تجمّل يالحزن
 

الحزن




انقضى عمري تجمل يالحزن واطلق سراحي
موحرام العمر يطويني وانا بسجنك اسير


البسك في الليل ثوب ومثل ظلي في الصباحي
لا قدرت افسخك لبس ولا افترق عنك بمسير


لو يهيض من الشجن شعري بعذبات القراحي
يطرب العشاق ويضاهي بجزلاته جرير


لو حمام الورق من عذب القصيد اطرب وناحي
لو يرشحني محبين الشعر للحزن امير


ما خذيتك صاحبي يالحزن مير الحظ طاحي
في ظلام الليل عوّد بك لي الحظ الكسير


كانت احلامي مدينه عطرها بالود فاحي
والامل بستان وارف بالقرنفل والعبير


لين ما جيشك دخل قوه تعاظم لجتياحي
دمر اسكان المدينه شوه الوجه النظير


لك رفعت الرايه البيضا بتهديد السلاحي
استلمت الحكم واصبحت المنفذ والمدير


شلتني من فوق الارض وطرت بي فوق الجناحي
وابتدينا رحلة المشوار في الليل الضرير


في بهيم الليل والا في مراويح الرياحي
ليلك الحاير هموم واجمل ايامك هجير


بين تعذيب الجروح وبين همن لايزاحي
جيت عالمك المخيف وقلت لي هذا المصير


يا حزن يكفي خويّك مالقى بالعمر راحي
روح دور في وجيه الناس لك غيري عشير


شوف هالعالم تسولف في وناسه وانشراحي
مثلهم ودي اعيش العمر في راحه وخير


تسهر اعيوني باليا ذنب وتنقّض جراحي
تطفي انوار الحياه وفي عيوني تستنير


امتلكت النفس يا غدار من كل النواحي
لين حليت بكياني واستحليت النظير


عالم الاحزان عالم مختلف ما هو بصاحي
عالم ٍ مسعور لايحكمه دين ولا ضمير




من قصائدي المتواضعه





..

رد: تجمّل يالحزن
 

صـــح لســــــــانك ياشاعرنــــــا الغالي

وأذهب الله عنا وعنكم وعن أمة محمد الأحزان.

كل الود والتقدير لشخصكم الرائع..

**المــــــــــاضـي**