رحلة خطافية

يازكرت وش الوضع ماعرفت انزل الصور وشي ثاني ترى اسامي الفنادق بعضها انسى اساميها لاتدققون واجد ماعلينا دخلت الفندق الا اللي يشتغل بالاستقبال ماش استقباله بارد واحس ماسكين عليه صور عشان يشتغل معهم قلت له ابي احسن غرفة عندكم ماعلينا قال تعال وراي وانا في ساقته وصلنا لجناح حلو ملكي صراحة لو سريرهم ودك ترقد عليه ولا عاد تقوم المهم قالي ابو خشة تقطع الرزق وش رايك قلت ابيها قالي ب 1500 درهم طبعا الفندق هذا وانت طالع من اسني يجيك السد حق ويركان قريب منه
على الطريق طبعا 1500 داخل فيها وجبتين اكل طبعا الفندق هذا اشبه بمنتجع صراحة شي خيالي فيه بار ومسبح ومطعم ومساج الجلسات اللي جنب المسبح ترد الروح التكية جنبها وقدام الجناح طاولة وكرسي شي مرتب اشبه هالمنتجع بغابة تستاهل القيمة قلت اليوم بكمل استرخاء ماش فيني عرق زولة كل حياتي استرخاء وكسل وجلست اتبيثر واتفحص هالمنتجع بصراحة ابداع لين جاء مسيان واروح للبار بصراحة اكتملت الصدمة شغل جبار انا احسب الاكل فيه قالو لا الاكل بالصالون طلعت الصالون شابين نار وعلومهم سفرة وميوزك رايق جابو العشاء رايق وطعمه عال العال وادبغ بالنعمة سلطة ومشوي وبعدها حلا طبعا لاني مدمن كوكا طلبت كوكا طبعا الكوكا خارجه عن حسبة الاكل بعدها رجعت للجناح وهاتك طقطقة بالتلفون طبعا عندهم واي فاي لين بدن عيوني يتراقلن واخذ لك ترويشة طبعا الغرفة مجهزة بدفاية زيت طفيتها قبل انام

كفو ياسعود خلك على هالوزنية وانس موضوع الصور.. اهم شي يخلص تقريرك اليوم

ههههههههه ليش مستعجلين على الرجال .

__________________
لاتسمع كل ما يقال ولا تقول كل ما تسمع.

اصبحت الصبح وافطر طبعا جلسة الفطور رايقة تطل على خضار وجو رايق
افطرت وعينت من الله خير قلت ياولد وراني ماسوي مساج المهم طلبت مساج
طبعا لازم تحجز مع اني ماش ماحب الرسميات واحجز قالو تعال بعد ساعة واروح المهم
جاني اللي بيسوي مساج وقام يتفلسف علي عندك امراض وعطاني ورقة اسجلها
بالفرنسي طبعا قلت له ترجم لي قال فيه بالانجليزي قلت له انا عربي مدري وش جاني
مسكت معي قومية عربية حسيت اني جمال عبدالناصر قالي الورقة زي التعليمات وكذا
انك تعاني من امراض او عندك حساسية من زيت معين قلت له بلهجتنا ياخوك هو موب مساج تراك بتمرخني بزيت ومساج وصلى الله وبارك المهم بعد ماسويت المساج وشيل وحط الشغلة ماتستاهل طبعا المساج ب 450 درهم ماهوب ذاك الزود طلعت من المساج حسيت جسمي مفكك عطوني اتاي مدري وش حاطين فيه المهم قالي يروق الاعصاب قلت له بلهجتنا سم طال عمرك قام يناظرني وطق الفهاوة قلبها عناد قام بخثرق علي بالامازيغية وانا اللي ادوخ هههههه احس انه لعن اليوم اللي سويت عنده مساج

تعجبني البساطه اجل تقول فيك مواصفات زول هههههه

المهم بعد مابدت تفك سكرة المساج رحت للجناح واضف عفشي طبعا
وقت سفرتي وقت برد قلت مابدهاش ياولد خلني امر اوكايمدن كود القى ثلج
وانطلق كالفارس المغوار وفاقع صوت السماعات اغاني راي والشاب حسني الله يرحمه
يردح باغنيته المشهورة سكران ناسي ماردني الا طريق اوكايمدن وصعوبة الطريق
بس اللي هون علي شوفة الناس البسيطين وافران الخبز على الطريق قلت باخذ لي
خبزة انقرش عليها يسمونه خبز تنورت لين وصلت اوكايمدن طبعا وصولي قبل غروب الشمس خذو مني 10 دراهم واناظر بالجبال ثلج وغيوم جو شاعري اتوقع اي شخص يجي
لاوكايمدن بذا الوقت غصب بيصير نزار قباني المهم وانصى فندق وللمرة الثانية نسيت اسمه خذيت غرفة صراحة حليو ماعليه بس طبعا لا فطور ولاشي حطيت شنطتي وهاتك ركض قلت بتعشى طاجن وادخل مطعم شعبي واحلى طاجن مع بريق اتاي وسلطة بعدها رجعت الفندق وطقطقة على التلفون مع الهدوء وصوت نباح الكلاب الله يكرمكم وهواء يرد الروح واحلى ترويشة بعدها نومة

