لا تجرب تروح المغرب ....

Str!ke

مزعوط نشيط

المشاركات: 73

تاريخ التسجيل: Jun 2011

2011-09-29, 08:56 AM

المشاركه #51

رد: لا تجرب تروح المغرب ....

سجلني احد المتابعين ...خصوصا ان ظروف سفرك مشابهة لما حدث لي ..

تقرير واعر .. واسلوب جميل..

طفش

مزعوط مبتدء

المشاركات: 40

تاريخ التسجيل: Aug 2011

2011-09-29, 01:50 PM

المشاركه #52

رد: لا تجرب تروح المغرب ....

نكمل السوالف

صحيت من النوم على المغرب

واطلق ترويشه واحلى لبس

قلت لخويي انا طاقني الجوع

وين تبي نتعشى قال مشينا لبجكني

قلت يالله ونروح لبجكني على رجولنا

بحكم انه قريب والمشي حلو صراحه

وصلنا بجكني لقيناه مسكر عشان ايام العيد

وجنبه واحد قال خويي هاه شرايك نتعشى عند ذا

قلت لا يبوي خل نروح ماكدونالدز بس قال على راحتك

ونرجع ماك ونتعشى وبعدها طلعنا لحدا هالكافيهات

الي في البلازا ونتقهوى الشاهي وسوالف وما الى ذلك

لين طاح الي بروسنا قلت لخويي نبي نسهر الليله

قال اوكي فيه قهوه كويسه مشينا نسهر فيها

قلت وش اسمها قال ( ان ما خانتني الذاكره )

مونت كريستو قلت وينها قال حول بجكني

قلت مشينا ونمشي ودخلنا لين القهوه بالسطح

والجلسه زحمه وفيه ميوزيك وكثير الاجانب طلبت ريد بول

ونجلس وفيه رقاصات يجن عند الزباين ويرقصن ويدسون لهم

قروش يا في حزامها يا في ....... المهم جت الرقاصه عندي

وقامت تهزهز وانا مالي دخل في السالفه وكنت وقتها ادخن

وهي تهز وعمك اصمخ لين قررت اكرشها بطريقه غير دبلوماسيه

شلون ؟؟؟؟ سحبت لك ذاك النفس من الزقاره وانفخ في سرّها

وهي الي تفشل وتروح للبشكه الي جنبنا :D

المهم جلسنا في ذا

الكوفي لين الساعة 2 تقريبا وسرينا للهوتيل

على اساس انو بكرا ماشين اقادير ....

فاصل لتجميع الافكار وعذرا على قصر الحلقه

الولهان

مزعوط خبير

المشاركات: 1,682

تاريخ التسجيل: Jul 2011

2011-09-29, 02:02 PM

المشاركه #53

رد: لا تجرب تروح المغرب ....

: (210):: (606):

سلطان المنتدى

مزعوط فضي

المشاركات: 808

تاريخ التسجيل: Sep 2010

2011-09-29, 02:22 PM

المشاركه #54

رد: لا تجرب تروح المغرب ....

تقرير رااائع وسرد جميل

واصل وحنا متابعين

__________________

مخاوي الشنطه

لا تجرب تروح المغرب ....

المشاركات: 1,046

تاريخ التسجيل: Apr 2011

الدولة: منتدى المزاعيط

2011-09-29, 06:38 PM

المشاركه #55

رد: لا تجرب تروح المغرب ....

سرد وأسلوب ممتع ويدل ذلك على شخصيتك المحبه للمغامره والاكتشاف لكن توقيت السفره غريب كان خليتها بعد العيد اصرف واحسن

__________________

Ressay

مزعوط قدير

المشاركات: 189

تاريخ التسجيل: Feb 2011

2011-09-29, 11:50 PM

المشاركه #56

رد: لا تجرب تروح المغرب ....

ههههههههههههههههههههههههه ههههههههههههههههههههههههه هههههههههه

طفش حرام عليك ياخي نبي حلقة مسكة خط

اما الطريقة الغير دبلوماسية احس دخلها براد من النفخ

__________________

طفش

مزعوط مبتدء

المشاركات: 40

تاريخ التسجيل: Aug 2011

2011-09-30, 02:14 AM

المشاركه #57

رد: لا تجرب تروح المغرب ....

