واحدة تلو الأخرى

السلام عليكم ورحمة الله وبركاته
الشكر موصول لأعضاء ومشرفين والقائمين على هذي المنتديات لما فيها من معلومات مفيدة لكل مسافر لدولة المغرب الشقيق.
اول سفرة للمغرب واول تقرير لي وراح يكون سريع وان شاء الله في قادم الايام نكون محترفين في الكتابة. فأرجو المعذرة في اي قصور قد يطرأ. السرد سوف يأخذ منحنى العامية.

اعرف السفر من صغر سني وتغربت في دولتين او ثلاث والسفر للمغرب كان هاجوس منذو زمن بعيد لدرجة كنا ايام الطيش ( سفرات المراهقين) نحجز للمغرب ولا جينا المطار كنسلت وقلبتها اما لمصر او لبنان او اي ديرة. لاني راعي سفر وخايف اتعلق في المغرب وافتح باب جديد لنفسي. المهم كان شي يراودني ويقولي المغرب بدري عليها وكأني حاس سفرتها بتكون قفلت بشيش ( لعبة الضومنه). ولذلك كان التأجيل حليفي في كل مره.

قبل ثلاث سنوات استدليت على مزاعيط المغرب وانا احب اقرا عن البلد الي اول مره اجيه واثقف نفسي مزبوط. وفي شهر فبراير من ٢٠١٧ عزمت السفر ولوحدي رغم الحاح بعض الاصدقاء المقربين وهم رواد السفر للمغرب بالمرافقه ولكن حبيت اخوض التجربة واستكشف واشق الطريق بنفسي.
قدمت على ايجازة لمدة اسبوع وحجزت عالخطوط المغربية وهي ليست بالجيدة ولكن تأدي للغرض.
كانت الرحلة فجراً وكان موقع جلوسي بجانب باب الطوارئ ( موقع سئ جدا) لدخول الهواء وكان باب الطوارئ فيه تنسيم او جلد الباب سيئة وهذا شي غريب واول مره اصادفه.

وصلنا مطار محمد الخامس الصبح بدري وكان توقيت ممتاز. عبيت الورق عربي انقليزي عشان نكون ملتزمين ولا احد يقروشنا واول ماوصلت لكاونتر الجوازات وهو يسألني اول زيارة للمغرب خويا وانا في خاطري اقول هيا وايش ترد عليه ذا الحين بسؤاله الغبي! قلت له لا المهم رد وقالي مالك بيانات عندي في الجهاز ، قلت له ممكن مريت عالمغرب من قبل ١٥ او ٢٠ سنه المهم حسسته زي ماسألت هيا استحمل الاجابه بس طبعاً بكل ادب. وكان عندي جوازين مدبسين في بعض ومليان اختام وفيز وممكن هذا الشي عرفه اني كثير سفر ويشفع لاجابتي وهوا يمد الجواز ويقولي سير خويا.
اتجهت للشنط والجمارك وكل الامور عدة سهالات وبعدها لبنك وفاء بعد ان صرفت مبلغ ٥ الاف بافضل سعر من الصرافين المتواجدين وافتح حساب وفاء بمبلغ رمزي ماني فاكر كم بالضبط واودع المبلغ واخذ البطاقة وامشي لكشك يبيع شرايح دلتني عليه موظفة البنك بعد سؤالي وكان مقابل البنك تشكرتها واتجهت للصرافة واصرف مبلغ رمزي تقريباً الف درهم وادق شريحة بيانات ماتكفي حاجتي لمدة اسبوع وكان معاها بعض دقايق الاتصال والرسايل المجانية.

