عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب


راحلتي الاولى الى اغادير من تاريخ 23 اغسطس الى 3 سبتمبر

إضافة رد
مزعوط كلاس
مزعوط نشيط
المشاركات: 107
تاريخ التسجيل: Sep 2014
مزعوط كلاس غير متواجد حالياً  
قديم 2014-09-20, 08:48 AM
  المشاركه #1
راحلتي الاولى الى اغادير من تاريخ 23 اغسطس الى 3 سبتمبر

السلام عليكم ورحمة الله وبركاتة
اسعد الله صباحكم بكل خير



اول شي ابي ابداء فيه هو اهم شي وكان حمل كبير على عاتقي اني اوصله لكم هو الشكر الجزيل لكل شخص في هذا المنتدى المميز انا شخصيا توني اسجل في المنتدى بس كنت من المتابعين بأستمرارله واستفدت اشياااء كثيره مو اشياء استفدت من كل شي في سفرتي من نصائحكم وتوجيهاتكم وعلى راس القائمه اخي وحبيبي مخيطو << ترى مايعرفني بس انا استفدت منه كثير وتابعت جميع مشاركاته
طبعاُ من غير قصور بالباقين والشكر موصول للجميع ......

ثاني شي

كان نفسي ادعم التقرير بصور لكن حاولت ارفع الصور مو راضيه تنرفع بس مو مشكله اذا ضبطت معي مره ثانيه راح اتزلها بالردود مع التعليق عليها.. <<< ترى عنده صور خوقاقيه ههههههه


انا اول مره اكتب احداث سفره لي فتحملوني



فكرت السفره كانت بعد مشاورات مع واحد من اخوياي وطلعنا بنتيجه انه راح نسافر واتفقنا على كل شي المده والميزانيه وكل شي
وكانت الفكره مدة 15 يوم مقسمه 5 ايام في اغادير و 10 ايام في مراكش طبعاُ هذا الكلام قبل موعد السفر ب شهرين
بديت ادخل المنتدى مع اني ادخل للمنتدى من قبل افكر اسافر كنت استمتع بالتقارير واخذ فكره شامله عن المغرب لاني بجد حبيتها قبل اروح لها
وسويت برنامج حلو لمدة 15 يوم لشخصين ورتبت كل شي
وطبعاً قدمة اجازتي من العمل وجات الموافقه وكل الامور طيبه وكلمت صاحبنا قلت يالله ياصديقي خلنا نحجز << طبعاً اكلمه جوال
قال اوكي بشوف الامور << مع ان صوته ماعجبني حسيت فيه تردد ... وكان باقي على موعد السفر شهر

<< عاد خويكم ذيب السفره في راسه لو يروح لحاله ماعنده مشكله هههههه هذي امغرب محد يلومني
بديت ادخل المنتدى وادور برنامج للوحداني ههههههه << يجهز الدواء قبل الضربه ههههه

وانا كان عندي احساس انه ماراح يروح بس قلت يمكن احساس غلط وعلى فكره هو اللي مفاتحني بموضوع السفر للمغرب الموضوع في راسي من قبله بس فاتحني قلت اوكي
المهم كلمته بعدها بأسبوع وقلت هاه ياصاحبي التذاكر بدت ترتفع واغسطس ماينمزح معه << قالي انا عندي ضروف شوي وان شاءالله عطني وقت ونحجز مع بعض قلت اوكي

اتضحت الصوره عندي واطير لمكتب الحجوزات واطق تذكرت الطياره على طيران الاتحاد كلفتني 4000 ريال واطلع من عندهم
واطير للمؤيد واحجز في صحارى من 23 اغسطس الى 2 سبتمبر<< وكانت هنا اكبر غلطه غلطتها في سفرتي وكانت هي الغلطه الوحيده اني سكنت في صحارى افشل فندق شفته في حياتي راح اتكلم عنه بالتفصيل الممل في الجايات << هذي النقطه اللي ماستفدتها من مخيطو لاني ماسمعت الكلام استاهل

طبعاُ هنا ايقنت اني وحداني لان باقي اخوياي كلهم خذو اجازاتهم ولا يقدرون يقدمون مره ثانيه,,