الانتقال الى اقادير

طبعا وقفنا على سريتنا من الكوفي

خويي حط راسه وانا كالعاده ع النت

وقال صحيني على 12 ع اساس نروح لمحطة الباص

جات 12 صحيته وحزمنا قشّنا وزبطنا امورنا

ركبنا اقرب تاكسي و رحنا لمحطة الباص (سبراتور )

الناقل الوطني الي محطتهم ملاصقه لمحطة القطار

في مراكش وهم نفس الشركه المشغله للقطار

وانصح بها للتنقل بالباص داخل المغرب باصاتهم محترمه

ونظيفه عكس الشركه الثانيه ستيام باصاتهم مهرهره

المهم كانت رحلتنا على الساعه 3 ان لم تغدر بي الذاكره

جلسنا في البوفيه حق المحطه وصراحه كان بوفيه جيد ويقدم

اكل نظيف ( وجه يتذكر البخاري حق محطات ظلم وحلبان)

وتقهوينا الاتاي وكان فيه واي فاي قلت لخويي وش وضع السكن

ما حجزنا شي ولا ندري وش السالفه قلت يا ولد مالك الا تدخل

على حدا هالمنتديات وتشوف وش السالفه واطالع الاغلبيه تمدح

اماديل والقى رقم حق المؤيد ( الله لا يبارك فيه ) موظف اسمه ابو بكر

اتوقع اتصلت وقلت ابي غرفه تطل على البحر قال صار قلت انا ابوصل

على صفرة قبل المغرب <<< خخخخخخخ عز الله بيفهمها المغربي

قال زين تعال وابشر بالخير هات اسمك قلت دوك اسمي فلان الفلاني

قال اذا وصلت الرسبشن قل انا حاجز عن طريق المؤيد قلت اوكي

وبكذا خلصنا مسألة السكن وحنا بالمحطه وارتحنا نفسيا وعينا خير

وبتلنا نقهوى من ذا الاتاي لين تفزّرت بطوننا في انتظار الباص

جا وقت ركوب الباص وقمنا ندور باصنا ولقيناه

ركبنا قشّنا وركبنا في الباص متهجين على بركة الله وتوفيقه

الى مدينة اقادير يوم طلعنا من مراكش ومسكنا الخط

بديت اتحقرص ماش الوضع موب طيب وادور حمام في الباص

احسبه زي خوينا النقل الجماعي الله لايذكره بالخير طبعا

ولو انه فك ازمات بس برضو الله لا يذكره بالخير ولا لقيت حمام

وش السوات وش السوات قلت مالي الا اسأل سواق الباص

قلت يا ابو الشباب متى نبي نوقف قال بعد 45 دقيقه :(

وانا الي يضيق صدري واقول امري لله اتصبر يوم جلست

خمس دقايق قلت خلاص ما اقدر اتحمل لازم ادبر عمري

واطالع في قارورة سيدي علي الي قدامي بخبث :D

ولين فيها شوي مويه وانا خابر وضعي راح يعبيها ويمكن يزيد

قلت لخويي لو سمحت يا زميل ممكن تشرب المويه الباقيه

قال ابشر بالسعد ويشربها واخذ لي مناديل وانزل الدرج

الي عند الباب واخلص اموري واخلي القاروره تحت

وحمد لله كان كرسينا عند الباب عشان اول ما يفتح القطها

قبل لا يشوفها احد وتصير فشيله وقرف مع ان السالفه

ما تحمل فشيله لانها حاجه غصب عنك يا الانسان

المهم اول ما خلصت الا السواق ياخذ مفرق ويسفط

عند المحطه وانا الي اطرطع

لييييه يا بن الهرمه تقول لي 45 دقيقه

طبعا كان معنا جريده اول ما وقف واقلب

سعيد عويطه ( عداء مغربي مشهور) على الباب

والف القاروره في الجريده وادعس واجدعها في الزباله

وانتوا بكرامه ولا من شاف ولا من دري

طبعا لم اورد ذا السالفه من فراغ ما يستفاد من الكلام

انو لو بغيت تركب باص لا تكثر سوائل وخلص امورك قبل تركب

عشان ما تتورط وتعيش نفس الموقف المحرج الي عشته

خصوصا ان بعض الشركات الناقله ما توقف خير شر !