المهم قررت اتوجه لمراكش بالقطار لعدة اسباب وهي اني لوحدي وجاي من سفر ولا في اسوق والاهم اختلاطي بالمجتمع والبعد عن العزله والقطار كان بتوقيت الصباح. المهم نزلت تحت للقطار واقطع تذاكري زي البشر وعلى مراكش. وتجلس جنبي سائحة من سنقفورا مع والدينها وكان تشتغل في شركة عالمية في نفس مجال عملي وقضيناها سوالف الين وصلنا. وانا في القطار كنت اشيك على فنادق قليز وحجز يوم واحد وقلت اليوم الثاني انزل واشوف موضوع الشقه بنفسي. بعد وصولنا اخذت عفشي والجبل اقصد الفندق وكان قريب من القطار مشياً وانزل شناطي وحاولت اخذ غفوة العصر ولكن دون جدوى لقلقي الزايد وودي انزل واشوف شوارع المغرب. اخذت التلفون واتصال عالريسبشن اسأل عن الحمام المغربي قلت دام مابها نوم خله ينظفنا وينشطنا وننزل على نظافه. وكان بمبلغ ٢٠٠-٣٠٠ درهم والبس ياولد ورح دور عيشه ودز على قليز مشي وانسقط في لاونج قبل استابكس وخذ طاولة ركنية على شارعين ههههه وكانت اوت دور والجميل صادف ذاك الوقت يوم جمعة مساء وهذا بداية ويكيند عندهم. وعينت من الله خير وجالس اتفرج على البشر وفي ذاك الوقت ازريت افهم على لهجتهم وقلت ياولد دامك لا سكسوكه ولا تفهم اجل اقلب انقلش وزي ماحيروك حيرهم. بيني وبينكم شفت وضع لهجتهم ماراح تخارج معي حذفت العربي ونزلت الانقلش وصرت ماتكلم الا بالانقلش واذا هنق الي قدامي قلبت عربي بس في اوقات معينه اما اذا الوضع فيهبيع وشراء هههه صملت عالانقلش وساعدتني الطريقه ذي بالذات مع ملط السكسوكه.
وهضم ياولد في شارع قليز وكان جو جميل وبشر اجمل وترزز ياولد يمين وشمال وحصلت بعض المواقف مع الماره الين ١٢ اليل وقلت ياولد ضحي باليله وروح ارقد عشان تقوم بكرا بدري ونشيط فايق ورايق وتزبط وضع سكنك بما ان الامور توحي ببلد جميل ورحلة جميله. واخذ بعضي واتكرفس على فراشي ونوم.


هذا اول يوم من رحلة بدات من بداية يوم جمعه وانتهت بيوم سبت ( ٨ ايام تقريباً ) بميزانيه ١٠ الاف تقريباً.
ملاحظات بسيطه:
قسم فلوسك مابين كاش ( درهم وسعودي وبطايق وفيزا) طبعا حسب ميزانيتك وجوك.
عامل الناس باحترام وقدم النية الطيبه
أسأل قبل الطلب وكاسر بادب
لا مانع من دفع بخشيش لمن يخدمك او تطلب انت منه خدمتك بشي رمزي.
خلك متواضع وموزون
لا تخاف ومن حذر في نفس الوقت.
في المطار جاوب على قد السؤال وماحد يقدر يغصب على شي ترا.

يتبع،،،

سهرانين لا حد يدقق في الإملاء. عدلت ولكن ماعرفت ارسلها وانحذفت وناهيك اني اكتب من جوالي

اهلين اخوي ...
ماتابع لك بنتظار التكمله'

كل الشرف اخوي عزوز

صحيت الصباح بدري واهنق لمدة دقيقه مدري انا وين ههههه طبعاً مع تغير المكان والزمان المهم وادرك بعدها اني في الفندق في قلب مراكش واخذ شور سريع وانا اقول في خاطري لو القى دباب الان يلف بي شوارع قليز ادور شقه ابرك من التكسي فك باب وصك باب وحوسة طلعه ونزله.
وانزل للوبي وافك جوالي على برامج كريم واوبر والقى واحد منهم شغال ومن سويت بحث ويطلعلي المتوفر فقط فئة الدبابات فقط وانا ارجع واقفل البرنامج وافتح مره ثانية ماني مصدق الصدفه ذي. والقى دباب واحد متاح فقط وبيوصل بعد نص ساعة واسويله طلب وادخل على موقع airbnb وادور شقق في منطقة قليز والقى خيارات كثيره وطبعاً انا مشيك على البرنامج من قبل فتره طويله قبل الرحلة ولقيت خيرات كثيره وراسلت كثير ولكن قلت دام الامور متاحه اوصل هناك ياولد وخذ على عينك. وانا قاعد في اللوبي راسلت كذا واحد وكنت استنى ردودهم.

