انطباعي بعد الزيارة الاولى مراكش واغادير

TAR · 2016-12-04T10:43:00+00:00

قبل كل شي احب اشكر الاخ محمود عميد مراكش من قبل الرحلة بشهر وحتى يوم المغادرة وهو يعرض خدماته ولا يردك بشي ومهما قلت عنه فماراح اعطيه حقه ونعم الاخ والصديق بالبداية كنت جازم وانا احجز للمغرب انها بتكون الاولى والاخيره وجزمت وانا اركب طيارة العودة اني سوف اعود قريبا لهذا البلد الساحر كان الوصول ظهر ١٩ نوفمبر للاسف مطار كازا لا يليق انه يكون بواب استقبال المغرب لا من تعامل الجوازات وزحمتهم ولا من تعامل الامن والجمارك ولا حتى السماسره الي مايخليك تتنفس حتى مافيه غرف التدخين لا بالوصول ولا بالعودة مالك الا الحمام الله يكرمكم و١٠ دواهم بيد الي تنظف اشياء مهمه بالمطار ١- لا تقبل ان احد يقدمك سوا تفتيش او جوازات ويقولك بدخلك بمسار لحالك لانه بالاخير يا منكح وبتعيد المسار الاول يا بيطلب منك مبلغ ومهما عطيته بيقول قليل ٢- كرت الدخول معبيه انقليزي وعربي وقالي لازم تعبي فرنسي ههههه طبعا ضحكت وقلت اكتبوا الاسأله بالفرنسي واعبيها فرنسي انتوا كاتبين عربي انقليزي ومهما تاخر عليك لا تعطيه لانه مايطلب الا من الخليجيين ٣- بتجيك عروض السماسره الي تخلي الارض بيد والقمر بيد افضل حل لهم التجاهل لان غالبيتهم كذابين ٤- تعامل امن المطار لا مع السياح ولا مع المغاربه الله يعدل الوضع وبس ٥- لاتنسى تتاكد بعد ختم الجواز ان تحت الختم رقم ورمز وهو رقم دخولك المغرب لاني تورطت وماكان موجود بجوازي غير الختم فقط واصحابي ختم وتحته رقم دخول فكان لي مرمطه بولاية الامن لمدة ٦ ساعات عشان هذا الرقم وعدت على خير كان حجزنا عن طريق صوفوي كار واعطونا جيب شيروكي جديد كموديل بس مكروف المسيكين سعرهم جيد وتعاملهم جيد ماطلبوا اي تامين او مبلغ اضافي طبعا انا من وقت الحجز شارط عليهم هذا الشي طلعنا مراكش وجلسنا ٨ ايام في منتجع جنة اطلس طريق ورزازات كان الحجز فله ٦ غرف وكان فيه غرفة زياده الفله بشكل عام جدا نظيفه الاثاث جديد والمكان وسيع وشرح فيها طباخه وشغاله ملاك ونعيمه كانوا والله مايردون طلب وبدون اصلا ماتطلب كل شي موجود ويجيك لمكانك تعامل الموظفين من امن وادارة وشغالين الكل كان يبحث عن رضاك المنتجع فيه خمس فلل ماهو كبير مره لكن مستقل وفيه خصوصيه تامه والصوت والضيوف امورك هانيه محد يكلمك او يضايقك او يطلب درهم منك نقاط مهمه بمنتجع جنة اطلس ١- فاوض ثم فاوض ثم فاوض بالسعر وهذا كلام ادارتهم ٢- المنتجع طريقه مظلم واخره ردمية لكن ممكن ماترتاح للطريق باول زياره لكن يوم واحد وتتعود ع الطريق وتحفظه ٣- المنتجع يبعد عن وسط مدينة مراكش من ١٣ الى ١٨ دقيقه بحسب الزحمه كارفور قريب منه وفيه كل ماتاحتاج ٤- لو رجعت مراكش ماراح ابحث عن منتجع غيره كان دخولنا لمراكش فيه تشاؤم بعض الشي اول ما دخلنا ممكن ٥ العصر خلال ١٠ دقايق وقفنا شرطي وساعه نتفارض معه يقول انت قاطع الاشاره و و و وبالاخير قال المخالفة ٧٠٠ درهم بس انا خفضتها لكم لين ٤٠٠ درهم وقتها ضحكت وقلت اوكي انا اسف وغلطان عطني المخالفة قال لازم تدفع الحين قلت ما معي انا الحين داخل مراكش معكم شبكة انا معي فيزا ؟ قال لا بس وش نسوي الحين قلت خليني امشي هذا الحل قال اكرمني قلت اقولك الحين واصل مامعي ماصرفت شي قال اي عطيني سعودي قلت معي تركي وكان عندي ترانزيت بتركيا ومعي ١٠ ليرات تبيها خذها قال اوكي عطيته وكاني احاسب محل وقال لالا مو قدام الناس كذا واحطها بيده ٣ دقايق ورجع قال خذها وسير اخويا ضحكت وبعدين عرفت ان الليرة اصلا ماتصرف في المغرب تحركت ١٠ متر وقفني شرطي ثاني وبدا يفتش ونفس الموال بعدها بداخلي اقول يا حليلك يامصر ويازين نظام ام الدنيا كنا ظالمينها كانت السهرات متنوعه بين الفله وبين كاش و دبليو تعليقي على W طبعا انا بحياتي ماشفت انظف وارقى من w فعلا فعلا شي خرافي من كل النواحي مشكلته الوحيده انه غالي كانت الطاولة بمكان بعيد لست سبع اشخاص من ٣٥٠٠ الى ٤٥٠٠ معها بطل وعدد من الطلبات واظن لو تجي ١٢ الظهر بتحجز قالك فل المكان كله صعب جدا تحصل طاولة بمكان مميز كاش كاش بصراحه سمعته اقوى منه وبالفيديو شي وبالواقع شي ثاني المكان مو مره كبير طاولاتهم وسط للامانه يميزه الدي جي واسعاره اقل من W طاوله ٦-٧ اشخاص من ٢٥٠٠ حتى ٣٠٠٠ معها بطل وعدد طلبات نقاط مهمه بالسهر بمراكش ١- كاسر ثم كاسر بالاسعار ٢- لاتعطي اكراميه قبل نهايه الخدمه لانك بتعطي ثم ينسحب عليك ويجيك واحد ثاني ٣- حاول تخلي خروجك من المكان قبل النهاية بربع ساعه يعني 4:45 عشان يمدي توصل قبل ما تبدا نقاط التفتيش الي يقصدون يخلونها 5 الفجر ليتصيدون الي طالعين من اماكن السهر ٤- وقت السهر من ١٢ حتى ٥ مراكش كسياحه وتمشي ومطاعم جدا جميله ومتقاربه من بعض اذا انت من حقين الدايت فانصحك توقف هناك لان من اجمل الاشياء بالمغرب سفرتهم واكلهم وطريقة تقديمهم للاكل مطعم علي بن فلاح لايمكن تطلع من مراكش الا تزوره لانه من احد اهم واجمل معالمها مطعم شعبي فيه عروض ورقص وطرب يصلح للعوائل والشباب يبدا ٨ المساء الاكل والعروض ١٠:٣٠ وتخلص ١١:٣٠ نظام الدخولية شامله العشاء ثلاث درجات ١- ٤٠٠ درهم منيو خاص وخيام عاديه ومكان لمشاهدة العرض من الجنب ٢- ٥٠٠ درهم وهو خيام مميزه ومنيو مميز ومكان لمشاهدة العرض عادي ٣- ٧٠٠ درهم منيو ملكي وخيمة ملكيه ومنصه خاصه لمشاهدة العرض طبعا اخذنا تذكرة ٧٠٠ درهم بقيمة ٥٠٠ درهم بعد المفاوضات ومثل ما قلت لاتستحون من التفاوض مع احد ابد لكن خلك مبتسم ومزوح كانت معاملتهم راقيه ومحترمه من الباب للباب وحتى الفرق الي تجي لطاولتك تغني اضحك معهم ولا انت ملزوم تعطيهم شي مطاعم المدينة القديمة كل مطعم يبدا بدار كذا وكذا كلها مميزه مكان واكل وضيوف بس المكان جدا راقي فالافضل لبس رسمي للمكان ساحة الفنا وبصراحه هي الصدمة في مراكش من البداية تدور موقف حتى تطلع منه والكل يحاول يستغلك الساحة جدا جميله وونيسه وتستمتع فيها وافضل وقت لزيارتها اخر العصر حتى العشاء فيها مطاعم وقهاوي وعصاير وعروض وناس توسع الصدر بس مايمديك تاخذ نفس الا الشحاذين ناشبين لك فخلك حريص ع جيوبك ومهما عطيت ماراح يكفيهم اذا ١٠ بيوقل ابي ٥٠ اذا ٥٠ بيقول ابي ١٠٠ وانت ماشي بالنهاية لو يجي اهتمام بالساحة من ناحية المتسولين