مزاعيط المغرب - السفر الى المغرب - وصلنا بحمد الله من كازا الحب

الحلقة الثالثة

وصلنا بحمد الله الى كازا بعد عناء سفر كبيررررر , نزلنا من الطياره ونتوجه للجوازات لختم الجواز , الشباب مسكو طابور وانا جالس اطالع في وجه كل عسكري واقول هذا وجهه سمح وهذا لا شكله ملعون وهذا ملكع وهذا مدري ايش .. المهم وقع الاختيار على واحد في الطابور الي في النص وقلت توكلنا على الله .. الشباب قربو من الموظف وانا لسه باقي علي كثير .. شوي الا فوج من المسافرين داخل علينا وانخبصت الصاله .. الا ويفتحون الكونتر الثاني واجيك انا امشي مليون وأول واحد يوم وصلته وانتحل شخصيتي حقت الجوازات طبعاً الشخصيه هذي ماتطلع الا في مطار المغرب ومطار مصر :-
العسكري : هلا وسهلا
انا : ابتسامه عريضه بس
العسكري : كيفك ؟
انا : الابتسامه مستمره وعيوني تطالع في السقف وفي الارض وفي العسكري
العسكري : مالك خويا
انا : الابتسامه مستمره وارفع يدي اليمين على راسي احييه
العسكري : يأشر بيده على فمه ويقول احكي
انا : ام بابا ام بابا
العسكري : تغير وجهه وسوى حركه بيده معناها فلوس
انا : ام بابا ام بابا , واشر عليه واقول شكرا مابي شي
العسكري : يصفق الختم على الجواز صفقه كل الصاله سمعوها
انا : ام بابا ام بابا وابوس يدي وانفخها عليه
العسكري : سيررررررررر خويا سيررررررررررررر الله يسهلك
طبعا الحركه هذي كثير استخدمها في المطارات الي ذكرتها والسبب الحركات الي اشوفها من حقين الجوازات بس جدا جدا جدا ناجحه خخخخخخخخخخخخخخخخخخخ
المهم لما جيت انزل من الدرج والعسكري الي يشيك على الختم ونفس الحركه ام بابا ام بابا ومشت الامور كمان .
اخذت العربه حقت الشنط وتوجهت على السير واحمل الشنط كلها والشباب توهم يوصلون ويكلموني وانا ارد ام بابا ام بابا ولا يدرون ايش السالفه .. في الاخير سكتو وقال انت فاضي تستهبل .. وكل واحد اخذ شنطته وراح ..
وصلنا عند التفتيش وإذا فيه واحد من وجهه مبين انه عله كل شنطه ينفضها نفض ولا يخلي فيها شي .. المهم واطلع جوازي وامسكه بيدي اليسار لان فيه ضابط جالس عند الجهاز حق التفتيش ابيه يشوف الجواز ويطمع يصيدني .. نجحت الخطه وجاني يركض وقال هنا خويا .. واروح للجهاز معه وافتك من ذا العله الي في الوجه يفتش يدوي ويدخلون شنطتي في الجهاز واروح واخذها من الجهه الثانيه والضابط يتبسم ويجي عندي واسلم عليه وانا اقول ام بابا ام بابا وابتسامتي عريضه بشكل غريب .. تغير وجه الضابط اتوقع رحمني ويسلم ويطبطب على كتفي يعني اهلا بيك توكل على الله ربي لا يعيد جيتك خخخخخخخخخخخخخخخخ ..
طلعت واجلس انتظر العيال تأخرو .. شوي الا طلع ابراهيم وعزوز !! واسالهم وين محيميد ؟ قالو شكو في شنطته المربطه وقالو افتحها .. ويتذكر انه اخذ قفل بس من غير مفتاح قلت يستاهل انا قايل له شنطتك راح تشبهنا .. طيب ايش صار عليه ؟ قالو قطع العسكري الشريط البلاستيك ويفتش الشنطه .. قلت يالله ننتظره .. شوي ويجينا يدف شنطته مفتوحه .. وقميص طالع من جهه والبوكسر من الجهه الثانيه وحالته حاله .. واحنا نموت عليه ضحك .. وهو يتحلطم ويشتم في الهندي حق المطار الي ماعطاه المفتاح حق القفل ..
طلعنا برا والا صاحبي المغربي الله يجزاه الف خير ينتظرنا برا .. ونسلم عليه ونسولف شوي ونروح للمواقف علشان نركب السياره الي مستأجرها لنا .. المهم ركبنا وقال ابراهيم سوق السياره لاني انا اشتغل في المطار واذا شافوني اسوق فيكم يتوقعون اني اخذ الزبائن من اصحاب التكاسي واصير في مشكل .. المهم ركبنا وساق ابراهيم السياره وبعد اول محطه نزل ابراهيم وصار السواق صاحبنا المغربي .. وهات يضحك وسوالف ونتذكر مواقف صارت لنا في سفرتنا الاخيره مع صاحبي المغربي .. وعلى مدخل كازا فيه تفتيش ويقوفنا وينزلون صاحبي المغربي .. ايش القصه مدري لانه قال لا تنزلون من السياره .. واطالع في المرايه الا هواش وصيحه بينهم ونجلس نص ساعه .. ويجي صاحبي ويركب السياره !!
انا : ايش فيه ؟
