|
رحلتي البسيطه الى المغرب 2017
بسم الله الرحمن الرحيم سيداتي وسادتي الجميلين والحليوين والماجدات ايها الشعب الكريم :icon31: في عيد الفطر الماضي .. ماادري وين اسافر مليت اوربا .. وانظمتها المزعجه وشرق اسيا كان اسوا الخيارات مع اني مااحب السياحه في البلدان العربيه وعزمت على اوربا وألمانيا تحديدا .. ولكن قبل السفر جاءني رفيق من بقايا المحاربين القدامى وحقين مراكش تحديدا ووسوس لي هكالليله بالاستراحه وقال يارجل رحت لكل محل جرب المغرب هالمره .. قلت هاه تدري خلني اروح وان ماجازت اطلع اسبانيا من عندي :maroc (1022): ولملمت اموري وانا في القرارات (قبسه ) يعني شهر او شهرين اخطط تجي ليله اقرب الفيزا وكاس الشاهي واسوي كل شي مالكم بالطويله .. قربت (مربط النعامه ) (الفيزا) واول رحله بوجهي رخيصه وحليوه ( القصيم -اسطنبول -اسطنبول كازا) واشيل شنطتي البنيه بعد العيد بثلاث او اربع ايام وعلى مطار القصيم وتبدا الرحله الجميله الحليوة :) |
جينا مطار بريده (القصيم ) في منتصف المملكه السعوديه وواجهتنا مشكله (فيه وفد شكلهم وفد موتمر اسلامي او زي كذا ) اخرونا على شانهم ساعتين .. ولما وصلوا 7 او ثمان اشخاص .. حمران البشره ولهم لحى حمراء :harhar1: تركي له لحيه ماتجي المهم واضح انهم مهمين وتعالت الاصوات بالطائره يشتمون التاخير والطيار وطيارته ههههههههههه انا كنت جالس منخرش لان رحلتي مواصله الى كازا تنطلق بعد ساعتين من الوصول والوصول الان تاخر وتوقعت الاسوء ولكن (وهذا سر ) لا طرت من مدينتي بريده ( ماعندي مشكله في اسفاري) اتاخر في مطار .. الطع في طائره .. تضيع شنطه .. يكنسلون فندق (ماهنا مشكله كل المشاكل تنحل ) (اهم شي جوازي والفيزا وعمي جوجل ) والباقي كله ينحل اهم شي انك تسافر وتغامر وتستمتع ( ماودك الاشياء تمشي زي الساعه لازم شويه اكشن ) وبالفعل لما وصلنا ومتاخرين شوي .. رحت الكاونتر قلت انا ابولجين (بسم الله علي) وين اخويااي حقين كازا .. قال يسلمون عليك تلاقيهم الان فوق الاسكندريه ... ابك ابك ابك .. طيب وانا وش اسوي قال روح تحت للمحل الفلاني واجلس يضفك الباص ويوديك اسطنبول وترقد الليله وبكره نجيك وناخذك للمطار .. قلت مجانا قال ابد والله ماتدفع ريال .. قلت تم .. ليله باسطنبول وليش لا .. الان نحن المغرب تقريبا .. رحنا تحت ولقيت واحد رشيدي الله يذكره بالخير .. من بلدياتي قلت وش العلم قال انا طالع موريتانيا وطارت الطياره بعد .. قلت الليله نرقد ونستانس وبكره انا واياك كلن مع طريق .. نضرب اصقاع افريقيا :) جاء الباص وضفنا .. انا وصاحبي الرشيدي ومعنا من هالحمران والملونيين الى اسطنبول .. وانبهرت من اسطنبول فهي بلد ممتاز ومرتب وانيق جدا .. (خلاف ماكنت متخيله ) كنت متخيلها زي دمشق من اول ... وصلنا الفندق وكانت النعره التركيه بالترك .. وتعاملهم كما قال رواد تركيا .. ماهو وازينه .. جافين شوي .. اخذنا الغرف ودخلت الغرفه وصليت واخذت دش وريحت شوي .. ثم نزلت رايح ( وجهة عريبيا كلهم ) (تقسيم ) اللي نسمع به دايم على لسان كل من راح لتركيا وللخبر بقيه ... النصابين بياعة الورد بلاد الشاورما |
