بسم الله من تاني حكايتي بديت
بديتها بالصلاة على النبي العدنان محمد عليه الصلاة و السلام
اللي من الصلاة و السلام عليه ما مليت
كان حتى كان في يام زمان
مع الفجر وذن فروج,
نزلت لالة خدوج,من السما السابعة والهم تابعة لقات الحكمة ما بين الما والسما.
من هادوك البروج على شامة بنت خدوج :
شامة عندها علام وعندها راية, شامة بنت خدوج ماتت امها بقات وحيدة قالت تربي قريدة ربت قردة ولدت جوج,
واحد قبط بندير واخر قبط هزهوج,ارنا شامة مرا حكيمة مكتصرعشي من ديما, كانت مرا علامة, مايفهمها غير كبير الفهامة,
ولكن فدار شامة القرود دارت قيامة.شربكو العلامة مع الفهامة,شامة كانت شوافة ومرا كريمة ومضيافة واللي شافها لبد مايتعافى.
واحد النهار احكى لي صاحبي خبار ثلاثة زارو شامة لدار واحد زار وراح مشى وارتاح واحد سرقها وازهق بات ماصباح واحد سرق ولصق خوالها الجباح.لالة شامةمرا على دارها مغيارة وتفهم غير بالاشارة اش داير في الحارة.
فدارها جنان كبير زيتون وتين وبير, المسكينة كانت تحن في القرد الصغير ولكن صغير القرودة عندو الدار محفوضة, يعرف منين يدخل ويخرج وكيفاش يدوخ شامة بنت خدوج,عطاتو سوارت الدار والادارة بجوج جاب معاه فروج براني مايفهم والو في المعاني لكن طبعو كان انساني صغير القرودة كيعرف فين كاين الزردة جاب الضيف البراني يعاونو على تنشيف السواني .
بشوية بشوية جنان شامة صفر ودبال محال يولي لحالتو محال, ارنا طيور الجنان جاتهم النفس بداو كيبكيو بالحس اللي على صوتو يتهرس فداك ليام حتا واحد ماقد ينطق واللي انطق كيتعلق.
خممت لالة شامة طاحت عليها فهامة قالت تربي طير من الجنان يكون فصفة انسان يكون بها لما تشرف وتبدا المحان خترت من الطيور البليق والحبيب البليق ما طولشي معاها بزاف وهو يعيق قال دار هذا شامة ماتليق غير الخونة والسريق.
مشات ايام وجات اخرى بدات تبان علامة القهرى وحد النهار وشامة تفيق مالقات فدارها غير الحصير والبريق شامة كما قلت مرا علامة ندمت ونفعتها ندامة .
المسكينة عيات ماتربي فداك الدار اللي رباتو تلقاه شفار والعيادو بالله من الشفارة اللي نهبو الاوطان وخربوها تخريب
ايوا هدي الحكاية سلات
او من واد لواد دفقات
او انا مع ولاد الجواد جلست
2011-07-16, 03:44 PM
خيوط الهم
المواضيع المتشابهه للموضوع: خيوط الهم
العرض العادي
الدرهم المغربي مقابل عملات الخليج