اصبحنا وعينا خير وجلسنا نخطط للبرنامج وهنا عندي ملاحظة
انا جيت اكادير 3 مرات قبل هذي فيه مره كنت وحداني سويت اكشنات على كيف كيفكم بس المشكلة الباقي معي اخويا والشباب اغلب نظامهم سهر مافيه نصيب كبير للاستكشاف . وبحكم اني امير الرحلة حطيت اقتراح لعب فيني في ذا الرحلة الا وهو ان خطوه او تعديل بالبرنامج خاضع للتصويت وكنت احكي لهم كيف ان امريكا اصبحت اكبر قوة عسكرية ومسيطرة على العالم لانها دولة قائمة على الديمقراطية واحترام الحريات في كل شي ،
الوكاد اني كلت هواء يوم اقترحت التصويت وصار دائم التصويت صوتين مقابل صوت كل الي كنت ناوي اسويه خربوه الشباب وانا من الناس ما احب اصير حقنه او عومه في السفر قلت الله يعيني عليكم
قلت اليوم خلونا نروح حمام مغربي ومساج يمدحون السبا الي عند المارينا وفعلاً رحنا عندهم وكان عندهم عرض حليو حمام مغربي ومساج ساعة 650 درهم طبعاً عندهم صالة كبيرة فيه 3 جاكوزي بس المصيبة الي ناوي يروحون لهم لا ينسى ياخذ معه شورت او بوكسر لانهم بيعطونك حاجه مادري وش اقولكم شي يضحك ذكرني بشرق اسيا بالضبط
بالعربي بيعطونك بكيني تلبسه تخيل نفسك تمشي قدام الناس كذا ، فكنا الله وكنا جايبين معنا لاننا شفنا ناس وقمنا نضحك ونشاهق حتى هم يضحكون على انفسهم ،
تنظفنا واسترخينا وسرقنا الوقت ومرينا على مطعم قلعة المؤيد وناخذ ذيك الكبسه مع اللحيمه الي يحبها قلبكم وريحنا وتقهوينا وعلى الفندق من الفندق لمخيتو من مخيتو لشهرزاد صحارى :( وانتهى اليوم الثاني
كنا حاجزين في اماديل 4 ايام وكانت الاربع ايام نفس الشي تقريباً .
صوتين مقابل صوت لا بارك الله في الديمقراطية استاهل
الجزء القادم السفر لمراكش وسالفة خويي الي لزم على ضيفه الا يسافر معنا بالسياره