متابعينك ابولجين وبالصف الاول ✌️✌️
|
ليلة اسطنبول :
نسيت اقول لكم قبل ان نصل للبوابات خروجا للباص طلبوا مننا الحصول على فيزا اظن بـ 60 دولار او حول كذا رحت للمسئول وقلت يااخي نحن ترانزيت بالمطار والخطا من الخطوط راحت رحلتنا يعني دخولنا لاسطنبول مرغم اخاك لابطل .. قال ماعنك وعنها هيا والله ماتطب الباص الا بفيزا قلت تم نفداك :maroc (1022): نعود لما بعد الوصول للفندق .. نزلت تحت ورحت امشي ابشوف وين انا .. ولقيت نفسي قريب من وسط البلد .. وفيه باصات صفر متوسطه الحجم تنطلق لكل وجهه .. المهم انا بثوبي السعودي مسوي فيها عروبي .. دورت مدري وش السالفه شفت وحده شقراء توحش .. وباين عليه انتيكا .. وانا ودي اتفشخر بالانجليزي شوي .. مس كان يو سبيك انجلش قالت اي بالله ياضيف الراحمان :icon31: قلت ابي تقسيم قالت عان هالباص الاصفر اركب وعلى تقسيم وهالمكان وانت راجع اسمه كذا وكذا .. المهم توكلت على الله وركبت الباص وانطلقنا الى الميدان الشهير او قريبا منه .. نزلت من الباص والمنطقه تعج بالناس والسياح وفيها 4 مليون محل شاورما جنب بعض مصفوفه معلوم ياعيني انت ببلاد التركش .. ( هلا بيش ) :santa_1: قعدت اتمشى ومريت بياعه الورد ( وشريت ورده على هاجس غربتي وحنيني ) >>> تحمس وتعشيت لي بمطعم فاخر جدا وكان الطلب كالعاده مشاوي اذا ماعرفت وش تطلب من اكلات :maroc (891): واحلى عشاء .. وانا راجع امر بممرات فيها محلات كثيره .. وصار الثوب نكبه طلع لي 100 سوري وكل واحد يعرض نفسه وانا من عادتي لا احب الحديث مع الغرباء .. وشكرا .. اسف .. شكرا .. المهم لزقوا فيني وعرضوا علي امور غير جيده ( سائتني كثيرا ) ولاحظت البعض يعرض علي بضائع سوريه ويلمح انها في المحلات الخلفيه وليست في الشارع الرئيسي ويتعذر ان النظام يضايقهم شوي ( اكتشفت لاحقا انهم ياخذونك للخلف بدعوى يورونك بشوت وجلابيات ) ثم تجد نفسك بيدين عصابه يضربونك وياخذون اغراضك جوالك وبطاقاتك ( امر خطير وسي مره ) ولكن لله الحمد بفضل الله لم استمع لهم مع اني لحظتها ماكنت ادري (ولكن الحذر عموما ببلاد الغربه زين ) المهم رجعت وانا عارف نظام الباصات وركبت الباص ويممت شطر فندقي .. للنوم وانتهت ليله اسطنبول من الصبح كان موعد رحلتي بعد الظهر .. صحيت ونزلت تحت لقيت صاحبي الرشيدي وكان رجل حار جدا .. معه شنطته قلت له العلم يافلان .. قال ابروح للمطار قلت له تو موعدك باقي ساعات .. قال اخاف تطير الطياره مره ثانيه .. المهم يالله اقنعته بان ينتظر الشتل (الباص ) يبن الحلال لاحق على موريتانيا يعني وش يبي يفوتك بنواكشوط |
اقتباس:
:morocco_5 (6): |
