زيارتي للمغرب ومراكش والتي بسببها عشقت المغرب

مجنون صاحي · 2016-07-05T02:06:56+00:00

بسم الله الرحمن الرحيم قبل البدء في التقرير او تجربتي للمغرب أحب أذكر معلومات بسيطه : 1/ هذه أول سفريه لي خارج حدود المملكة . 2/ التقرير كتبته في المغرب لحظه بلحظه لدرجة وانا وسط الفله تحصلني أكتب ومحتفظ بتقرير من وقتها. 3/ القصد من كتابته لذكرئ وللفائدة اذا رجعت مرة أخرى ما كان في بالي إني أطرحه أبد ولكن مع ازدياد شوقي للمغرب وبعد تردد حبيت أشاركم بهذا التقرير البسيط جدا . 4/ تم بعض التعديل عالتقرير وحذف أشياء خاصة كتبتها سابقا ، لأني عند الكتابة ماكنت أحسب حساب النشر . 5/ لا أحب التصنع وسأكتب بكل أريحيه . 6 / أرحب بالنقد . ---------------------------- ( ماقبل تحديد الوجهه ) في البداية أنا شخص ما عمري تعديت حدود السعودية ماغير أفرفر في أرض بلادي الواسعة من شرقها لغربها وجنوبها لشمالها ( بسألك من فين أنت أبسألك من فين أنت قال من أهل الجنوب ) اللي قرأ ولحن يسعدلي جوك . بعد ماتوظفت قلت هذه فرصتي لسفر وحددت كذا دوله بس مالقيت أحد يعززلي ( سوريا - مصر - إندونيسيا ) بأستثناء الدول التي هي مازالت أمنية للأسترخاء في سحرها وطبيعتها ( النمسا - إيطاليا - برلين ) المهم كنت أفر رأس الشباب بين فترة وأخرى على السفريه بس مدري ايش جوهم القهر أغلبهم مدنيين يعني ويكند أقدر أحط رحالي في شرم الشيخ ومحدثكم عسكري ولله الحمد ( الله الأول وعزك يالوطن ثاني .. لأهل الجزيرة سلام وللملك طاعة ) بعد محاولات وعدة غزوات عقلية وفكرية مني لأخوياني اتفقنا نسافر إندونيسيا إلى قبل السفر بشهر سألتهم من باب معنويه كنسلوا اللي قرر يتزوج والثاني خطب ويجهز لزواج بعدها قلت لا أبوكم لا أبو من يحتريكم أصلا راح عمري وأنا أنتظر تعزيز على كذا ماراح أسافر اهااا هنت وصلنى لطارئ المغرب وبداية الذكريات للأمانة المغرب ما طرت على بالي بالرغم من معرفتي التامة بالجمال والشئ اللي يطيح الصقر ويجيبه على وجهه وتعرفت على شخص بالدوام مقطع المغرب ودائم يسولف بس ماهز شئ فيني لان كل سوالفه ملهى مرقص فله مرقص ملهى بار عصير مدري شنو وهذا مو جوي نهائيا " ليش تسافر اذا ماتتمشى ولا تطلع ولا تتعرف عالبلد " ماعلينا وقتها كان باقي عالم الشات والدردشات ما أنقرضت وبما إني مدمن شات ومنتديات تعرفت على فتاة مغربيه( واي فتاة يا ناس تعجز الحروف عن وصفها مزمزيه) كان نتواصل عن طريق السكايبي البنت يبيلها موضوع ثاني قمة الأخلاق والأدب عايشه بالريف بس تروح فترة كازا عند أخواتها متزوجات ومقيمات هناك تدور شغل ومره تدرس بس علشان تتوظف لان وضعهم صعب ولا تحب تطلب بتعب لو وصفتها للأمانة إنسانه نااادرة وتأكد وعرفتها لمن صار بينا عيش وملح. مع كثرة التواصل صار فيه تعود على الطرف الآخر وتعرفت على عائلتها صرت أعرف كل شئ حتى أخواتها المتزوجات طبعا من باب صداقة ومحبة من طرف للأخر كانت تقولي ماتزور المغرب ولا لك نية قلت : ديرة مافيه شئ لا طبيعة ولا أماكن تزورها ( صدمتها ) وأنا وقتها من جد أتكلم ماعرف شئ عن المغرب تفكيري