المهم بعد ما نزلنا المحطه مر في بالي شريط الذكريات

على محطات الخطوط الي في السعوديه صاحبةاكبر احتياطي

بترول في العالم وهذه الدوله الفقيره ولسان حالي يقول

وآسفى يا بلادي ( وجه طاقه القهر )

وش النظافه وش المطعم ووش العاب الاطفال

فعلا تحس ان المكان يحترم آدميتك

عموما صلينا الظهر والعصر جمع تأخير

وركبنا الباص ووينك يا اقادير

وصلنا اقادير على آخر العصر اجواء جميله

وتبعث التفاؤل نزلنا المحطه وتلاقطونا اهل التكاسي

قلت لخويي اتركهم نمشي لنا كم خطوه وناخذ تاكسي

قاعد يمشي ونشب لنا واحد يلحق فينا ويقل ادبه

لين بغيت العن والديه بكل ما في هذه الكلمه من معنى

وانقلع في الي ما يحفظه ولا ياقاه

وقفنا لنا واحد من عيال الحلال الي يمشون

ركبنا وقلنا اماديل وصلنا لاماديل

وانزل واخلي خويي بالسياره

ع اساس اشوف وش بيقولون في الرسبشن

نزلت لقيت لي واحد في الرسبشن ومعه وحده

سلام ,عليكم السلام السالفه انا حاجز عن طريق المؤيد

قال اصبر انادي لك موظفهم ويناديه جاني هاك الوجه الودر

قال ايه علمني خويي وقال لحق الرسبشن الودر الثاني

عطوه غرفه خذ جوازي ويسجل المعلومات ويتميلح

ويقول وش عندكم انتوا في السعوديه مافيه الا منفوحه

ما يدري عن بشير يوم يقول( ياناس يازين منفوحه ...يازين غرو سكن فيها)

وما يدري ان منفوحه سكنها الشاعر الاعشى صاحب معلقة

ودّع هريرة إن الركب مرتحلُ ...وهل تطيق وداعاً أيها الرجلُ

منفوحة التاريخ ومنفوحه الحضاره <شكلي بأنسى اقادير وابتل امدح منفوحه :D

المهم قلت اوكي انا ابروح اجيب خويي

قال ليه خويك معاق ؟ هنا الشيخ طفش علّق الابنص في مخه

وطقته الحميّه على خويه قلت عيب عليك الكلام هذا

وبعدين انت تعرفني يوم تمزح معي ؟؟؟ رجاء خاص لا تمزح معي ثاني مره

وانا ماكله معي وشاربه من عقب منفوحه حبيبة قلبي :D

طبعا قد يقول قائل انت متكبر ولا تحب احد يمزح معك

وارد عليه بقولي ( إن بعض الاشخاص قد تتقبل منه ما قد لا تتقبله من اشخاص آخرين وذلك من خلال ملامح الوجه والارتياح لنفس الشخص وخفة روحه فما اصعب على الانسان من تحمل الخفّه من الثقلاء واصحاب الملامح الغير مريحه,,,هذا والله اعلم وهو من وراء القصد)

نزلت لخويي وناديته وخذنا عفشنا وركبناه في العربيه ورحنا للرسبشن نسجل جوازاتنا وندفع القروش

