نصائح من ذهب لسفرتي المنظمه للمغرب 2016

FaHaD VIP · 2017-02-21T08:43:31+00:00

تحيه طيبه اخواني الكرام بمنتدى المسافر الغالي على قلبي اولا انا انقطعت عن المغرب 5 سنوات تقريبا وتوني رجعت منها بعد ما قضيت 14 يوم بالتمام وكان خط سيري كالتالي كازا - المحمديه - بوزنيقه - الجديده وسيدي بو زيد - بني ملال - اقليم الفقيه بن صالح - مراكش - اغادير - الصويره والعوده لكازا حجزت وكلي شوق ولهفه ولا اخفي عليكم خططت لزياره المغرب كتمشيه واستكشاف وطبيعه وحب استطلاع للاماكن الغير معروفه وهجوله بالسياره بين كل مدينه ومدينه وابتعدت عن اماكن الخليجين المعروفه وكل جدول كانو يحطوه بالمنتدى لزائر المغرب الجديد وغيرت الجدول تمام وانا كنت ارتب جدولي بنفسي باكتشاف الاماكن الجديدة والغير معروفه والقارمن كان يساعدني باختيار الاماكن ومساعده قوقل اذا المكان يستاهل اروحله او لا والحمد الله ما صرفت شي وما تجاوز المبلغ بالكامل غير 8 الف ريال من غير قيمه التذكره واستاجرت سياره واستانست وما بخلت على نفسي بشي غير اني ابتعدت عن كل ما يغضب رب العباد والنطيحه والمترديه وما التفت لها ابدا وهذا الى ريحني بالسفر واستفدت الشي الكثير , انا لاني ملتزم ولكن قناعات استفدتها من تجارب سابقه وللاسف تعلمنا متاخرين وجاء الوقت الى نطبقها وعلى قوله الشاعر ياسر التويجري ( كسبت نفسي وريحت القلق والضمير وابشركم حالتي دايم على ما يرام ) من النقاط الى لازم اذكرها يا اخوان عن تجربه واتمنى تفهموها وتدخل قلوبكم 1 مخافه الله في كل شي هذي الحقيقه يا اخوان لا تجاهر بالمعصيه ولا تودي نفسك للتهلكه 2 اختار الوقت المناسب للسفر والحمد الله توفقت بتوقيت ممتاز وكان الجو ربيع شهر 4 وشفت امطار بكازا والجديده ترد الروح 3 اختار الوقت المناسب لشراء التذكره وشوف العروض المناسبه والحمد الله توفقت بسعر تذكره ما كنت احلم فيه 1400 ريال ( عرض ) 4 السفر لوحدك له فوائد,, انا سفرتي هذي نويتها لوحدي لاني جربت سفر الاصحاب وحبيت اغير عشان لحد يعكر مزاجي وكنت اتحاشي اشوف خليجي او سعودي ولحد يزعل يا اخوان بس البعض وليس الكل جدوله ما تغير من سنين سهر ونوم وسهر ونوم او يبعص جوك انت تبي تتمشي وتشوف المدينه وهذا يناقز بالاسواق او باماكن السهر عشان كذا ما كنت حابب اتعرف على احد او اقول لاحد تعال معي نسافر او ارتبط مع احد ويطلع جدوله خايس وهالنقطه ريحتني كثير 5 الصدقه يا اخوان ضروري الصدقه لانها تدفع البلاء وتدفع عنك الامراض وتبارك بمالك والله كنت يا اخوان اتصدق للمساكين الى فعلا محتاج والاقي فلوسي تزيد ولحد يسئلني وشلون وربي طرح البركه بفلوسي واقسم بالله عن تجربه والصدقه ما تكلفك شي من درهمين الى 5 درهم 6 الثقه بالنفس يا اخوان ضروري هالنقطه وانا مجربها مع ابتسامه ثقه حتى لمن تتكلم مع احد يحترمك غصب لمن يشوفك واثق ومرتب كلامك ومنت مرتبك او خايف من شي وصارلي موقف وراح احكيلكم عنه في التقرير 7 استئجار