رحلتي القصيرة والاولى لـ ديار المغرب | 2013
السلام عليكم ورحمة الله وبركاته
ترددت كثير ع السفر لـ المغرب خوفاً من شيء مجهول كـ غالب الشباب او خوفاً من التعلّق في الديرة ..!
وعزّمت ع السفر مع خويي اللي نفس وضعي اول مره يسافر للمغرب .. وكانت الرحلة قصيرة و وقتها ضيّق فـ سميناها رحلة إستكشافية
نبدا بـ تقرير الرحلة القصيرة بكون سريع ومختصر ..
تم الحجز ع الخطوط السعودية : 2650 ريال من ( الدمام - جدة - الدار البيضاء )
يوم الجمعة تاريخ 18 أكتوبر 2013 والعودة الأربعاء 23 أكتوبر 2013
طبعاً خويي اللي معي مسافر من جدة .. يعني بنتقابل ب جدة ونسافر سوا ع كازا ..
رحت المطار وانا مواصل مدري هو حماس للسفر ولا خوفي الرحلة تفوتني : )
وك العادة اتأخر في مواعيدي .. فـ يالله لحقت اقص البوردنق ومن الربكة شحنت شنطتي وانا اللي ناوي ما اشحنها !
وتوكلت ع الله واقلعت الطيارة ع جدة .. وبهالرحلة تعرفت ع واحد باين عليه مقطّع المغرب بروحاته .. وخذتنا السوالف و وصلنا جدة
وقابلت خويي متحمس ينتظرني وشبعان نوم لأن الرحلة كانت من جدة الظهر .. امداه ينام مو انا مواصل : (
افطرنا خفايف وساعتين وركبنا الطيارة وعلى كازا ..
تعرفنا اكثر على الشخص الثالث .. اللي صار عضو من الرحلة بشكل رسمي .. وأستفدنا من خبرته الكثير بصراحه
وكانت الرحلة الى كازا طويله ومُتعبه بالنسبة لي مع الرغم اننا جالسين جنب **** راجعين لديارهم ما قصرّو معنا سوالف لين قضت السوالف ونامو
وانا اللي انام لي نص ساعه واصحى وعلى هالموّال ..
وصلنا لمطار كازا.. والحمدلله تمّت جميع الاجرائات بسهولة بدون اي بخشيش .. إلا الشنطة اللعينة إلطعتني 3 ساعات
وكان التخطيط نشوف لنا اقرب طيارة او تاكسي ع اغادير لكن تم الاتفاق مع الطرف الثالث انه يخاوينا ونريّح بـ كازا ليلة لأننا تعبانين من السفر
واليوم الثاني الظهر نمشي لـ اغادير
ونسيت اقول لكم كان حجزي على ( أغـادير ) الخمس ليالي .. حجزت شقة بغرفتين عن طريق " محمد عاطي " بـ 2550 درهم ..
وكلمت محمد عاطي وكنسلت اول ليلة لأني بجلس بـ كازا وبمشي اليوم الثاني وما قصّر الرجال .. ضبط الامور ع اتم وجه
خذيت شنطتي وحضنتها وحلفت ما اشحنها مره ثانيه للمغرب .. رحت لـ بنك ( وفا كاش ) صرفت 10000 ريال وسويت حساب في البنك
واودعت المبلغ فيه وخذيت معي 5000 درهم كاش لزوم اول يومين ..
ولـ الاسف كانت اكبر غلطة اني سويت حساب بـ وفا كاش لأن تغير نظامه وصار مالك إلا 2000 درهم باليوم !!
وهقني كثير وبعلمكم وش صار وكيف تصرفت من ضمن التقرير
الشباب طلعو شرايح مغربية وسحبو علي لأني طولت بالبنك : (
طلعنا من المطار الا السواق حق خوينا الثالث مستقبلنا وجايب السيارة لنا .. ورحنا لـ كازا
مرينا ع محطة نعبّي بنزين فل بـ 500 درهم يخرب ببيتهم !
وصلنا لـ كازا وخوينا الثالث قال خلونا نسكن في فندق ( كنزي بسمة ) الوضع فيه فري ورخيص نريح فيه ليلة بس ..
قلت انا وخويي انت الدليلة وابوها وسمها .. ولا انا ما كان لي نية اجلس ب كازا
وفعلاً وصلنا الفندق وصرفنا السواق .. وحجزنا ع اساس خوينا الثالث ضامن الوضع فري ويدخل ضيوف .. ويوم حجزنا قلبي نغزني قلت اسألهم عادي الوضع
وتفاجئنا بالمنع .. مع المحاولات .. إلا ان الرسبشن تقول النظام صار متشدد ب كازا ومنعنا استقبال الضيوف بالفندق لنا 3 اشهر ..
قلنا مو مشكلة الليلة ترييحة
اخذنا غرفتين .. غرفة لي انا وخويي وغرفة لخوينا الثالث
الغرفة الوحدة طلعت بـ 700 درهم تقييمها 3 / 10 بالنسبة لي
الجوع كان لاعب فينا .. قلنا ما نبي نريح لأني مواصل لو بريّح بنام واسحب عليهم :D
طلعنا على عين دياب وكان واعر لأن الدنيا عيد .. وتعشينا بـ الطازج كان واعر بعد
اسعاره حلوه 3 وجبات طلعت علينا تقريباً بـ 130 درهم
تعشينا وبعدها هضّمنا بالكورنيش وكان الجو رايق .. خوينا الثالث قال خلونا نحجز بـ وناسه قلت براحتك
يوم دخلنا اكتشفت انه مرقص " كباريه " وهذا ماهوب جويي انا وخويي .. قلنا له احجز ويصير خير بعدين
ورجعنا الشقة ريحنا لـ الساعه 12 .. وزبّدناله قلنا جونا ديسكوات مو كباريهات .. قال فيه ( البلاك هاوس ) قلنا تم مشينا
قصينا تيكيت دخولية الواحد بـ 200 درهم مع مشروب ع البار ..
كان شبه فاضي .. ابو ساعه بس والوضع صار مزياااان .. الديسكو إمتلى ***** اشكال والوان
إنبسطنا حيل فيه رغم المواصل والتعب الشديد .. ورجعنا لـ الفندق منتهين .. وأحلى نومة
وبكذا انتهى اليوم الاول .. واعذروني اول مره اكتب تقرير ومن النوع اللي اكتب ولا اراجع اللي كتبته فـ تشوفون السوالف ملخبطه : )