وصل راعي الدباب واتفق معه ب ١٠٠ درهم ادور شقه داخل محيط قليز بحد اقصى الساعة ١٢ الظهر وهذا الكلام الساعة ٨ الصباح تقريباً. كنسلت الرحلة من البرنامج واركب وراه وعلى اقرب كوفي نفطر فيه ونتقهوه مع قليل من السوالف وبعد تمينا الفطور ركبنا الدباب وكم لفه على كم سؤال وشوف بعض الشقق ولكن مافي شي اعجبني بشكل عام. وهنا بدأت توصل بعض رسايل عالبرنامج واخذ مواعيد وكنت نسقت موعد في وقتها مع واحد كان يبدو لي بأنه ليس عربي ونتجه للمكان المحدد ويطلع شايب فرنسي. وياخذنا على شقه في عمارة كلها فرنسيين على كلامه وكانت عمارة نظيفه جداً وموقعها خلف فندق اظن اسمه الديوان الي بعد استاربكس بجانب الدوار وكانت عبارة عن استيديو من غرفة وحمام اكرمكم الله وصالة مفتوحه على مطبخ امريكي واعجبتني بصراحة نظافتها وحجمها وتصميمها وقربها من كل شي واتفق معه على سعر ٣٥٠ وبالويكند ب ٤٥٠ وكان يوم سبت هذا الكلام وادفع له حق يومين ونكتب العقد والعنوان ويسلمني المفاتيح ويضرب الباب وانا اضرب الباب وراه واركب دبابي وارجع عالفندق وكان الوقت تقريبًا ١١ الصباح وحاسب راعي الدباب وادخل الفندق واسوي تشيك اوت واروح انزل اغراضي واقرب تكسي تحت الفندق وعالشقة بمبلغ رمزي
وانا انزل شناطي وانزل ادور الغدا واطيح في محلات سي فود في شارع خلف السينما اذا ماني غلطان واتغدا وبعدها بتكسي على سوبرماركت في المنارة واتقضى احتياجاتي كاملة وارجع الشقة واضبط اغراضي وارتب امور واخذ تعسيلة خفيفة وبعدها قوم خذ دش والبس وانزل على قليز خذ قهوتك وتمشى شوي وكان يوم ويكند وزحمة الشوارع وارجع البس قلت بجرب السهر عندهم وانزل على الدبليو الي اسمع عنه ومن وصلت وهم يقولولي الطاولة ب ٣ الاف ولازم حجز هههه وانا اقولهم لحالي وهم ينزلون ٥٠٠ هههههه المهم طنشتهم والقى واحد جنبه اتوقع الديوان نظامه فنان وشغل نمر ويعطيني عرض وسعر طيب واسهر فيه وكان لاهو زين ولاهو شين له ناسه وجوه وارجع الشقه اكبر راسي ونوم.
واصحى افطر وانزل اضرب قهوتي واتمشى شوي في قليز وبعدها قررت ورحة ساحة الفناء وارجع قليز وكل شوي اجرب كوفي واطلق رجولي ههههه وارجع اريح في الشقه وبعدها قلت يالكي او تريبل ٥ والبس واعدي على الكي ومن قلتلها انا لحالي قالت ٢٠٠ درهم خويا وانا افرصع عيوني قلت شكلي سمعتها غلط وترجع تأكدلي بان فيه تكت عالبار ب ٢٠٠ تقريباً وادخل والقى الوضع مزيان وفيه كراسي عالبار وانا ارجع واقص التكت وادخل وكانت سهرة واعرة. وارجع شقتي واحط رويسي ونوم.
الجميل لمن الاغلب ينظر لك بأنك لا تستطيع ويتفاجئ بأنك تستطيع مالا يتوقعون.

يتبع..

ملاحظات:
ابعد كل البعد عن بنات الليل تراهم خطيرين
ابعد عن الفشخره والهياط وعيش بطبيعتك

ماشاءالله عليك ..
شوقتنا بنتظار المزيد...

تسلم حبيبي عزوز

واصحى عاليوم الرابع وفطور وقهوة في البيت وروقان واقرر الخروج من مراكش والبقاء اخر ٣ ايام هناك. وادق عالشايب وقلتله تعال خذ قروشك ومن يوصل و ابلغه بخروجي وهذي حتكون اخر ليله لي وتشكرته عالضيافة واتفق معي بتسليم المفاح للحارس في اليوم التالي ظهراً. خرج الرجل وانا البس واخرج وراه ورحت عالمول قلت بعمل شوية شوبينق وروح بعدها على قليز وقد مريت اخذت زيوت وصوابين وليفه مغربيه وبعض الاشياء العشبيه الجميله في تلك الديار.

رجعت للشقه اودع الاغراض وارتب اموري استعداداً للمغادرة غداً. اخذت شور سريع وانزل قليز ادور كفي واستمتع بالهواء العليل وقلت بما اني نويت الرحيل من مراكش يلزمك زيارة الدبليو الليله بسهره خفيفه. واتصل عليهم واستفسر عالطاولة والتكت وأئمن نفسي بسهرة الليله واخذ بعضي وعالشقه البس واتجهزه واتأكد من جميع اغراضي واطلع عالدبليو. قصيت تكت بار وطلع الشغل وقافي ههههههه وكانت سهرة حلوه وارجع البيت استعداداً للنوم.

صحيت اليوم الخامس واخرج من الشقه العصر واتجه على القطار لاستقل رحلتي متوجهاً لكازا ومن وصلت واخذ تكسي واتفق معهم وياخذني على فندق انقليزي وكان نظيف وجميل واقضي ليلتي في ارجاء كازا بلاصخب وسهر وكانت فاصل اعلان جديد وجميل ههههه واصحى اليوم الثاني الصباح بدري ادور شقه ههههههههههههه على فكرة النظام ذا جميل جدا في المغرب للناس الي زي لا خبره ولا داتا ولا معارف، خذ فندق اول يوم ودور شقتك على عينك بس مهم تكون معك برامج تساعدك في البحث.

