمنى كتابة الموضوع بتفاصيل التفاصيل ولكن أخشى من هذا الحديث (كل امتي معافى الا المجاهرون) والواحد فيه اللي يكفيه , الله يتوب علينا ويغفر لنا ولكم :


كل الشكر وقبله على رأس هذا الرجل المحترم ابوتركي (زيزوم) على كل ماقدمه لنا من توفير للسكن في كازا والنصائح قبل وبعد السفره , وله منا كل العرفان والتقدير .
أيضا أشكر ابوعبدالله (أهنجار خليجي) على تقديمه لاكثر من فرصه للسكن في مراكش.
الشكر موصول للعضو (LEO KSA) وتحمله لازعاجي شخصيا طوال فترة الاستعداد للرحله .
شكر شخصى للعضو (العازف) وعرضه لفله رائعه في كازا ولكن لم تكن من نصيبنا .
شكر واعتذار للاخ جواد (لتأجير السيارات) ماشاء الله عليه لم نقابل شخص في المغرب يعرفه الا يمدح وينصح بالتعامل معه .

بعد الانتهاء من المجاملات وحب الخشوم (خربتها في الاخير :) ) ندخل في موضوع الاستعداد لما قبل الرحله :

يقولوا في الامثال اللي يذاكر كويس ينجح ( مثل من تأليفي الشخصي ) والمغرب تحتاج الى مذاكره واستعاد حتى تكون الرحله مميزه بكافة تفاصيلها وتكون ذكرى جميله .

لذلك تم الاستعداد للرحله قبل وقت السفره بأكثر من 3 أسابيع من حجوزات الطيران والسكن وتوفير السائق الخاص الى الاماكن الواجب زيارتها وطبعا تحديد ميزانية تقريبيه للرحله وانا اقول تقريبيه لان في المغرب 1+1 ليس بالضروره يساوي 2 ممكن 3 أو 4 وأحيانا اكثر من كذا حسب الظروف .

الرحله مكونه من 3 اشخاص ( محدثكم المحترم واثنين معاه عكس ذلك تماماً :) )
مدة الرحله 9 أيام , 6 أيام في كازا والبقيه في مراكش.

تم تقسيم مهام السفر بيننا , فالأول مسؤول عن حجوزات الطيران والسكن , ومحدثكم مسؤول عن توفير معلومات الاماكن السياحيه الواجب زيارتها هناك بكافة تفاصيلها , والاخير فاضي ومتفرغ لأنتقاد مانعمل.

الرحله كانت على الخطوط المصريه سيئة السمعه في كافة النواحي من الكراسي الضيقه وعدم توفر اي وسائل ترفيه بالطياره. تم الحجز عليها بسبب مناسبة وقت الوصول والمغادره من هناك فقط ( حتى سعرها كان مرتفع تقريبا 3450 ريال للشخص ) .

طبعاً حجز الطياره له سالفه , مو سالفه وبس مصيبه بقيادة الشخص الاول .

القصه باختصار قمنا بحجز الرحله فجر الخميس في نهاية شهر 5 ميلادي ,
قبل الرحله باسبوع ونص اتصل علينا صاحبنا من قام بحجز وقص التذاكر , وقام بعمل مكالمه جماعيه (الثلاثه كلنا) :

حنا : هلا وش السالفه يبو فلان
الشخص الاول : أبد كنت اطالع بالتذاكر علشان اشوف كم يسمح لنا وزن العفش .
حنا : طيب اوكي ممتاز .
الشخص الاول : بس طلع فيه مشكله بسيطه .
حنا : ( أول شي توقعناه انه في مشكله بالوزن والعفش) وش المشكله يبو .
الشخص الاول : ابد بس يوم شفت وقت الحجز طلع فجر الاربعاء وليس فجر الخميس .
حنا : @#$%^&$$#$#%$$$&%$@@##

طيب وش نسوي اللحين , يالله اخذنا اجازات من عملنا 5 أيام , وش نسوي بيوم الاربعاء , وخاصه انه تغيير موعد الرحله لفجر الخميس راح يكلف على الواحد 1200 ريال يعني انسى .

اتفقنا انه كل واحد يروح للعمل ويسوي فيلم هندي مع المدير علشان يااخذ الاربعاء اجازه , اللي دخل على مديره قبل يوم الرحله وقال انا فجأه تعبان وبكره مااقدر اداوم , واللي قال انا مسافر مع اهلي بس الله يهديهم حجزوا وقت الرحله خطأ , شخصياً دخلت على مديري وقلت له السالفه مثل ماصارت انه واحد من اخويياي اللي حجز التذاكر عنده شوية تخلف عقلي :) وحجز في فجر الاربعاء بدل فجر الخميس , طبعاً ضحك وقال مافيه مشكله بس بعدها اعطاني نظره معناها لاعاد تكررها .

المهم الحمدلله مشت امورنا وصار هاليوم الاضافي من نصيبنا ( كل يوم في المغرب اضافي هو من نصيبك ومتعه لاترد ولاتستبدل ) .

طبعا الايام اللي قبل الرحله وخاصه الاسبوع الاخير اصبحت تمشي ببطئ شديد , الواحد فينا يالله يمشيه علشان يخلص .

شطحه خفيفه : من الفوائد الجميله اللي استفدت منها شخصيا قبل الرحله اني شريت شنطه ولاول مره في حياتي , لاني كنت اتسلف الشنط من بعض الاحباب والاصدقاء , شريت شنطه حمراء بااربع كفرات :icon30: (لبى قلبها) علشان اقدر اشوفها واميزها من بعيد في المطار .

ايضا شرينا شنطه اضافيه حطينا فيها عدد 2 شيشه وجمر ومعسل وسماعات , واللي وصل هناك عدد 1 شيشه وشوية جمر ومعسل مفكوك والسماعات الله ستر عليها (لأن الشنطه كانت اي كلام مع اننا حطينا فلين ولكن غالبيه الاغراض تكسرت :( )

طيب وين وصلنا
ايه وجا يوم الرحله الموعود وزانت العلوم وكل واحد النفسيه فل الفل والضحكه شاقه وجهه من الاذن للاذن : (732):
ووصلنا لاجمل مكان في الرياض , صالة المغادره في مطار الملك خالد . والجميل في الامر لأول مره أصبحنا محترمين ودخلنا صالة ال VIP :7:



أنتهى .


الجزء القادم راح يكون تقرير بسيط عن كازا ويتضمن بعض من الصور و اويلي من كازا ( يمكن ترى اتهور واقول وش سالفة اويلي اللي ازعجتكم فيها :) ) .

تحياتي

محمد في الرياض , حمودي في المغرب ...