ومشاكلهم راح تكون اجمل من ساحات اوربا قليز مكان جدا راقي شوارعه مرتبة مليان بالماركات والقهاوي والمطاعم اقرب شي له عندنا بالرياض شارع التحلية الوجيه الي تشوفها بستاربكس راح تشوفها بدبليو وكاش مراكش ونقاط مهمه فيها ١- سكان مراكش سكان جافين بتعاملهم وطريقة كلامهم وممكن تاثير البيئة عليهم مثل الفرق بين اهل الرياض والشرقية ٢- قليز - ساحة الفنا - مطعم علي بن فلاخ اماكن لاتطلع من مراكش الا شايفها شلالات اوريكا كان شتاء وامطار ونصحونا بعدم الذهاب ٣- خلك واثق من نفسك في كل تعاملاتك مع الشرطه مع المطاعم مع الكل الكل وبنفس الوقت خلك لين ومبتسم ٤- مراكش جدا مناسبه للمجموعات واستغرب من البعض يكون اكله وسهره وقهوته برا فلته رايي يكون يومك مقسم لان عندك خدم بالفله في اول يوم عب المطبخ والثلاجة ووصيهم ع خروف مقطع او اطلع جيبه انت وخل الشغاله تشوف شغلها وللامانه موادهم الغذائية ارخص من السعودية ٥- خلك حريص بكل تعاملاتك مع الكل ومثل ما قالوا المصريين ( حرص ولاتخون ) ٦- جادل وناقش الشرطة في حال توقيفك واذا كنت فعلا غلطان وانت (مقتنع بغلطك) بعض الناس يمسكونهم مثلا معه بطل مقفل وجديد ويقوله هذي مخالفه وطبعا هذا كذب المخالفة يكون مفتوح اذا انت فعلا مقتنع وانت مخطي فكلمهم انك بيومك الاول بمراكش وانك ضيف عندهم و و و بعد ماعشنا ٨ ايام بمراكش وكانت من اجمل ايام العمر توجهنا لاغادير وكان حجزنا بفندق رويال اطلس بالطريق صادنا الرادار ودفعنا ٥٠٠ درهم مخالفة واعطانا وصل بالدفع وكان في غاية الاحترام وذكر ان حنا ضيوف عندهم ولا يرغب بالمخالفة لاكن الجهاز صادنا وبيحاسب عليه وتقبلنا المخالفة بصدر رحب وذكرنا الشرطي مادمت بالطرق السياره او الطرق السريعه مثل مانسميها لابد كل الركاب يربطون حزام الامان دخلنا اغادير وكانت مليانه درك وشرطة كان وقت مباراة فيها توجهنا للفندق استقبال جميل تعامل مميز كان مليان بكل الاجناس والاطياف اعطونا غرفنا اخذنا سويت و٤ غرف السويت لان فيه صاله تكون جمعتنا فيه نقاط مهمه عن رويال اطلس ١- الفندق موقعه مميز وتحسه بقلب الكورنيش ٢- ممكن توصل للمارينا مشي وومكن توصل لصحارى ايضا مشي ٣- دخول الضيوف كان تعاملهم غريب لان كل غرفه لشخصين وساكنها شخص واحد فاخبرناهم بهذا الشي وذكروا لنا ان الحجز عن طريق بوكينق ارخص من الفندق وارخص من المؤيد ولذلك ماتشمله الدخوليه او بمسمى فتح غرفه وكانت ٤٠٠ درهم طبعا وقتها ما اعجبني الكلام وكلمت الصباح ادارة الفندق واصريت اني الغي الحجز واحجز عن طريقهم بدون فرق السعر ووافقوا ٤- وقت الدخول كان من ١١ حتى ٦ الصبح وكانوا يتغاضون بعض الشي عن الاوقات الثانيه ( ويلمح انه ساعدك بالدخول وانه بيتحمل مسئولية ) اشكره وعطه ظهرك وامشي بدون دفع اي شي اضافي ٥- اشترينا مشروباتنا قبل الدخول من محل مقابل الفندق واسعاره مثل كارفور مراكش دخلنها بالشناط ومرت ٦- اذا عندك صاحب محدد ماراح تغيره فافضل طريقه خل بطاقته مع الفندق وادخل واطلع معه اي وقت واي يوم بدون دفع اي شي ٧- اذا بتدخل مشروباتك بعد ماتدخل شناطك فالافضل تدخلها نهار باكياس ملونه وخلك واثق سهراتنا