للدول اللي ذكرتها أول قالت: حرام عليك وتوريني صور وتعطيني أسماء أماكن او مدن وتقولي أبحث عنها بصراحة أنهبلت معقولة في المغرب كذا وفيها هالأماكن الساحرة خاصة ( أوريكا و شلالات أوزود ) قلت لازم أزورها وخويئ اللي مقطع المغرب سوالفه طيور وسهر وعصير فقط . هنا بدت الفكرة تتسلل لأعماق رأسي وبعد شهور من تواصلنى وصرنا أكثر من أصدقاء وقوة المعرفة اللي بينا قررت أسافر كان أبي معزز ( إن وجد ) او ماتوقف مسافر مسافر قلتلها قالت حياك المغرب كلها تحت أمرك وكانت تقولي حاول تجئ مع أصحابك ، أستغربت ليش قالت أخاف تجئ بلحالك وتطفش وتقول المغرب مو حلوه ولا تزورها مره ثانيه برغم إنك ضيف عندي من المطار لين ترجع المطار مره ثانية ( هلاااا بالعيال ) طبعا قررت وحددت السفر وكنت من زمان مسدد المخالفات بس منتظر اي سفره وأطلع جواز احسن من أطلعه وينرمي بالدرج وسويت برنامج لي الله يخلي قوقل وصار فلم لمن فتحت الموضوع مع الوالد والوالدة الله يحفظهم طبعا ماودي اوجع رأسكم بكل الأساليب وما أملك من طرق وغزو فكري وجعل نقطة الصعف قوة والقوة سلاح الزبدة صرت دكتور قدرت أقنعهم وأطلع بكلمة ( روح الله يستر عليك ) لاني ماتعودت أكذب على أهلي خاصة لمن بطلع خارج الرياض لازم أعلمهم كيف وانا بطلع خارج المملكة هوووبا على مكتب الحجز حجزت بعدها بأسبوع رحلتي. -------------- -------------- --------------- ( رحلتي للمغرب ) أول يوم فاتتني الرحلة برغم إني جاهز من بدري بس فيني برود أحيانا يجيبني وراء وبحكم إني غشيم في الرحلات الدولية ومتى تقفل مع العلم إن اللي حجزت من عنده خبرني بكل شئ فاتتني الرحلة لأني جيت قبل الإقلاع بساعة قالوا قفلت الرحلة رجعت البيت قبل الفجر خذيت غطه وقمت الصبح ورحت عدلت رحلتي لنفس اليوم ونفس وقت الرحله السابقة الساعة 12:50 ص على طيران الإماراتية ترانزيت دبي 5 ساعات وصلت المطار الساعة ١٠ كان زحمه المطار لأن وقته عز الإجازة الصيفيه خفت تقفل الرحله كان قدامي ٣ أشخاص يبون كازا معي واحد منهم هو الدليل حقهم في المغرب مع السوالف قلتلهم فاتتني الرحلة البارح والله يستر اليوم لا تقفل بعد سمعني اللي وراي وأنجلطوا لحظات الا الوقت يمشي وحنا تقريبا نفس المكان ويروحون للكاونتر شوي يجئ ( سوبر فايزر ) على ما أظن قال لا تخافون ماراح نقفل الرحلة لين نخلص الكل لو تتأجل الرحله وفعلا تأخرت الرحله من الساعة ١٢:٥٠ الى الساعة ١:٥٠طبعا بعد ما قصيت البوردينق تنفس الصعداء بقى الجوازات شوي زحمة وعلى واحد واحد والعسكري يختار اللي يعجبه ولا يتميلح قدام المزز ويقدمهم طبعا أنا كان حاط في بطني جح صيفي لاني قصيت البوردينق بس بدأ العسكري يعكر مزاجي بسالفه الأختيار * ولا عزاء للأجانب* ساحب عليهم مساكين حسيت إن واقفين في بست ونعرض أنفسنا سلامات " اللي مايعرف بست يصفط على جنب " شوي وقفت جنبي مزه معها ولدها صغير صراحة العين عين المها وخصرها على قوله الشاعر ابن ذيب ( خصرها يحكي لنا واقع القوم التعيس .. وردفها عن غطرسه بوش يعطينى دروس ) وملفته لنظرفي وسط الزحمه . فاصل غنائي على طارئ الزحمة ( في زحمة الناس صعبه حالتي .. فجأة أختلف لوني وضاعت خطوتي ) طبعا كان في تبادل نظرات بيني وبينها بكثره انا بصراحة املئ عيني وهي الله أعلم وش بخاطرها بس أنا عقلي في المغرب ولا أشوف أحد مالكم في الطويلة بعد ما وقفت جنبي قررت عدم النظر لها برغم إنها تناظر لسببين الأول ثقل الثاني بستقبلني هناك حوريه وبكون في ديرة هي منبع الجمال وبينما جسدي في زحمة الإنتظار عقلي يسبقني بساعات لطريقة الإستقبال في البلاد الساحرة لحظات حتى يخلص اللي عند الجوازات والعسكري يقول للمزه تقدمي هنا ابو سمره زعل وشوي ويطلع الخال اللي بداخلي وأقلبها سامري وأستنزل عليهم العسكري عرف إني دنفست ( شلون مدري ) ممكن بنظراتي اللي كلها غصب قالي تفضل لدرجة اللي قدامي توها تعطيه الجواز تعديت الجوازات ورحت عند الصالة وعالجوال أطقطق ومشغل أغنية ( مشتاق للمغرب ولي قلب حساس .. هي جنة الدنيا فيها طيب الأنفاس ) للأمانة المطاار زححمممممه حتى عند البوابات كأنك حراج سيارات يوم الجمعة * طلعنا الطائرة الساعة ١:٣٥ * تحركت الطائرة الساعة ٢:٣٥ * الإقلاع ٢:٤٥ ساعة في الطيارة مدري ايش عندهم برب السعودية --------------------------------------- هبطت الطائرة في مطار دبي ٤:١٤ ( توقيت السعودية ) و ٥:١٤ بتوقيت دبي من هنا التوقيت حق دبي طبعا أول مرة أشوف مجتمع منفتح واحد مثلي بيكون عنده خاصية النظر HD بس الثقل موجود لابد منه شوي وتشوف اللي معك بالطيارة ومسوين حشمه تتفاجأ هناك للاسف بمناظر !! المهم ياحبيبي كنت شايل هم 5 ساعات لكن لمن شفت المطار مش ممكن ياحبيبي مش ممكن ( أقراها بتعليق الشوالي ) ايش مطاعم ايش سوق ايش هجولة جت فيه الله وكيلك فريت المطار طبعا كنت في مبنى B اللي أتوقع أكبر مبنى ما أنتبهت الا باقي ساعة عالرحلة ورحت للبوابة * ركبنا باص من الصاله لطياره الساعة ٧:١٥ ص لا أحكيلك على الطيور شئ قلابي وشئ يصفق وشئ رقاصي هههههههه مشينا مسافة تقريبا خمس دقائق ووصلنا الطائرة وركبنا ٧:٢٠ * المسافة من دبي الى كازابلانكا 6068 كيلو مرورآ بي ( السعودية - الجزائر - تونس ) * مدة الرحلة ٧ ساعات و٢٤ دقيقة * اقلعت الطائرة الساعة ٨:٢٥ دقيقة كانت فل الطائرة سالفة تبي تتبطح عالمقاعد أنسئ ياحبيبي ( أقراها بلكنة أبو النار ) فيه ثنين شيبان كانوا معنا وفيه وحده جالسه جنبهم عادية بس تقول للإغراء تخسئ المهم ضحك معها وفله قلت شكلها جايه معهم لان الوضع مو وضع توهم متعرفين خطيرين الشياب عاد هي ضحكتها ما أسمعها الا في الأفلام العربية والوضع يكون +18 اتوقع عرفتوها واحد منهم من اقلعت الطائرة وهو يرفع في هاتكيلا وكل ماله يرتفع يخرب بيت العدو ما كفاك إرتفاع الطيارة شوي الا هو مستانس ويدق حنك مع المضيفات بس فله بصراحة هالشايب قبل لا نوصل قام وغير ملابسه وطق ذيك البدله هواء يا شايب منت بهين ;) * هبطت الطائرة في كازابلانكا الساعة ٣:٤١ ( توقيت دبي ) ١٢:٤١ توقيت كازابلانكا أخيرا وصلت لديرة اللي خذت عقلي قبل لا أوصلها نزلنئ من الطائرة وحنا في طريق لصالة وأنا كلي فرح وشوق كان في شخص يمشي جنبي في