مكتب يوسف تأجير السيارات في مطار الدار البيضاء.

كنت في كازا لمدة اسبوع من 13 الى 20 اكتوبر 2016
اجرت سيارة من مكتب سافواي (يوسف) طوال فترة الاسبوع
اتعرفت على مكتبه عن طريق الموقع وتجارب الاعضاء الكرام
حجز السيارة ولا اسهل قبل الوصول بيوم عن طريق الواتساب وارسال صورة تذكرة السفر لتبيان موعد الوصول
والشهادة لله الناس قمة الذوق والشياكة في التعامل - السيارة ما شاء الله كانت ممتازة وجديدة
السيارة صحيح صغيرة حسب طلبي ولكن عمليه جدا للتنقل في شوارع كازا المزدحمة جدا
والاجمل انها كانت موفرة جدا في استهلاك البنزين
على فكرة لتر البنزين في المغرب ب 10.33 درهم مغربي يعني تقريبا 4 ريال سعودي او 4 درهم اماراتي للتر الواحد
استلام السيارة وقت الوصول في ربع ساعه ...بدون ترك هوية ولا جواز سفر ...فقط نسخة منهما
وتسليم السيارة نفس الشي وقت السفر كمان ربع ساعه ...باختصار تعامل ولا افضل
الناس عموما في المغرب في منتهى الطيبة والاخلاق خصوصا اني كنت موجود في وقت بعيد عن زحام الصيف والبلد هادية ورايقة والناس كمان رايقين.
للناس اللي اول مرة يسافرو زي حالاتي (ان شاء الله الزيارة الاولى وليست الاخيرة) ...اليكم بعض المعلومات اللي يمكن تساعدكم :)
- تاريخ الازدياد يعني تاريخ الميلاد ..عشان لا تستغرب في المطار وانت بتعبي كارت الوصول
- جوج يعني اثنين
- توقيف السيارة في شوارع كازا بتكون ليست مجانية في الاماكن المزدحمة ...بتدفع 10 دراهم فقط لأي مدة لشخص من البلدية بييجي لحد عندك ...الرباط فيها مواقف بعدادات الساعه تقريبا ب 4 دراهم
- الشاي المغربي اسمه أتاي ... والكسكس بالخضار واللحم بيتواجد في اغلب المطاعم يوم الجمعه فقط
- البسطيلة اكلة روعه عبارة عن نوع من العجين محشي دجاج مع لوز محمص من الداخل ..ومرشوش عليه سكر ناعم من الخارج ...مكس حلو مالح طعمه رائع ...اما الترفيسة فهي النسخة المغربية من الثريد او ما يسمى الفتة في مصر .... المسمن نوع من الفطائر ...الخليع نوع من البيض باللحم المقدد للافطار و...البريوات صنف حلويات قريب الشبه من بلح الشام.
- اللي بيعرف يتكلم فرنسي يا حظه في المغرب :)
- طريق سيار بالأداء يعني طريق سريع بتدفع فيه رسوم ...والرسوم حسب المسافة ...مثلا الرسوم من كازا للرباط كانت 23 درهم .
- محطة الأداء مش يعني محطة بنزين زي ما كنت فاهم الاول بالخطأ ههههه محطة الاداء يعني المحطة اللي بتدفع فيها رسوم الطريق السيار.
- اعتقد بس مش متأكد ان يعطيك العافية في بعض مناطق المغرب لها معنى مش كويس (تقريبا العافية لها معنى اخر هو النار او ما شابه) مش متأكد صراحه من المعلومة ممكن احد الاخوة الخبراء يفيدنا.
- لتر البنزين ب 10.33 درهم والجازولين ب 8,90 درهم ... والسعر متغير بنسبة بسيطة من محطة بترول لأخرى والبنزين هناك نوع واحد فقط
- غسيل السيارة اسمه لافاج :) وفي مغاسل في اعلب محطات البترول وبسعر 30 درهم وطبعا انت وكرمك مع العامل في 10 دراهم ولا 15 درهم واللي مش رح تخرب الميزانية اعتقد :)
- كراء السيارة يعني تأجير السيارة وعقد الكراء ديال السيارة يعني عقد ايجار السيارة
- محطة البنزين اسمها : ستاسيون دو جاز .... والله نطقها احلى من محطة بترول :))
-الجوازات في مطار كازا بطيئين شوية لكن الله يعينهم عددهم قليل والضغط كتير
- شوارع كازا زي شوارع مصر ...مليانه حفر ومطبات تخلق جو من الاثارة اثناء القياده وتخليك مصحصح هههه .... شوارع الرباط افضل بكتير ...وفي البلدين انتبه من الطرامواي لأن له الاولوية طبعا
- زجاجة الماء المعدنية اسمها : قرعة ما ... والنوع الاشهر هو سيدي علي .
- لما توصل كازا ...في المطار روح على مكتب شركة اتصالات (اينوي) ... ب 150 درهم مغربي تشتري خط ويكون فيه 6 جيجا انترنت فور جي وكمان ساعه مكالمات ...الاتصالات من الموباليل هناك ممتازة ورخيصة والانترنت كمان سريع ...بس انتبه عند اعادة الشحن لأن كل مرة بيكون في عرض مختلف وممكن يديك الشحن دقايق اكتر او انترنت اكتر ... اعتقد الانترنت بالنسبة للزوار اهم ...عموما قبل الشحن كلم خدمة العملاء افهم منهم لأن المسج بتجيلك بالفرنسي وفيها العرض وممكن تكون زي حالاتي ضايع في الفرنسي :)
لو افتكرت حاجة تاني مهمة هابقى اقولهالكم
اسف للاطالة وتحياتي لجميع الساده اعضاء الموقع ... وشكرا جزيلا مرة اخرى للأخ يوسف وكل الاخوة العاملين بالمكتب على كرم الضيافة وحسن المعاملة والاستقبال