تجارب الاعضاء في المغرب اكتب تجربتك سواء سكن من فنادق , منتجعات , شقق ..ومواصلات كشركات تاجير سيارات..خطوط طيران

وحداني رحلتي الى المغرب الحبيب بعد غياب ٦ سنوات

هوآجيس · 2024-07-21T21:34:46+00:00

سلام عليكم ورحمة الله وبركاته تحية طيبة للمزاعيط الغاليين حقيقة من زمان كان ودي اكتب بعض عن رحلاتي للمغرب وكل يوم اقول بكره ولا جاء بكره ههههه للاسف شفت اغلب المواضيع قديمة من ١٠ سنين نفس ماكانت سابقاً ولافيه تحديث والموقع هذا له فضل علي واستفدت كثير من تجارب الاخوان الله يعطيكم الصحة وندخل في الموضوع رحلتي كانت في تاريخ ٢٠/٦/٠٢٠٢٤ لمدة ١٣ يوم هالمره اول مره اسافر لحالي للمغرب بعد غياب ٦ سنوات عن المغرب الحبيب . الرحلة كانت ١٠ ايام في مراكش و٣ ايام في كازا حجزت على الخطوط السعودية على درجة البزنس عن طريق اميال الفرسان وكان وصولي تقريباً الساعه ٦ مساءً . على طول اخذت شريحة انترنت من شركة انوي عندهم باقة لمده اسبوعين عبارة عن ١٠٠ قيقا و٥ ساعات مكالمات ب ٦٠٠ درهم . وبعدها توجهت لاماكن الصرافة لمحل اسمه بنك افريقا وقتها كان افضل سعر صرف موجود الريال السعودي يعادل ٢.٥٨ درهم طبعاً خارج المطار بتحصل بسعر افضل ممكن ٢.٥٩ او ٢.٦٠ حسبتها شفت ماهي مستاهله كثير يمكن فرق كان حدود ٨٠٠ درهم واذا ما صرفت راح يكون معي المبلغ كاش لليوم الثاني وما حبيت اخلي معي كاش خصوصاً انا لحالي والمبلغ اللي معي كان كبير . بعد ماصرفت توجهت لبنك وفا كاش وفتحت حساب ب١٠٩ درهم واودعت كامل المبلغ والحد السحب لليوم الواحد ٦٠٠٠ درهم وتقدر تحاسب شبكة الى ٣٠ الف درهم وبالامكان تطلع بطاقة صراف ثاني اذا الحد اليومي ما يكفيك . طبعاً كان طريقتي في الدفع في جميع الاماكن عن طريق الشبكة والكاش فقط لطيور وبعض المصاريف الجانبيه اخذت تاكسي من المطار ب ١٣٠٠ درهم الى مراكش . غادرت كازا على الساعه ٨ تقريباً ووصلت الى مراكش وتحديداً الى مقر السكن على الساعه ١٠ مساءً سكنت في منتجع الاوليفير بالم منتجع جديد على طريق فاس اخذت الاستديو vip بسعر ١٨٠٠ درهم لليوم الواحد الاستديو جميل وشرح والمسابح اللي في المنتجع جميلة والمنتجع فيه مطعم وبقالة وبالاضافة خدمة تنظيف الغرف ممتازه جداً وتعامل العاملين فيه جداً ممتاز وراقي ولافيه قروشه من العساسين يعني ارتااااح وعلى الاخر يعيب المنتجع انه بعيد شوي مسافة ٢٠ او ٢٥ دقيقة عن جليز وتواصلت مع الشوفير اول ما وصلت المنتجع اخذت سيارة نوعها كيلو من شركة رينو الفرنسية ب ٢٥٠ درهم لليوم سيارة اصغر من الاكسنت بنسبه لي تلبي احتياجي واجرة الشوفير ب٢٥٠ الاجمالي ٥٠٠ درهم لليوم الواحد كان بالامكان استآجر سيارة بنفسي وهذا اللي انصح فيه حقيقة لكن اللي مو متعود على سواقة اهل مراكش بيتعب كثير خصوصاً اصحاب الدبابات حوادثهم كثيره وفي اليوم تشوف حوادث عجيبه وكثيره وانا صراحة قلت بشتري راحة راسي لاني مآجر الدور العلوي من بداية الرحلة هههههههههههه اماكن السهر اللي سهرتها كانت بابوشكا وديبلو واذا السهره بتكون في البيت رحت لاونج بدري بدري بابوشكا ديسكو اجنبي قريب من السعدي مكان فخم وراقي كله اوروبيين والدي جي قوي جداً جداً وفيه راقصات صراحة المكان مرتب وافضل مكان سهرت فيه الطاوله ابتداء من ٥٠٠٠ درهم يتطلب حجز مسبق ولازم كبلز في البدايه قالوا لنا لك عصير واحد واصريت عليهم لان كان معي طيرين واحد محنى وواحد اريش العيني وياعيني ياليل يالليييييييل هذا موال قديم هههههههه واصريت عليهم تعطوني عصيرين ووافقوا وخلصناهم وبالصحة والراحة هههههههههه الدبليو الطاوله ابتداء من ٢٥٠٠ درهم وضروري تحجز قبلها