خيبة امل كبيره في باكو .. النصب و الإحتيال بجميع انواعه و فوقها غلى الاسعار

برد عليك مع اني اقهرت من تصرفك ولكن الله يعوضك

انا من رواد اذربيجان
المفروض يوم حجزت من بوكنق وجتك رسايل اللي يقول انه صاحب الشقه واللي يقول بجي اخذك من المطار وذكرت انه جتك رساله ثانيه ان واحد ثاني قال انه صاحب الشقه كان سحبت يبوي هذولا نصابين
انا اذكر مره قلت باخذ فيلا وفعلا حصلت في بوكنق وحجزت ويوم رحت الا وهي غرفه وصاله بس وفي بوكنق كاتبين ثلاث غرف والله بوجه قوي قلت لا كذا انتو كذابين ومشيت وخليتهم وهم يناظروني وانا اركب التكسي وامشي
ياحبيبي لا بوكنق ولا خرابيط ، انزل الطار خذ شريحة نت اطلب بولت دقيقه وهو عندك لاتركب مع حقين التكاسي ابدا ، اطلع مع بولت نظامي انزل في احد دواعيس شارع الشقق واجد والسكن خياراته واجد احجز وانت شايف بعينك اللي ماعجبني والله ما اسكنه ولا ادفع ريال لو يقوم البقس
بعدين سالفه ايجار السيارة البد مايحتاج تستأجر سيارة ماهو مثل المغرب
ياحبيبي اذا بروح قوبا وقبلا عندك مرشدات سياحيات بنات اليومية ب 100 دولار ماتخلي بك مكان وحلوين وسوالف ووناسة وسيارات حديثة
لاتاخذ رجال خذ بنات مرشدات سياحيات عسسسسسل
والبلد نوعا ما رخيص انا اطلع 5 ايام ماتكلف 4000 ريال وحنا ثلاثة وكل يوم سهر بعد وناخذ هدايا لأهلنا
لو بحثت هنا في الموقع كان الشباب علموك بالشقق الزينه ولو سألت عن مرشدات سياحيات كان علمناك واعطيناك ارقام ووصينا عليك بعد
انا والله بالواتس احجز الشقة وكل شي
شقة ثلاث غرف نوم وصاله ب 220 ريال 100 منات

اصلا من يوم ركبت مع السواق اللي جاك المطار وتقززت منه ومن تصرفاته ويوم نزلت الا والمكان موحش والعمارة ماهي اللي شفتها كان قلت توكلو على الله ومشيت وهم يناظرون وش بيسوون مثلاً
ان طالت عطه حق التكسي وامش
بيهاوش مثلا يبيها هوشة والله لأتوطى في بطنه ولا بيسوون شي اصلا الشرطة بكل مكان
لكن اشتري راحتي وادور على شقه او فندق وارتاح من اولها
من يوم قلت ضخم الجثة شكلك قمطت هههههه
والله ياخي اني انقهرت عليك وعلى اللي صار معك بس ولو الواحد مايسلم رقبته للناس خلك واعي وقوي شخصيه
واذا ديورت مقلت ما ابي الشقه خلاص قامت القيامه عادي ياحبيبي لاتخاف ما اعجبك امش وخله باكو كلها شقق على مستوى وررررخيصه مرة وبتستانس فيها لدرجة ان بعض سهراتنا فيها وكل شي يجيك حدك

باكو حقت استجمام ثلاث اربع ايام
انا احبها هي وتبليسي وقت الشتاء خاصة مع تساقط الثلوج
راحه واستجمام من تعب الدنيا فقط
ما اقول انها بلد وااااااو
لا حقت تغيير جو وراحه فقط
وبالفعل حلوه وجميلة وناسها حلوين جدا

ياحبيبي انا يوم اقولك مرشدات سياحيات ابي اوضح لك ان الموضوع مايحتاج ايجار سيارة الموضوع اني ابي اعلمك انك ترتاح من السواقة بدون فرامل وتجلس تسحب جلنطات
يوم اقولك مرشدات راح بالك على طول الي بالي بالك وانت غلطان بصراحه ، الدعوه انك تركب مع ناس فاهمه وترتاح من المشاوير واللي بتدفعه في ايجار السيارة تدفعه للسيارة بسواقها وترتاح
ويوم تقول ماودك تتعب اخوياك هذا انت تعبتهم وسكنتهم طوال الرحله بمكان موب زين وتفشلت منهم كان من اولها قلت انا اسف ما ابي الشقة واقرب شقق تشوف لك الزين وترتاح طوال الرحله
على العموم اتوقع لم يحالفك الحظ وسؤ التصرف ولكن الحمد لل على السلامة وكل دقه بتعليمة