ابي اتكلم لكم عن خط السير حجزت تاريخ 21 اغسطس وكان الى ابوظبي وترانزيت 7 ساعات وبعدين الى كازا
انا بدال ترانزيت 7 ساعات خليته يوم يعني وصلت الساعه 6 ونص الى ابو ظبي ورحلتي لكازا الساعه 2 الفجر اليوم الثني تاريخ 22

طلعت من مطار ابو ظبي وكان مطار مميز من جميع النواحي وكنت حاجز في فندق ريدسون بلو فندق اعجبني صراحه نظافته وتعامل الطاقم فيه كان قمه في الاحترام

وصلت الفندق ونزلت اغراضي ونزلت في اللوبي كنت مررررره عطشان ولقيت الدلال مصفوفه قدامي كان ودي انسدح بينهم ههههههههه
<< لحد يلومه عطشااااان وراسه مصدع يبي قهوه من زماااااان ماتقهوى
المهم تقهويت وكان فيه واحد اماراتي قمة في الاحترام سمعني اسأل اللي يقدم القهوه والشاهي طريق الكورنيش قريب ولا بعيد ؟؟
لان كنت مواصل ولا فيني من راح ورجع وضرب مشاوير

سالني الاماراتي قال تفضل اخوي انا افيدك باللي تبي قلت مشكور وماتقصر انتو اهل خير وانتو اهل مضياف ولا هي غريبه عليكم << عطيته من الكلام الطيب لانه يستاهل والله

وحلف علي انه يحاسب عني حساب القهوه وعصبت عليه ورفضت بشده قلت والله ماتحاسب قال انت ضيف علينا قلت والله لو اني وش اكون ماراح تحاسب وكلمه مني وكلمه منه وارتفع صوتنا وهداه الله ووافق انه مايحاسب

قال طيب اذا رفضت اني احاسب والله ماترفض انك تخاويني بالسياره امشيك على ابوظبي << وانا بيني وبينكم ودي قلت تم تم تم مع هزت راااس
ههههههههههههه

طلعنا وتمشينى على الكورنيش واخذنا فره طويله في انحاء ابو ظبي ومرينا فندق عندهم قهوه وكملنا قهوتنا وتساحبنا اطراف الحديث عن الوضع الخليجي والوضع المادي الدولي وتحدثنا عن المغرب الحبيب وجلست امدح في المغرب وانا ماعمري شفتها << مزعوط من قبل مايروح هههههههههه

وكانت الساعه 5 فجراً رجعني الرجال الفندق ماقصر والله وكان يوم جميل << ماصدقت اوصل الفندق ونووووووومه الى الساعه 3 العصر
قمت وخذيت شور وصحصحت واجمع اغراضي بسوي تشيك اوت لاني اخذت الفندق يوم واحد بس نزلت اغراضي وحطيتها عند مسؤول الشنط قلت خلها عندك وبجي اخذها منكم الساعه 10 ونص بالليل لان الحضور للمطار الساعه 11 قال ابشر على خشمي قلت عليه الشحم << ترى يمزح ههههه المهم الرجال وافق وعطاني كرت عشان يعرفون شناطي

وكان عندي وقت طويل الى الساعه 10 ونص المهم مابي اطول عليكم رحت فراري وبعدها ووتر ولد وسارت الساعه 6 المغرب
ورحت للفندق حق امس حق خوينا << اعجبه الفندق هههه وجلست اتقهوى فيه الين الساعه 9 ونص ورجعت اخذ شنطتي وعلى المطار طياااااره طيااااره

وادخل المطار الساعه 11 واسوي اجرائاتي من جوازات وتفتيش واخلص وعلى السوق الحره ولقيت محل قهوه واكمل قهوتي واتقهوى واتقهوى
الين قرب موعد فتح البوابه وانا كنت حاط عيني على محل ابي اشتري من عنده دلال لانها تلمع وتلق اطيب من دلال السيف اللي عند اهل المغرب << حسب النصائح اللي جاته

