ياشباب نبي قصايد

هههههه طيب ..نقول بسم الله:


ياعل قلب ما شكا الحب والتاع
تنهار من فوقه محاني ضلوعه
يا ما نهيت القلب لا شك ما طاع
ما طاع يد له والليالي تلوعه
أثر المولّع دمعته تجرح القاع
وإلى ذكر ما فات هلّت دموعه
يفز قلبي تالي الليل مرتاع
أخاف تبعد عن ربوعي ربوعه
الموت كان العرف عقب البطا ضاع
والمنتحى يا سعود صعبٍ رجوعه
في غير شوف العين ما نيب طمّاع
حقّه علي أمشي بدرب المطوعه
أبو عيونٍ رمشها سود ووساع
في ذبحها العاشق فتون وبتوعه

تستاهل قصايد
تعبت اسامح واساير خاطر العالم
و العالم اقدامهم لـ البــعد متجهه
حتى اللي اغليه كان بغيبته ظالم
راح يتغلى وخليته على ‫#‏وجهه‬♡

__________________
..........لا تخلط بين شخصيتي و اسلوبي
ف شخصيتي هي انا.....
واسلوبي معتمد عليك..........

ابو صلاح صح لسانك

صح لسانك ياسلطان

يقول من نفسه جزوعه كل ماهب الشمال
الله يفرجها اليامن ضاقت فجوج(ن) وساع
كل ماضاقت على اللي يرتكي لأم الثقال
يدري ان الله عوينه وان ذا الدنيا.. متاع
يامل قلب يفوح كنه بن في وسط الدلال
على زمان يطرح الرجال في وسط النزاع
لاتعديت الهشاش اقتادني جرف(ن) هيال
ولاتعديت ...المدينه..... ماتعديت الظياع
في وجه أبوك انا دخيلك يا مقابيل اليال
جنبيني من صدوفك .....والخيانه والخداع
أقدر أكون الداهيه وارضي مفاهيم الخيال
بس المصيبه كيف؟ ابرضي من شرب دمي وجاع
المعضله في ذا الزمن أنك تحاشى لك سؤال
اجابته ماهي ترد الصاع لك مثله.. بصاع
وياللي تنششد عن علومي هاك حالي في مثال
وانت ياوقت الغضب أحسن الي الاستماع
كن حالي حال عودن مارزقه الله.. عيال
ضاق من لوع الطمان وهو عشيق الارتفاع
كن كبده فيها صالي(ن) يزيد.. الاشتعال
الى ذكر بأن المعزه للرجال الاجتماع
أبوي يقول الدله اللي نص واردها.. حثال
ماتطول وجيه عطران الشوارب والشجاع
وانا أقول ان الجبال النايفه تبقى جبال
وان صرت ذيب (ن) ماتوطتك الثعاله والسباع
واحده تغنيك غير الماكل اللي من حلال
قبل تقول للدنيا ..... ........ ....
..وداع
وثنتين ماتوخذ بقوه لا ولا تشرى. بمال
العافيه والموت يوم (ن) غيرها يشرى ويباع
والثلاث اللي ترد الطيب عن وجيه الرجال
الفقر والدين ومرافق خبيثين .. الطباع
وانا أحمد الله مالي مع هل الشينه مجال
دامني من صلب شيخ (ن) مايطيع الا يطاع
من تقرب لي شبر جيته قبل يزهم تعال
ومن تجنبني شبر جنبت انا عشرين باع.

__________________
لاتسمع كل ما يقال ولا تقول كل ما تسمع.

‏إحذر تخاوي منهو بالوجه رجّال
خاو الذي لا طحت تفـداك عينه

السيف وهو السيف أنواع و أشكال
سيفٍ شطير وسيف بالبيت زِينه

يا سعود العلي عذبني ملهوف الحشي هههههههههههههههههه

يقول الشاعر : طايل الذويبي

من لاحسب قبل النسب معدن الخال
لاينشـد المولـود مـن ويـن عيبـه

قصيدة كل بيت فيها يساوي قصيدة لحالها ،،،

يا العبد لو ميزت فـي كـل الاحـوال
عرفـت ويـن المخطيـه والمصيبـه

وعطيـت وافي الحـق قـدام ينقـال
مخطي وتصبـح بيـن شـكٍ وريبـه

الحق ما يَزعَـل مِنـه غيـر الانـذال
أهل الردى واهل الوجيه الغضيبـه

دام السريره صافيـه فانـت رجـال
وليـا دخلهـا غـش والله مصيـبـه

الحر لو ماحـط لـه بشـت وعقـال
يكفيـه بيـن النـاس فعلـه وطيبـه

وراعي الردى لو باجمل اللبس يختـال
تلقى الـردى مابيـن كمـه وجيبـه

ومن لاكسب كلمة نِعم بيـن الاجيـال
يكسب بدلهـا ياهـل العِـرف خيبـه

ومن لا شرب لمواجه الوقت فنجـال
يقضي العمر بيـن الطمـان وشعيبـه

ومن لاتحدى في الزمن بحرالأهوال
اللـول والمرجـان ما هـو نصيـبـه

من لاحسب قبل النسب معدن الخال
لا ينشـد المولـود مـن ويـن عيبـه

ومن لادفع في ما قف الربـع مثقـال
لا ينتظـر تعطيـه ربـعـه زبيـبـه

ومن لاطلب للمشكلـه نـاس عقـال
يجيـه مـن عميـان اﻻريـا كتيبـه

ومن لاحفظ سَمْعه عن القيل والقـال
تلقـى ورم مخـه نميمـه وغيـبـه

ومن داس عرض الناس لوكان بالمال
من عرضه المصيون دفع الضريبـه

ومن لاحسبها صح في عمر الاقبـال
ماهـو بحاسبهـا ليـا صار شيـبـه

سمعـت ما قالـوه قبلـي بالامـثـال
من لا كسـب كلمـة نِعـم وش تبيبـه

جنب عـن الرديـان وكبـار الأزوال
وتلقى من اهل الخير من تعتزي بـه

هذي نصيحه كان ما اعطيتهـا بـال
اتضيـع بيـن المخطيـه والمصيبـه

ودك تشوف الذل.في صورته صح ؟
شف دمعة الفرقا..على خد رجال

ولاتشوف الذل في صوره أوضح ؟
شف بسمة المقتول. في وجه قتال

__________________
مشتاق للمغرب ولي قلب حساس