استفسار عن موضوع سياره و سايق....لاهل الخبره
السلام عليكم و رحمة الله
عندي استفسار للاعضاء الكرام و اهل الخبره
العام الماضي استاجرت سياره و سواق من احدا الشركات المعلنه في الموقع لمدة اسبوع تجولت فيها في من كازا لطنجه و ما حواليها ثم اغادير و مراكش انتهاءا بكازا . كانت رحله خطافيه استكشافيه للمغرب الحبيب. كنت لوحدي.
كل شي كان تمام لكن لاحظت ان السايق يختبص كل ما مرينا نقطة تفتيش و يبان عليه النرفزه على خفيف و يعطي اكراميات جزله بعض المرات (طبعا دفعنياها اخر الرحله)
المهم انا ساكت عن الموضوع الى نص الرحله لاني لاحظت ان السالفه زادت عن حدها
سالته ويش الهرجه
قال لي شغله فاجاتني
في البدايه حاول يتفادا النقاش في الموضوع لكن الحيت عليه
الزبده زي ما فهمت منه ان القانون لا يسمح انك تستاجر سياره وسايق في نفس الوقت من هذي الشركات. يسمح لك ان تستاجر السياره وتسوقها انت. بس ما تقدر تاخذ سايق. الموضوع له علاق بنقابة ساواقين التكاسي وشركات الليموزين او ما شابه ذلك.
و بعض الدرك فاطنين للموضوع ذا و يستقعدون للسايق الين يعطيهم اكراميه. صارت قدامي عدة مرات.
للمعلوميه اسم السايق موجود بالعقد لكن بصوره شكليه. يعني خرطي.
في نهاية الرحله طلب مني حولي ٦٠٠ درهم حق الشغلات ذي واكراميات السيكيوريتي حقين الفنادق والكلوبات طوال الرحله.
انا اخذت سياره بسايق علشان اريح راسي. طلع الموضوع ذو شجون. كل ما جينا نقطة تفتيش يصير دراما و نرفزه والدرك يثقلون دمهم ويطالعون في الشنط ويتفحصون الجواز ورقه ورقه و تاخير و ترهيب. تقطع جوازي في المغرب من كثر
ما تفحصوه و قلبو اوراقه في هذا الموقف وغيره في الدخول والخروج من المطار ...الخ الخ
طبعا انتو عاررفين طريقتهم اثناء تسليمك السياره....لازم تسوقها انت بنفسك تطلعها من المطار وتقابلهم عند محطة افريقيا تخلص اوراقك معهم و تدفع و يطلع معك السايق. شغل جيمز بوند.
افكر المره الجايه اخذ سياره بدون سايق واجرب. للاسف اكثر سفراتي وحداني.
اسف للاطاله وارحب بالمشاركات والاراء.
التعديل الأخير تم بواسطة AbuMeshal ; 2014-05-15 الساعة 03:33 PM