قبل الرحله بساعتين او اكثر شوي ... وصل الباص وضفني انا وشنطتي وعلى مطار اسطنبول ... يوم جيت البوابه نسيت نفسي ونسيت اني سعودي كل الموجودين مغاربه راجعين من العمره بعضهم وبعضهم جاي من اصقاع الارض حسيت نفسي مهم ولانزلت من الطياره الا مكون عشرين صديق :maroc (1188): ويوم نزلت الطياره سوو حركتهم دايم ( يصفقون ) وصفقت معهم وبغيت ابكي من حنين الوطن (نسيت اني ماني مواطن مغربي) المهم انطباعي الاول ( واقولها لله ثم للتاريخ ) ان المغاربه شعب طيب ومحترم وصلت لقيت سرا طويل جدا .. وانا متخوف اصير اخر واحد اخاف ياكلوني ضباط الجوازات لقيت شايب وعجوزه جايين من مكه اصدقائي بالطايره نادوني وفعوا لي الحزام الامني وقدموني بالسراء ياحبي لهم .. قبل ياصلني الدور قال لي الشايب .. وين الورقه حقت الجوازات قلت ماعندي قال انقز هاتها من اول السرا .. ومسكوا لي محلي .. رحت وجبتها وعبيتها ووقفت عند كلمه ( تاريخ الازدياد ) ماادري وش هي .. واللغه الاخرى فرنسي بالنموذج .. قلت للشايب وشو الازدياد قال (الميلاد ) قلت هلا هلا .. وكتبته ( 28 / يونيو ) مواليد العظماء :Fantasy Dreams: طلعت من المطار .. وحيدا شريدا اسحب شنطتي البنيه رفيقتي في الاسفار .. اول مره بالمغرب وبدأت المغامرة :morocco_5 (67): |
احب ادبيات السفر وفلسفته يعني سعودي على طيران تركي نازل المغرب من اسطنبول ( شعور فنتاستك ) بغيت اشري غليون من احساس الفشخره :maroc (1062): |
للوهله الاولى .. من اول ماتتعدى الجوازات وانت تشعر انك ببلد عربي ( الكل يكلمك ويهمس لك ويدعوك ويجي ويسلم عليك ويعرض عليك فندق او سياره ) وان قلت لا شكرا (زعل ) ههههههههه المهم كنت ابي سياره تاجير .. وبطبيعتي في البلدان العربيه لا اثق الا بشركات عالميه بمعنى ان المكاتب المحليه مزعجه وكثير مشاكلها وممكن يعطيك عقد مزغلط او مضروب او مش دقيق وتلاقي نفسك بلشان وسطهم وانظمتهم اللي ماراح تنصفك ابد .. تعديت العديد من الاخوة وتهاوشوا معي وبعضهم يهمهم بكلام غاضب اذا عديته ... قال واحد انت وش تبغا بالضبط .. قلت يااخي ابغا شركه عالميه كافره ونظام كافر بن كلب احسن لي ههههههه وزعل زود مالكم بالطويله لقيت محبوبتي (يورب كار ) والسعر كان ضعف المكاتب الاخرى .. لكن اهم شي سلامتي وسلامه سفري وراحت راسي .. فرق الف الفين ماتفرق .. خاصه واني مسافر اقتصادي يعني ماهو من كثر مصاريفي .. اخذتها جميله حليوه صغيره جديده عليها تأمين (كامل) فل انشورنس من يورب كار وانا عميل دائم عند هالشركه حول العالم .. واستلمت سيارتي .. وانطلقت انا وشنطتي في بلاد الله .. وعبرت بوابات المطار ميمما شطر كازابلانكا .. والجو خيال .. والمغرب البلد العربي الوحيد اللي حسيت فيه بارتياح روحي وانسجام .. واول ماطلعت كم كيلو وقفت وطلعت الفلاش حق (الدبكات والشيلات ) لزوم الطرب .. هلا بيش .. انت بالمغرب ياعم وشوي القى سيده مغربيه( عجوز بالستين ) تأشر على الطريق وقفت عندها (ماوراي شي ) وعندما تكلمت اكتشفت ان الدارجه المغربيه صعبه جدا .. للامانه ماادري وش تقول قلت ياعمه انا طالع كازا كان بيتك على الطريق اركبي .. توقعتها تركب في الخلف .. زي عاداتنا .. المهم فتحت الباب عمتنا العزيزه وركبت قدام ( قلت هذي اول البركات نوصل العمه لدارها ) وانطلقت انا واياها وهي تسولف علي وانا والله كلمه اعرفها وثلاث مااعرفها .. المهم