والله غامرت وخذيت لي خمس دلال حطوها لي 3 في شنطه وثنتين في شطنه لحالها يعني سار معي اربع شناط << عفش مطلقه مو واحد بيسافر هههههههههه
ثنتين في الشحن وثنتين معي في الطياره واطير للبوابه << اخر واحد دخل للطياره ههههه دخلت جو مع التقضي واخضر احمر اصفر هههههه
وخذيت بعد 3 كروز << هالنقطه ذكرتها للي يبي يسأل كم اخذ معي .... عادي ترى الامور طيبه خذ اللي تبي

دخلت الطياره وانا كلي شوق وكلي لهفه اشوف هالمغرب اللي جنني وانا مارحت له كنت متعطش للحظة الوصول
وكانت الطياره عامره بالمغاربه كني بالمغرب ولاحظت اعمارهم صغيره واكثرهم لحالهم << ابو الشباب قلبها صيد بالطياره
طبعاً انا كنت مرهق واحط راسي ونوووووومه الين باقي ساعه على الوصول واقوم واروح اغسل وجهي واصحصح
وجابو لنا الفطور وافطر واعين من الله خير << كان الوضع ناقصه زقاره بس مااااش ممنوع
والتفت يسار الا هذاك الطير اللي يضحك لي << انا شكيت في نفسي قلت ياولد لا تستعجل ماتبيك يمكن وانا نايم جلست اشاخر هههههههه
بس مو عوايدي واجلس افكر واطالعها مره ثانيه وتضحك وانا وجهي فيه علامات تعجب وش السالفه ههههه

المهم اعلنو بالهبوط وانا كرسيي مكانه كويس في المقدمه بعد الدرجه الاولى يعني اقدر اتمدد بس عيبه انه في النص يوم اعلنو الهبوط ودي انط عند الشباك اتفرج على كازا بس ماحصلت لي هالفرصه الثمينه

الحين نبداء بالجد والف قصه وقصه مع اجمل واحلى والطف واطيب دوله على وجه الارض

نزلت من الطياره طبعاً جاي من ابو ظبي رطوووووبه وحرررر اول ماطلعت من باب الطياره وتجيني ذيك نسمة الهواء اللي ترد الروح واستنشق بكل ما اوتيت من قوه ولا ودي اسوي زفير من جمال نسماتها كان جو فيه بروده خفيفه << تصدقون جوهم فيه عطر والله فيه ريحه حلوه ياناس مدري انا واقف جمب وحده هو العطر منها ولا من الجو والله مدري بس ريحه حلوووووه اااااااااه بس ودي ارجع استنشقه

ركبنا الباص اللي يودينا للمطار وجلست قدامي وحده << تخبرون خويكم ملقوف .. قلت لها جوكم حلو كثيير قالت مو بس جونا قالت كل شي عندنا مزيان

المهم وصلنا نقطة الجوازات وخويتنا ذيك اللي بالطياره اللي تضحك كانت تمشي قدامي وتلتفت علي وتتبسم قلت في نفسي ياليل حتى هنا معي ههههههههههه
انا عرفت قصدها بس سويت نفسي ابله وكملت طريقي وصكتني بنضرت استحقار قلت بسيطه اكبر وانسى

المهم صفيت بالدور وكان مررررررره زحمه واخيرا جاء دوري واتقدم للكاونتر بكل ثقه ودلالي اجرها معي ههههههههههه
واعطيه الجواز مع الورقه اللي كتبت معلوماتي فيها وكنت كاتبها بالعربي جلس يقلب الجواز يمين يسار يطالعني وانا معطيه الابتسامه الصفراء
قال اول شي طريقة كتابت المعلومات خطاء واقرب راسي للشباك قلت ليه قال ماكتبتها بالانجليزي قلت انا عربي وماعرف انجليزي
قال طيب انت من السعوديه مافيه اكراميه انا تعبت وانا اكتبها لك بالانجليزي
قلت والله مشكور على تعبك معي واسف اني تعبتك لكن مامعي شي وماصرفت فلوس
قال خلاص سير سير
قلت شكرا << والنحشه

