رحلتي للمغرب ٢٠١٨ قطرة العسل وحد الموس

تمهيد :
تقرير إن شاء الله سهل وسلس ومفيد وفيه بعض النصائح وربما المواقف كتبته رد جميل لهذا المنتدى الرائع الذي له فضل علي بمن فيه من مشرفين ومسؤولين لهم وافر الشكر
الجزء الأول/
# الحجز كان على الخطوط السعودية من جدة مباشر لكازا والسعر مرتفع ٤٥٠٠ حاولت ولم أجد بالنسبة لتوقيتي غير هذا السعر
#كانت الطيارة مليانة فل معتمرين مغاربة وكلهم أعمارهم كبيرة ومع الرحلة الطويلة صار هناك علاقة ماهي أخوية بل علاقة ابوية الشيبان والعجز طاقينها ميانة كل شوي واحد يطلب مني اساعده والا اجيب له غرض لدرجة بعضهم يناديني أشغل له الشاشة اللي قدامه ههههههه لا ويقول الفلم ذا ماعجبني دور لي غيره هههههههه ما تسمع إلا كلمة ياوليدي وياوليدي الله يستر عليهم بس ربحنا منهم دعوة طيبة ولما وصلنا المطار كل منهم يلزم عليك إلا تقلط عندهم ، وأنا أعتذر منهم قلت عندي عمل هههههههه مسوي قدامهم الولد المثالي هههههه المهم ببركة دعواتهم مشت أموري بالمطار على خير مايرام وما فيه أحد تعرضني، طلعت برا وتاكسي وعلى الفندق كان التكسي ب ٢٠٠ درهم المهم وصلت وكان تعب وارهاق غير طبيعي وبقيت يومين في كازا كانت كلها محصورة تقريبا في عين الذياب
#بعدها توجهت لأكادير وحجزت في فندق خليج أغادير، الفندق مصنف على أنه خمس نجوم بس المغرب غير ، الغرفة مكتومه وريحتها دخاان وعفن والسجاد محرق وأغطية السرير ريحتها عفنه وكذلك المناشف لا وجنب الغرفة جهاز مركزي للتكييف، المهم رجعت الرسيبشن وسويت لهم حفله قالوا معليش الفندق فل اصبر لبكرة وهذا نظام كثير من اللي تتعامل معهم بالمغرب قبل الاستئجار ملاك وبعدها شيطان ولا كأنه يعرفك ويجحدك ، طلعت بعدها وتمشي بذا الديره الزينه والجو بريد مارجعت إلا تالي الليل ونومه.... صحيت صليت الفجر وانا بعد ارجع انام لأني دايخ ومانمت زين المهم ما امداني احط راسي إلا الباب يدق وافتح الباب إلا وهو عامل المطعم جايب الفطور... لاحول قلت من اللي قال لك تجيب فطور أنا بنام ... المهم جلس يشرح لي الفطور انه زين قلت خلاص دخله ... واثرهم نصابين يجيبون لك الفطور للغرفة علشان ينفعونك ١٠٠ درهم وهو مجاني... افطرت وقلت ارجع اريح لي أبو ساعه ... ما امداني إلا والباب يدق لا حول ذولا وش بلاهم...قمت وفتحت الباب إلا وهو خوينا راعي الفطور جايبن سطل ثلج... قلت من اللي قالك تجيبه أنا ما اشرب... قال لا انبسط ويلزم علي ههههههه لاحول... المهم قلت خل ألبس واطلع بدل ذا المهزله كل شوي واحد يطق الباب تقول بزريبه لا احترام ولا تقدير ... طلعت المارينا ورحت مقهى الشيشه اللي يروحون له الشباب هناك وانصدمت من قذراة الاثاث ووصاخته وفوق كذا السعر دبل لان اللي يجون خليجيين، طلعت المقهى ثاني بنفس المارينا فيه اروبيين ومفاربه وتحصل النظافه والأسعار نص الاسعار اللي هناك ..
#أكادير بلد جميل وهادي وأهله طيبين بشكل عام، لكن جميع الاماكن اللي رحتها واللي يقصدها الخليجين تتنافس في سوء النظافة وسوء الخدمة والمبالغة في الاسعار، وأنا صراحة أطلب من أي شخص إلا يغامر ويستأجر أكثر من ليلة بأي مكان إذا عجبك خير ماعجبك هج ، ومايمنع تروح تشوف أماكن الاروبيين وعامة الناس علشان تعرف الفرق بنفسك
#سوق الاحد جميل بأكادير لكن انتبه السعر دبل على الخليجيين وهذا قاله لي واحد يشتغل في السوق يقول من نشوف الخليجي اللي ب ٥٠٠ نخليه ب١٠٠٠ علشان كذا لازم المكاسر
#كان لي زيارة لفندق صحارى مدري من اللي باقي يسكن بذا الفندق والعجيب انه مليان ههههه
#فيه مطعم رهيب للفطور اسمه تفارنوت شي لا يصدق من طعم ولذه وكذلك الأسعار
#من ناحية الطيور اللي شفته دداسن مسمكره هههههههه ماش ماشفت شي يسوي بأكادير
#من ناحية المراقص وووعالمها فالجو الصاخب ما يناسبني ماعندي علم عنها رحت اماكن محدودة مجاملة لبعض الزكرت والا جوي طلال مداح أو أبو نوره وصوت خفيف واضاءه خافته هههههههه
هذا الجزء الأول
وانتظرونا في مراكش الحمراء الجزء الثاني

الحمد لله على سلامتك ابو محمد
وسجلني معاك متابع للآخر

__________________

الحمدالله علي سلامتك

لا تعبت .. ورحلة سعيدة
صدقت الدداسن المسكره واجد لا وتجي خطوط وبدون مكيف .

تقرير رائع وبانتظار البقيه وابشرك مودع فنادق اكادير منذو زمن وطايح بالشقق

تقرير ممتع الحمدلله على السلامه وبنتظار الجزء الاجمل " متابع

الحمد الله ع سلامتك تقرير جميل

تقرير راااااااااااااااااااااااا اااااااااااااااااااااائع

يازينك ويازين تقريرك يابو محمد روعه وبساطة في السرد لا وجوك مثل جوي منتب راعي سهر