سياره يا اخوان ضروري ضروري توخر عنك استغلال التكاسي وطمعهم ومحد يرمي لك كلمه مالها داعي واذا على السواقه مافي اسهل منها واقسم بالله اللهم تتبع النظام انا لفيت المغرب بالسياره ولا صارلي شي ولا اخذت مخالفه قولو ماشاء الله وكنت امشي مع القارمن بالسرعات مره 80 مره 40 مره 60 الى يطلعلي بشاشه القارمن على طول امشي معاه وشفت ناس توقفو كثير مرو من جنبي وكلها بسبب السرعه او عدم ربط الحزام او يساقط على العالم امشي عدل يحتار عدوك والعدو اكيد العسكر والى يدور عليك اي زله وغلطه بس تمشي بالسليم يشوفك يقولك تفضل سير خويا 8 القارمن ضروري يا اخوان القارمن اعطيه نسبه 80 بالميه من سعادتي ووناستي بالمغرب وبالقارمن فيه نقاط اهتمام مثل مطاعم واوتيلات ومحطات بنزين وصرافات واماكن ترفيه وربي كان الى ينظم جدولي القارمن اضغط على مكان ترفيه يعددلي خيارات وانا افرفر بالاماكن الى يقولها لي وسعر الجهاز ما يتجاوز 800 ريال 9السكن في اوتيلات متوسطه من 300 درهم الى 500 درهم وراح ترتاح ولحد يتفشخر هناك انت ربي عزك ببلدك وانعم عليك ومهو قاصر عليك شي فليه تروح تعيش دور الفخفخه وانت مسافر ببلد غريب وانت في بلدك مرتاح !! حاول تغير عيش مع الشعب البسيط اسكن في اماكن متوسطه انزل الشارع شوف العالم روح مطاعم شعبيه عيش زيهم وراح تحس فعلا بقيمه السفر لانك خرجت من الاطار الى كنت عايشه ببلدك وترا المغاربه يحبو هالنوع من الناس انك تعيش زيهم بالتواضع والاوتيل مكان للنوم بس ماله داعي الفخفخه والشقق الغاليه كله عشان امان وطيور تفارق كل هالاشياء مدام اني معزز مكرم محد يسرقني او يستغلني باسماء وهميه او طيور حراميه عز نفسك تجدها يا صاحبي المسافر 10اختار تمشيتك بالصباح بعد ما تفطر بالفندق الصباح من 8 الى 9 وبعد فنجال قهوه وترتب جدولك وين بتروح وانزل فرفر وارجع ريحك الظهر وكمل من العصر لين العشاء وصلى الله وبارك وشلك من طلوع اخر الليالي مافيها غير النطيحه والمترديه ومرتادين اخر الليل يا سكران يا حرامي يا بنت ليل يعني اخس الناس بس اذا طلعت بالنهار راح تشوف الناس الصاحيه والمحترمه الى تاخذ وتعطي معاك بكل عقل واحترام وهذا وجهه نظري 11نزل تطبيق مصروفاتي وكل ما تدفع شي تسجله ومنها تعرف وش صرفت وش ما صرفت عشان يكون لك جدول مصروفات زي الاوربين ما يطلع منهم الدرهم الا بعد ما يحسبله الف حساب اجل وش قاصرنا حنا . ونزل تطبيقات تحويل العمله وتطبيقات بوكينج وكل تطبيق خاص بالسفر والسياحه مدام ربي انعم عليك بجهاز غالي وتقنيه حديثه استغله ونزل فيه كل شي مفيد بالسفر 12الهندام والنظافه يا اخوان شي حز بخاطري وانا راجع المطار شفت ناس لابسين ملابس رياضه وصندل ؟؟ سلامات ؟؟ يا اخوان انا ما اتشمت بس ربي رزقك وقدرت تروح المغرب تستانس وتنبسط منت قادر تشتري بدله او قميص وبنطلون لبس يليق بالمكان العام خصوصا راح تصادف موظفين مطار وعسكر وجمارك على الاقل البس لبس يفرض فيه نفسك كسايح يعرف يلبس ويكشخ 13 احفظ جوازك دايم بمكان سكنك ولا ترهنه مع احد ولا تطلعه بالرايحه والجايه وخذ صورة معاك وين ما حتروح ويكفي 14لا تشيل بوكك معاك ما غير مصروفك اليومي وصورة جوازك وجوالك وسماعه الاذن ويكفي ومهم سماعه الاذن عشان وانت تسوق لحد يعطيك مخالفه لمن يشوفك تكلم وسماعه الاذن لمن تركبها وانت تتمشي يتحشى احد يكلمك حتى الشحاتين البثرين الصغار الى مهو محتاجين وعايشين دور المحتاجين كنت امر من جنبهم وانا مركب السماعات ومحد يكلمني لان يتوقع اكلم احد او اسمع لشي 15الطلب من المطاعم اي شي تطلبه لازم تشوفه بقائمه الطلبات وجنبها السعر ولو ما لقيت عندهم قائمه حط رجلك ولا تتناقش لي صديق طلب شويه سمك مع قمبري واستكوزا صكوه 1000 درهم وهذي حقيقه اطلب الشي بعد ما تعرف سعره وصافي 16ابتعد عن الرشاوي ارجوكم لا عسكر ولا غيره مدام ماشي صح ورب الكعبه ما اعطيت اي احد فلوس بغير وجه حق كنت فقط اعطي المحتاجين وانا سافرت ورحت وجيت ما اعطيت احد شي لحد يقول بسيطه هي بسيطه فعلا بس راح تخرب على الي بعدك واول سوال سئلني حق تختيم الجوازات اول مره تزور المغرب مع ابتسامه عريضه قلت لا عشرين مره قال الجواز جديد قلت جددت الجواز قبل ما اجي لمكم زعل شوي وختم ومشيت !! ما نحرني ولا قص رقبتي مشيت غصب وحق الجمارك ما فتش الشنطه كل التفتيش بالجهاز ويطالع الشاشه ولو فتش وش بيلقي يعني قنبله مثلا ؟ خله يفتش وبعدها يقولك سير وصافي وعندي قناعه ذولي ما يستاهلو شي لان عندهم راتب وهذا شغلهم يا اخوان وما يقدرو على الاوربين ابد بس متشطرين على الخليجين للاسف , حتى لو معاك دخان ولا معسل ولا هدايا وش بيصير يعني اذا صادرها خذ ورقه ايصال باستلام الاغراض وانت راجع راح تلاقي اغراضك وصلت قبلك السعوديه اهم شي ما نعطي احد بالمطار درهم واحد وهذي وجهه نظري 17لحد يوسوس زي ما صارلي بالسفريات الى قبل احذر انتبه عصابات قتل خطف السعودي مكروه احذر قف احذر !! سلامات مافي بالبلد الا العافيه بالنهار بس بالليل تحمل الى يجيك حتى ببلدك تطلع توالي الليل تحمل ما يجيك والسعودي او اي جنسيه مهي مكروها ابدا المكروه التصرفات والهياط بس وما يناظرو لجنسيتك صدقني يا الغالي هما يشوفو تصرفاتك معهم وبعدها يحدد باي نوع يتعامل معاك من يحترم يحترم ومن لا يحترم لا يحترم هذي سياسه كل العالم 18خذ كوايه بخار صغيره من ساسكو اسمها كوايه سفر بالبخار قيمتها 90 ريال تكوي ملابسك عالسريع بنفسك لا جيت خارج بدل ما تودي ملابسك مغسله وتجلس ساعات عشان بس كوي او غسيل 19هدايا بسيطه ما يمنع سجاجيد او سبح او بخور ما حتكلفك شي ويلا الجنه كل شي رخيص عندنا والدليل وش كثر محلات ابو خمسه والفهيم يفهم والهديه مهي بقيمتها البسيطه هوا مهو داري بكم شاريها بس لمن تقدمها له صدقني لها اثر بالمستقبل وهالشي صار معي مثال بسيط اتفقت مع صاحب المكتب يستلم السياره ويوديني المطار بالسياره وما ذكرلي المبلغ بكم يوديني بعد ما وصلت اعطيته هديه بسيطه جدا