- مساء الخير يا شيخ
- وعليكم السلام ورحمة الله وبركاته يا اختي
- يا شيخ انا حلمت اني ( يقاطعها الشيخ )
- الاسم الكريم لو سمحتي
- مزنه
- تفضلي يا اخت مزنه بس اول شي قصري على صوت الراديو عندك والا طفيه
- طيب ..... طفوا اللمبة يا عيال
- يا خاله الله يحسن عملك انا قلت الراديو
- طيب ....ولعوا اللمبة يا عيال
- الو .... الو ..... هل لا زلتي على الخط اخت مزنه؟ الو
- ايه ايه ياشيخ ..... البزاران الله يصلحهم يقولون تخفين بنا انتي يمه ورحت اولع اللمبة
- طيب بس وطي على صوت الراديو والا طفيه
- سم سم
- وش عندك؟
- والله يا شيخ حلمت اني العب كورة واني سجلت 9 هداف واحد منها الغاه الحكم يقول انه تسلل والمدرب كأن عليه بدلة زرقا ما تحرك من كرسيه وكنت احرث الملعب عرض وطول وانا حفيانه. بس المدرب طلعني ودخل لاعب قبل المغرب كل شغله يمسس شعيراته وما سجل الا هدف واحد صدفه بعد. وبعد المباراة قام المدرب يخمخمه كثير وانا اللي جبت الاهداف وسويت كل شي ما عطاني وجه. وكأني شفت بركة مويه جنب الملعب يلعبون فيها العيال.
- خير انشاء الله ... لعلها ان شاء الله تكون اضغاث احلام ... ولكن عندي لك شوية اسئلة
- تفضل يا شيخ
- انتي جبتي تسعه عيال صح وواحد توفي؟.
- ايه صح ياشيخ
هذا يفسر الاهداف اللي سجلتيها والله لا يحرمك شفاعة المتوفي. وتؤيدين قيادة المرأة للسيارة صح؟
- ايه وابي اصير مثل منال الشريف و... ( يقاطعها الشيخ )
- بس بس بس ... لاحول ولا قوة الا بالله ... اللهم لاتجعلنا ممن يرد إلى ارذل العمر
- وشو .... مدري وش تقول يا شيخ؟
- زوجك يشجع الهلال ... صح؟
- ايه، الله يعافيه ولا يبلانا
- معناته ان المدرب هو زوجك وهذا تفسير لون البدله اللي في الحلم. اسمعي يا اختي ... قد يكون ما تجدينه في الدنيا من زوجك اجر لك في الآخره فاصبري واحتسبي ....واقول مستعينا بالله ان كونك تلعبين كورة وهو ضرب من المستحيل فذلك يفسر ان احلام بعض النساء في القيادة، مثل حلم ابليس بالجنة... خيب الله مسعاهن. ابي اسألك يا مزنه وتجاوبيني بصراحة.
- تفضل يا شيخ
- انتي عراقيبك كنها منابت فقع صح؟
- مهوب عاد مرة يا شيخ ماغير شوي
- وانتي تمشين في البيت وتغسلين الحوش حافية صح؟
- ايه يا شيخ
- هذا تفسير انك تلعبين حافيه
- طيب وشي بركة الموية اللي يلعبون فيها البزران؟
- البركة الله أعلم ان زوجك اذا بغاك في كلمة راس بغرفة النوم يحط طشت لعياله ويملاه مويه ويحط به بلكه ويقول للعيال اللي يبشرني انها ماعت اعطيه عشره ريال... صح والا لا يا مزنه؟
- اي والله صح يا شيخ ... مهوب يخلي طبعه ذا الشين في النهار. طيب واللاعب هالمروح اللي ما غير يخمخمه المدرب؟.
- اقول مستعينا بالله ان زوجك بيتزوج عليك ثانية من المغرب العربي وهذا يفسره نعومة اللاعب واهتمامه بأناقته ودخوله قبل المغرب واحتضان المدرب له وبتجيب له بنت وحده وهذا تفسير الهدف اللي سجله اللاعب.
- اسمع يا شيخ ... فال الله ولا فالك ... ما غير تدجل علينا تحسبنا عاد بنصدقك و.....
(ششششش سسسسسس ششششش) انقطع الخط
2011-07-16, 04:29 PM
المواضيع المتشابهه للموضوع: ا شيخ انا حلمت اني
العرض الشجري
الدرهم المغربي مقابل عملات الخليج