علشان ترتب وضعك في طاوله زوينه والطاوله فيها عصير ومزة تجدد لك بشكل سريع ولك طلبات جانبيه اتوقع ٣ طلبات وفيه نقطه مهمه لازم اذكرها لكم عند العودة للمنتجع بتلقى نقاط تفتيش يجون من الساعه ٤ الفجر الى الساعه ٦ صباحاً تحديداً بعد الانتهاء من السهرات يسوون نقاط تفتيش خارج اوقات عملهم الرسميه يعني مخالفين بيوقفونك ويسوون لك قروشه شوي يا تخلص معهم او تاخذ وتعطي معهم كثير لين ما يفكون اللي في راسك ويفكونك او تسوي مثل ما انا سويت ???? مرينا من عندهم وعلى الدعسة ولا وقفت لهم لا لحقوني ولا سووا شئ اصلاً ما يقدرون المطاعم بكتب مجموعة مطاعم من اللي اذكرها ابتدي بمطعم باب جمعة شغلهم طواجن واكل مغربي صراحة ممتاز ونظيف جداً واسعاره معقوله تقريباً شخصين يكلف ١٥٠ درهم ومطعم عند الامين هذا طباخ الملك سابقاً له فرعين اذا ماخاب ظني واحد في جامع الفنا والثاني في جليز انصح تجربون كتف غنم لذيذ ويكفي ٣ اشخاص ب٣٥٠ درهم مطعم ليالي كارون مطعم ايراني فيه كبسات واصناف متنوعه مطعم لذيذ ونظيف هذه ابرز المطاعم تقريباً وفيه كثيره لكن ماتحضرني حالياً واماكن التمشية في مراكش ماهي كثيرة مره عندك جليز تحديداً ستار بوكس وجنبه مول صغير اتوقع المنطقة ماحد يروح لها حالياً انا مريت مرور الكرام وفيه pestana كافيهات ومطاعم ومحلات يستحق الزياره مكان مرتب وجميل وجامع الفنا ضروري تروحون له لكن انتبهوا لاغراضكم النشالين كثيرين هناك وبتلقون في الساحة عروض كثيرة ناس تعزف وتغني وناس ترقص وناس تستعرض بمهارات عندهم اذا بتصورون لازم تعطونهم فلوس واذا بتمرون مرور الكرام ماحد بيكلمكم وفيه مطاعم وكافيهات واسواق ودهاليز شعبيه جميلة وفصلت هناك ثياب وبشت مغربي شغل يدوي الواحد ب ٩٠٠ درهم طبعاً يعتبر غالي ممكن تحصلونه في كازا او في اي منطقة غير سياحيه باقل من نصف السعر ، لكن ما حبيت اشغل نفسي في البحث جدولي اليومي كان كل يوم بيومه وهذه ميزة اللي يسافر لحاله لا احد يقروشك متى تصحى ولا ترتبط باحد النية اساساً كنت بزور عدة مدن في المغرب لكن وصلت مراكش الحب ولا قدرت اتخطى ههههههههه وهذه ميزة اللي يسافر لحاله الجدول قابل لتمديد والتغيير في اي لحظة عموماً كنت عادة اصحى تقريباً على الساعة ٣ العصر اتغدى واتقهوى واروح لعلاج طبيعي بشكل يومي عندي مشاكل في الظهر ديسكات والام ما الله به عليم . قبل لا اسافر كنت يالله يالله امشي وكنت على وشك اني الغي الرحلة خفت ما اقدر اجاري نسق الرحلة ههههههه لكن وصلت هناك صرت مثل الحصان ما ادري المرض نفسي ولا جسدي هههههههههههههه لكن الشهادة لله طحت بدكتور ممتاز الله يجزاه خير دكتور متمكن في الام الظهر وسبحان الله الدكتور طلع كفيف الله يشفيه ويعوضه خير ومجرد ما لمس فقرات الظهر عطاني برنت عن مشاكلي كاملة بالضبط ولمس منطقة في اسفل الظهر قالي عندك فلات فوت في رجولي وهو ما لمسها وسبق سويت عمليات وعطاني برنت كامل عن وضعي بدون اشعه وفحوصات ماشاء الله تبارك الله انا لي اكثر من ٢٠ سنة في العلاج الطبيعي واتعالج في اكبر مستشفيات الرياض ولا اخذت فايده ملموسة من رحت له لقيت اثرها في نفس اليوم ماشاء الله تبارك الله الدكتور حسن وابحثوا عنه في قوقل ماب ‏(( Kinésithérapeute alfeddy hassan الترويض الطبي )) طبعاً باقي تفاصيل الرحلة اتوقع الكل عارفها ما يحتاج نتكلم فيها وبعد ماكملت ١٠ ايام في مراكش حسيت اني اخذت كفايتي في مراكش طبعاً ما مليت لكن خلاص اكتفيت وكنت بروح اقادير بس ماعندي وقت كثير وماحبيت اضرب خطوط خصوصاً من اقادير لكازا مسافة طويلة شوي وقررت اروح على كازا ونكمل معكم في المشاركة الجاية ،،،

