معلومات عن الجزائر

مساء الخير ....انا سبق وزرت الجزائر .
النصيحة كانت تباع ثم تهدى ....ثم تذاع ومحد ياخذها .

خلكم من كوفيد والوباء اللي اسأل الله العظيم ان يزوله ويرفعه عنا وعن باقي بلاد المسلمين .

الجزائر اللي يروح لها فقط للصيد والمقانيص وعساك تسلم كل البلاصات محميات شيوخ وتجار الخليج من الدبداب الى تيندوف .
بتكلم عن تعامل الجوازات والشرط في غاية السوء قاسين جدا تقول انك ذابح ابوه .
الشعب ثوري ...وغجري الا البادية اهل الصحراء طيبين وكريمين بشكل غريب عجيب يعجز لساني كيف اكتب عن كرمهم وحسن ضيافتهم وحبهم للضيف بدون اي مصلحة او نفاق .
عموما تجربة وعدت مع اني من عشاق الصيد والقنص وعزالله يالابيض ووادي بوناموس والشفر والبنود ان تشوف الكدري والحباري والطيور اشكال والوان بس العسوس والدرك في كل مكان يطبحون عليك وانت بنص الصحراء يفتشون عن تصريح الصيد والصقور وووو ....موال طويل عريض .
لحد ينشدني عن السهر ومالسهر لان البلد محافظين بشكل رهيب ...اشوف يروحون البحرين حقتهم (تونس طبرقة وعين دراهم والعاصمة) ويرجعون .
البلد رخيص مرة مرة ....الاكل في مستوى الاكل المغربي الثقافة المدن الغربية ثقافة ومعيشة مغربية بنسة ٩٠% المناطق الشرقية يشتركون مع تونس في كثير من الامور .
كونت صداقات كثيرة
وصار لي مواقف صعبة كثيرة من نصب وخداع من متعهدي الصيد وسماسرة كرا سيارات المقناص وتجهيزه وحمد لله رحنا ورجعنا والحافظ الله .
لكن لن اكرر التجربة الا اذا رحت لطبرقة وعين درهم التونسية لايمنع من دخول الجزائر والوصول ل بجاية وجيجل وزيارة الاصحاب في سطيف وبني مسالي .

دمتم بحفظ الله ورعايته .