هل ينسحب البساط من المغرب (السفر الى اوكرانيا)

حياكم الله من جديد و اعتذر على التاخير

و نتابع

ثاني يوم في كييف خليتها مولات و محاولات تشبيك فاشله بالنهار و بالليل سهرنا في منطقه فوق الجميله مع انها بسيطه جداً
خل فندق ريفيرا هاوس على يسارك و النهر في ظهرك و انزل مع الشارع الصغير 1 كم بس و بتلقى كافيهات و بارات جلساتها على الشارع
بالنهار هاديه كثييير و بالليل جوها روعه
جلسات بسيطه بالهواء الطلق و دي جيه و فلها بوسط الشارع
طبعاً مو دايم زحمه حسب الدوامات عندهم بس ذاك اليوم كنه كان في احتفال بفوز اوكرانيا او اجازه
الزبده السهره للساعه 6 الصباح ولا اروع
ثالث يوم في كييف قررنا نروح لفيف
و الله وكيلك 6 ساعات ندور سياره لاننا كنا نبغى جيب وسيع شوي لكن للأسف الديره مو جاهزه للسياحه
كل السيارات طالعه و بالموت لقينا برادو عند شركه اسمها Icar مديرها واحد اسمه ديما رجل زي العسل و متعاون و ما طلب رخصه دوليه مثل الباقين و قال السعوديه تكفي
حسب علينا البرادو 2021 جديد ب 185 دولار باليوم و تأمين الف دولار
مالكم بالطويله
دقينا سلف من كييف الساعه 6 بالنهار طبعا الشمس تغيب الساعه 9
و وصلنا لفيف الساعه 3 الفجر
حنا رحنا مع الطريق الزراعي و تأخرنا شوي بالوقفات الكثير
طبعا طريق ولا اروع و اعتبره تمشيه لحاله
مع الطريق قطع علينا الخط جميع الحيوانات و منها الغزلان (حلالاه ي الشوزن)
وصلنا تعبانين، اقرب فندق و نومه ي الحبيب
صحينا و اخذنا لفه على الاكواخ وللأسف اغلبها فل و اضطرينا ناخذ واحد غالي (السياح مناحشين عنه بسبب سعره) اختصارا للوقت
الكوخ تبع فندق بانوراما 4 نجوم روووووووعه و فخامه لابعد درجه
3 ادوار 4 غرف نوم و صاله كبيره و غرفه طعام و مطبخ محهز بالكامل من و الى ب 2000 ريال باليوم
استلمنا الكوخ و طيران على السنتر حقهم الي فيه الالعاب
من زيب لاين الى تليفريك الى القفز الحر بالحبل و جيت سكي بالبحيره ثم من التعب مساج في المحل الي جنب البحيره (رجال احترافيين بالمساج)
بعدها قعدنا بمطعم عنده شيشة بالسنتر و ريحنا شوي و بعدها على شبك الغنم
اخذنا هرفي لباني و ذكيناه و عطيناه راعي الشبك وداه مطعم قريب و قطعه و جابه لنا الكوخ مع الشيف
الشيف يشوي و حنا سامرين بحوش الكوخ الي مطل على لفيف و الاجواء كانت ضباب
و بكذا انتهى اول يوم بلفيف