كانت في سكاي المارينا : ١٢ ل ٤ وكانوا يقولون بعد يومين راح نقفل معاملتهم وسط ماهي مثل مراكش ولكن مو مثل مانسمع من التحذيرات طاولاتهم وكراسيهم غير مريحة المكان مزدحم والبيست صغير كنا ٧ اعطونا طاولتين الطاولة ب١٥٠٠ بمشروبها دي جي مغني دي جي طبعا فيه طلبات وشيلات و و مخيطو : ١٢ ل ٤ كان للامانه افخم وانظف واحسن معامله واوسع مكان وابرد انا ارتحت فيه لكن ضيوفه الرجال اكثر من البنات واحسه مناسب لكبار السن طاولته ل ٥ اشخاص ب١٥٠٠ مع مشروبك اتلانتك افتر بارتي : دخلته وكان اسوأ مكان ممكن تدخله لا من ضيوف ولا معامله ولا اغاني ولا مكان ، مكان غريب جدا غير مريح وتحس الشواذ من الجنسين فيه كثير وفيه من كل الجنسيات طاولته ب١٥٠٠ ل ٦ اشخاص مزيكا : من ١٢ حتى ٤ دخلنا وللامانه معاملتهم حلوه طاولتهم مريحه نظام مطرب كل ساعه فيه طرب بس يخربه التنقيط والاهداء وكانك بسوريا وكان المكان مجمع لكل الاعراق حتى فيه طاوله اتراك ويسهرون فيه المغاربه بكثرة طاولتهم ب١٥٠٠ بمشروبها المكان ملتم وماهو كبير بس مريح شهرزاد صحارى: من ٣ حتى ٧ وكان بالنسبة لي الافضل من كل النواحي ذكرني بمراكش وسيييع المكان مليان من الجنسين طب وتخير نظام دي جي وبصراحة كان افضلهم واجملهم الناس هناك اغلبهم ع البار حنا كنا ٧ واخذنا طاوله كبيره ب٣٥٠٠ معها مشروبين مايخربه الا شي واحد الشمبانيا الي تفتح وتنكب بالبيست تطلع منه وجزمك الله يكرمكم كان فيها علك ههههههه اشياء غريبه لاحظتها بالسهر في اغادير * المطربين اكثر من الدي جي * ظاهرة التنقيط والاهداء * نظام الشيلات والقبلية * تسهر وكل الجنسيات حولك سهرانه * عادي جدا تسمع دبكة ثم محمد عبدة ثم شيلة فماتنسيق بالاغاني ابد المطاعم الي زرتها شواية النهضة : اكل مغربي لذيذ وطاولاته شعبيه وهذي ميزته لكن لايقارن بالفاسية او علي بن فلاخ مطعم اسماعيل : كبسته عاديه جدا وجلساته عاديه زهرة لبنان اظن كذا اسمه : للامانه ماجربت مشويات غيره بالمغرب عشان احكم عليه لكن خدمته واكله ومكانه جيد والي يحب المشاوي بيحبه المطعم الهندي الي بجانب المؤيد : كان اكله لذيذ ومكانه جميل خدمتهم راقيه حبيت للامانه المكان ولا اعرف سر هالحب قلعة المؤيد : تعنيت اخليه اخر واحد لاني انقهرت وكان اخر مطعم جربته باغادير بصراحة لوي اعرف المطعم من قبل ما اكلت بمكان ثاني غيره ( اكل ، خدمه ، نظافه ، جلسات ، تعامل ) كلها راقيه وجميله وتخليك تحب المكان واكله اغادير مخلتفه كليا عن مراكش من كل ناحية السكن ، السهر ، الطيور ، المجتمع ، الطبيعه ، الاماكن السياحية ، الاكل السكن مراكش فلل وخدم وجمعه ناس اغادير فنادق وكل واحد غرفته وهذي ميزة مراكش السهر مراكش سهره وحده طويله وغالبا يكون ديسكو فقط دي جي مافيها شغل تنقيط واهداء وشيلات اغادير تنقسم لوقتين من ١٢ الى ٤ ومن ٤ الى ٧ بمكانين سهر كل يوم اغادير اقرب شي لها سهرات البحرين من زباين ومن مغنيين وللامانه الطاولات ارخص من مراكش وفي رايي انا وافضل سهر مراكش اكثر من اغادير الطيور مراكش تعتبر ارقى واغلى وافخم واكشخ من كل مدن المغرب بتحصل بمراكش افخمهم واكشخهم اما اغادير