اقتباس:
المشاركة الأصلية كتبت بواسطة ع السريع
ونكمل التقرير معكم دامي مصحصح : )
" اليوم الخامس والاخير "
صحينا انا وخويي على مكالمة خوينا الثالث قال انا جايكم ..
مرنا بسيارته وطلعنا تغدينا بـ مطعم الاسماعيلي .. بما اننا عارفينه زين ..
وبما انه اليوم الاخير في اغادير وبكره مسافرين لـ كازا .. قلت خلني اروح لـ فرع بنك وفا كاش اسحب فلوسي كلها واستمتع باليوم ..
لأني توهقت ما صار عندي شيء ولازم اسحب بعد الساعه 12 الليل 2000 درهم ثانيه وما كانت تسوي شيء
وغير كذا باقي بحساب وفا كاش مبلغ وقدره ف حرام احرم نفسي على اخر ليلة !
رحت لـ الفرع اللي ب اغادير ولـ الاسف قالو ما تقدر تسحب المبلغ كامل او اكثر من 2000 الا من نفس الفرع اللي اودعت فيه
يعني بمطار كازا ! طيب ياهوه ما عندي فلوس وش اسوي ؟ وكثر الجدال معهم وخذيت رقم ادارة البنك وبالاخير نفس الرد بدون اي فايدة
اضطريت اسحب من صرافتي السعودية كنت حاط مبلغ احتياط فيها ( هذي فايدة تحط مبلغ لك بالاحتياط دايم )
خلصنا من سالفة الصرف ورحنا لـ منتجع السوفتيل القديم .. وآآخ ليتني ما جيته
من أول ما دخلت وأستقبال هاي كلاس تحس فعلاً انك مسافر برا السعودية 8 ساعات !
تعامل وابتسامة وشغل ترتيب .. بس يعيبه انه غالي مع انه مو ذاك الغلى 800 ريال باليوم لكن امور الضيوف لازم تفتح غرفة وفيها سالفة
المهم .. جلسنا بالمقهى حقه طلبنا لنا شاي مغربي وشيشة وشغل ترتيب وجلسة رايقة كان فيه فرقة موسيقية تغني ..
وإستضفت شخص كانت العين عليه من جيت اغادير وكنت متردد اكلمه مع ان رقمه عندي ..
جانا مع صاحبه وحلّو جلستنا رغم انها كانت حلوة ورايقة .. والله من حلو جو الجلسة جلسنا من الساعه 4 العصر لـ 8 العشاء ..
بعدها خوينا الثالث إستإذنا بروح لفندقه بقابل خويه .. واضطرينا انا وخويي ناخذ تاكسي ورحنا لـ المارينا
وإخطرت في بالي فكرة اني ادفع حق السكن بـ بطاقة وفا كاش المبلغ كامل وبكذا استفدت من البطاقة وخويي يعطيني قطّته كاش لي واستفيد من المبلغ
مدري فهمتو ولا ؟ ههههههه
المهم ضبطت الفكرة وفعلاً دفعنا حق السكن لـ اربع ليالي وانحلت مشكلة الدراهم عندي
بعدها اتفقنا انا وخويي ما نسهر اليوم لأن تغيّر مسار رحلتنا من اغادير لـ كازا كانت 1 الظهر وتكنسلت وصارت 10 الصباح يعني لازم نكون بالمطار 8 الصباح
فـ توهقنا .. وتقريباً كنا مكتفين ومتشعبين من السهر مع اننا ما طولنا !
خويي راح ينام وانا شدّت معي اكلم اللي جاني السوفتيل على اخر ليلة .. ( مابي اخلي شيء بخاطري )
مع انه كان مغرور ومتكبّر وشايف نفسه .. بس كان بصراحه يستاهل .. صاروخ والصواريخ قليلُ في اغادير هههههههه
بصراحة لما جاني وجلسنا مع بعض طلع نفسيته حلوه وسهرنا مع بعض وزان الجو ..