العقد 4 تقريبا ويتكلم بصوت عالي أخيرا وصلت المغرب مابغينى نطيت وقلت الحمد لله عالسلامة التفت ورد ما شاء الله من ربعنى قلت الله الله من وين قلت : السعودية / قال: أنا من الكويت بس خوالي سعوديين شكلك مقطع المغرب يا خالي ويضحك قلت: لا والله مثلك أول زيارة / قال: ماظنتي وطلع بكت وانا أناظر إيش بيسوي قلتلها ممنوع ترئ تلفت وقال مافيه لوحة مكتوب ممنوع التدخين قلت : مايحتاج هذا ممنوع دولي في كل مطارات العالم فيه أماكن مخصصة فقط طبعا وحنا نمشي هالكلام المهم قال: أقبها / قلت : فك نفسك صدقني ممنوع ريا غريب خلك أديب لا بعد أنت خليجي يعني يبون الزله قال: يارجال محد درئ أقبها بس شفتها صامل بس يبي تعزيز الزقارة مره في فمه واذا بيرد علي نزلها اللي حولنى يناظرون فينى زي اللي يقولون وش بيسوي هالمجنون انا شفت العالم تناظر وهو رأكب راسه وأبي الفكه منه قلتله : براحتك قبها ، ما صدق خوينى ويحط الزقارة بفمه وجنبنا أوربين بصوت واحد ( O MY GOD ) تأكد خوينئ إنه جاب العيد هههههههه نناظر قدام إلا نشوف الصالة والعسكر وباقي العالم تهذر مع بعض وهم يحشون فيه أرتبك خوينا بشكل بغيت أفطس من الضحك بس أحترمت كبر سنه قال : وش أسوي وش أسوي وين أطفيها بس بحركه وأسلوب ههههههههههه مجنون قلت أنطلها بالأرض ولا كأنك سويت شئ بعدها أبعدت عنه هو وزقارته اللي حسيت إنها قنبله وصلنئ الجوازات والأمور في السمبتيك وكل لهفة لمقابلة المزمزيه ودخول البلاد الساحرة المغرب فيه تفاصيل لازم اتعداها علشان ما أطول التقرير أكثر برغم ملحها المهم وصل الدور عندي كنت معبئ الكرت ماغير مكان الإقامة دقر عندها لازم أكتبها طبعا بأسلوب وراي خال برضه سعودي قالي ياعم أصرفلهم أي فندق وهذا اللي صار وانا أكتب تقدم الخال عطاهم الجواز والكرت معبأ أموره كويسه فتحوا الجواز الله وكيلك مافيه صفحة فاضية فففلللل أنا أنصدمت في نفسي أقول ( لا يااا خالي أذكر الله تروح أنت ) والله العظيم الموظف لف الجواز رايح جاي مافيه يا دوب لقئ صفحة فيها ختم بس يعني يجئ ختم ثاني والخال واقف وعالرايق ( يسعدلي جوك ) مشى جيت انا ختم الجواز مشيت فيه واحد ثاني واقف يدقق بالجوازات والختم فقط طبعا الخال يوم أخذ جوازه قفله يعني ضاعت الصفحة وصل عند الثاني وأنجلط الموظف وخذلك تقليب وبرضه عالرايق خالي ، شوي الموظف الأول يأشرله يعني خله يمشي تعديته دقيت على المزمزيه صديقتي اللي كان متفقين تجئ المطار وتستقبلني قالت هي فاتها القطار اللي يطلع من محطة كازا للمطار بتنتظر الثاني الساعة ٢كل ساعة قطار جلست في المطار تقريبا ساعة مع تأخر العفش وخفت انه يكون نزل في مطار دبي ولا شئ لان اللي كانوا معي من الرياض ماجاء عفشهم كنا خايفين وكل واحد يناظر الثاني طبعا أنا أستغل هالأوقات وأكتب التقرير واللي صار معي بعد ساعة جاء عفشنا اخذت الشنطة ورحت اصرف العمله ، كان قدامي اثنين ما تأخرت صرفت وودعت السعوديين اللي كانوا معي من الرياض هم قالوا بيجلسوا في كازا ثلاثة ايام بعدين مراكش سألوني تبي شئ او مساعدة قلت سلامتكم راحوا لنا تكملة ... في جزء قادم