اذا ماعليك كلافه
عطنا تجربتك عن جورجيا وارمينيا نستفيد

اشكرك على مداخلاتك ، كل نصائحك و حلولك يابو علي تدل على ان البلد غير سياحي و فيه نصب و استغلال .. ترا و انا في المطار فكرت اسحب عليهم و اشوف لي فندق محترم في باكو لمدة يوم و بعدها اضبط اموري و لكن فيه رأي اخر غلب عليه و هو اني امشي في المغامره ذي و اشوف نهايتها لانه بدأ يساورني شك ان فيه خربطه بتصير و قلت لاصحابي شكلنا مقبلين على مغامره ماهي بحلوه قالوا اتكل على الله خلنا نشوف اخرتها .. يعني لم يكن غائب عن بالي هالكلام ، و الرحلة ما هي رحلة دلع و فخامه و لازم اني ما اتعرض لأي موقف و الا بألغي رحلتي و ارجع .. هي رحلة عادية نبغا تشوف فيها البلد و الناس و الخدمات المتوفره .
فكرة اني اخذ سائق و سياره امر غير وارد عندي نهائيا ولا عمري استخدمته .. ما اخذ راحتي الا بسياره اسوقها بنفسي و لكن لا شك ان هذه رغبات و كل واحد و طريقته و كانت هذي رغبتي انا و اصحابي .. و تراني ما تفشلت منهم الله يهديك .. هم ماهم ضيوف في بيتي، هم معي في رحله استجمام قصيره .. بعدين الشقه اللي عطونا كبيره واسعه و نظيفه و فيها بلكونه تطل عالشارع الرئيسي و فيها 3 دورات مياه و لكن شكلك ما انتبهت لكلامي .. اقول انها ليست 5 نجوم مثل ما هو محدد في بوكينق .. الصور شي و الواقع شي ثاني ..قضينا فيها يومين و الباقي قضيناها في كوخ ممتاز في قبالا و في فندق جميل جدا في باكو.
يا عزيزي .. وش ذا البلد اللي لازم ما تركب في تاكسي من المطار خذ بولت و لا تسكن فيه من بوكينق روح شارع نظامي و شف في دواعيسها شقه بعدين ضبط امورك و لا تستاجر سياره خذ لك سواق بسياره و لا تاكل في مطعم الين تشوف المنيو ( ترا فيه منيو سياحيه و منيو محليه ) .. و لا تسافر الين تشوف من يدبر لك ارقام سواقين و يشوف لك شقق و لازم تبحث في المنتدى و تعرف على التفاصيل الخفيه لهالبلد عشان ما تواجهك مشاكل ؟ فيه بلدان عربيه رحتها واجهت اسوأ من كذا بكثير من سرقات و مهاوشات و نصب و استغلال و لكن كان هالشي متوقع و معروف عن هالبلدان لي و لغيري ولذلك لم اعرض هالتجربه في المنتديات .
على كل، ما يمدح السوق الا اللي ربح فيه، و انا اعطيتكم الوجه الاخر لهالبلد و الشغله ماهي تقليل في اراء او رغبات ولكن للإستفاده لمن اراد.
تحياتي للجميع

اقتباس:

المشاركة الأصلية كتبت بواسطة ضاري٢٠٢٠

اذا ماعليك كلافه
عطنا تجربتك عن جورجيا وارمينيا نستفيد

جورجيا و ارمينيا ما زرتها و لكن اقارب لي زاروها و اصدقاء و لا يمدحونها ابدا .. من تنزل المطار تتوقع مشاكل .. الفساد مستشري فيها اكثر بكثير من اذربيجان .. ممكن يرجعونك من المطار لاسباب لا تعلمها .. البنية التحتية للبلدين تعبانه جدا .. الخدمات ضعيفه جدا و لكن الشعوب ودوده و التعامل معهم مريح .. انا وقفت على حالة في المنفذ البري من الشمال التركي مع جورجيا (منفذ سارب مدخل مدينة باتومي ) رجل سعودي و زوجته وقفوهم في المنفذ 4 ساعات بدون سبب و الهدف ابتزازهم ماديا .. اخذوا جوازاتهم و تركوهم جالسين ينتظرون و كلما سألوهم ليش موقفينا قالوا هذي اجراءات و بعدين يجيهم واحد يقول لهم ادفعوا 100 دولار و يمشونكم على طول .. لكن السعوديين رفضوا يدفعون .. تدخل المسافرين الاتراك و تهاوشوا مع الجوازات فزعة للسعوديين و لكن دون جدوى و بعدها اضطروا استرجاع جوازاتهم بعد جهد و العوده لتركيا من المنفذ .. يعني تعب و سفر و بهذله و انتظار 4 ساعات و ابتزاز و بعدها رجعوا من حيث اتوا !! ارمينيا بلد مسيحي صرف و ضعيف اقتصاديا و لا يوجد فيه ما يستدعي السفر اليه، من خلال مطالعتي لمواقع كثيره عن هالبلد و ايضا من خلال ما نقله لي بعض الاصدقاء .. هالبلدان لازالت بعيده جدا عن السياحه .. فيها مناظر طبيعيه بالذات منطقة القوقاز لكن الباقي تعبان.
ناتي لبيت القصيد ..
هل فيه ناس يزورونها ؟ نعم
هل يواجهون مشاكل ؟ ممكن
هل ينبسطون في رحلتهم ؟ ربما ( لان الناس يختلفون في درجة رضاهم و رغباتهم و اهتماماتهم )
هل ساسافر لها شخصيا ؟ لا ( لانها لن تضيف لي شي و عندي البديل الافضل بكثير )
هل هي رخيصه ؟ ربما ( ولكن اذا كان الرخص على حساب راحتي و متعتي فلا حاجة لي به )
هناك مبدأ .. في اي بلد، اذا كان البوليس و الجوازات و الجمارك يمارسون الابتزاز المادي للسياح فتأكد انك راح تواجه مشاكل فيه .. و لكن هذا لا يعني انك لا تسافر له .. مهم جدا انك تعرف ما سيواجهك في اي بلد تنوي السفر اليه و بعدها القرار قرارك.
مع تحياتي للجميع

مشكوور وماقصرت
اعرف ثلاثه راحو جورجيا وارمينيا
الاثنين اللي راحو جورجيا مدحوها بس كانوا يشتكون من الغجر الشحاذين وايضا صار لهم موقف في سهره في باتومي دفعوا فيها مبلغ وقدره واذكر نصيحتهم تجنب اي سهره يديرها اتراك
اما ارمينيا اعرف عماني راح لها ومدحها لكن تمقلب هو الثاني بديسكو
الاكيد اماكن السهر موبوءه