ما تذكر انبسط فيها وقال ما ابي حق المشوار واتمنى نشوفك بالمغرب باقرب فرصه وصافي اولا كسبت ثقته وثاني مشوار من وسط كازا للمطار حيكلفني اقل شي 200 درهم بعد الهديه صار ببلاش وصافي يا اخوان 20شغل غريزتك الداخليه وحواسك الخمس تجاه الاشخاص وبعضهم ربي وهبهم ملكه ان يحس اذا الشخص الى يقابله طيب او خبيث حاول تشغل فراستك اذا لقيته طيب واصل معاه بالكلام والنقاش والتعارف ولو لقيت شكله غير مقبول او يحاول يسرقك بس بابتسامه هذا حط رجلك منه ولا يهمك احد فلوسك تعزك هناك ومحد يجبرك على شي لا بالكلام ولا بالاتفاق على شي ما تبيه 21 لا تفكر ان كلها ايام وراح تسافر وما راح ترجع بالعكس اكسب علاقات ورجال تستاهل تزورهم مره ثانيه راح يوقفو معاك بالشده وانا الحمد الله تعرفت على ناس ثقه وصارو من اعز الاصدقاء بالتعامل والاحترام وتبادل الفكر الراقي وعزيمه قهوه وعشاء خفيف وبس وترا مهي صعبه عليك 22 اعرف بس مين تصاحب ومين تختار قل لي من تصاحب أقل لك من أنت إنك إن صحبت الأخيار ارتقيت بهم إلى الله وإن صحبت الأشرار هووا بك إلى الهلاك فالصاحب ساحب، والصاحب هوية لك، أنت من؟ أعرفك من أصحابك، فلا يعقل ولا يقبل أن المؤمن الطاهر العفيف يصاحب إنساناً منحرفاً، بذيء اللسان، له مغامرات في المعاصي والآثام، يفتخر بها، كيف يكون صاحب لك؟ 23 الحذر من التعارف بالمنتديات وتسافر مع شخص ما تعرف اطباعه وهالكلام عن تجربه خلك بعيد حبك يزيد كان لي الشرف التقيت باحد اصحابي المشرفين هنا بالمنتدى ويعتبر من اعمده المغرب واسمه غني عن التعريف بس طلب ما اذكر اسمه لظروفه الخاصه وحقيقه استفدت من جلستي معاه فيها من النصايح والود والاحترام وغالي علي بالحيل وصديق من 8 سنوات تقريبا الخلاصه اعرف مين تصاحب بسفرك ويكون له درايه وخبره هذا الى تفتخر تشوفه وتمشي معاه المعذره طولت عليكم وبعدها راح ابدا التقرير وارتب الصور وانزلها وابدا هجولتي من مدينه لمدينه

غالي الأثمان

مزعوط جديد

المشاركات: 14

تاريخ التسجيل: Aug 2012

الدولة: الدمام - السعودية

2017-02-23, 02:36 AM

المشاركه #11

هذا هو التقرير السهل الممتنع والمختصر المفيد.

شكرًا للمشاركة، لك كل الود والتقدير.

__________________
عيّا زماني لايجي لي على الكيف
لقيت من وقتي عناد وتحدي
يمرني عمري مثل عابر الطيف
ياما تمنيت الدقايق تهدي
وياما تمنيت الشتا ينقلب صيف

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: نصائح من ذهب لسفرتي المنظمه للمغرب 2016
الموضوع	آخر مشاركة
نصائح عامة للمسافرين للمغرب	2025-06-30 04:59 PM
مطلوب فيلا صغيره لشخصين بطنجه من 20/8/2016 الى 25/8/2016	2016-08-05 01:15 PM
ما هو أفضل وقت للسفر للمغرب هذا الصيف 2016	2016-06-17 11:05 PM
نصائح للمسافر للمغرب ...	2012-05-07 10:27 AM

الساعة الآن 01:45 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

نصائح من ذهب لسفرتي المنظمه للمغرب 2016

روابط سريعه