مزاعيط المغرب - السفر الى المغرب - بداية وقت .. و نهاية ازمان

حكاية اول رحلة

كان السفر الى المغرب يجول في خاطري كثير و كنت اتمنى اسافر لها بما اني اعشق السفر
زرت دول كثير الا المغرب و يمكن ارتباطنا احنا اهل جدة بمصر خلانا نشوف مصر غير عن اي دولة ثانية
و كان السفر للمغرب محظور تماما في العائلة لاسباب عائلية مثل ماهو محظور على كثير من الناس
ما اطول عليكم و ادخل في تفاصيل مملة.

في شهر ذو الحجة اتصال هاتفي من مديري يبلغني فيه اني راح اروح رحلة عمل الى المغرب بعد اسبوعين
جاك يا مهنا ما تتمنى.

في يوم 7 ديسمبر انا في مطار الملك عبدالعزيز متجه الى المغرب في حفظ الله النداء الاول اتبعه النداء الثاني الى النداء الاخير
وانا في صالة الفرسان اعبي نيكوتين.

ركبنا الطيارة واشوف اللي حولي مخضرمين عمالقة و ركب جنبي واحد من اهل الرياض دار بيننا حديث اولي عن المغرب
فهمت انه رايح للقنص هناك و انه بيقعد شهرين و انا رايح خمسه ايام.

وصلنا مطار كازا بحفظ الله و هاذي اول رحلة للمغرب و تحذيرات و تنبيهات من العسكر في المطار و اخوكم حريص وخايف
عدينا الجوازات و عديت الجمارك ولا احد كلمني و انا فيني لهفة اطلع اشوف ارض كازا.

اول ما اطلع من الجمارك كنت طالب من الفندق سيارة تجيني للمطار خرجت ما القى اسمي في اللوحات و فيه مقهى قدام الباب
الا اسمع احد يناديني و صوت انثوي معروف لي قلت يا ولد لا تتخيل و اركد ترى ياخذونك الدرك الا القى لي صديقة عمل
تعمل في احد دول الخليج في المقهى و جايه نفس المؤتمر و هي من المغرب الشقيق بس معاها جنسية اوروبية و تقولي ايش جابك
وشفيك مندهش قلت خليني اقول بس ابغى اروح الفندق قالت انتظر بتجي صاحبتي تاخذني قلت لا با اروح بسيارة الفندق ما ودي اقلها اني خايف و عشان كمان ما اقلل من احترامها.

المهم وصل السواق بعد ما ساعدتني اني اكلم الفندق و اركب معاه و نمشي المهم الفندق كان حياة ريجنسي.

عدى اول يوم تعرفون وصول العصر و انا اول مره اجي البلد فقضيت اليوم في الفندق ما خرجت ولا سهرت بس نزلت تحت في اللوبي الى الساعة 12 و طلعت نمت و كان يرافقني زميلي من الجنسية المصرية.

المهم اول يوم بعد الوصول من الصباح قضيناه في العمل و عزمنا احد الاشخاص الى مطعم و ماعجبني و انا في نفسي ابغى اكل كسكسي و طاجين.

رجعت الفندق و نوم خرجنا انا و زميلي في الليل اتعشينا في منزل احدى الاسر الفاضلة و هنا تعرفت على نظام العزايم في المغرب
اول شي جابوا الحريرة بعدين جابو حوت بعدين خروف كامل محمر بالفرن و هنا انا تقول اول مره اطيح في مطعم وضرب الين قلت امين رجعت الفندق الساعة 1 و نووم على طووول.

ثاني يوم صحيت الظهر كان عندنا مواعيد عمل تبدا بعد الظهر خلصنا منها و اقابل مديري اللي توه واصل كان ساكن في كنزي تاور
و اروح اقله يا ابو محمد ذي المغرب اللي تقولوا عليها ماشفنا شيء قال خلص شغلك و في الليل كملني قلت تم قال تم و اتصل عليه و الرجال مايرد قلت افا بدينا في السحبات اللي مالها داعي.

وجاء في بالي واحد من الشباب راعي مغرب و دايما هناك قلت يالحبيب انا في كازا و ترى والله زهقت في الفندق قال ابد انا في كازا تعال فندق الشيراتون و اروح اتكي معاه الين الساعه 1 و ارجع الفندق. هنا كانت اول حادثة لي سيئة في المغرب ركبت تاكسي من قدام الشيراتون قلتله وديني الحياة و المسافة بينهم قصيرة يعني تدفع 20 درهم بالكثير يوم نوصل قدام الحياة اقوله كم حسابك يقلي 100 درهم قلت هيا 20 مافي غيرها و يمسكني من يدي يبغى يمشي بالسيارة و اعطيه كوع محترم و انزل جري عالفندق شافني السيكيورتي و جاني قالي في مشكلة قلتله هذا العلم طال عمرك وياخذ مني 20 درهم و يعطيها السواق ويقلي سير خويا.

المهم طلعت و نمت و صحيت وذا ثالث يوم رحنا المؤتمر و اقابل مديري و اسوي حزين اكيد با اسوي حزين لاني لو سويت قوي با اروح فيها قلتله كذا يا ابو محمد هاذي اخرتها قال اليوم ولا يهمك و فعلا الساعة 10 بالليل و يتصل علي و يقول هيا تعال مطعم البلكون في عين ذياب والله و اروح و هنا تبدا مرحلة جديدة في المغرب تعشينا في البلكون اللي صار مطعم لازم اجيه كل ما اروح للمغرب
و بعدها طلعنا البنجاب و سهره الى الساعه 3:30 و ارجع الفندق و انام.

اليوم الرابع يوم عمل نهاري كان و في المساء قابلت مديري كمان في البلكون و تعشينا و بعدها عالبلاك هاوس اللي سمعت و ما ادري فين و انصدم ان البلاك هاوس التاريخي في نفس الفندق اللي انا فيه يا ويل حالي.

و سهرة في البلاك الى الساعة 3:30 و بعدها رحت مع مديري لكنزي تاور و كملنا السهرة و رجعت الفندق نمت و لميت اغراضي و عالمطار و عودة الى جدة.

اخذت عدة انطباعات عن المغرب في اول رحلة :
بلد جميلة جدا
لن اكرر الزيارة مرة اخرى
شعب مضياف و خدوم
الحذر من التكاسي خصوصا في اخر الليل

طبعا بسبب العمل ما خرجت و تمشيت في كازا كان اغلب وقتي في الفندق و صراحة قلت البلد دي ما راح اجيها الا عمل فقط.