وقفنا وشرينا ماء انا واياها :morocco_5 (201): واحسن ماقاالت ومازلت اذكره تقولي ( واللاهي بلادنا زوينه ) خخخخخخخخخ يوم وصلنا بلده بالنص .. قالت بس هنا .. قلت علي الجيره ماانزلك قالت ليش قلت لانك سيده كبيره وعلى راسي والخوي بالذمه والله ماانزلك الا عند بيتك انا ماوراي الا الفندق وجاي للمغرب كله اتمشى .. انحرجت ووصلتها لحد باب بيتها وعزمتني على الشاي وياابني و و قلت ابدا الله يحفظك وانطلقت مكملا طريقي الى كاازا الجميله ... وكنت مستاجر فندق اسمه فندق الوليد ( فندق 3 نجوم عادي ونظيف وليس به لهو او صخب) ومقابل سكه القطارات والمترو وسعره رخيص وبموقف السياره بعد .. المهم ركنت سيارتي ودخلت للفندق .. معلومه على الطاير : كان يقال لنا ان القياده في المغرب صعبه وتختلف عن سواقتنا هنا و و و والحقيقه ان قيادتهم لاتختلف عنا والبلد ماهو مزدحم جدا الا في بعض الاماكن والناس متفاهمه ... وصلنا الفندق ونزلت اغراضي وطلعت مشي .. ولقيت من حسن الحظ بنفس العماره كوفي .. قلت عطني قهوة وشرح لي بلطف عاداتهم بالقهوة والماء وتشرب الماء قبل او بعد ويتفلسف علي مدري هو جاد والا يمزح .. وكان هناك ايضا محل بيتزا مقابل الفندق فاجتمعت في ذالك الفندق المتع الثلاث : موقف سياره وبيتزا وقهوه ياااالهي هذا كثير قلبي لايحتمل :maroc (916): |
اصبحنا من بكره بعد نومه جميله وهادئه وفلتره من الاسفار .. صحيت وافطرت في مكان قريب .. ومريت حق القهوه ودبلت لي كوبين قهوه لين صارت حواجبي ( قوس قزح ) وركبت المزيونه ويممت شطر اللاشي ( طفيت القارمن ومشيت على وجهي بالديره .. لاستكشف الاماكن بدون تحديد) مريت وشريت شريحه بيانات وركبتها وتاكدت ان صديق اسفاري حول العالم معي الا وهو (عمي قوقل طير شلوى ) حي والله من قيل له قوقل .. ولقيت مسجد كبير جدا اظن اسمه مسجد محمد (الخامس او السادس ) ولكنه الاشهر وهو مطل على البحر .. يعني الصلاه هناك تجمع الروحانيه والمشهد الجميل جدا .. وتتبعت الساحل .. ويمين وشمال .. وعند الظهيره قلت لعمي قوقل ابي الفندق ويممنا شطر الوليد .. وهذي كازا اللي نسمع فيها من الصغر .. اني في المغرب العربي .. رجعت وتغديت ونمت شوي .. والعصر تكيت بالكوفي وسولفت مع قوقل (اشهر الاسواق) اعطاني كم سوق شعبي ركبت المترو .. للمحطه هذي وتلك .. والاسواق الشعبيه ليس فيها مايميزها زيها زي اي بلد عربي تقليديه لاتشتري منها الا التذكارات والملابس التقليديه .. المهم مشيت الى ان انهد حيلي (ومن عادتي بالسفر يجيني عرق خواجه ) امشي كثيرا جدا .. ولما دخت رجعت للمترو ورجعت للفندق مساء وانتهى اليوم الاول .. في كازا .. الاسعار معتدله ورخيصه نوعا ما .. اقصد في الاكل وغيره .. من الغد .. سأنطلق ان شاء الله الى طنجه اول هدف .. الشمال المغربي |
تقرير عفوي و بدايته مشجعه وما شاء الله عليك من اول سفره للمغرب تعمقت بزيارة اكثر من مدينه وخاصه كازا يرهبونها المستجدين... بأنتظارك يالغالي
تحياتي |
ما شاء ألله عليك سرد جميل وبسيط وممتع ..... أكمل شوقتنا ابو لجين ....
