|
رد: ضاقت النفس وسافرت ..!!
صحيت من النوم وانا افكر اني احلم ماصحصحت الا يوم التفت يمين وشمال عرفت اني في المغر ب وكان وقتها الساعه 3 العصر قمت استحممت ولبست قلت اطلع شوي اتمشى واتغدا بعد ماطلعت من الفندق رحت عين ذيا ب وتمشيت على رجولي يمكن فوق ساعه رايح جاي واشم هالهواءالعليل
وشفت صفت هالمطاعم اخترت احدهم وتغديت والله حتى ماذكر اسمه هالمطعم بعد ماتغديت رجعت الفندق ورتبت اغراضي على اني بسافر للرباط وهي كانت وجهتي الاساسيه لسفر للمغرب وصلت الرباط يمكن الساعه 10 بالليل وكنت مرتب مع احد الاصدقاء على شقه يعرف صاحبها وبعد الاتفاق سكنت في منطقة اكدال خلف الماكدو على ماذكر المهم الماكدو كان قريب من شقتي من الخلف اخذت الشقه بحوالي 650 درهم باليوم وكانت شقه جميله ومريحه بعد ماستقريت في الشقه طلبت من الشغاله اللي اتفقت معها فقط نصف يوم انها تشتري اغراض للشقه لمدة اسبوع وهي كانت شغاله مطيعه وطيبه وارتحت لها كانت تجي الصباح وتطلع حوالي 7 مساء وبعد مامر هاليوم بالبقاء باالشقه نزلت اليوم الثاني حوالي وقت الظهر اتمشى حولها واكتشف الاماكن خصوصا ان وصولي كان بالليل رحت الماكدو اتغدا وهنا صار لي موقف مضحك ومحرج في نفس الوقت رغم اني مو سببا فيه كنت انتظر دوري لاخذ الطلب وكانت فيه بنت جنبي اخذت الصحن معها كولا وهي تمشى طاح الكولا وانفتح وطار كله على ملابسي وهي واقفه قدامي متفاجئه من اللي صار وصارت تتأسف وتتعذر بشكل قوي وانا اقولها خلاص خلاص ماصار الا الخير المهم حاولت البنت تاخذ كولا ثاني بديل لكن البائع رفض وهي راحت طاولتها وجلست مع بنتين ثنتين انا بدوري طلبت لها كولا ورحت لها وعطيتها الكولا قالت لي انت احرجتني تسببت في بهدلت ملابسك والحين تجيب لي بيبسي قلت لها يابنت الناس عندنا مثل يقول ( اذا انكب عليك بيبسي من بنت يعني انت محظوظ ) <<<< مثل مادري من وين جايبه بس كان تأليف في وقته طلبت مني الجلوس معهم واخذناها سوالف وانا جالس بملابسي اللي تغيرلونها بسبب الكولا ..!! نكمل بعد الراحه 0 0 0 |
رد: ضاقت النفس وسافرت ..!!
( اذا انكب عليك بيبسي من بنت يعني انت محظوظ ) :Abu Ahmed (446):ذيب
|
رد: ضاقت النفس وسافرت ..!!
استاذنت والحوا علي بالجلوس قلت والله لازم اغير ملابسي اخاف يشوفني مصنع القصيبي يحتج علي وانا لابس البيبسي حقهم قالت لي منهو القصيبي قلت عديها المهم طلبت رقمي قلت لها ماني حافظه قالت هات جوالك برن على نفسي قلت لها خذي ودقت قالت خلاص وصل قلت اوكي
رحت الشقه وبعد مارتحت وبدلت ملابسي قلت برجع الماكدو مادري ليش هناك الوضع عجبني من الحماس وانا نازل على السلم من العماره كان رجلي تدوس على خيط الجزمه ( اكرمكم الله ) واجي على وجهي واجي كيلو قدام ماردني الا حضن البواب وتمسكت فيه وهو علشان ماطيح حضني بقوه الا يشوفنا يقول هذول جايبين هدف في الوقت الضائع ..!! اعتذرت منه وسط ضحك من البواب وزوجته وعياله احس نفسي تفشلت وانا طالع من باب العماره اعرج شوي جاني شد عضل شكلي من الهدف من اللي جبته في البواب رحت الماكدو قلت الحين كيف اطلب وانا توني ماكل فيه وش يقولون علي اللي في المطعم رحت اتمشى على رجولي حوله واتفرج على الناس وانا احس بشد العضل اللي جاني تمشيت كثير ومادري وين رحت المهم ضيعت الشقه لا حول ولا قوة الا بالله وش ذا اليوم احس ان راسي دار قلت اذا استمر الضياع وقفت تاكسي واعرف العنوان المهم سالت وين الماكدو قالي من اليمين يسار اثره قريب مني لكن في جهه اخرى هذا وانا ماشرب عصير اجل لو شربت وش بيصير ؟! رجعت الشقه وريحت وشفت حل حق شد العضل ونمت وقمت اليوم الثاني جلست فطرت بالشقه قالت الشغاله وش تبي فطور قلت لها سوي اللي عندك بعد مافطرت وريحت شوي واجريت بعض المكالمات للوطن قررت اطلع شويه اتمشى بعد الراحه نكمل |
رد: ضاقت النفس وسافرت ..!!