فبتحصل الصغير الكتكوت ال الي ع نياته وفي هذي ما اقدر ارشح شي على شي لانها توفيق المجتمع مثل ماقلت قبل مراكش واهلها وشرطتها جافيين بعكس اغادير هادين ويضحكون واكثر لين من غيرهم ومبتسمين بكل تعاملاتهم مراكش من اصعب الاشياء تركب معك انثى بالسياره حتى لو كانت الشغاله بعكس اغادير الي ممكن تتمشى مع صاحبتك بالسياره بالبحر بالمطاعم بكل مكان وبكل وقت وهذي النقطه لاغادير الطبيعة مراكش بين الجبال بارده فيها اللون الاخضر طاغي وقتنا كان كل يوم تمطر بناياتها عتيقة لونها الاحمر فاتن فيها عراقة جميله سماءها صافية ومابعد شفت مثل صفاوة جو مراكش حتى بالريف السويسري والنمساوي اغادير مدينة كانها ميامي بحر وطيور النورس مب الي بالي بالكم هههههه كلها منتجعات وشاليهات بالنهار ماتمل من مقاهيها ومطاعمها وبالليل كلها تكون بلد سهر وتجد يسهر فيها العربي و الغربي والخليجي والافريقي وبين هذي وهذي جمال فمايكمل جمال مراكش الا زيارة اغادير والعكس الاماكن السياحة مراكش تتفوق بتنوع اماكنها فخمس ست ايام بمراكش ممكن ماتغطي كل الاماكن وتحتاج طاقة وقوة عشان تلف كل اماكنها وتزور مزارتها اغادير بلد للراحة والاستجمام صغيره كل شي ممكن توصله برجلينك يومين ثلاثه ممكن تكون غطيت البلد كلها ولا استطيع ارشح شي على شي لان كل واحد مايرغب وان كنت اميل بعض الشي لمراكش الاكل مراكش يميزها عن اقادير الاكل المغربي مطاعم فخمه وغاليه وعتيقه + طبخ الطباخه بالفله فاذا وفقت بطباخه مثل مليكه فانت محظوظ اغادير مطاعمها مافيها هذيك الفخامه الي تذكر لكن تنوعها جميل فيوم اكل مغربي ويوم خليجي ويوم ايطالي ويوم هندي وكذا في هذي النقطه اميل لاغادير مع اني افضل الاكل المغربي لكن التنويع جميل وبنهاية المقارنه لاحد يستطيع ان يقول هذي اجمل من هذي وللناس فيما يعشقون مذاهب لكن رايي ان المجموعه مناسبة لمراكش والافراد لاغادير انسب ولاتكتمل زيارتك للمغرب الا بتجربة كل مدنها بالاخير كل ماكتب فوق يعبر عن رايي وتجربتي شخصيا كل ماكتب فوق حدث معي وقد لايحدث معك كل ماكتب فوق من اسعار بالدرهم المغربي كل ماكتب فوق من سلبيات وايجابيات يبقى للمغرب سحر غريب يجعلك تحبه وتحب اهله رغم كل شي نصايح اخيرة * جيبك اذا كان مليان مايعطيك الحق تسوي كل شي تبيه فالناس لها كرامه وغصب عليك تحترمها * كن خير سفير وممثل لبلدك واهلك وتربيتك رغم كل شي لاتجعل من نفسك تافه بتصرفاتك وكلامك * خلك واثق من نفسك ولاتهتز من اي كلمه * التفاوض والمكاسر يدل انك شخص حريص ولست تافه ماله دخل بالكرم * لكل مقام مقال فلكل مكان طريقة بالتعامل واسلوب بالكلام * التزم بقوانين البلد وعامل الكل باحترام * اذا اعطيت احد درهم واحد سوا شرطه امن مرور جوازات او حتى تنقيط وهو مايستحقه فتراك تخرب على نفسك وعلى غيرك فلاتخرج درهم الا لاحد خدمك * كثير كثير الكلام الي يخوفك بالمغرب من كل ناحية شرطة مداهمات امان لعب سحر ترا السواليف شي والواقع شي ثاني فاذا انت عازم على السفر فتوكل ع الله اسف اذا الموضوع مافيه تنسيق او فيه نقاط مكرره لاني كتبته على فترات مختلفة واي استفسار انا حاضر وشكرا