المهم لقيت شقق جميله ومواقع ممتازه بس ماحالفني الحظ وكنت مضطر اخذ شقه وقلت مالها الا المعلنين في المنتدى الجميل ذا، ولقيتها فرصه نجربهم ونجرب خدماتهم وبعد بحث وتحري في المعلنين
وتطيح عيني على ابو اميرة واتصل عليه

أبو اميرة: الو
انا: مرحبا كيف حالك ابو اميرة
ابو اميرة: تمام الحمدلله مين؟
انا: احد زباينك وارغب في شقه
ابو اميرة: اهلا وسهلا فيك خويا،، كم شخص وكم غرفة وكم يوم.
انا: استيديو لاني لحالي وباخذها يوم اجرب واذا زان لي الوضع بمدد فيها ويمكن يجون لي شباب وناخذ شي اكبر ( طبعاً انا باقي لي ليلتين واسافر بس عاد لزوم البيع والشراء وماتخلي احد يطمع فيك.
ابو اميرة: ماكاينش غرفة في غرفتين واقل شي ليلتين.
انا: مو مشكلة بس ان شاء الله فيها خدامه وكم سعرها.
ابو اميرة:نعم فيها خدامه وشقه نظيفه وموقعها ممتاز و راح تعجبك
انا: طيب بكم؟
ابو اميرة: روح شوفها وماراح نختلف ان شاءالله
انا: لازم اعرف سعرها قبل اتحرك يمكن خارج البدجت تبعي ( هنا قدمتله صورة الحشر ههههه)
ابو اميرة: وهنا كأنه تحير شويه وملزم علي الا اروح شوفها.

وبعد اخذ وعطى قالي ب ١٢٠٠ تقريباً وقلت له غالي عليا واتفقنا اني اروح اشوفها وماراح نختلف. الرجل ذا لا يعرفني ولا اعرفه وموضوعي ذا قديم بس كان رجل في المجمل محترم وكويس في التعامل رغم بعض العيوب الي مايخلى منها بشر.

ومن شفت الشقه وتعجبني جداً و خدامه صغيره وباين على شكلها بنت حلال وادق عليه وفقلت له ايش هذا الشقه كبيره مره وانا رجل لحالي وهذا اذا جو خوياني تصلح لنا شفلي غيرها وهوا اصلن قالي ماعندي غيرها بس عشان ابعد رغبتي في الشقه هههههه المهم وهو يقولي لو تاخذها مدة اكثر انزلك في السعر واقل مدة ليلتين وانا اقول في خاطري هي ليلتين وماشي وينزلي الرجال الي فيه النصيب والصراحة ماني فاكر بالضبط كم بس كان السعر حق الناس للناس وقلت له مر خذ فلوسك وقالي مايحتاج اذا جيت ماشي امر اخذها. وارسل الخدامة تجيب عدة طبخ يومين وهنا كانت الصدمه من لذة الاكل المغربي الي اول مره اجربه وفي طبخ بيت وصراحة كان طبخ جميل ولذيذ. واقضي ليلتين في كازا بدون سهر سياحة نهارية فقط ولقيت كازا تمتاز بموقعها الجغرافي الخورافي. واقضي ليلتين جميله في كازا وارجع عالمملكة الحبيبة. انتهى،،

العذر والسموحة فالتقصير لان الرحلة قديمه شويه وهذا ماتذكره منها


ملاحظات:
المعلنين لا بأس بهم بس خل في بالك بياخذون زيادة عليك عشان موضوع الامن والامان.
لا تبلغ احد بموعد مغادرتك ولا لاحد حق يعرف.
السكن في فندق اول ليله له فوائد.
حكم عقلك قبل قلبك
المغرب له مفاتيح وبلد يسحرك بجماله وطيبة اهله اذا عرفت مفاتيحه.
عليك بالنهار اكثر من الليل اذا تبي تعرف اي بلد
عدم الافصاح عن رقمك السعودي
رمي الشريحة المغربية في زبالة المطار.

سامحوني على ملاحظاتي بس هي خليط نبع من خبرة سفر سنين ولدول كثيرة ورغم سفرتي الاولى للمغرب
الا اني اتوقع فهمها اكثر من البعض بمراحل.

وهنا سوف تكون رحلتي الثانية للمغرب في هذا الشهر وتحديداً بعدكم يوم ان شاءالله وراح تكون شمالية بطنجة وماحولها ولحالي بعد. راح انزلكم تقرير مفصل تفصيل هندي عنها.

مشكور اخوي الداخل على الطرح الجمييل والمفيد