عزة النفس

صديت عن رقمك وانا ودي ارد

وجرحك منعني عن قبول اتصالك

ياللي لعبت الصد بلعب معك صد

هذى ترى في داخلي مابغالك

عقب الجفا والصد مني تبي ود

الظاهر ان عاشقك قاطع وصالك


داري عقب صدتك بتعود وترد

وماهوب انا اللي لابغيته صفالك


تبغيني ابني قصرك اللي بي انهد

اشره علي ان عاد قلبي بنالك

العين ماتشفع ولا يشفع الخد

ولاعاد ابي غنجك ولا ابغي دلالك

شوف النجوم العالي وابتدي عد

عديتها يوم انه غيب هلالك

هذي حروفي جات في محمل الجد

انتاج هاجس من قبل قد عنالك

وصديت عن رقمك وانا ودي ارد

والحين كني مانظرت اتصالك