واتعداء الجوازات واطيح في نقطه ثانيه مدري وش هي بس يوقفون اللي يبون ويمشون اللي يبون
قال عطني جوازك واعطيه الجواز قال اوووه سعودي وينادي ثنين من اخويايه << قلت ياليل هذي السوالف اللي يحذرون منها في المنتدى وش اسوي انا معي دلال
قرب مني واحد مررره لزق فيني ويأشر بيده يالله طلع فلوس طلع فلووس بحده بالصوت << انا انصدمت قلت في نفسي لا لا مو لهدرجه عاد
قلت مامعي فلوس وماصرفت
قال عادي عطني سعودي اي شي عندك هاته
قلت << وارفع صوتي شوي قلت مامعي فلوس ياخي
قال هذا انتو يالسعوديين بخيلين سير سير << صراحه سد نفسي

<< قلت في نفسي يارجال لجل عين تكرم مدينه الامور طيبه وهذا شي بسيط عادي لا تتضايق عشان هالاشكال
والله وترجع الابتسامه واكمل طريقي

وكان همي هالشناط اللي معي وش بسوي فيها

وانزل مع الدرج ويقابلني طير شلوى قال اشيل شناطك قلت شلها جعل عيني ماتبكيك واحنا متجهين نستلم باقي الشناط
قال هالشنطه شكلها معروف
قلت هااااه طيب وش رايك وش نسوي
قال معليك عندي وانا ابو هندي
قلت بيض الله وجهك وحلاوتك عندي انت اللي تستاهلها موب اللي فوق
وناخذ شناطنا االباقيه ويحملها معه
قال انت خلك بعيد عني وانا بطلع لك الشناط
قلت اوكي << وانا امشي قدامه وعيني عليه من بعيد ويمر من عند الجمارك وعطاهم ابتسامه معناتها وخر عني والله هذا اللي فهمته
ويطلع لي الشناط زي السلام عليكم
قال هاه وش رايك فيني قلت والله انك مطنوخ وذيبان
قال ها وين بتروح وش بتسوي قلت والله مدري ابي ادخن واروح ادخن واعين خير وهو يطرد اللي يجون حولي

بقولكم نقطه تبين لكم بعض الامور .......

طبعاً برنامجي خليته كله اغادير من 23 اغسطس الى 2 سبتمبر واخر يوم برجع كازا عشان الطياره
ولا لقيت اي رحله داخليه الى اغادير وكنت ناوي استاجر سياره بس اكتشفت يوم وصلت اني ماجبت الرخصه << كانت خيره اني ماجبتها لاني ماعرف بالديره شي ومايصلح اني اسوق فيها

بعد مادخلنت التفت على حق الشناط قلت وش الحل ابي اغادير ..؟؟
قال مالك الا القطار هو افضل شي و أأمن لك
قلت شورك وهدايت الله توكلنا على الله

ونروح للقطار ونبي حجز قالو فيه من كازا الى انوازيس نقطة تحول وبعدين الى مراكش وبسس ودبر نفسك كل شي فل
قلت ياليل والله اللي تبهذلت

واجلس افكر بعمق واخذ نفس عمييييييق واسترجع انفاسي

قلت اقول احجز يلعن ابو الفقر والمعاش الردي جيب تذكره

ويروح معي طير شلوى الين ركب شناطي في القطار درجة اولى وكان سعرها 200 درهم

ويطالعني طير شلوى ويعطيني ابتسامه معناها اكرمني << قلت والله انك تستاهل

واعطيه 300 درهم وتشكر مني
وقال احنا بالخدمه وبيض الله وجهك
قلت لاشك في ذالك الله يستر عليك

وتبهذلت شوي بالقطار والمحطات الين وصلت مراكش بحمد الله ورعايته
وانزل للمحطه وانا افكر وش اسوي وش اسوي وش اسوي

وطلعت من بوابة المحطه وجاني الف واحد طاكسي طاكسي طاكسي
وراجع للمحطه واخليهم << رفعو ضغطي معد ادري انا بيد مين ههههههههه

