برمه المغرب ويزز

مرحبا شباب

عندي اجازة اسبوعين وطلعت شنقن وحجزت على الهبه طيران ويزز الوردي
من الرياض الى ڤيينا باخر سبتمبر والامور تمام ومرتب كل شي
لكن بطني ماغصني من سالفة الالغاءات الي تصير بهذ الطيران في بعض الحالات والا كثير من الناس يمدحونه وطايرين فيه المهم لازمني خطة بديله لو الغيت رحلة ڤيينا عندي تذكرة غير مستخدمه ع السعودية للمغرب مخليها خطتي الاحتياطيه مجرد مايلغون رحلة ڤيينا لاسمح الله بروح المغرب

وعشان كذا ابرتب الوضع احتياطاً مع اني عارف بالاخير بسحب على ويزز وابو ويزز وبدزز للمغرب بكن اسم اني حاولت اجرب اغير عن المغرب ياووووك عجزت ابطل هالادمان لكن النيه موجوده صراحه وابي اعسف روحي واروضها يعني ياروحي ياحبيبتي ان مارحتي لاوروبا والله يامراكش واغادير ماتشمين ريحتها بستنذل في روحي وبوديها الرباط او طنجه وان كنت افضل طنجه ماعمري جيتها

فلذلك ابي كل شي عن طنجه
ابي فزعتكم ياعيال لاتصيرون معي ضد روحي ترا روحي مسكينه بلحالها ولاهو ذنبها انها تحب الزين ماعلينا عاد انتم وضميركم

ابي فندق فلاوي سمح و يسمح
وابي شقق زينه بالحيلل لو مليت من الفندق
نومي قليل مرررره لو افقد ولا انام الا عقب الفجر حدي 10 وانا مثل الجني صاحي وين اروح مكان فطور هادي قريب

ابي اماكن تمشيه حليوه مااحب المشاوير البعيده حقت الاورستقراطيين مو جوي مع احترامي ل الي هذا جوهم يعني لاونج حلو تتكي فيه تالي عصير تديها بالغازيات عشان ماتعبي هوا

ومطاعم حلوه للغداء والعشاء وللاهم الختمه تالي الليل

ابشركم اعرف اسوق بس ماراح استاجر سياره لاني قليل حيا ممكن اشغل واذوس وانا مديها فاسلم شي تبعد عن الشر وتغني له

والله ياعيال كنت مرتاح في مكان اسمه برمه ورا الجنادريه مخيم وتاكي فيه انا وخوياي الله يرحمهم صار عليهم حادث وانقرضو كلهم وقعدت بها وماسليت الا يوم جيت المغرب لاعاد عليها من جيه بس خل عنكم جو هي الوحيده الي نستني برمه واهلها يويل حالي وياويل الي ماله والي

المهم مالها داعي الكلمتين الي فوق بس احسن اقولها هما بدل ماتمسك صياح مع اول قريقوس يطيح بيدي


عرفتو حجم المعاناه فبليز ياشباب افزعو واستعفرو بعدها تكفون مراكش بنت اللذينا لعبت في حسبتي وحرتني على وجهي المره تلو المره تلو المره بس الحق يقال غسلت كبدي ونشفت دموعي وعرفتني على ناس حلوين ابي فرقاهم جتني بواصير من رحلات المغرب رايح جاي

امحق هذي وهي خطة بديله اقطع يدي اذا سحبت على ام طيران ويزز
على فكرة ياعيال ترا فيه رحلات لمراكش واغادير من روما وميلان ل الي يبي الرخص بتذاكر المغرب يعني تطلع عليه الرحالة ذهاب واياب اقل من الف ريال بس ترانزيت ولاقد جربته صراحه


وبالختام المستحيل حصل ياعيال النصر لاعب مع سان جرمان في اليابان ويلعب معه رونالدو والجمهور كيم كارديشيان يعني ماعاد فيه شي مستحيل ضبطوني ياعيال لاهنتو

كل شي موجود بالمنتدى

شيك على بوابة طنجة تلقى سكن واماكن حلوه

كل مدينه سياحيه لها بوابه خاصه فيها بس ليش ماتحبون تقرون شوي

ابشر طال عمرك بروح اقرا وبرجعلك تسمعلي