فضفضة لا اكثر ولا اقل

السلام عليكم ورحمة الله وبركاته

مزعوط متواظع بين مطانيخ بهذا المنتدى ويحاول يسرد لكم قصته مع اول سفرة له

اولاً
انا متابع قديم لهذا المنتدى والله يبيض وجه كل من كتب فيه لان للامانه فادني كثير

ما علينا من كثرة الكلام
بداية القصة التعيسة لي نبداء بها في نهاية عام ٢٠١٧

طبعاً تولعت بالمغرب من خلال سماعي للاصدقاء بالعمل واخوياي

توكلت على الله وقلت يالله نبداء بالطيران

حجزت على الخطوط المغربية ذهاب فقط. انا وواحد من اصحابي

عاد المشكله ان خويي بالسفرة فلوسة ناقصة

قلت له خلنا نأجلها لحد ما يزبط وضعك

الرجال صامل وقال انا رايح رايح ومالك دخل انا ادبر نفسي
قلت له كفو اربط حزامك بعد كم اسبوع نبي نطير قال اوك


اقترب وقت الرحلة ودقيت عليه وقال الميزانية عندي مهزوزة شوي
قلت له امدد الرحله لوقت ثاني؟
قالي لا

وصل موعد الرحلة ودقيت عليه ويدي على قلبي

مع العلم اني ما احب اروح لحالي بالسفرة

جاني جوابه وكان صادم لي

قالي ما يمديني اطلع
قلت له كلام ندمت عليه هههه

قال تدري انت روح وانا ابي الحقك
قلت يالله انتظرك

عاد الله لا يوريكم انا بالطياره لحالي واول مره اطب المغرب

وقمت طول الرحلة اهوجس واقول في نفسي انا وش اسوي ، طيب لو ما جاء انا ارجع ولا اكمل

مالكم بالطويلة

قلت في نفسي يا رجال منت بأول واحد ولا اخر واحد يطلع لحاله

وصلت مطار كازا وكان التوقيت ان ما خانتني الذاكرة

الصباح او الضحى

وصلت الجوازات جنبي سعودي وقالي ترا بيطلبون فلوس

قولهم فلوسي بالفيزا
قلت اوك
وصلت عند الرجال وعطيته الجواز وكان مبتسم ويقول اول مره
قلت يب
قال نورتنا
قلت له النور نورك
نظر في بطاقة الدخول وكان نظراته للورقة مثل اللي لقى مصيبة فيها
قالي لازم تحط مكان السكن قلت طيب
قال عندك شي يثبت مكان السكن
عاد انا كنت حاجز في منتجع برستيجيا في مراكش
قلت له في مراكش
الوكاد الرجال مصمل وقال لا لازم بالتحديد
طال الكلام بيني وبينه
قال صبح علينا بوجهك الحلو
من هنا عرفت انه يبي فلوس
قلت له نفس تصريفة خوينا ما معي كاش
عصب وشاف ما فيني حيلة ختم الجواز وحذفة على الطاوله بدون نفس كاني ماخذ منه فلوس
نزلت للصرف وصرفت ومشيت مراكش
وصلت مراكش بحفظ الله ورعايته
كلمت صاحب السكن وقابلته عند محطة افريقيا اللي جنب سوبرماركت المرجان
رحت وشافني لحالي قال وين خويك

الله لا يوريكم بغيت ابكي هههههه

قلت له جاي ان شاء الله بعد بكره

جلست في السكن ما ادري وين اروح على امل ان خويي يجي ونسهر

قلت يا عمي عيش جوك لين يجي
رحت وسهرت
طلعت من السهرة ولا كاني سهرت
قاعد افكر بخوينا يجي ولا لا ههه

رجعت السكن ونمت قلت الصباح رباح انتظر رسالة تقول انا وصلت كازا انت وينك


جاتني رسالة صوتية

كنت متردد افتحها ولا لا

فتحتها قال انا ما اقدر اجي

اخذت نفس عميق ومافيه كلمة بذيئة الله يكرمكم ما قلتها ههههههه
قال وش تبيني اسوي
قلت له من البداية لا تقول خلنا نروح

المهم ما قفلت الجوال من عنده وانا اتصل على واحد من الشباب قلت له احجز لي على بكرة لجدة

قالي يا ولد اذكر ربك انت وش صاير عليك
قلت له يا فلان احجز لي وانا اعلمك اذا وصلت


الحين انا دافع فلوس سكن حقة ١٠ ايام
كيف استردها

للأمانه كانو اصحاب السكن ينحطون على الجرح يبرى

اخلاقهم جدا جدا عاليه

وتفاهمو معي ورجعو باقي المبلغ


رجعت السعودية وكان خويي بأنتضاري

سردت له السالفة كلها وقال انت مهبول
قلت لا والله خبل اللي يطلع لحاله


الغريب بالموضوع اول ما وصلت خويي يقولي اقسم بالله فلوسي توها جات حسابي اول ما نزلت من الطايرة وانت واصل


قلت في نفسي لعلها خيرة

وتوته توته خلصت الحتوته :)