واطلع مع بوابه ثانيه فيها عسكر واقفين وكانت فااااااضيه مافيها احد واطلع للشارع واقبل واحد لحاله قال تبي تكسي قلت اي والله ابي اغادير
قال نوديك اغادير ليش لا
قلت بيض الله وجهك هههههههه
قال 1400 درهم
قلت لا خلاص مابي اروح بجلس في مراكش ههههههه
قال لا والله السعر ماعجبك؟؟
قلت ايه اكيد ماعجبني وش هالسعر نااااار قلت مامعي الا 900 تبيها حياك الله
قال 1000 وتوكلنا على الله
قلت تم مشينا
والله ويوديني على مرسدس نضيف وكويس بس عيبه مافيه مكيف ومراكش حررررر كانت الساعه 2 ونص الظهر

صح انا تبهذلت بخط السير الى اغادير بس كانت حلووووه لاني شفت المغرب وشفت القرى وشفت مناطق كثيره وشفت العشش حقتهم وشفت جبالها اللي وهو صيف عندهم الا انها خضراء <<< يالا جمالك يالمغرب اشتقت لها ينااااااااااااااااااس

وصلنا اغادير الساعه 5 ونص وعلى المرجان ياحبيبي << رحت للمرجان بسبب غلطتي اني سكنت في صحارى لا عادت من فندق
واتقضى من المرجان اللي احتاجه خلال جلستي عندهم وسارت معي خمسه شناط ههههههههههههههههههههههههه ههه

<< عفش ثلاث مطلقات هههههههههههههههههههههههه

المهم رحنا لصحارى وانزل الاغراض وانشبو لحياتي البوديقارديه الله يسد انفسهم هم وتعاملهم وغير الاطفال اللي متناثرين عند البوابه
وادخل للاستقبال واعطيه الورقه حقى الحجز من المؤيد قالي اوكي غرفتك موجوده وبلدور الرابع دخل اغراضك

والله ودخلت اغراضي محد فتشها انا استغربت لنهم يفتشون الشباب الثانين << سيماهم في وجوههم << مع ان الشطنه نكبه واضحه ههههههههههههههههههههههههه ههه

اليوم الأول

دخلت اغراضي في الغرفه واصفف ملابسي واخذ اللي يبي له كوي واغير لبس الطياره واخذ شور وماردني الا مطعم اسماعيل لاني مره مره مره مره مره كنت جوعان على فطوري في الطياره
واطلب ذيك الكبسه باللحم اللي ترد الروح صراحه اعجبتني والله خطيييييييره واقط ملابسي المغسله وخليته يكويهم مستعجل على ماتعشيت الا هي خالصه واخذهم وعلى الفندق

وافتح دله من الدلال وهااااااااااتك يالقهوه واتقهوا واتقهوا << مع اني تعباااااااان بس سرت نشيط مابي يروح علي هاليوم لازم احلل ابوه
يوم كيفت راسي على الساعه 9 وانزل ابي استكشف الفندق ومرفقاته وانزل الا الشباب باللوبي جالسين اكثرهم وشلونج وش اخبارج
مع احترامي لهم ماعجبوني ماجلست حولهم طلعت برى الا الخيمه مولعة واجلس ويرحبون فيني واتقهوا وكانت اسعارهم مرتفعه بعض الشي

وطلعت من عندهم على الساعه 10 ونص ولا ردني الا قولدن في حوش اماديل << اللي جلست ابكي اني ماسكنت فيه
ياجماعه اللي بيسكن وصاتي له اماديل << انا المره الجايه بروح وبسكن فيه ان شاء الله

جلست بقولدن وجلست اتقهوا فيه الييييييييييييييييييييييي ين الساعه 1 بالليل << طولت صح لانه عجبني جووووه وهادي ومره نااايس
بس انا من وجهت نظري قولدن يصلح وانت معك صاحبك

