|
شد الحقايب وقال ماشي لاغادير ... حلقات
اخواني مزاعيط المغرب . تحية طيبة من اخوكم انا واعوذ بالله من كلمة انا بسمي نفسي السلاوجي وخويي المعنجر وذلك لاني اسلوج بمعنى اني احب التغيير ما احب اثبت على شي واحد وخويي المعنجر لانه بعض الاحيان يقفل بليتينه ولا يغير رايه ابدا بس انا اعرف له . المهم لا نكثر الكلام . ندخل بالموضوع ..
السالفة ومافيها ياطويلين العمر دخل علي صاحبي قال تراك معزوم في راس السنة على حسابي في التو سيز يعني البحرين قلت كفو والله اجل الموتر علي رحنا البحرين وانبسطنا وسهرنا قلت وحنا في وسط السهره آآآه يالمغرب آآآه يامخيطو قال والله ماتصمل قلت اسحبها قال والله ما اسحبها متى متى قال عندي اجازة في اول فبراير قلت تم بدخل النت واضبط الحجوزات قال يالله . دخلت النت وحجزت برخص التراب (الله يعزكم) واعطيه رقم الحجز كما هي عادته ذيبان راح الله يكثر خيره وقص التذاكر على حسابه . قلت لازم تصير طيب زي خويك رحت انا بعد وحجزت رحلة داخلية عن طريق النت (موقع الخطوط المغربية) ودفعت عني وعنه (كازا ـ اغادير ـ كازا) . (الحلقة الأولى) يوم الاثنين 7فبراير 2011 الاقلاع الساعة 12.00م وعلى غير العادة طارت الطيارة بموعدها (الخطوط السعودية) وكان العدد فيها قليل ويوم دخلنا الطائرة اول ماشفت اربع صقور ومعهم اثنين بدو ... قلت لهم لابومتعب قالو الله الله . قلت يستااااهل . عرفت ان الطائرة بتضبط امورها ...هههه المهم . الحمد لله الرحلة كانت حلوه يالله من فضلك تبطح في ذا الكراسي . يوم اخذنا لنا 7 ساعات الا ويجينا البراد اللي يرد الروح اثرنا دخلنا ديره الشموخ والمعزه . نزلنا المطار الا وش تشوف هوى عليل بس والله فيه برد شوي وصلنا المغرب الساعة 5 بتوقيت المغرب ورحلتنا الساعة 9.20 إلى اغادير قلت يالله اربع ساعات نتصبر عليها كان المطار حلو وجلساته حلوه وجوه حلو المهم دخلنا إلى الصالات اللي فيها البوابات قالوا راح تتأخر طائرة اغادير قلنا ماااشي والله كان التعب بدأ يسيطر جلسنا الصالة مليانه من الاجانب فرنسيين واسبان وبعض الخوال مادري وين يبون المهم جت طائرتنا وفتحو الباب وركبنا الطائرة كنها توبيس خط البلده وبعدين فل ابوشن مليانه وكلها نص ساعة الا وحنا بدارنا اغادير الا والله ادفى من كازا وعلى طول اقرب تموينات عبينا لنا شنه كاملة لي ولخويي (عصيرات ـ شوكولا ـ ماء ـ لبن (امزح لبن مين والناس نايمين) اتجهنا إلى اماديل وكنا حاجزين عن طريق واحد صاحبنا (مضبطنا) ودقينا على طويراتنا ويوم وصلو كان التعب اخذ منا ما اخذ بس يوم دخلو ربعنا اسفهلت امورنا وارجهنينا واسفهلت امورنا ونمنا الساعة 6صباحا .. صحينا اليوم (الثلاثاء) ورحنا لمطعم إسماعيل اللي بجنب صحاري عندهم اكل حلو وزوين . ورجعنا للفندق علشان نتجهز وننزل مخيطو والآن اكتب لكم الموضوع وراح انزل أدري ان بعضكم لشطني عين بس عسى الله يستر . تحياتي لكم وإلى اللقاء مع الحلقة القادمة . |
الف شكر حبيبي على التقرير ننتظر الباقيه سلملى على صاحبك واعر بزاف اى عين الله يوافك |
لاواهنيك دالهن ياسعود
متابعيييييييييييييييينك بس الله الله بالصور عشان نعيش الجو صح:n1: واهنيييييييييييك على الصوره اللي بالتوقيع ، شي يتعب |
بدايه موافقه اخوي مخيطوو
وفي انتظار المغامرات يابطل ...: (721): |
يا خوي حاول تترك ------ اللي مالها لزوم
بدو ....خوال .... مدري وش باقي ما قلته ؟؟؟؟ ------------------------------------------------------: (704): |
الحمدالله على السلامة لاطول علينا : (209):
|
علشان رد الاخ اللي فوق اعتقد ان اسلوبي مو موفق في استكمال باقي الحلقات .
تحياتي لجميع من رد على موضوعي . |
هلا عزيزي مخيطوو,,, حمد لله على سلامتكم ووصلوكم للمغرب,,, اقتباس:
احلى تحية للسلاوجي: (456): وللمعنجر: (456): وشكلها بداية موفقة لثنائي مرح راح يتحفنا بما هو ممتع,,, اقتباس:
يوة ذا المطعم الى الحين موجود,,,,ياخوي جرب شواية النهضة والقلعة يقولون انهم غطو عليه,,, اقتباس:
بسم الله عليك,,,ماشاء الله لاتخاف اخوي ماراح ننضلك ولا بنطيرك,,, سرد حلو وجميل,,,بس لو تزودنا بصور يكون احسن,,,متابع معك اخوي السلاوجي,,,ورحلة موفقة لك وللمعنجر,,, تحياتي وأشواقي,,, |
اقتباس:
أي عنصرية تتكلم عنها أخي العزيز!!! الرجال ماسب أحد ولا شتم أحد,,,هو مجرد ذكر ان فية بدو بالطيارة صقارين,,,يعني لاسبهم ولا مدحهم!!! وانت جاي مدرعم تبي تتهاوش وبس!!! حتى موضوع الخوال!!! هو ذكر ان فية فرنسيين واوربيين وخوال,,,هل سب أحد؟ أو شتم أحد؟!!,,,لذلك أخوي لاتتهم الاخ بالعنصرية وهو ماغلط ولا سوى شي,,,قل خيراً والا فإصمت,,, تحياتي وأشواقي,,, |
اقتباس:
أخوي صاحب الموضوع,,,كمل وماعليك من احد,,,القافلة تسير وال....تنبح!! تحياتي وأشواقي,,, |
| الساعة الآن 03:58 AM |
جميع المواضيع و الردود لاتعبر بالضرورة عن رأي و توجهات الادارة و انما تعبر عن رأي كاتبها فقط