رحلتي للمغرب مابين نوفمبر وديسمبر2019

ماقصرت
معلومات قيمة وطرح سهل

تقرير جميل جدا جدا
يعطيك العافيه اخوي DarkMoon
الحقيقة استمتعت في التغطية في السناب والمنتدى
كنت مبدع في الأثنين شكرا لك

__________________
G I N
! ! . . . ♥ . . . ! !

تقرير جميل جدا جدا
يعطيك العافيه اخوي DarkMoon
الحقيقة استمتعت في التغطية في السناب والمنتدى
كنت مبدع في الأثنين شكرا لك

__________________
G I N
! ! . . . ♥ . . . ! !

عذرا عن الانقطاع لكن حاب انهي التقرير


نكمل

بعد ١٠ ايام ممتعه وسياحيه وهواء نقي في مدينه الجمال عروس الشمال طنجة ...

احسست اني احتاج اغير الجو والمدينة وهذي من احد مميزات انك تسافر لحالك متى ماجت براسك فكرة شغل موترك وحرك لا تحاول تقنع فلان او علان

جاء وقت وداع هذه المدينة القريبة الى قلبي

انطلقت من سيارتي الساعه ١١ صباحًا من طنجة الى اكادير

طريق طويل نعم تقريبا بحدود ٩ ساعات ولكن الطريق كان جميل ومزيج من شعور الحزن لمفارقة طنجة وشعور جميل لانني مقبل على مدينه رائعه أخرى.

الجو كان غائم وممطر مالك الا تشغل الساوند كلاود وتاخذ لك قهوه وتستمع بجمال الطبيعه والطريق


وانا في الطريق كنت اشيك على اسعار السكن وكان عندي خيارات
فندق مارينا وجدت غرفه وصاله ب١٠٠٠ درهم في الليله
شقق ملاك مارينا وجدت شقة غرفة وصاله ب ٨٠٠ درهم
شيكت على فندق خليج اكادير عن طريق موقع بوكينق وجدت سعره لليوم تقريبا ٩٠٠ درهم مغربي

حجزت لمده يوم قلت خلني اجرب الفندق من زمان ودي اجربه لكن ماتضبط معي دايم يا احصله فل او اسعاره غاليه. وتم الحجز


وصلت اكادير على غروب الشمس تقريبا الساعه ٨ ونص مساء .. وتوقفت عند مطعم المشويات المفضل في اكادير سوفيداس يقع على مدخل اكادير محطة بيترومين ..والحمدلله كنت جوعان وقتها على لحم بطني ما اكلت شي اصبر نفسي اني بوصل لها المطعم وأخيرا وصلتله .. تعشيت عشاء طيب حمدلله مشاوي ولحم مبخر مع البطاطس وسلطة مغربيه واتاي الحساب ١٢٠ درهم .

بعد ما اكلت وشبعت الحمدلله جتني الدوخه الان ادور الفندق ..

وصلت الفندق وكانت موظفه الاستقبال المحترمه والخدومه جدا فاطمه..

قلت بنفسي خلني اشوف اسعارهم يمكن من الفندق يكونون اقل من بوكينق.. فسألتها كم سعر الغرفه عندكم ؟
فاجأتني يوم قالت سعر الغرفه ب ١٦٠٠درهم
قلتلها انا عندي حجز عن طريق بوكينق وأعطيها الحجز

(طلع سعر بوكينق ارخص من سعر الفندق)

المهم بعد الانتهاء من إجراءات التشيك ان .. تبعت الرجل الاسمراني الطويل الله يسعده محترم وخدوم جدا والضحكة ماتفارقه يتميز بلبسه وكأنك في العهد الأندلسي حمل الأغراض ووداني لغرفتي .

بعد الوصول الى الغرفه مشاء الله الغرفه ممتازه ومرتبه ونظيفه عيبها مافي لا صاله ولا مطبخ في بلكونه فيها كراسي وطاوله يمديك تدخلها للغرفه اذا تحب اعتقد اللي سكن في خليج اكادير يفهم وش اقصد ..

أخذت دش وعينت خير وخذيتلي نومه صحيت على الساعه٣

لبست ورحت تايقر مشي ميزه الفندق أمامه تايقر مايحتاج تحرك سيارتك من الفندق طبعا ماكنت حاجز طاوله ولا شي خذيت لي لفه سريعه وحجزت لبكره ورجعت للسكن كان فيه افتر بارتي في خيمه فندق خليج اكادير جلست فيها شوي بعدين رجعت للغرفه وهاتك نوومه..

صحاني واحد الله يهديه في ريسبشن الفندق صوت تلفون الغرفه ماسكت الا يوم رديت عليه .. قال خويا بتمدد ولا خارج ؟
قلتله شوي وارد عليك ..