لاني انا جلست وتعرفت على طير هناك كان مره محترم واستقبل عزيمتي بكل صدر رحب مع انه مرتبط بس ماحب يردني
قالي انا والله جلست معك لاني ارتحت لك وكان ودي اكون معك اليوم وكل الايام الجايه << واضح انه ارتاح لي
بس يقول انو الساعه 5 الفجر بيجي صاحبه من مراكش
قلت عادي تكفي قبولك عزيمتي وانت مرتبط
وجلس معي الى الساعه 1 انا استأذنت ومشيت لاني ابي الحق على مخيطوووو لاني مشتااااااق اشوفه بس اخرني راعي قولدن
ههههههههههههه

دخلت مخيطو واعجبني جلساته الوسيعه وكان عاامر مره بالناس وانا من كثر ماتقهويت وبعد هالتعب بس ابي اتفرج معد ابي اتكلم هههههههههههههههههههههه
جلست على الكراسي اللي اول ماتدخل تكون يمين واجلس اتقهوى واتفرج على الرايح والجاي وكانت اغانيهم مره حلوووه وجديده
وجلس يوسوس فيني شوشو قال حرام تفوت اليوم من غير طير قلت اعوذ بالله منك ياشوشو خلني برتاح اليوم


وجات عيني على طير واضح انه جديد على الساحه الفنيه وتوه صغير ماشوفه يطير مثل باقي الطيور
جالس مكانه وخجلان ولا له بالمكان اللي هو فيه مثل الطفل اللي توه بيدخل اول ابتدائي يدخل المدرسه
ولا يدري وش بيشوف ولا وش بيقابل وخايف من كل شي

جاني فضول اني اجلس واسولف معه اكثر من اني اطمع انه طير معي << ولا كنت اتوقع انه بيطير معي لانه خايف من كل شي
نظراته تدل بالشي هذا وكثير يتلفت يمين ويسار تحسون ياجماعه انه خايف من شي

كان جمبه كرسي فاضي بينه وبين اللي معه بالطاوله لان صاحب الكرسي راح يرقص وكنت اتمنى ان الاغنيه ماتخلص عشان ماترجع مكانها
رحت للكبير اللي جمبه قلت ممكن اجلس معكم شوي ابي اتكلم معكم قالت تفضل اجلس جلست وعلى طول التفت للطير الي ابيه واسلم عليه واخذ اخباره << قسم بالله ياجماعه عينه في الارض ماطالع فيني
طلع موضوعه اول مره يدخل مكان مثل هذا اللي على يميني اختها وجايه زياره عندها في اغادير
وجاء الطير اللي يرقص بس طلع اخلاق سحب معه كرسي وجلس هههههه

عرضت عزيمتي بعد ما حاولتانت شوي واضحكه واطلعه من المود اللي هو فيه وبدى يضحك وقبل العزيمه بكل صدر رحب
وكانت الساعه 3 وجلسنا مع بعض الين فتحت اللمبات
واتجهنا لفندق الفقرررر ههههههههه
وكملنا سهرتنا هناك على سماعات الديجي المميزه اللي رجيت صحارى بصوتها

وكان يوم جميل مع التعب والارهاق اللي صادفته بس ياحلوووه من تعب اااااااااه بس



هذي كانت المقدمة واول يوم في اغادير الجميله
وللحديث بقية

انتظرو الاحداث القادمة الاجمل والاجمل


التعديل الأخير تم بواسطة مزعوط كلاس ; 2014-09-20 الساعة 08:54 AM
رد مع اقتباس
شموح رجل
مزعوط نشيط
المشاركات: 91
تاريخ التسجيل: Jul 2014
شموح رجل غير متواجد حالياً  
قديم 2014-09-20, 09:08 AM
  المشاركه #2
الحمد لله على سلامة الوصول ... واضح من البدايه التقرير واعرررر.