صاحبي : فيه صاحب تاكسي شافنا واحنا نبدل عند المحطه وبلغ عن السياره يقول سياره خصوصي مستأجره تشيل ركاب من المطار .. واحنا اصحاب التكاسي علينا ضريبه ورخصة تاكسي والاشكال هذي تاخذ الزبائن من عندنا ..
انا : وبعدين ؟
صاحبي : ولاشي 200 درهم وانحل الموضوع
انا : والله كفو عليك ياسروق يالحرامي
صاحبي : ليش ؟
انا : لانك تسرق الزبائن وتخطفهم من المطار
صاحبي : خخخخخخخخخخخ يلعنه تاكسي لو اعرفه إلي بلغ علينا كان صدمته
توجهنا للبزار وصرفت العمله وطلعنا على الفيلا والا والله حلوه وفيها خدامه وعساس و طباخه عجوز صرت اسميها ام لسانين .. اذا شفتها تقول من طيرات الجنه وهي تتفخ راسك بالبربره .. بس تضبط لك الرز البشاور وطاجن الخضار بالحم ضبطه ماعمري اكلت مثل أكلها مرررررره خطير .
شوي يوم قال السواق خلينا نتصل على صاحبة الفيلا .. قلت اوك بس بشرط قال ايش قلت انت لاتحكي ابد .. قال خلاص ..
اتصل عليها وقال احنا في الفيلا تعالي .. شوي ويرن الجرس وتدخل وحده عمرها تقريبا 25 سنه وعلى طول اخذتني وصاحبي على الصالون وقالت المبلغ كذا والمجموع كذا .. قلت اوك اكتبي عقد بينا .. يوم تغير وجهها قالت مانعمل عقود في المغرب !! قلت مو انتي صاحبة الفيلا قالت الا قلت خلاص المهم صارت تلف وتدور واختبصت شوي .. قلت عن اذنك بطلع للتواليت وراجع لك .. وعلى طول اروح للعجوز ..
انا : كيفك ياحجه
هي : بخير وانت
انا : بخير الحمدالله
هي : عجبتكم الفيلا ؟
انا : كثير .. بس صاحبة الفيلا رافع السعر شوي
هي : والله بالعكس سعرها كويس
انا : قلت لا لا لا لازم تنزلين وحلاوتك عندي كلمي صاحبة الفيلا
هي : صافي بحاول معها انت مبين عليك ظريف
شوي وتتصل وتكلم وحده .. وانا ساكت ماحكيت شوي منها شوي من صاحبة الفيلا قالت والله صافي السعر هذا اخر شي الي اعطتكم هو 4000 درهم !!!!!!!!
انا طارت عيوني .. قلت عطيني اكلمها .. واكلمها واحاول فيها رفضت قلت طيب احنا في الفيلا تعالي خذي فلوسك .. انا ما اثق في السماسره .. قالت 10 دقايق واجيك ..
واطلع للبنت الي تدعي انها صاحبة الفيلا .. واحاول اقنعها تنزل واسوي فلم عليها وهي ضابطه الدور صح .. في الاخير قلت لصاحبي قوم وخلينا شوي .. لما راح قلت شوفي حبيبتي انتي سمساره ومو صاحبة الفيلا وانتي اجرتي الفيلا علينا بي 4000 درهم من صاحبتها وزدتيها 500 درهم في اليوم ليك انتي من غير معرفة صاحبة الفيلا هذا غير 20% الي راح تاخذينها سمسره من صاحبة الفيلا .. طبعا انا ما ادفع شي لها لأنها مالها مكتب اصلا والقانون يعاقبها فما تقدر تطلب شي مني .. المهم تغير وجهها ولا عرفت تحكي .. قلت انا ماراح اقطع رزقك ولا كأني سمعت شي ولا شفت شي .. انا بعطي صاحبة الفيلا قيمة الايجار الي هو 4000 درهم عن كل يوم .. والزياده الي قلتيها ماراح اتكلم فيها .. لانه ممكن تقطع رزقك ولا تقدري تأجري لها مره ثانيه ..البنت سكتت ولا حكت بكلمه .. وصلت صاحبة الفيلا ودفعت لها حقها بالكامل وقلت طبعا السمساره .. انا مالي شغل فيها .. قالت هذا اكيد انت بس تدفع الايجار فقط .. وتطلع البنت من عندنا ولا طلع منها ولا كلمه ..
شوفو كيف الاستهبال والتحايل علينا .. يعني لو زادتها 100درهم ممكن تنهضم بس تزيدها 500 درهم غير سمسرتها .. لا حبيبتي هذي سرقه واحتيال بصراحه .. وبعدين ماعرفت تكذب كيف وحده في العمر هذا وتملك فيلا بالملايين .. واذا هي صاحبة الفيلا كيف ماتجي الخدامه لها وتقدم لها شي اقلها عصير او قهوه .. او تحكي معها وهي داخله مع باب الفيلا .. وكيف مايكون معها مفتاح لفلتها ؟ كيف ترن الجرس ؟ لكن الحمدالله عدت على خير .. وربي كفانا شرها وضحكها علينا ...
رتبنا ملابسنا في غرفنا وعقدت اجتماع مع الطباخه والخدامه اشوف ايش طلباتهم من المرجان واسجلها .. واطلع انا ومحيميد وصاحبي المغربي للمرجان علشان اشتري لوازمنا من اكل وشرب وعصير ..

محيميد والكسكسي الي يحسبه رز .. محيميد وغيبوبة السكر .. عزوز وهوشته مع ام لسانين وتلقيبه بلقب القذافي .. ابراهيم طلع ولد ام لسانين .. انتظروني في الحلقه القادمه