مجنون صاحي

مزعوط قدير

المشاركات: 180

تاريخ التسجيل: May 2016

2016-07-07, 11:23 AM

المشاركه #11

اقتباس:

المشاركة الأصلية كتبت بواسطة مجنون صاحي

الأحد ٦/١٦ ميلادي

صحيت الساعة ٩ وجلست مع صديقتي العزيزه نتبادل أطراف الحديث لأني أستمتع بكل لحظة معها وبحكيها وأحب خجلها وتعويض اللحظات التي كنت أشتاق لها في بلدي
الساعة10:30 كل شخص راح يبدل وطلعنا نفطر في المحلبه ديالي بعدها رحنا المناره بس علشانه حر والظهر ما طولنا وطلعنا
أخذنا طاكسي قاصدين قصر البديع مسافة أقل من 10 دقائق (قصر البديع تاريخي وأثري بناه السلطان السعدي بعد إنتصاره في معركة ضد البرتغاليين ) المنطقة اللي فيها قصر البديع وقصر الباهية الذي بجانبه تعج بالسائحين الأوربيين تحس إنك في بطولة اليورو ونسبة قليله من أصحاب العيون الضيقه( شرق آسيا ) طبعا أنا أنبسط بها الشئ ولا زود على ذلك بما إن الجو حار شوي السائحين يطربك وتشوف شئ على قولة( الشاعر خلف بن هذال / شئ يخلي جبين الحر ينداله )
مالها دخل بس طرت على بالي

اخر شئ ذا اللي وصل
حطمت قلبي

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: زيارتي للمغرب ومراكش والتي بسببها عشقت المغرب
الموضوع	آخر مشاركة
عاونوني زيارتي لكادير ومراكش	2016-06-27 02:46 AM
زيارتي للمغرب	2016-01-11 10:52 AM
استفسار عن زيارتي للمغرب	2014-03-03 11:39 PM
عشقت المغرب عشق الهبال	2012-07-08 07:03 PM

الساعة الآن 10:10 AM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

زيارتي للمغرب ومراكش والتي بسببها عشقت المغرب

روابط سريعه