صحيت من النوم طبعا ماش ماعجبني تعامل ادارة الفندق قلت مانيب مفطر عندهم
واطلع برا واخذ احسن فطور وبريق اتاي وانا افطر الا واحد ناصيني قالي تبي تلعب بالثلج
قلت ماهيب شينة تجربة قلت له بفطر واجيك المهم جلس قدام المطعم يحتريني واقوم قلت له اجل خلني باخذ اغراضي من الفندق واجيك قلت له احترني وانزل شنطتي واحطها بالسيارة واروح له قلت له افلحنا قام يهز براسه احسه يسلك لي المهم نصيحة اذا معك سيارة رح لين المواقف حقت الجبل اللي فيه ثلج اقرب لك واحسن لك قالي بسبقك على رجليني وانت الحقني بالسيارة قلت له طيب وصلنا عند اخوياه طبعا هن عندهم مدرب ويعطونك عدة التزلج واللبس حقهم اختياري ومع هالعرض التلفريك اللي يطلعك فوق طبعا قمت اكاسره بالسعر اخر شي اتفقنا ب 250 درهم شاملة للعرض كامل المهم بديت البس لبس التزلج حسيت نفسي اني سبهه ماعرفت قام يعلمني لين لبستها عاد بدا شغل الضحك وطلعنا بالثلج قمت المس الثلج حسيت اني من ذوليك مجاهدين الشيشان
طبعا وداني عند هاللي تتعلق فيه ويطلعك فوق والله ياجاء ضحك طبعا هو جاء وراي وانا قدامه ماش شكيت بعمري وحطو لي شي زي الحبل بين رجولي المهم يوم انطلق الحبل عشان يطلعنا فوق عينك ماتشوف النور واطيح طيحة الله لايوريكم
والله ياني عذبت المدرب انا اتوقع قلبها يبيع بليلة بعد ماجاء معي المهم لعبت وناقزت بالثلج الين تفكك رجيلاتي قالي بجيب لك زي الخشبة تجلس عليها وتتزحلق لحظات روعة
المهم قالي تعالي بشهر 6 او 7 عشان اوديك جبل توبقال خذيت رقمه قلت يصير خير يوم خلصت حسيت بجسمي متكسر ركبت السيارة ورحت للغدير اللي بدخلة اوكايمدن جلسة رايقة

المهم طلعت من اوكايمدن قلت ياولد وين والوجهه قلت على وزازات والصحراء واطلع من اوكايمدن وقفت بدخلة اوريكا واتغدى مشوي لحم مع اتاي منعنع يحبه قلبك خلصت اكل واشد الطريق لوزازات صراحة طريقها صعب وقروشة المهم وانا بالطريق مالي و لا علي الا اسمع طقة بالسيارة قلت يارب وش ذا واوقف اغربت الشمس الا الظاهر اني صدمت قطوة وانا مدري ماش ويقفل جوي وتقلب حزن واشغل مزعل فرحان طلع جوي مخيس ماردني الا دخلة وزرازات طبعا بدخلة ورزازات فيه محطة وقفت اعبي بنزين المحطة نفسها فيها فندق وادخل الاستقبال واسال عن احسن فندق عندهم قالو فندق اعتقد كان اسمه صح علي بربر بلص طبعا نفس هالفندق ينظمون رحلة لاحد الواحات بوزرازات تنام ليلة عن
هم اسم المنطقة واد النجوم صراحة اللي في الاستقبال ولد بقمة الادب عطاني معلومات وين اروح وين اجي بوزازات المهم وصف لي مكان الفندق يوم جيت اركب سيارتي الا وهو جنبي قالي الحقني قلت مابي اكلف عليك حلف علي المهم لحقته لين وصلني الفندق الفندق صراحة روعة وعلى حسب كلام اللي بالاستقبال يقول ان محمد السادس من رواد هالفندق مدري عاد يفقش علي او صادق ويقول انه يجونه ناس كباريه الجناح ب 2000 درهم مع الفطور بس شي يستاهل الفندق فيه مسبح ومطعم وبار ونادي صحي نفس الجناح في جلسة برا بس كان بالليل برد صعب تجلس برا حطيت شنطتي وطلعت استكشف الفندق تصميمه حلو صراحة وشغل عدل مدل طلبت منهم عشاء تعشيت وترويشة وبعدها احلى نومة

تقرير سريع جداً من سرعته طارت طقيتي
ياحبك لكثر الترويشات ياسعود :)

مستمتعين، التصوير أزمة في هذا المنتدى، مادري ليه الادارة ماتسهل طريقة تحميل الصور علشان الجميع يستفيد

متابعين معك ياخلفهم، وبانتظار باقي التفاصيل

رحلة موفقه

والله يحفظك

__________________