نكمل يا مزاعيط :
بعد ما صحيت تقريباً الساعه سبعه المساءً أتلفت يمين يسار ما به أحد جنبي ، خرجت من الغرفه
الربع كلهم نايمين ، غسلت وجهي إلا ريم شاطفتني معها الفطور " فكل دول العالم وقت الفطور ف الصباح إلا ف المغرب " .
أنا : وين رايحه خلينا نفطر عند المسبح
ريم : كلهم نايمين والجو بارد برا
أنا : طيب لا تفطرين لين ارجع
اتصلت ب الدي جيه محمد
أنا : سلام وينك فيه
محمد : برا عند الحارس
أنا : تعال الصاله انتظرك
محمد : واخا
جاء محمد صافحته ، سألني اش فيه ، قلت له
" شغل الدي جيه " ، جلس يناظرني ذا صاحي ولا مجنون ،"ما ألومه وجهي كان مفقع من النوم و ابيه يشغل الدي جيه كيف كذا يا صديق " .
أنا : حط السماعات كلها على أعلى صوت
محمد : حشومه الشباب كلهم نايمين
أنا : انت سوي مثل ما اقولك
محمد : يزعل ابو فالح مني
أنا : عندي ابو فالح قسم لا اخليه يقوم يرقص عشره بلدي
محمد : راح اعلمك من فين تشغل واطلع من الڤيلا .
أنا : اوك ، انت روح ولا ترد ع الجوال الا اذا انا اتصلت عليك
محمد : واخا
طلعت اتأكد انهم كلهم نايمين ، نزلت أكمل الجريمه
بعد ما ضبطت الشغل ، سويت تشغيل و انحشت
للغرفه تخيل معي خمس سماعات تشتغل كلها فوقت واحد وتقابلني ريم حاطه يديها على اذنها و ادفها للغرفه و اقفل الباب ، و اسمع انواع اللعنات و الشتايم على محمد ، خرجت اشوف المنظر انقلبت الصاله مثل الزومبي واحد يترنح و الثاني جالس ع الدرج والباقين متجمعين عند الجهاز ولا احد عرف يقفله ، فالاخير فصل السلك ابو نايف ، رجعت افطر مع ريم وهي ميته ضحك كان هرمون السعاده واصل آخره بعد المقلب اللي سويته فيهم .
المهم بعد ما تطمنت إنهم صحوا ، خرجت من الغرفه
و انا اتصنع النوم ، جات مريم تسوي لهم الفطور
وانا نزلت وجلست معهم و انا داخلي ميت ضحك على شارع و رؤوف وهم نايمين ع الكنب .
أنا : ما لكم داعي خربتوا علينا النومه
أبو فالح : هذا محمد دواه عندي
أنا : يمكن انتم ناسين الديجيه من الصباح شغال
ابو فالح : والله يمكن بس ليش ما قفله قبل لا يروح
أبو نايف : عطونا الفطور بس .
المهم نزلت مريم الفطور و تجمعوا كلهم شباب و بنات ، و أنا جالس ع الكنب مثل الامير .
طير السعد : تعال افطر
أنا : سبقتكم ع الفطور
طير : تو صحيت ، متى افطرت ؟
أنا : افطرت قبل ما اشغل الدي جيه ههههههههه
إلا كلهم يناظروني ومثل ما قالوا النحشه نص الرجاله اقفز من فوق الكنبه ومع الباب وعلى الحديقه برا ، عاد لحقوني وهم يتوعدوني و بيني وبينهم المسبح و انا رجلي ما عاد تشيلني من الضحك.
المهم هم رجعوا للڤيلا وتطلع لي ريم و نجلس انا
و ياها مقابل هالمسبح والجو تقول إنك فاتح الفريزر
اجتمعت الماء و الخضره والوجه الحسن و سيقاره لي و سيقاره لها و سواليف تجر بعضها .
إلا واللي يخمني وانا جالس و ألتفت عليه إلا الشيف باشتان ناويني بالشر المهم تأكدت ان ما معه سكين بصل ولا غطا القدر ، حاولت افك يده
الا الرجال ما شاء الله من العسل و العصيده وش تفك .
و يخمني معه رؤوف وهو يضحك ضحكته الخبيثه الحين كلها بسيطه بس وش النيه مدري ، الا هم ماخذيني للمسبح ، و انا عاد عدوي المسبح ما اعرف اسبح لا والماء لو يشد حيله شوي يمكن يتجمد .
المهم انخاهم تكفون والله ما اعرف اسبح تكفون سامحوني جوالي ف جيبي طيب لا يخرب ، ويجي شارع احسبه يبي يساعدني واطيره فوق بالمدح كفو والله انك ذيب وهو يطلع الجوال من جيبي عرفت انه معهم عاد الحين العدو من خلفكم و الماء من امامكم و أبو نايف ميت ضحك فديت خشمه .