صراحه جازتلي الغرفه وخصوصا السرير كان مريح جدااا والغرفة نظيفه وخيار ممتاز للوحداني

فقلت خلني امدد يوم اخر ونشوف ..
رجعت اتصلت عليه وقلت بمدد ..
وماطلعت من السكن جلست ٨ ايام كلها فيه هههههه
وصراحه ماندمت لان السكن كان على مستوى عالي من النظافه والترتيب وحتى اللي شغالين فيه اخلاقهم جدا عاليه وماعندهم حركات الاستهبال حقت الفنادق الثانيه ( عساهم بس يصملون)
عيبه الوحيد سعره في اغلب اوقات السنه غالي جدا

طبعا في اكادير كررت زيارتي لنفس الاماكن اللي زرتها وتقدرون تشوفونها في بدايه الموضوع ..

استمتعت حتى اخر يوم لي ماحسيت اني شبعت ابد او حسيت بملل .

وفي نهاية التقرير اشكركم جميعا على المتابعه وباذن الله تنزاح ازمة كارونا وترجع الحياة الطبيعية زي اول واحسن ..



راح اقولكم بعض النقاط والنصائح:-

-تجربتي مع شركة اورنج للاتصالات كانت جدا ممتازه ماتوقعت انها بهالجودة ابد في بعض المناطق تغطيتها تفوقت على اتصالات عموما هالتجربه راح تتكرر باذن لله .

-مطار كازا تحسن كثير واصبحت الاجراءات اسرع
-انتبه من رجل الدرك المتواجد عند خروجك من مواقف المطار ربما من هنا تبدا رحلة معاناة الابتزاز .. احرص دائما على ربط حزام الامان والتاكد من اشعال الانوار لان البعض يكون توه واصل وما انتبه ويقع ضحية لهم للاسف .. عموما انا وقفني وماوقفت له مو عباطه او شي بس واضح مقصده يبي يتصيد اي شي خصوصا وانا كنت واقف ادفع مبلغ المواقف اشوفه قاعد يطالعني من بعيد وينتظر احرك وهذي احد ضرائب الرنج للاسف..


-جهاز جواز للمرور السريع عند محطات الاداء كان عامل مريح بالنسبه وفادني كثير واختصر وقت انتظار كثير كان ممكن اخسره .

-لا تمسك خط وانت مرهق اكبر غلطة سويتها اول ماوصلت كازا مسكت خط لاكادير وانا توني وصل من سفره طويله ومرهق .. وكان بيصير لي حادث شنيع مع تريلا لولا لطف الله ..

-حاول لا تحمل معك مبالغ نقديه كبيره كاش في تنقلك داخل المغرب .. خل معك مبلغ احتياط بسيط بحدود ١٠٠٠ درهم في محفضتك كاش والباقي في البطاقات البنكية .معظم المحلات والمطاعم تقبل الدفع بالبطاقة

-نقل المشروبات بين المدن المغربيه ممنوع ولو طاح عليك درك وفتش سيارتك وحصل معك اي مشروبات او ممنوعات يحقله يحولك للمحكمه ..(راح يبتزك بمبالغ كبيره ورح تدفع للاسف علشان تخلص عمرك)
فماله داعي تتنقل بمشروباتك بين المدن يالزير سالم .. كل مدينه يوجد فيها محلات تبيعه لا تخاف ماراح تنقطع.


-النهار جميل في المغرب احرص عليه عزيزي المزعوط واطلع تمشى وشم هواء وغير من روتين السهر .

-لو بسافر مره اخرى للمغرب ماراح استاجر رنج هدفي من استجاره للامانه كان اني بسافر كثير بين مدن المغرب ف احتاج سياره تكون مريحه في الخط لكن للاسف تلفت الانتباه بطريقة احيانا مؤذيه خصوصا من قبل الدرك مع اني خلال شهر كامل ما خذيت مخالفة مروريه الا وحده في مراكش كان الشارع سرعته ٦٠ وانا كنت ماشي ٦٨ ودفعت المخالفه . لكن تم ايقافي كثير خصوصا في الطرق السياره بين المدن بالرغم من التزامي بالسرعة القانونيه .. واذكر من المواقف اللي حصلت لي كنت راجع من مراكش لكازا تم ايقافي بحجة ان الرادار صادني ع ١٨٠ ووراني جهاز فيه صوره بنفس لون سيارتي واعترضت على المخالفة لاني كنت مثبت السرعه ع ١٢٠ وهي السرعه القانونيه وبعد مراجعه الصوره في الرادار اتضح ان السياره تحمل لوحة غير لوحة سيارتي .. طبعا اعتذرو وكملت طريقي.
ايضا اذا حبيت تزور مناطق شعبيه بسبب مطعم او محل معين راح تعاني من نظرات الناس وماراح تحس انك مرتاح ..


نهاية التقرير

يعطيك العافية DarkMoon على التقرير

اعجبني تجربتك في فندق خليج اكادير والحجز عن طريق بوكينق

__________________
‏هلا بالصمت دام الصمت ما يجرح مشاعرنا.