السلام عليكم جميعاً
عذراً عن التاخر في الرد
اشياء مريت فيها نحتاج نستفسر عنها قبل السفر علشان لانقع في فيها
الحمد لله لايوجد حجر لاني وصلت في يوم ١٤ يعني لو تاخرت او أجالت يوم كان ماسافرت راحت على الي يبي يسافر يوم ١٥
ورقة البطاقة الصحية لاحظت انه الي ياخذها منك مايقراً بس يشوف ويتاكد انه مستكمل والتوقيع لان زحمه الناس ياخذ ورقه ويشوف ويحط وياخذ ويحط بس يتاكد من التوقيع لكن من واجبنا لهم نستكملها بمصداقية وهي في النهاية ورقة اقرار
الجوازات ماسالوني عن الفندق مع اني طابع ورقه حجز فندق ماسالني عنها ابدا
لاخذ الشنط تعبت فيها اضنه مسار واحد وفيه شخص ينزل من السير ويحط في الارض يعني ممكن شنطتك ينزلها علشان زحمة الشنط فوق السير فإذا وصلت الله يحفظك تابع السير وتابع الشنط المنزله
الجوال تاخذ شريحة في نفس المنطقة الي فيها الشنط اخذت شريحة ناسي كم دفعت ٢٠٠ او ٣٠٠
تحويل العمله انتبه .... لاتحول الا بعد ماتطلع من التفتيش لان سعر الصرف يفرق قليل لاني حولت عمله قبل التفتيش في منطقة الشنط بسعر ٢.٢٩ ولمن طلعت علشان افتح حساب في وفاء كاش لقيت سعر الصرف ٢.٣٠
انا متابع في المنتدى سعر الصرف يحدث بشكل يومي وعارف المتوقع ولمن شفت السعر توقعت انه نفسه لكن الفرق بسيط لكن حق المسافر ياخذ افضل عرض
الحين طلعت علشان تودع في حساب وفاء كاش ماتشيل مبلغ في جيبك .. لازم تجع الله يحفظك لمنطقة الشنط لانك نسيت تاخذ ورقة تنقل وترجع بتفتيش جديد وتدخل تلقاه في الوسط تقوله المدن الي تبي تزورها ويكتبها لك ويختم عليها كيذا انت نظامي والحين تطلع مره ثانيه
وفاء كاش تاخذ من عندهم الى حد ٥ بطاقات تودع فلوسك فيها علشان ماتشيل كاش في جيبك انا اخذت بطاقتين وحطيت في كل بطاقة مبلغ عندك حد سحب يومي ٦٠٠٠
طبعا الي في وفاء كاش وعارف انك ربما ماتعرف لطريقتهم للامانه الي في الفرع متعاون ويشرح يقول افكها لك ويفك الظرف بعد مااقول ايه ويطلع البطاقة ويطلع ورقه ويلتفت الجهه الثانيه علشان مااشوف ويقول صورها بالجوال هذا الرقم السري
ونفس الشي مع البطاقة الثانيه
تنزل لشركات التاجير انا كنت مرتب مع احد الشركات مااحب اذكر اسماء لكن تعامل راقي واخذت سيارة
طلعت من المطار واحصل ٢ عسكر واقفين في نص الطريق يقولون وقف ويأشر وقف يمين على التراب
وقفت وفتحت الشباك يقول مسرع وانا ماشي اقل من ٨٠ قلت ماني مسرع قال الا مسرع قلت ماني مسرع انا ماوصلت حتى ٨٠ قال السرعة هين ٦٠ والرادار لقط السيارة
انتبهو ياجماعة داخل المطار خط وسيع سريع ترى السرعة ٦٠ ويمكن يخالفوك عليها انا مشوني الحمد لله عارف اني اول مره اجي ابتسم لي قال لاتتجاوز ٦٠ في هذا الطريق وبعد مسافة ممكن ٨٠. تشوف لوحه
رجل متعاون
طبعاً اختلفت مع احد المنتجعات قالو الجواز يبقا عندنا قلت لا يتاجرون بدون حجز جواز او بمشي قالو كلهم يخلوه هينا قلت الي بيخليه بكيفه ترا غير نظامي حتى انتم لمن تطلب حجز الجواز طلبك غير نظامي وفعلا مااتفقما ورحت وتركتهم وشفت غيرهم بدون حجز جواز جوازي معي ... انا لا اريد ان اسمي اي منتجع لكن الي يواجه لاتعطي جوازك لاي منتجع مالهم اي حق قانوني لطلبه .. الجواز وثيقة رسميه تبقى معك، سكنت في فنادق كثيرة ولا احد قال جوازك يبقى عندنا ..
تعامل الناس راقي جداً للامانه مالاحظت الي تقولونه هينا ماشفت ابتزاز او طلب بخشيش ماواجهت
ونستودعكم الله