تجمعوا كلهم برا ومساعد يقول خلاص امسحوها ف وجهي ، لكن رؤوف وباشتان حسبي عليهم حطوني بروسهم و ابو فالح يقول انتظروا اجيب الجوال عشان اصور ، وعينك ما تشوف الا النور هبوط اضطراري وسط المسبح .
ما عاد ادري عن شي الا واللي ماسكني من يدي أبو نايف و مساعد بيض الله وجيههم ويطلعوني من الماء .
وتلحقني ريم ب المنشفه و تمسح وجهي عاد تشنج
وجهي مدري اضحك ولا وش اسوي .
المهم طلعت غيرت ملابسي و نزلت وهم يشوفون الفيديو ميتين ضحك ، عاد ما لي وجه اشوف نفسي و انا متشنج .
جلسنا نسولف شوي الا و ابو فالح يقول ابيك تخاويني لـ قيليز المكان المفضل لي و الشباب اتفقوا على فندق السعدي يبون يلعبون روليت .
المهم ونتكشخ و ننزل ويشغل ابو فالح البورش
وعلى قيليز و الصوت ع الأخير ماجد المهندس
بين غلاي وعطني الحب كله ونفتح السقف .
عاد من شفت قيليز وانا تخنقني العبره كنت رايح
جاي عليه المهم نيشان على ستاربكس و نوقف ويجينا الدرك يقول ممنوع الوقوف و يعطيه ابو فالح مية درهم قال الحين شلون قال تهلا فراسك خويا .
نزلنا من السياره و نتمشى رجليه ، كان المكان مزحوم بالقوه لقينا طاوله و ناخذ لنا كوفي و نحليها مع الكيك عاد كيك ف الصحن و كيك يتمشى يمين ويسار .
قال ابو فالح نبي نخربها ، وانا ما احتاج وصايه ، قال خلص بسرعه ترانا الحين تحت الانظار قلت من مين ، قال طالع وكأنك ما تطالع أنا ألف راسي ، و العين ف العين .
وهو يحط يده على راسه قال قوم بسرعه قلت اصبر
والله ما اقوم لين اشفط اللي بالكوب كله و امسح الصحن قال اخلص قبل لا يروحون قلت ما عليك اعطيتهم نظره تخليهم يجلسون سنه ما يتحركون
ما خلصت كلامي الا هم ضاربين الباب وطالعين ههههههههه .
يوم شاف إني مطول وهو يعزمهم عاد انحرجوا ف البدايه وكل وحده تطالع ف الثانيه لكن حولوا الوجهه من الباب للطاوله معنا .
عاد دخلت فيهم مباشره بلا مقدمات و ما شاء الله وش هالطول والجمال حياكم استريحوا و ابو فالح يقرصني بيده يعني هدي اللعب ، قلت اعرفكم على ابوي ، كان الفارق العمري واضح بس عاد قلبه خضر ابو فالح ، وهو يدخل فيهم من وين انتم
و فين رايحين ، ما شاء الله وحده من طنجه والثانيه من كازا ، المهم كثرنا الحكي وسوالف وضحك معهم قالوا انتم فين رايحين قلت ولا شي نتسكع انا والشيخ اذا انتم فاضين الليله نتشرف فيكم ب الڤيلا عاد الطنجاويه بصراحه دخلت قلبي من اوسع ابوابه واسحب الجوال من يدها وانا اضحك واسجل رقمي عاد احراج صراحه بس قلبي طاح يوم شفتها وابو فالح من سواليفه مع الكازاويه عرفت ان السناره غرزت .
المهم استأذنوا و نطلع انا وابو فالح وهو مبسوط
ونركب السياره و نعطي الدرك تحيه و على صالة السعدي نبي نشوف الشباب وش علومهم الا مساعد يلعب بالدراهم لعب و يحلف علينا ان السهره الليله ف الدبليو على حسابه المهم و نتصل ونحجز ثلاث طاولات عليها تقريبا ١٦ كرسي " جنب العيادي" .
المهم الشباب كانوا حاجزين ف مطعم الفاسيه
توجهنا على المطعم كانت الساعه ١١ دخلنا المطعم
فخم و معروف من افضل مطاعم مراكش بس غالي شوي ، و نطب فالنعمه " طبعاً ما تذكرنا التصوير الا و الصحون فاضيه " .
بعد ما تعشينا و على الدبليو نلحق السهره .
2017-03-05, 06:14 PM
العرض الشجري
الدرهم المغربي مقابل عملات الخليج