من الببسي الى الطيحه عزالله انها موفقه من اولها
اكمل تراني متابع |
رد: ضاقت النفس وسافرت ..!!
لا تقول عملية الركبه من طيحة الدرج ! شكلك نازل تفكر فيها :D شكلي مثلك , بطلع المغرب لحالي , لاكن خوفك بدال ما يحظني حارس العمارة يحضني الدرك:Abu Ahmed (728): سردك رائع أستمر |
رد: ضاقت النفس وسافرت ..!!
هههههههه واصل اخوي يعطيك الصحه
|
رد: ضاقت النفس وسافرت ..!!
شكرا لكل من رد
نكمل وانا نازل على الدرج قابلت وحده كبيرة بالسن ساكنه بنفس العماره اللي ساكنها واول مره اشوفها كانت شايله معها اغراض واكياس وقفت وتكلمت معي بكلام مافهمته فهزيت براسي اني مو فاهم عليها ومشيت فاستمرت تتكلم انا وقفت ورجعت لها مره ثانيه فاخذت الاغراض منها اساعدها فتكلمت مره اخرى بس بغضب فرديت عليها طبعا بالعربي اني مافهم عليك انا مو مغربي انا خليجي فضحكت وقالت انا كنت اول مره اطلب منك تساعدني انت مارديت ومره ثانيه يوم اخذت الاغراض كنت اقولك ليش ماساعدتني من قبل اعتذرت لها ووصلت اغراضها لشقتها طلبت مني الدخول فشكرتها وطلعت برى العماره جلست اتجول في الحاره حقتي <<< صارت حقتك الحين طلعت اتجول واتمشى ورحت القهوه الخضراء اخذت اتاي وانا اكحل العيون واتفرج هنا وهنا مع لقافة اللي يشتغلون في المقهى كل شوي جايني واحد يقولي الحساب لو سمحت قلت له كم مره ادفعه سبق دفعته لزميلك وياليته يروح ويفارق وجهك لا جالس قدامي وماسك الصحن بيده قلت لها تامر على شي قالي لا انا واقف هنا بس حسيت بكابه من المكان بسبته وطلعت ورجعت شقتي تمددت شوي الا الباب يضرب قلت مين يجيني هنا فتحت الباب الا هذي العجوزاللي ساعدتها جايبه اكل مثل طاجن باللحم واشياء ماعرفها شكرتها كثير وقالت ذوق من يدي ان شاء الله يعجبك بالفعل احلى اكل اكلتبه بالمغرب رغم نص اللي اكلته ماعرف اسمه واستمرت هالعجوز تجيب لي اكل في جميع الوجبات مره يجيب الاكل ولد صغير مره بنتهم مره ابوهم مره هي الحقيقه زاد وزني كرم ماعمري شفت مثله كل هذا علشان ساعدتها بشيل اغراضها المهم وجهوا لي دعوه لحضور خطبة احد ابناءهم في شقتهم حضرت بعد ماتكشخت وصرت جالس بينهم كاني واحد من عائلتهم وانا مفهي ولا ادري وش السالفه بس اتفرج واسمع خصوصا انهم اذا تكلموا مع بعض مافهم عليهم المهم جلست في حفل الخطوبه لين اخره وانحرجت اني استاذن خفت ازعلهم شكرتهم على عزيمتهم ورجعت شقتي ونمت ر احه ونكمل |
رد: ضاقت النفس وسافرت ..!!
كمل تكفئ كمل ترا دخلنل جو تقرير واعر مثل راعيه:thumbup1:
|
رد: ضاقت النفس وسافرت ..!!
وش ذا ياخي كل شوي تكتب كلمتين ثم تقول " تعبان راحه " لا يكون ونت جاي نزلت الخرطوم , ترانزيت متابعين معك , أستمر:3: |
رد: ضاقت النفس وسافرت ..!!
يعطيك العافيه
|
| الساعة الآن 07:18 AM |
جميع المواضيع و الردود لاتعبر بالضرورة عن رأي و توجهات الادارة و انما تعبر عن رأي كاتبها فقط