خبراء أغادير، ما هي أفضل طريقة لتأجير سيارة؟
 

السلام عليكم ورحمة الله وبركاته
كل عام وأنتم بخير ومن العايدين ومن الفايزين بإذن الله
عوشركم مباركة

يا إخوان بخصوص تأجير سيارة في أغادير
كان لي تجربة سيئة مع أحد المعلنين هنا ولا بودي أذكر أسمه، وسفرتي بإذن الله في شهر ذوالحجة لمدة شهرين تقريباً، صح إنها بدري بس أنا أحب أرتب أموري من بدري، دخلت موقع Rentalcars لقيته غالي شويتين والتقييم كمتوسط 6 من 10 وأغلب السيارات قير عادي، دخلت مواقع مثل بدجت وافيز وحصلتها غالية.

سؤالي للخبراء هل من اقتراحات بهذا الشأن غير المعلنين هنا في المنتدى؟ يعني مثلاً موقع في النت سواء لشركة للتأجير في أغادير سواء عالمية أو محلية.

مع الشكر الجزيل مقدماً لكل من يشارك.

شهر ذي الحجة هذي السنة يعتبر آخر الصيف و أنصحك بالتروي لأنه أنت عارف الأسعار تكون مرتفعة في الصيف و خاصة انت جالس شهرين ...

انا مثلك احب أرتب من بدري وارتاح ولكن لابد من الهدوء و عدم الاستعجال

أتمنة الايجار للسيارة معروف و محدود و أعضاء بالمنتدى بيعطوك الأتمنة و تجاربهم و انشاء الله تستفيد

صدقت لا بد من عدم الاستعجال
بحث في تويتر والفيس بوك وحصلت كم محل للكراء، وبتواصل معهم أشوف ايش وضعهم

مشكورة يا أختنا
وإن شاء الله الأعضاء يعطونا تجاربهم

عندي صاحب مكتب تأجير بالمطار بكازا،

يوصل لي السياره لأي مدينه بالمغرب.

اذا تبيه راسلني.

مرحبا
التجربه السيئه افضل تذكرها و تذكر المكتب
حتى الاخوان ياخذون بالهم منه
الاجار الشهري يختلف عن اليوم
مالك الا تستاجر عن طريق واحد مغربي ثقه تطلع عليك السياره رخيصه

الله لا يهينك حبيبي برسلك على الخاص.

فكني من اسم المعلن.
المشكلة أني لم أسجل حجزي في المنتدى هنا.
الموضوع حدث من سنة وشوي كنت جاي المغرب لمدة 21 يوم على مطار الرباط وموعد وصولي 3 العصر ، وبطلع مباشرة على أغادير من خلال الطريق السيار، راسلت المعلن قبل وصولي بخمسة ايام وفهمته وضعي واقنعني بسيارة ببيجو 508 وأرسلي صورها من جوه ومن بره وقالي أن التأمين شامل 100‎%‎ ويوميتها 600 درهم، وانا طالع الطيارة من الرياض ارسلتله على الواتس اب اني جاي، ورد علي ان السيارة جاهزة وبتكون موجودة في مطار الرباط قبل أوصل وبيخلص الأوراق بسرعة عشان امسك طريق اغادير ولا أتأخر.
وصلت الرباط وخلصت وطلعت الساعة 3:30 العصر، اتصلت على الرجال يقولي جايك وكل نص ساعك إلى الساعة 5 العصر، وعطاني رقم السواق كلمته قالي لفيت على جميع مكاتب الإيجار في كازا ولا حصلت لك بيجو 508!
طبعاً حاولت أشوف مكاتب مطار الرباط ما حصلت الا سيارات صغيرة وغالية، ورجعت كلمت الرجال قام يتعذر أن بنته ولدت وارسلي شهادة ميلاد حفيدته وتاريخ الشهادة من شهرين مدري 3!
وآخر شي كلمني يقولي فيه سيارة الفا روميو جوليتا جديدة لوحتها w يعني بقراطيسها وب500 درهم في اليوم، قلت والتأمين قال شامل، قلت تم.
ولا جاني سواق الالفا روميو الا الساعة 8:30 مساء وجاني من مطار كازا، وفعلاً السيارة جديدة لكن التأمين مو شامل نسبة التحمل 15‎%‎ والنكته أنه بغى ياخذ جواز السفر كرهن عنده، قلت انسى الموضوع، قالي مو مشكلة، وطبعاً طلب مبلغ الإيجار مقدم كامل لمدة 21 يوم، وعطيته طبعاً وصور جواز سفري والرخصة ، وعطاني عقد باسم شركته وليست شركت المعلن.
وما وصلت أغادير الا 1 بالليل وعدت على خير ولله الحمد.

ويوم جيت ارجع السيارة سألته عن المعلن وهل له مكتب في مطار كازا، قالي هذا سمسار ولا عنده مكتب ولا سيارات.

وسلامتك وتعيش

بالنسبه لي استاجرت سياره من مكتب في مراكش لمدة شهر عن طريق صديق مغربي حسبها لي ب200درهم مغربي في اليوم طلعت عليه ب6000 درهم في الشهر