|
بداية جميلة وسرد اجمل
استمر بنفس الحماس مواصلين المتابعة |
الله عليك أبو لجين .... فندق الوليد ومحطه كازا فويجور والمقهى
|
متابعينك يالغالي واصل امتاعنا بتفاصيل رحلتك
|
ان شاء الله شهر 9 موعدنا مع مطار محمد الخامس ومدينة الرباط ومدن الشمال المغربي
|
بالتوفيق تقرير جميل
|
سرد جميل وممتع للمتابعة
واصل متابع معاك |
طرح جميل واسلوب أجمل
|
اقتباس:
اهلا عمي صقر .. الله ياصاحبي المغرب ليس من سفراتي الاولى لذا فرهبه البلدان الجدد راحت علينا :004: لكن للامانه كان الحذر بما اننا ببلد عربي وسمعنا عن السلبيات كثيرا عشان كذا نازل متحيزم بالمطار ولكن صارت سهايل .. تحياتي لك ويشرفني مرور سموك |
اقتباس:
احرجتني والله بحاول قدر الامكان تذكر التفاصيل تحياتي لك :maroc (964): |
اقتباس:
|
اصبحنا واصبح الملك لله .. سويت خروج من الفندق وودعووني بكل لطف .. ( مشاعر متضاربه لما تقول لاحدهم مع السلامه) وانت تعلم انك (عابر سبيل ) وستختفي ملامحك بعد اختفائك بلحظات المهم ماعلينا من الرومانسيات ( قدامنا 330 كلم) الى طنجه دانه الشمال المغربي ركبت السياره وخرجت باكرا وهنا وهناك الى ان مسكت الخط السريع ( بفلوس ) ماهي واجد (ريالات معدوده ) وانطلقت ميمما الشمال استمتعت بالتفاصيل واسماء المدن القنيطره وغيرها (نسمع بها دائما من المحاربين القدامى) حقين المغرب .. لم احجز فندق والمغرب عموما الحصول على فندق (لاتفكر فيه كثير ) فالامور سهاالات والغالب حقين الـ 3 نجوم لو كاسرت شوي تاخذه ممكن اقل من (بوكنج) نظام ( عريبيا ) حلو بهالجزئية .. المهم وصلت طنجه الفخمه .. جوها خيالي ومنظر المحيط ( ملهم ) قلت ابغامر واخذ (رياض ) وهو نوع رخيص من الفنادق الشعبيه يغلب عليه الطابع الشعبي المغربي وصلت اسفل الجبل .. طنجه مرتفعه عن سطح البحر اكثرها .. ولقيت واحد مغربي حق مواقف ( بتشوفونهم كثير ) هذا صديقك غصب .. المهم سألته عن رياض (كذا ) ( اخذت الاسم من النت) واخذني في طريق وعر صعودا ضيقا لين وصلت الاعلى والطريق بالكاد سياره صغيره وحده .. المهم نزلت واخذ نص فلوسي والعمله المعدنيه ومدري كيف قال بي .. ولقيت نفسي اشكره وهو اختفى فجاه .. قلت لازم ياولد ( تنازل احيانا) لاتصير ( نظام حضرمي ) كل شي بتدقق عليه .. .. المهم دخلت الله لايوريكم .. غوله من جد بناء قديم وشبه مظلم المدخل وكله من داخل زخارف مغربيه قلت انتم رياض كذا قال نعم .. وللامانه ( حسيت بعدم الامان ) مدري ليش .. قلت الغرفه قال دور ثاني او مدري ثالث بدون درج وبدون تكييف .. قلت انتهينا وارجع لسيارتي وانزل الى الاسفل وادور في المنطقه المقابله للكورنيش والقى فندق 3 نجوم .. حوالي المية ريال او اعلى قليلا .. وعندهم موقف سيارات وامامه البحر ( 200 متر ) عبر الشارع وخلفه مطاااعم متنوعه وسوبرماركات (بحثت لكم عنه بالنت لين لقيته اسمه اطلس الموحدين ) موقعه (ممتاز جدا) نزلت قشي واغراضي وجو طنجه رايق .. نزلت تحت استكشف المنطقه .. وطلعت للسوق في