قد تستغربون إذا قلت لكم أن أسؤ رحلة كانت عام 2019 بعد رمضان قبل بداية كورونا بست شهور على طيران الإمارات
ومن عادتي اقتناص أوقات التخفيض بشراء التذكرة قبل الرحلة بشهور لأني أسافر على درجة رجال أعمال سواء على القطرية أوالإمارتية أوالخليج
المهم .. في طريق الذهاب إلى المغرب كل شئ تمام صالة الإنتظار دلع في دبي على البزنس كلاس
لكن في طريق العودة من كازا غلفت الشنطة ورحت عند الكاونتر واخبرت الموظفة أني أحتاج الشنطة في دبي لأنه وصولي دبي 6 صباحاً والسفر إلى الدمام 1 صباحاً دخول اليوم الثاني .. يعني ترانزيت طويل وباخذ فندق بالجي بي آر أريح واتمشى بدبي ..
قالت اللي قدامي قانون تذكرتك استلام الأمتعة من الدمام .. حاولت معها دون فائدة .. قالت بالطيارة اخبرهم وهم يحلون هذه الإشكالية
طلعت الطيارة .. وطلبت المسؤل وطلعت إمرأة (سوبرفايزر) الصراحة ما قصرت وتواصلت مع مطار دبي عن طريق الإيميل وشاشة العرض .. والطائرة كانت العملاقة ايرباص A380 والإنترنت متوفر على الرحلة حتى أني حجزت فندق هيلتون ممشى جي بي آر دبي من الطيارة
كل المحاولات مرفوضة وعطتني ردهم إلكترونياً
أخيراً قالت تواصل مع مكتب أمتعة دبي إذا وصلت
وصلت دبي ومن مكتب إلى مكتب دون فائدة
ونشبت بأمن المطار وطلع معي إماراتي ووصلني إلى مكتب الإماراتيه الإداري بالدور الثاني وكان هناك فلبيني وأردني وكنت أطول صوتي أبي الأردني يتداخل بالموضوع .. لكن يسوي نفسه ما يسمع .. وأخيراً يكلمني أنجليزي من طرف خشمه .. يقول إذا بغيت الشنطة لازم ترقي تذكرتك وتدفع تقريباً 2500 ريال
بعدها فصلت الأسلاك معي وبديت أصارخ وين الشرطة وين البوليس .. وأقول أنا أغراضي بما فيها علاجاتي بالشنطة وأحملكم كامل المسؤلية هذا وأنا درجة رجال أعمال ومعاملتكم كذا ..
قالوا تذكرتك صح بزنس لكن مخفضة وقانون تذكرتك استلام الأمتعة من الدمام .. قلت كيف مخفضة وهي بسعر 7000 ألاف ريال ..
قالوا ليه ما قريت الشروط .. هنا ركبتني الشياطين وبديت أصارخ أبي البوليس أبي علاجي والله ما اخليكم إذا جاني شئ
الزلابه الأردني صار يكلمني عربي ولا أرد عليه .. شوي ويجي هندي وياخذني لمكتب كله موظفين وجلسني وهداني شوي .. قلت أبي أركب الشريحة فك الدبوس اللي ماسك اسمه على الكوت
بعد شوي واسمع صرصرت كفرات عربية .. أخيراً جابوا الشنطة
طلعت من المطار 9 صباحاً وأنا واصل 6
رحت للفندق وما عرفت ارتاح من القهر
ومن يومها كرهتهم وكرهت طيارتهم
آسف جداً على الإطالة
Sent from my SM-G998B using
مزاعيط المغرب mobile app