طنجة استفسارات فضلا لا امرا

افضل سهرات عند العرب في المغرب بلا منازع حتى بالتعامل ،،
المغرب لاتحكم عليها الا من نفسك لاتسمع لاحد
والله بعضهم شايف نفسه ويتكلم من راس خشمه ولاهو عاجبه شي ويعطونه المغاربه ع راسه ثم يجي يتشكى

بذكر لك قصه ولك الحكم في مطار محمد الخامس قدامي من نزل من الطياره لابس نظاره ويترنح قاله الموظف افصخ النظاره على شان يطابق مع الجواز ماعجبه حسها اهانه له وفصخها قاله يله خلصني طرده الموظف وقاله ارجع ورا يعني بالنهايه اسلوبك وتعاملك يحدد معاملة الناس معك
رسالة للبعض من اخوانا الخليجيين:
احترم الناس يحترمونك ولاتفكر انك تشتري الناس بفلوسك حتى هم عندهم فلوس وشبعانين يالي جاي بقروض ..

وتحصله باروبا مثل المسطرة يمشي على القانون
والدول العربيه نظام بفلوسي ومن بعدي الطوفان

الله المسعان .....

انشهد كلام منطقي

مرحبا اخوي والله تسمحلي اخلف معاك انا من وجهة نظري بعض المغاربه للاسف مايحبون الخليجي انا صار معاي موقف في سنة 2022 مع نهاية كاس العالم كنت جاي من اسطنبول الي كازا وانا الخليجي الوحيد في طياره لما جا دوري قالي شرطي الجوازات و من غير سبب انت اركن على جنب بعد ما جاف جوازي اني خليجي و لي عقبي مغاربه و اتراك يمشيهم و يرحب تذكرت فيلم عسل اسود لما كان على كونتر الجوازات والله العظيم نفس الموقف كلمته قلت له عسا ماشر راكني على جنب وتمشي الباقي قال عندك مشكله في جوازك قلت له مشكله في جواز بكلم سفاره قالي الي احذاه لا مشكله في السستم بعدها سويت نفسي اتعبث في جوالي موجه صوبي يحسب اني اصوره قالي ترى صج مشكله في السستم قلت له وانا مب قاعد اصور وانا عسكري وفاهم القانون ختم جوازي وقالي امش و الله العظيم هذي الي صار معاي مب شرط تتعامل بسلوب حلو تلقى نفس المعامله و المطار واجه واسف على الاطاله

مو من حقه يقولك اركن وين قاعد هذا، جوازك فيه اكثر من 6 اشهر وعندك تذكرة عودة وحجز سكن ماله حق يوقفك، هو موقفك يبي رشوة من الاخر، المفروض قايله في مشكلة؟ اذا قالك اي قوله ودني مكتب الضابط مو تقولي اركن، واذا قال مشكلة بالسستم قوله المفروض يوقف على الكل ما يوقف علي انا بس، مجرد ما يشوفك نشبة وراح تعله راح يقط عليك كلمة يغثك عشان يحسس نفسه منتصر لكن راح يمشيك.

الامر الثاني موضوع الكراهية ما يجوز فيه التعميم (من قبل المغاربة) في شباب خليجيين فعلا تصرفاتهم غير محترمة ولكن هذا لا يمثل بلده ولا يمثل الا نفسه، ويبقى السياح الخليجيين هم الافضل وكل الدول تتنافس لجذبهم لانهم الاعلى انفاقا ومدة اقامة، المفترض الترحيب بكل شخص محترم والغير محترم ينطق على راسه عشان لا يوطوط مرة ثانية.

مرحبا اخوي بخصوص السبب انه وقفني بس موضوع يبغي رشوه ممكن بس هذي وحده من الاسباب وسباب ثاني اعتقد انه الحقد على الخليجي وهذي مب شى جديد ومحد قال الكل بس من راي الاغلبيه
وانه في خليجيين مب محترميين و يتصرفون تصرفات مب زينه هذي الفئه احنا بعد تظررنا منهم و اعتقد سبب تدهور الامور في مراكش اهما

موظف الجوازات هذا اخطر واحد بالمطار
وعنده صلاحيات يعرقلك حتي ممكن توصل للسجن
أو إرجاعك من حيث اتيت لذلك اهم شي تكون هاديء
وتسايره على قد عقله حتي تفتك منه وتطلع
ومثل ما يقولون بالمطارات خليك خلف القطيع
وهذا الكلام طبقه في كل مطارات العالم
ما عدا طبعا مطارات دول الخليج اللي اعتبرها افضل
مطارات العالم إنسانية واحترام لكرامة الإنسان مع ايضا
مطارات بانكوك وفيتنام وكمبوديا حسب تجربتي مرات عديدة.

يخسي يرجعني، هذا الموظف شغلته يتحقق من البيانات ويختم فقط، اذا في شي يحولك على ضابط الهجرة هذا الي بيده قرار الترحيل، وهذا القرار ماهو سهل ابدا ولازم يكون مسبب، وحتى لو تم اتخاذ القرار شركة الطيران راح تدافع عنك وتنبش بأي ثغرة بالقرار (مو لسواد عيونك ما يبون يضيعون كرسي برحلة العودة)، مافي ضابط صاحي راح يسلم رقبته ويسوي قرار ترحيل لسائح خليجي اوراقه كاملة لانه ما رضى يعطي رشوة لموظف الجوازات.

انا ما اقولك روح تهاوش معاه وانفخ عليه، لكن اعرف الي لك والي عليك، نعم سايره وعطه على جوه وابتسم لكن خلك واثق، ما اخليه يقولي اركن على جنب وين قاعدين؟