تياترو

مزعوط مميز

المشاركات: 276

تاريخ التسجيل: Aug 2016

2016-12-09, 01:05 AM

المشاركه #36

اولاً تقرير مرتب و واضح.
ثانيا خالي من المبالغه وحذر في انتقاء الكلمات.
اخيرا شامل لكل ما يحتاجه المسافر للمغرب.

يعطيك العافيه اخوي تار والله يكثر من المسافرين امثالك.

لو تسمح لي اتلقف واسألك عن بعض الامور اللي ما ذكرتها، مدري اذا عمداً او نسيتها:

- مدة اقامتكم في اغادير.
- بعض الاسعار لم تتطرق لها، اجار السياره، الفيلا في جنة الاطلس، وسكنكم في الرويال اطلس.( الا اذا كان فيها احراج او طُلِب منك عدم الافصاح من قِبَل المؤجرين) .

لك فائق ودي واحترامي

__________________
nous etions formidables

الكلمات الدلالية (Tags)

مراكش

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: انطباعي بعد الزيارة الاولى مراكش واغادير
الموضوع	آخر مشاركة
انطباعي عن القاهرة	2024-06-08 12:37 AM
السنه هذي نويت مراكش واغادير، ونصحوني بمراكش بالروز واغادير بصحاري، وش رايكم ؟	2019-06-17 03:54 PM
رحلتي للمغرب الاولى والمصيبه الاولى في الطائره	2019-05-03 05:22 AM
سؤال عن القرى والمدن القريبة من مراكش وتستحق الزيارة	2017-08-16 03:54 PM
قصتي الاولى في مراكش	2012-09-13 03:01 AM

الساعة الآن 02:42 AM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

انطباعي بعد الزيارة الاولى مراكش واغادير

روابط سريعه