يوم طلعت للغرفه لقيتها غير مطله على البحر

وانزل لهم وانا اذاني حمراء من التعصيب ليه تقول لي فيه

وتسكني بغرفه ميب مطله ؟؟؟ هاااه قال انت وش فيك معصب

وانت ماش وانت تراك تغلط عليه اسلوب بن الهرمه يشكك في احترامك

قلت اوكي سوري على اسلوبي المتشنج

ممكن تشرح لي ليه حطيتني في غرفه مش مطله على البيتش

قال احمد ربك اننا سكناك طبعا انا مدري وش بلاني حامت كبدي

من السالفه ولا عاد لي خلق هواش قلت زين وامشي بلا تعليق

وانا في بالي انو اماديل x بعد هذا اليوم دخلنا الغرفه طبعا اقل من عاديه

سيراميك حمامات وصراصير صغار وانتو بكرامه وتلفزيون ابو كلب ولا هوب يشتغل

ومكيف الله بالخير ! يعني الوضع مدري شلون متحملينه الزملاء وحتى اني نزلت

موضوع يتكلم عن ذا الهوتيل المعفن ولا عقبت على ردودكم سوري يعني :D

وغير كذا انواع الازعاج ميوزيك في اللوبي ياخي حطوا الميوزيك برا عند البيتش

خلوا الي يبي ينام ينام عموما انا كنت مواصل ورايح في عين امها من التعب

وفي نفس الوقت طاقني الجوع لين دخت فقمت طقيت ذيك الترويشه

وبدلت ملابسي وقلت لخويي ابي عشاء قال مشينا ونشد اقرب تاكسي

قلنا شواية النهضه وصلناه لقيناه صاك ولين فيه مطعم جنبه حق سمك

قلت وقف بس وقفنا وطقينا لنا عشوه ميب ذاك الزود للامانه بس الجوع كافر

ورجعنا للهوتيل واطقها ذيك النومه الي جت بعد جهد جهيييييييييييييييد

الحين انا قصّرت من الكتابه فيبي لي استراحه ويبي لي ارد على الزملاء الي عقبوا على الموضوع

انتظروا الجاي لا تروحون بعيد وابشروا بكل خير

ملاحظه /تمت كتابة هذه الحلقه على انغام اغنية السيدة نعيمة سميح

امري لله والحب عذاب واهديها لكل المزاعيط على هذا الرابط

التعديل الأخير تم بواسطة طفش ; 2011-09-30 الساعة 02:17 AM سبب آخر: جبنا العيد

طفش

مزعوط مبتدء

المشاركات: 40

تاريخ التسجيل: Aug 2011

2011-09-30, 02:27 AM

المشاركه #58

رد: لا تجرب تروح المغرب ....

اقتباس:

المشاركة الأصلية كتبت بواسطة الولهان

: (469):ياحلو تقريرك وياحلو راعيه كلام موزون سرد ممتع واسلوب شيق طالبك ياخوي تكفئ لا تعلقنا بنص الطريق ولا تكمل التقرير ترا دخلنا معاك جو ولا توهقنا هههه تسلم يالغلا وتقبل تحياتي:eyee2:

يا حلو مرورك ويا زين تشجيعك يا بعد قلبي وابشر بكل خير

وشاكر لك مرورك الرائع وتشجيعك الي يخلي الواحد يمحط بمخه في اقرب جدار عشان تنتثر الافكار والاحداث ويوسع صدوركم بها

دوك

طفش

مزعوط مبتدء

المشاركات: 40

تاريخ التسجيل: Aug 2011

2011-09-30, 02:30 AM

المشاركه #59

رد: لا تجرب تروح المغرب ....

اقتباس:

المشاركة الأصلية كتبت بواسطة مصطي

سجلني متابع معاك يا الغالي

سرد جميل

أهلا أهلا يا مدير ( على طريقة الهنود ) :D

حياك الله يا زميل مصطي وشاكر اطرائك

دوك

طفش

مزعوط مبتدء

المشاركات: 40

تاريخ التسجيل: Aug 2011

2011-09-30, 02:37 AM

المشاركه #60

رد: لا تجرب تروح المغرب ....

اقتباس:

المشاركة الأصلية كتبت بواسطة Ressay

ههههههههههههههههههههههههه ههههههههههههههههههههههههه ههههههههههههههههه

ابداع ابداع يا طفش

متابعين

الابداع تواجدك يا زميل والله ما عرفت اقرأ اسمك واخاف اكتبه غلط بالعربي :D

شاكر لك مرورك طال عمرك

دوك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه للموضوع: لا تجرب تروح المغرب ....
الموضوع	آخر مشاركة
عضو تتمنى تروح معه المغرب	2021-03-09 09:25 AM
ودك تروح كازا بس خايف؟	2012-09-05 08:17 PM
طحت مريض وين تروح باغادير	2011-09-07 09:37 PM
بسرعه لا تروح الطياره	2011-06-30 02:23 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

لا تجرب تروح المغرب ....

روابط سريعه

الذين يشاهدون محتوى الموضوع الآن : 1 ( الأعضاء 0 والزوار 1)