الاعلى .. سوق شعبي تقليدي جدا ( خضار وفواكه ) على الطريق وملابس وغيرها واخذت لفه بسيطه بالمدينه في الاعلى .. وعلى طول الساحل .. البلد جميل وللامانه لم يعطى حقه من المدح اللي نسمعه عن (مراكش واغادير ) وشهرتها .. امضيت باقي اليوم امام المحيط .. وتجول في الاسواق المحيطه وتعشيت بمطعم اسطنبول (قريب جدا) من الفندق وانتهى اليوم الاول في طنجه * الطريق ممتع ولو علمت ان هناك طريق ( غير الهاي وي ) لسلكته .. لان الهاي وي مايمر تلك المدن الكثيره .. *كانوا يقولون لنا ان هناك (نقط تفتيش كثيره ) وان الشرطه يضايقون السياح ويطلبوا اموال او غيرها ولله الحمد من كازا لطنجه ماوقفتني اي شرطه او نقطه مروريه .. * فيه نظام بالقياده بالمغرب لازم تحافظ على بعد كبير بينك وبين السياره اللي امامك وعندما تقترب من السيارات الاخرى في الهاي وي وتتجاوز تلاحظ نظرات الاستغراب .. ربما ان سواقتنا كخلايجه دفشه شويه .. * الرياض او الفنادق الشعبيه خيار ( غير جيد أبدا) ولاتغرك الصور اللي ببوكنج *في كل المدن المغربيه لما توقف في موقف عام يطلع لك حق المواقف (غالبا كبار السن ) ولازم تعطيه فلوس (بخشيش ) بسيط ريال او ريالين ع الاكثر لو مااعطتيه سوا لك حكايه ماادري هل هم موظفين فعلا ام انها ضمن نظام ( بسط اليد على الباركنج) .. لذلك مواقف الفندق افضل *فندق اطلس الموحدين هادي جدا والاستقبال محترم |
تابع ربي يسعدك
|
بعض المواقف صحيح ماجرينها من البلديه وتعطيه ٣ دراهم او درهمين فالساعه يساعدك فالوقوف والخروج وحمايه للسياره .وبعضها عندها مكينه تدفع مدة الوقوف وتحط الكرت على الطبلون . مافي مواقف ببلاش خاصه فالشوارع . واصل تبيع النعامه بنعطيك سومه زينه ههههههههههههه
متابعين فين غبرت يابو لجين ربي يحفظك كمل لنا رحلتك وكذا الرحله ولابلاش تجي بطبيعتها ازين لايكون |
راعي صوقعه يابولجين ههههههه
تعال باقي العلوم وينها اكمل كتابه رحلتك |
اهلا بالجميع اصبحنا وحصحصت ورحت ادور قهوة وشربت لي كم كوب لين صارت الحواجب مستقيمه :) ونزلت ودورت ( شيهانه) سيارتي الصغيره ( بوكس مالها ذنيب ) بس رايقه .. الوجهه اليوم تطوان .. (شد الرحال ودرب عمك تدله ) تليت المويتر .. وعرضته خطوط تطوان .. الطريق جميل وريفي .. ونسائم البراد المنعشه .. وهنا وهناك مع الخط .. وقفت بنص الطريق عند مسجد وجنبه بقاله .. المهم جوني 3 اطفال (بنت عشر سنين واخوانها اثنين ) وسلمت عليهم وانا على الباب وكان فيه شايب جالس عليه الوقار قالهم شي بالدارجه المغربيه فقامت البنت وسلمت علي وجت (تحب يدي وانا ماانتبهت لها .. ) تفاجات صراحه وسيطر علي شعور بن كلب نظرت لها وعينيها (حكايه طفوله وحرمان) قلت تعالي ياماما نعنبوا الفقر .. رفضت اول ولكن قالها الشايب روحي معاه دخلتها معي البقاله هي واخوانها وشريت لها ربع البقاله لين قلبت نظرات طفولتها (فرحه ) والله لأعلمك كيف تحركين وجداني ( طنختها هي واخوانها الله يحفظهم ) .. :icon31::icon31: ودعتهم ومضيت كالغرباء .. يزفنا البعد للغياب ( رجعنا لادبياتك ) لم يكن الطريق طويلا .. حول 70-80 .. وحصل موقف مع قرويات وقفت عندهن يبيعن شي زي الزبادي .. وقفت وفجاة تجمعن علي ووحده تطق القزازه اليمين وانا مقفل وفاتح اللي عندي ويعرضن علي واحرقتني اللي يمين والله بغت تكسر القزازه من اصرارها المهم قبست وتهاوشت معهن وقلت انقلعن كلكن واجي ابحرك .. التفتت وحده وقالت لخويتها بلهجه مستغربه ( ممممممااااصري) تعني اني مصري لما سمعت لهجتي بما انها قرويه مغربيه فاللهجات العربيه عندها غريبه .. ضحكت وقلت تعالي كم زباديك هذا قالت بعشره او بعشرين شريته وقلت لها انبسطي نعنبو حيك يوم طلع راعي بريده مصري ودعتهم ومشيت على شيهانه تخم الارض والزبادي معي على الباب الايمن ( الحمد لله ريحته غريبه ) جدعته بعد كم كيلو .. :maroc (891): وصلت تطوان وتمشيت بالديره .. عاديه جدا ولافيها ذاك الزود .. مع انها لو كان معي احد تستحق ليله وتتمشى فيها من بكره .. لكن اللي وحده يمل بسرعه .. امضيت فيها جزء من نهار وفرفرت .. ثم قفلت راجعا الى طنجه .. ومريت بالطريق بمطعم على الطريق فيه الذبائح معلقه والبوفيه المفتوح فيه كل شي واللي يشوي تختار اللحمه ويشوي لك (جو ملكي) :icon31: تغديت واللي علي من الخير وركبت شيهانه وخليتها تهدى تعرف طريقها .. (تمشي الهوينا كما يمشي الوجي الوجلٌ) ابوك :icon31: لمحات : -طريق تطوان ريفي جميل جدا -محطات الطريق عامره وبعضها فيها مطاعم كبيره ومرتبه خصوصا القريبه من المدينه -لاتصير قمبازي واشتر زبادي من البياعات :maroc (1209): -الجو بارد وجميل والشمال المغربي حلو جدا جدا (قصرتها والا كانت الخطه اني اروح لمدينه الحشاشين الجميله شفشاون ) بس تخبرون بما اني من بريده ورجال عاقل يقالي خفت اروح ويعزموني وارتفع ثم اخلي (شيهانه ) كأنها كابريس اس اس بزمانه :icon31: . -باقي مغاره هرقل من بكره -الهروب من الحنشل حقين المواقف -مراكش ام نخيلات الحاره -التسميم في مراكش -حاره السحره ومغامرات اخرى لابولجين دام ظله :icon31: |
اقتباس:
الله يسعدك |
اقتباس:
كان تحس انك تدفع لاله ولكن هذا يطلع لك مدري منين يطلع ومعظمهم كبار سن يحكي مغربي ماتدري وش يقول ودايم زعلان والمغربي يعطيه 5 درهم يقبل انت يالخليجي لو تعطيه عشره لوا بوزه .. وكم مره كرشتهم لا لوا بوزه قلت انقلع لابوك لابو قطش حلا هي .. كل من مر بنعطيه وانا ياراعي اغادير لا سافرت مااصير زي ربعنا الخلايجه يمشون برتابه ومرتبين ولايحتكون بالناس .. السفر هو الغوص وسط الناس والتفاصيل وضرب الخطوط وتعرض الهبايب وش استفيد لا طحت لي بفندق او شقه .. امس بديره واصبح بديره :) ومنكم نتعلم ياذيبان |
انتبه ل شيهانه بعد زيارتها لشفشاون لا تخربط بالطريق [emoji12]
|
اقتباس:
حرصا عليها .. ماوصلت لشفشاون:bye1: |
تقرير جميل
|
واصل متابعين
|
بالتوفيق
|
| الساعة الآن 01:03 AM |
جميع المواضيع و الردود لاتعبر بالضرورة عن رأي و توجهات الادارة و انما تعبر عن رأي كاتبها فقط