حسبي على الايام والحظ الردي

بعد تمشية على الكورنيش واجواء كانت خرافية ما بين ضحك واغاني ،

العمدة كان كيوت، تراه مو بسيط يجي منه امكانيات

استقر بنا الحال في كافيه اسمه وود



المطعم عبارة عن دورين وتصميمة جميل ورائع طلعنا الدور الثاني وجلسات وانت تشوف الكورنيش ولا اروع

مع اننا كنا محط انظار الكثير من الناس الا ان كان التطنش هو السياسة ، المكان زحمته حلوه مش اللي تضايقك ، وقضينا وقتنا فيه وبصراحة ما حسينا لاننا كنا مره مبسوطين

التفت علي العمدة وهو يقولي تتذكر (****) قلت له يوووه والله ايام صحيح الحياة مدرسة وتعلم ، ما ادري وش اخبارة وش الله قايل به ، كانت ذكرى حلوه.

كنت اقول للعمدة دايم، لما تعيش موقف او مواقف مع اشخاص تذكر فقط اللحظات الحلوه وتجاهل كل هو سيء ، لان السيء راح يبدا يبني فيك افكار الانتقام والحقد

فكان هذا مبدأي ،

بدا التعب يطلع علينا قطعنا الشارع لماكدو ، كان صديقي الجديد يقول لي وش رايك نروح السينما اللي في المول، شوي الا العمدة يسمع وينط بسرعة ويقول اللحين عرفنا من الكيوت

وهم يتكلمون وانا بدأت تفر الدنيا فيني وانا استرجع شريط الذكريات لما حظرت اول فلم معاه في المغرب، سرحت وانا اتذكر وكان لسان حالي يقول كل ما قلت هانت جد في العلم علم جديد

اي والله حسبي على الايام والحظ الردي ،

تعذرت من صديقي الجديد وقلت له لا نبي نرجع الشقة لان التعب مبين علينا ، بديت اخلق الاعذار للرجوع ، تعشينا ورجعنا للدار

كانت ليلة هادئة بانغام في قمة الروقان تخللها بعض الضحكات والافلام اللي والسكتشات اللي تخلق اجواء لقضاء ليلة ناجحة.

كانت نوم جميلة ، صحينا قبل الظهر ولسان حالنا ينطق بالرجوع وانا الخاطر باقي ما شبع من طنجة

اخذنا شنطنا وقفنا طاكسي وانطلقنا لمكان احلى من سابقيه وهو كافيه كابتشينو





افطرنا وجلسه جميلة واجواء نهارية رايقة رايقة

ومن بعد على المحطة القطار اخذنا رحلة بعد ساعة ونص ورحنا للمول اللي جنب المحطة نتمشى

شرينا بعض الاغراض ، المول متواضع كعادته قولة العمدة محفوف

ركبنا القطار ووينك يا درب المحبة ، كازا .

عدنا لكم ،،،

بعد وصلونا للجوهرة مدينة الدار البيضاء قررنا اننا ننفصل عن اصدقاءنا وانا والعمدة نروح للدار

كان للعمدة بعد نظر ????

ما عليكم العمدة خطير البوقوس

وصلنا الدار وريحنا وكان الطاجن قاعد يبقبق نزلنا قشنا وعفشنا وطاح العشا

اتذكر اني شور واخذت لي غطه خفيفة وصحيت على صوت طرب في الصالة

الا المفتري جالس في الصالة ويطالع فيني ويقول لي يا خاين وانا اطالع فيه واضحك

كان زايرنا اليوم برفقة المفتري اصدقاء جدد تعرفنا وتعرفنا عليهم وضحكنا سوى وقضينا يومها بوضع في قمه الهدوء

كانت ليلة روعة هائة قضيناها بانغام جميلة إلى ان حان وقت النوم

اجمل شعور في السفر ان تصحى من النوم وانت صافي الذهن غير مبالي بكل ما يحدث من تفاهات قد تحرك حنين او شوق لشيء انت المستفيد الاول من فقدانه

وفعلا كان من اجمل الصباحات اللي صحيتها في المغرب ، صحيت متاخر بعد نومه عميقة طلعت على ريحة القهوة اللي كانت قد ملت البيت بطيبها

