شكوى القصيد

هاذا قصيدة ارسلتها لخالي اشكي عليه من الهوى ودروبه

واقول فيها :

ياموصلن خطن كتبته بيمناي
عدهـ على خالي طويل الذراعي

ياخال في طرد الهوى زاد مشكاي
بشكي عليكم لوعتي والتياعي

قالوا صبر قلت الصبر زاد بلاواي
اثر الصبر في الحب قل انتفاعي

اونس على كبدي مثل لاهب الماي
اليا ذكرت ام العيون الوساعي

من عقبها ياخال ضاوي وسراي
نوبن على يمه ونوبن ضياعي

كثرت هواجيسي عليها ودعواي
يالله دخيلك ياكريم المساعي

الحب له دربن صعيبن ولواي
يلوي قلوبن مالواها ارتياعي

كم من عقيدن من عنا الحب بكاي
وكم شيخ قومن في الهوى صار راعي

لااقبل علي الليل جريت انا عواي
عوي الذياب الصاملات الجياعي

على الذي ياخال هو غاية مناي
حبي لها ماهوب حبن صناعي

احبها من قلب عاشق وشراي
شاري هوى ياخال زين الطباعي

ياخال بشكيلك عسى عندك دواي
وارقب علومك ياحفيد السباعي