تجربتي مع طيران الملكيه المغربيه كابوس

السلام عليكم
تحياتي لجميع المزاعيط
رغم انه مالي خلق اكتب كثير بس من المرارة اللي عشتها حبيت المزاعيط ياخذو الحذر من الملكيه المغربيه

كانت رحلتي من الرياض الى كازابلانكا مباشرة يوم ابريل 1 الساعه 01:00
ركبنا الطائرة وتوجهت الى جده لتنزيل بعض المعتمرين وعلىى اساس الحجز مباشر هذا اول حركة وعديناها

يوم ابريل 7 كانت يوم عودتي من كازابلانكا الى الرياض الساعه 14:20 وتاخرت الرحلة حوالي ساعه ونص
كمان عديتها
بعد ماوصلت الرياض الساعه 23:40 رحت استلم العفش وانتظر مع المسافرين وكله راح وظليت لوحدي
الشنطه ما وصلت ؟؟ نكبه
مفاتيح السيارة واللابتوب والملابس كلو بالشنطه وهذا غلطه مني للأسف .. والسيارة في مواقف المطار..يوم عصيب
طبعا بلغت المطار قسم العفش وعطوني رقم مراجعه
طبعا الملكيه المغربيه انسى انهم يردون عليك اتصال .. ما عرفت اتواصل الا عن طريق تويتر خاص
بعد اسبوعين استلمتها يوم 21 ابريل ..هذا بعد ماكسرت مثلث نافذة السيارة الباب الخلفي علشان تفتح معي

الحذر يا مزاعيط وهذي تجربتي مع الملكيه المغربيه
اتمنى للجميع التوفيق

هذه مشاركة سابقة لي:
اغلب سفارتي لأغادير المغرب من الرياض عن طريق المغربية، عشان بالدرجة الأولى وقت الإنتظار في كازا خاصة في الذهاب ، والله أنها حليلة صح غير حديثة مقارنة بالسعودية، بس والله سواقتهم اركد من ربعنا ما تحس بالمطبات والهبوط ازين.

تصدق بالله توي دخلت أبشر عديت كم سفرة لأغادير على المغربية لقيتتها سبع سفرات من عام 2014، ولا عمره شنطي ما وصلت أو تأخرت لا في أغادير ولا في الرياض، السلبية الوحيدة أن رحلت العودة كازا اغادير الي 2:30 الظهر دايم تتأخر ساعة أو ساعة ونص.


وبعدين أخوي أنت قلتها ولا أبي أضيق صدرك أحد يحط مفتاح السيارة أو مفتاح البيت في شنطة العفش!!!

الأخ الكريم بو دحوم أولا حمدلله على السلامة و المهم ان اشيائك و شنطتك رجعت بالسلامة
الموضوع هذا يحدث في جميع الخطوط الجوية العالمية أيا كانت ولو تبي امثله اعطيك ...
طيران الاتحاد لو تدخل التويتر تشوف كمية شكاوي الى الليل ....
الخطوط السعودية حبيايبي هههه سوها فيني شخصيا وصلت وما وصلت شنطتي
الطيران الفرنسي وصلت لندن وما وصلت شنطتي الا بعد 6 أيام ...
وغيرها كثير ....
اللي يفرق هو تعامل الشركة بعد الفقدان فيه شركات تسحب عليك وفي شركات مثل ما تفضلت تحتاج تسولف معاهم على تويتر وتفرج عليهم خلق الله عشان يلتفتوا لك .
وفيه شركات تبادر لك و تحاول تقديم أي شي عشان تحافظ على سمعتها ..

الشي اللي احب انوه عليه للجميع اني افضل دائم عمل الحجوزات عن طريق البطاقة الائتمانية
لأسباب كثيره من أهمها ان في حالة فقدان او تأخر الشنط أو تأخر الرحلة يتم تعويض المسافر
بمبلغ مادي ( كل على حسب حالته ) طبعا كل بطاقة لها شروط واحكام وتختلف من بطاقة لاخرى

وأخيرا حمدلله على سلامتك

__________________

الملكيه المغربيه قصص مريره وطيران لاعلاقه له بالطيران ولحد الان الشنطه حقي مفقوده ولم تصل من كازابلانكا

الحمدلله ع السلامة للجميع .. الشناط تروح وتجي المهم السلامة

شخصياً لي كوابيس في الارض وفي الجو مع الخطوط المصرية + التركية.
اذا راعي سفريات لابد تواجه مثل هالمشاكل وبكل خطوط الطيران .. طبيعي.

المهم هو تجاوب وتفاعل الشركه معاك ك متضرر .

تسلم والحمدالله السلامه

أنا جربت المغربية مره واحدة فقط عام 2014 وكانت الرحلة من الرياض لكازا مباشرة لكنها توقف 45 دقيقة في القاهرة تشيل ركاب وتعبي بنزين ، التجربة نوعاً ما ممتازة وجيدة اذكر ما تأخرت الرحلة ابداً وكان طاقم الضيافة بشوش جداً والشناط ما ضاعت ولا شي ، السلبية الوحيدة اللي شفتها في الطيران المغربي أن الطائرة كانت صغيرة ( بوينغ 737 ) ..
وفي الصيف الماضي حجزت رحلة عودة من كازا للرياض وكانت التذكرة غير مسترجعة لكني قبل تقريياً اقل من 24 ساعة من موعد الاقلاع غيرت رأيي وقررت امدد لكني كنت متحسف على فلوس التذكرة لأنها غير مستردة وبعدها قلت خلني اتصل عليهم واحاول فيهم وماني خسران شي المهم اتصلت عليهم وردت علي بنت محترمة ولبقة وشرحت لها وضعي وتعذرت مني قالت والله تذكرتك مو مسترجعة ومو من صلاحياتي اني ارجع لك الفلوس وقالت بحولك على السوبرفايزر وحاول فيه ، والله وحولتني البنت ورد الرجال وكان قمة في الرقي وبعد ما سمعني قال ولا يهمك راح ترجع فلوس التذكرة كاملة بدون استقطاع اي شي على بطاقتك الفيزا خلال أسبوع عمل وبعد 48 ساعة بالضبط وصلتني رسالة من البنك انه تم ايداع مبلغ التذكرة ، الصراحة بعد هالسالفة كبر الطيران الملكي المغربي بعيني كثيررررر وراح اسافر معاه في رحلتي القادمة بإذن الله ..

الرحلات لي فيهم ترانزيت ديما المسافر يتكرفس وخصوصا ديال السعودية منين يجمعو الامتعة مع امتعة الحجاج والمعتمرين ، الخطوط الملكيةمن والى وجهات تانية بالعالم مافي ها المشكلة

كل طيران بالعالم فيه هذي المشاكل خصوصا بالترانزيت
الخطوط المغربية جربتها عام 2011 من الرياض الى كازا
مكتوب مباشر لكن وقفت في القاهرة 45 دقيقة

بالنسبة لي هو الخيار الاخير وحسب ذاكرتي حتى الشاشة ما كانت موجودة طيران اقتصادي

تأخر او ضياع العفش متعب ومزعج والاصعب هو تأخره برحلة الذهاب يعني تروح سفرتك وانت تفكر بالشنطة مسببه لك قلق
و الامر المماطلة بالتعويض

__________________