نمت لي ساعتين تقريباً وصحينا ع 7 .. ودعت صاحبي وصحيت خويي اللي كان مسطول نوم ..
خذينا دش وبدلنا وكلمت سواق تاكسي ابو مرسدس ابيض يودينا للمطار .. مشواره طلع بـ 250 او 300 درهم ناسي ..
كانت الامور طيبة في المطار مع محاولات طلب بخشيش بس مشيّناها بالسليم ..
طرنا الساعه 10 و وصلنا كازا بعد ساعة ..
الحين المشكلة رحلتنا لـ السعودية 7 ونص بالليل .. وش نسوي بهالخمس ساعات !!
اضطرينا نسوي خروج من المطار عن طريق الجوازات ونجلس بالمقاهي اللي في المطار تقهوينا شوي وجلسنا ابو ساعه وشوي
واذن الظهر وصلينا بالمصلى الظهر والعصر .. وخذينا لنا غفوة بالمصلى حلوة ابو 3 ساعات تقريباً هههههه .. كنت مواصل وما حسيت بنفسي
فتح كاونتر الخطوط السعودية قصينا البوردنق ودخلنا الصالة داخل .. تغدينا بالمطعم اللي داخل وريحنا شوي ابو ساعة
وأخيراً نادو على رحلتنا من التعب اللي جلسناه بالمطار ما صدّقنا على الله : (
وبكذا إنتهت رحلتنا القصيرة والاولى لـ المغرب كانت مجرد رحلة إستكشافية لهالديرة بشكل سريع ..
كنت حاب اشوف وش هالمغرب اللي كل من هب ودب تكلم فيها ..!
لدرجة كنت اتخيلها واحلم فيها ..!
كانو مهولّينها بعيوني .. بتشوف وبتشوووف !
لـ الأسف شفتها عادية جداً .. إستمتعت برحلتي وانبسطت بس ما كانت الصورة اللي تخيلتها !
وكنت متخوّف اني أنزعط واتعلّق !
بس هذاني طبيعي جداً بالعكس ما فكرت ابداً امدد وإكتفيت بالخمس ليالي فيها ( اعيد واكرر انبسطت فيها جداً ) لكن كفّتني
عشان محد يدرعم .. انا لست من روّاد الشام ومصر .. الشام ما عمري طبيتها ومصر جيتها مره بس ..
بما اني عايش بالشرقية بـ متشبّع من السهرات في البحرين او دبي
ومن روّاد شرق اسيا والديار اللي كل يوم لك جدول فيها .. تنام وتصحى ما تدري وش بصادفك بكره !
كل يوم متجدد عن اليوم الثاني ..
المغرب بصراحة روعتها بـ ليلها فقط !
بسهراتها وبالوجه الحسن وبالاجواء الليلية ..!
بالاخير تبقى هذي وجهة نظر شخصية .. وما أنكر يمكن يكون لي عودة مع قروب لـ مراكش لأني ما زرتها ..
لكن مو بشغف المزاعيط !
أتمنى ان التقرير كان خفيف ظل عليكم .. واعذروني ان قصّرت فيه .. والله اول تقرير لي اكتبه وحبيت التجربة
وشكراً لـ المشرفين والقائمين ع هالمنتدى اللي إستفدت وحسيت اني خبير في المغرب من مواضيعكم ..
هلا اخوى كيفك حتى انا يمكن اروح رحله استكشافيه اخر الشهر
بس يمكن انت مااعجبتك المغرب مره بسبب كثرة المطاعم اللى مريت عليها على قول اخونا عويد هههههههههه
امزح معك اخوى انا بصراحه مثلك من رواد جنوب شرق اسيا اندونيسيا الفلبين الخ
2013-11-01, 07:58 AM
المواضيع المتشابهه للموضوع: رحلتي القصيرة والاولى لـ ديار المغرب | 2013
العرض المتطور
الدرهم المغربي مقابل عملات الخليج