وعليكم السلام والرحمة
أنا شريت شقة في أغادير عام 2017م، ولعلك تستفيد من تجربتي.
أولاً ما احتجت محامي، احتجت نوتير معتمد (مسجل عقاري)، ولازم يكون ثقة لأن بعضهم نصابين، النوتير المعتمد هو المسجل العقاري، هو الي يشيك وضع العقار الي بتشتريه هل عليه ديون على عليه مشاكل، هو الي بياخذ فلوس العقار منك بشيك مصدق وبيسجل العقد ويوثقه في المحافظة.
ثانياً شراء العقار، عليك بمواقع العقار مثل مبوب وافيتو، أقلها تأخذ فكرة عن متوسط أسعار العقار، وطبعاً بتشوف المعلنين من الشركات العقارية الكبيرة، ولا تتواصل مع المعلن عن طريق الموقع لأنه أكيد زايد السعر، بتاخذ اسم المعلن وبتحطه بقوقل وبتوصل للمعلن ولمشروعه ومشارعيه وبتروح تشوف بعينك وتسأل عنه.
ثالثاً شيء ما شفت بعينك لا تشتريه ولو بنص السعر، أي مشروع تحت الانشاء، لأنه احتمال تحدث مشاكل (نصب، تأخير، غش .... الخ)
وهذي اقتباسات لعلك تستفيد منها:
اقتباس:
المشاركة الأصلية كتبت بواسطة مهندس
أنا شريت في شهر سبتمبر الي راح شقة في أغادير.
كنصيحة شي ما شفته بعينك لا تشتريه حتى لو كان بتراب الفلوس مو عاد ب137 الف يورو ، بمعنى شئ تحت التأسيس أصرف نظر عنه، لأنه لو أحسنت الظن في الشركة فمدة التنفيذ بتصير دبل وتريبل، وإذا أسأت الظن فلك أن تتخييل وش ممكن يصير وحلني على ما يرجعلك حقك اذا رجع.
بالنسبة لي يوم شريت، شفت الشقة وعجبتني واتفقت مع الشركة على السعر وكل شئ، بعدين رحت جبت نوتير (الي هو الموثق) عن طريقي وليس عن طريق الشركة وعطيته ورق الشركة وتأكد أن كل شئ نظامي ولا توجد مستحقات او ديون على العمارة الي فيها الشقة، وكتبنا العقد واستلمته بعد 20 يوم، طبعاً النوتير يأخذ 6.5٪ من قيمة الشقة (المحافظة 1.5٪ والمالية 4٪ والنوتير 1٪)، طبعاً هذه النسبة واحدة للمغاربة والأجانب.
الدفع كان عن طريق النوتير شييك مصدق بقيمة الشقة بإسم الشركة وشييك مصدق ب6.5٪ بإسم النوتير، طبعاً من حسابي بالعملة الأجنبية في البنك الشعبي.
تشغييل عدادات الكهرب والماء بما إن الشقة جديدة كلفني على ما اذكر 3800 درهم، نفس سعر المغربي.
الي يفرق هو ما يسمى رسوم البلدية مدري النظافة للمغاربة 1000 درهم في السنة وظني للأجانب 4000 درهم، إلى الآن ما جتني.
الشئ الغريب في الموضوع انهم ما عطوني اقامة ولا يعطوا اقامة لمن يتملك عقار ، واذا ابغى اقدم على اقامة لازم اجلس في المغرب 6 شهور متواصلة، او ظني ارخي الريال من تحت الطاولة ما جربتها، طبعاً فائدة الإقامة الحالية بالنسبة لي هو شراء سيارة، تخيل شريت شقة ولا اقدر اشتري سيارة بإسمي اذا ما كان عندي اقامة
مع التحية
جتني رسوم البلدية في السنة تقريباً 2000 درهم، وسألت ناس مغاربة في العمارة جتهم 600 درهم على أساس أنه مسكنهم الملك الأول، والمغربي الي عنده سكن من أول جته زي 2000 درهم.
اقتباس:
المشاركة الأصلية كتبت بواسطة مهندس
بحكم التجربة
عند خياران لا ثالث لهما
الخيار الأول كاش:
تمر بنكك في السعودية وتسحب المبلغ وتحتفظ بايصال السحب، واذا جيت المطار في السعودية وبعد تختيم الجواز وقبل التفتيش، تخبر الضابط أن معك مبلغ كاش تبي تصرح عنه، بيجلسك في مكتبه ويتصل على موظف الجمارك، بيجيك موظف الجمارك يعطيك نموذج تعبيه، وبيصور جوازك وايصال السحب، وبيعطيك صورة من النموذج الي عبيته بعد ما هو يوقعه.
اذا وصلت المغرب وبعد تختيم الجواز واستلام العفش، عن التفتيش بتقولهم معي مبلغ بصرح فيه، بيحولونك على مكتب وزارة المالية بتعطيه صورة النموذج وايصال البنك وبيصور جوازك وبيعد المبلغ، وبيسجله في دفتر عنده وبيعطيك ورقة افصاح مسجل فيها المبلغ.
تروح أي فرع للبنك الشعبي فقط لا غير، وبتفتح حساب أجنبي وساومهم على سعر صرف زين قبل لا تعطيهم المبلغ وورقة الافصاح وجواز سفرك.
الطريقة الثانية:
تروح المغرب وتفتح حساب أجنبي في البنك الشعبي باسمك، وتاخذ الايبان وتحول من حسابك في السعودية بالريال السعودي، والتحويل ياخذ عشان يوصل 6- 7 أيام.
المشكلة في هذه الطريقة أن سعر الصرف ما تقدر تشوفه الا اذا دخل في حسابك، وراح ياخذ البنك الشعبي 100 درهم رسوم للحوالة غير رسوم بنكك في السعودية.
أنا أتبعت الطريقة الأولى وكان مبلغي أكبر من مبلغك من 4 شهور والوضع كان اوك.
وكنصيحة اذا جيت تشتري أبعد عن السماسرة، عليك بموقع مبوب ممتاز وحتى لو ما حصلت طلبك أقلها يعطيك فكرة عن الأسعار في كل منطقة.
وطبعاً اذا جيت تشتري يكون عن طريق اصدار شيكات مصدقة في حسابك في البنك الشعبي، لا تدفع كاش أبد.
واذا بغيت أي استفسار عن الشقق وأسعارها في أغادير فلا يردك الا الكيبورد.
تحياتي