الا العمدة مروق على الاخر هو وصديقة جلست معاهم واحنا في جو هادي مسكت جوالي وشغلته بعد ما كنت متعمد اني ما اقرب له

واحصل مكالمات وارقام ورسائل من شخص في الرباط قد يطلب نجلس سوى مرى ثانية لعلي اعيد عجلة الزمن ونعيد المياه لمجاريها ونكمل ما توقفنا عليه في السابق

ما كان تصرفي الا اني قفلت الجوال ورجعته في الشنطة وقلت الا هنا وبس

ما اخذت الا العمدة بدا بحركاته المعهودة اللي اذا سواها اعرف ان وراه بلا

بلغ العمدة صاحبة اننا بنطلع ونرجع على العصر وانتوا لا تطلعون من الدار

وانا اقول الله يستر من سوالفك يا عمدة ، وبعد فطور من النوع اللي يخليك تخدر وتروق قمنا ولبسنا وطلعنا نتمشى في شوارع وسكيك كازا

ولا وقف العمدة الا عند نفس المحل حق الحمام وانا اقوله وانت ما تعرف الا ذا ولا مسويلك شي احنا ما نعرفة

قال انا ما ابي الا هو ، بعد تحقيق اصرار وتحقيق طلع الرجال متولع ، ففهمت السالفة

اخذت هالمرة بكج كامل من الى جلست عندهم حدود 3 ساعات ، صحيح تحليل لمعنى كلمة لبدنك عليك حق.


فاصل خفيف لطيف ونعاود

صورة للمحل اللي بمراكش ديال الحمام

لحظة تامل،،،،

بعد اخذ جلسة تحت مسمى لبدنك عليك حق ، هادئة محقق لجميع ما يقتضية الاستجمام من متطلبات

خرجنا انا والعمدة من المركز واحنا في قمة النشاط والحيوية والهدوء

ركبنا الاوطوموبيل وطلعنا نتمشى بين جنبات وشوراع كازا وقف لسان حالنا بشرب فنجان قهوة وحلا

وانا اللي انشب بالعمدة واقولة الا نطلع على روزفلت اللي في عين دياب ، ويقول تم

وفعلا جلسنا وتقهوينا كانت اجواء حلوه ، كان العمدة منشغل بالاتصالات وانا بديت اشرد بذهني حتى

جت اللحظة اللي ما كانت بالحسبان ابد ، دخل شخص للكوفي وكان يشبه إلى درجة كبيرة صاحبي اللي بالرباط

طبعا ، مش هو ولكن يخلق من الشبه 40 سرحت وانا اشوفة حتى بدات ترجع علي علامات ضيقة الصدر

في تاملي بديت استرجع واراجع كل اسباب انفصالنا ، خفت اني ظلمته ، لان الظلم ظلمات ، وان تموت مظلوم خير لك من ان تكون ظالم

قمت من مكاني وطلعت من الكوفي لوحدي احاول اخفف من الكتمة وضيقة الصدر اللي فيني ، صحيح اصعب شعور على الانسان ان يكون جرحة في قلبة

وخصوصا لشخص كان يعني لك شي ومش اي شي....

قمت امشي وبعد مرور وقت لقيت اني خليت كل اغراضي على الطاولة عند العمدة ومشيت لاكثر من نص ساعة بدون احساس.

الله كريم ،،، وربي يعوض

رجعت للكوفي والعمدة يقول انت مو مضبوط يا صاحبي ، وارد علي "لا تنشد عن الحال يا عبيد"

حاسبنا وطلعنا من الكوفي وعلى الدار وكانت ليلة صاخبة برعاية العمدة والمفتري

قررت اني اعطي نفسي جل اهتمام وابدا انظر للدنيا لنفسي فقط وانا انفض العوالق الموجودة على كتفي واللي اقدر اني اسميها بالغبار اللي يرجع كل ما توقفت

كان هذا مبدأي ، صحيح اني الا اليوم اتذكر ومرات اتالم لكن كل ما تذكرت اني رجعت للحياة وقمت اشوف الدنيا بمنضور اخر عرفت مدى كم كنت محظوظ ومسير في هالدنيا ولست مخير.

ويضل القراد قراد والبعير بعير.

فاصل ونواصل،،،،