وأهم شي شنط المطلقات ههههه

ننتظر باقي الأيام .
رد مع اقتباس
 الصورة الرمزية أبوهم وأولاده
أبوهم وأولاده
مزعوط نشيط
المشاركات: 107
تاريخ التسجيل: Sep 2011
أبوهم وأولاده غير متواجد حالياً  
قديم 2014-09-20, 10:06 AM
  المشاركه #3
الله علييييييك يا وحش

انا يعجبني اللي ما يحب يروح عليه شي
رد مع اقتباس
asahar
مزعوط جديد
المشاركات: 7
تاريخ التسجيل: Sep 2014
asahar غير متواجد حالياً  
قديم 2014-09-20, 10:38 AM
  المشاركه #4
انا رحلتي بكرا لكازا من الرياض وترانزيت بابو ظبي 6 ساعات. طبعا انا جنسيتي ما تمكننني من دخول الامارات

اسال كيف المطار ؟ فيه مرافق واحصل انترنت .. الخ؟

والطيارة كبيرة ولا وسط

التعديل الأخير تم بواسطة asahar ; 2014-09-20 الساعة 10:43 AM
رد مع اقتباس
 الصورة الرمزية عين دار
عين دار

راحلتي الاولى الى اغادير من تاريخ 23 اغسطس الى 3 سبتمبر

المشاركات: 5,298
تاريخ التسجيل: Jul 2014
عين دار غير متواجد حالياً  
قديم 2014-09-20, 10:57 AM
  المشاركه #5
ههههههههههههههه الله يسعدك والله اقراء التقرير واضحك بصوت عالي واللي بالمقهئ يناظرون فيني يقولون مو صاحي
رد مع اقتباس
 الصورة الرمزية سمو المشاعر
سمو المشاعر
مزعوط فضي
المشاركات: 842
تاريخ التسجيل: Mar 2013
سمو المشاعر غير متواجد حالياً  
قديم 2014-09-20, 12:28 PM
  المشاركه #6
وااااااااااااااصل يابطل

واطربنا يا مجنون

لباك ولبى مندوبك ولبى كل شي
رد مع اقتباس
مازال مازال
موقوف
المشاركات: 460
تاريخ التسجيل: Apr 2014
مازال مازال غير متواجد حالياً  
قديم 2014-09-20, 01:08 PM
  المشاركه #7
يخرب بيتك على الشرح الواضح ،،، بس ماقلت لي كم ليلة سهرت في قولدن لاني بسالك عن واحد !!


،،،
رد مع اقتباس
اهلا 1984
مزعوط مميز
المشاركات: 489
تاريخ التسجيل: Aug 2012
اهلا 1984 غير متواجد حالياً  
قديم 2014-09-21, 12:06 AM
  المشاركه #8
الحمدلله على السلامة

تقرير جميل ورائع

اتمنى كتابة اسعار السكن وغيرة

متابع بقووووة
رد مع اقتباس
 الصورة الرمزية احاسيس
احاسيس
مزعوط قدير
المشاركات: 205
تاريخ التسجيل: Jul 2014
احاسيس غير متواجد حالياً  
قديم 2014-09-21, 02:36 AM
  المشاركه #9
تقرير جميل حللت ام اليوم واصل يابطل .


​.. ♥̶̲̲̲‹ وسيع خااااطر ومعطي الدنيا ظهري � ‹☺›
رد مع اقتباس
 الصورة الرمزية خالد المسلم
خالد المسلم

راحلتي الاولى الى اغادير من تاريخ 23 اغسطس الى 3 سبتمبر

المشاركات: 2,086
تاريخ التسجيل: Nov 2011
خالد المسلم غير متواجد حالياً  
قديم 2014-09-21, 05:14 AM
  المشاركه #10
تقرير واعر بالزاف :)
وحمدلله على السلامه خويا
واصل متابعين احداثك :)
__________________
G I N
! ! . . . ♥ . . . ! !
رد مع اقتباس
إضافة رد

الكلمات الدلالية (Tags)
اغادير


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

الانتقال السريع

المواضيع المتشابهه للموضوع: راحلتي الاولى الى اغادير من تاريخ 23 اغسطس الى 3 سبتمبر
الموضوع آخر مشاركة
اغادير في سبتمبر 2016-10-29 09:59 PM
مسافر في 2 اغسطس والعودة 9 اغسطس ابغى نصائحكم وارائكم لا هنتوووو ،،، 2016-08-01 10:02 AM
مسافر المغرب من بيخاويني تاريخ 13 اغسطس 2015-08-17 09:09 AM
تاريخ ١٢ اغسطس 2014-09-02 02:09 PM


الساعة الآن 11:07 AM