ta3bt

مزعوط مميز

المشاركات: 384

تاريخ التسجيل: Apr 2016

2024-07-26, 04:06 PM

المشاركه #10

مشاء الله عليك تقرير جميل جدا
بخصوص السفر لحالك .. أنا تقريبا مثلك احب اسافر وحداني خصوصا المغرب. سبق وجربت اسافر من قروب استراحه وأصحاب وحتى اقراباء … الوضع يختلف تماما عن وضعهم في السعودية .. انواع الافلام والقروشة واختلاف الاراء.

علشان كذا من ٦ سنوات تقريبا ما اسافر إلا لحالي الميزانيه انت اللي تتحكم فيها وجوك ملك لك وحدك .. يكفي بس تقوم الصبح تحس ان ودك تروح مدينة ثانيه .. تنزل تسوي تشك اوت وتشيل شنطتك وسيارتك تحت ايدك … لا تحاول تقنع فلان ولا علان ..

تمنيت انك زرت أكادير احس راح تنبسط اكثر فيها

المواضيع المتشابهه للموضوع: وحداني رحلتي الى المغرب الحبيب بعد غياب ٦ سنوات
الموضوع	آخر مشاركة
رؤيتي البسيطه في رحلتي القادمه الى المغرب الحبيب [emoji108]	2022-09-01 04:36 AM
بإذن الله تعالى رحلة أسبوع في مراكش بعد غياب 10 سنوات من 26 يوليو الي 1اغسطس	2019-01-01 12:58 AM
رحلتي الئ المغرب الحبيب في تاريخ 3/2/2018	2018-04-17 10:58 AM
رحلتي ١٤ يوم في المغرب الحبيب	2017-05-03 12:06 AM
رحلتي الى بلد الحبيب المغرب	2016-10-03 07:00 PM