قصيدة غزل نهايتها زعل

النادر · 2012-03-18T20:33:04+00:00

قصيدة رائعة عن الغزل البارحة جاني مـن الحـب مرسـال .....من عقب ما بينـي وبينـه خصيمـة وانا ترى في الحـب مانيـب فعّـال .....ولا بعـد ولّـع بقلبـي هشيـمـه ولا بعد غنّيت فـي ساعـة وصـال ......ولا بعد ذقـت الفـراق وجحيمـه ولا جرى دمعي على الخـد همّـال .....ولابعـد جربـت مــرّ الهزيـمـة حتى وردنـي تالـي الليـل جـوال .....وانا على شاهي وبسكـوت ديمـة الرقم بايخ لكـن الصـوت قتـال .....كنه مثل صـوت المذيعـة حليمـة قالت مساء الخير يـا طيّـب الفـال.....قلـت ارحبـي ترحيبـةٍ مستديمـة بالعود والصفـري ودلـة وفنجـال .....واجبك يا بنت الأصـول الكريمـة ردت بضحكة ثم قالت وش الحـال؟.....قلت اشهد إن الحال عقبك سقيمـة قالت وهي تضحك بعد مثل الأطفال.....وانـا بعـد كنـي بدونـك يتيمـة من يـوم قالتهـا تزلزلـت زلـزال.....من فجعتي كنـي مسـوي جريمـة قلت ارفعي صوتك ترى مابه ارسال.....كـذاب لكـنّ المصيبـة عظيمـة قالت أقول اسمع ترى هرجنـا طـال.....ممكـن تصاحبنـي ترانـي وسيمـة واسمي الحقيقي أول حروفـه الـدال.....لكـن يسمّونـي البنـات الزعيمـة صحيح أحب الفخفخة واعشق المال.....لكـن ترانـي طاهـرة مستقيـمـة ما عندي امغازل ولا (لعب يهّـال).....ما عندي إلا في الشرف والحشيمـة بس الصراحة قلبي لشوفتـك مـال.....واصبحت وحدك جالسٍ في صميمه فكّر بعقلك واترك القيـل والقـال.....واحذر تطيع اهل العقـول العقيمـة وارسل علي الحين خمسميـة ريـال.....أشحن بهـا جـوال أختـي غنيمـة أو طقم غالي فيه خاتـم وسلسـال.....أروح بـه فـي عـرس ولاّ عزيمـة قلت الحقيقة مانيب رجـل أعمـال.....ولانـي بتاجـر والمـوارد عديمـة أنا الصراحة شبـه عطّـال بطّـال.....وعلاقتـي بالفقـر جـداً حميـمـة والراتب الله يرحم الحـال مـا زال.....محـدود والمصـروف ربـي عليمـه والدين بـالآلاف والبنـك شغّـال .....ياكـل فلوسـي بالربـا والظليمـة والسوق طايح والغلا ضيّـق البـال.....والموت والله صايـر اكبـر غنيمـة قالت تحمّل بـس والحمـل ينشـال.....خلك شديد الباس صلـب العزيمـة ياخي تصرّف جعلك اتصيـر نشّـال.....أهـم شـي إن النوايـا سليـمـة لابد تفهمني علـى كـل الأحـوال.....ما دمت من أهل العقـول الفهيمـة قلت إيه والله فاهم اللي على البـال.....لكن تـرى هـذي علينـا قديمـة يا بنت هـذا صايـر اليـوم مـوال.....للي تبي تلعب علـى ابـن اللئيمـة يا بنت ما تدرين كـم فيـه محتـال.....يلعب على الحبلين وانتـي غشيمـة يا بنت كم من جاهلة دمعها سـال.....من عقب ما جات العواقب وخيمـة والبنت لا اقفى عرضها بيد الأنـذال.....والله مـا يبقـى لهـا أي قيـمـة قالت تبي ولاّ فخلّك علـى جـال.....مهوب ناقصـني نصايـح حكيمـة عز الله إنك للأسف منـت رجّـال.....وانك قليل الذوق ما فيـك شيمـة يا لعنبو اللي مـا يسطّـرك بنعـال.....حتـى يعلمـك الغـزل يـا بهيمـة ( تفو ) عليك وصكّت الخط في الحال.....مدري ( تفو ) هي مدح ولاّ شتيمـة مـ نـ قـ ـول

ابن مراكش

مزعوط فضي

المشاركات: 807

تاريخ التسجيل: Apr 2011

2012-03-19, 11:16 PM

المشاركه #1

رد: قصيدة غزل نهايتها زعل

صح الله السانك ينادر

قصيده وافيه من وافي لاعدمناه

__________________

النادر

مزعوط ذهبي

المشاركات: 1,257

تاريخ التسجيل: Jan 2012

2012-03-19, 11:40 PM

المشاركه #2

رد: قصيدة غزل نهايتها زعل

اقتباس:

المشاركة الأصلية كتبت بواسطة ابن مراكش

صح الله السانك ينادر

قصيده وافيه من وافي لاعدمناه

صح بدنك اخوي ابن مراكش

لا عدمناك ولا عدمنا مرورك

__________________

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: قصيدة غزل نهايتها زعل
الموضوع	آخر مشاركة
بدايتها ضياع جواز السفر و نهايتها بكاء على الفراق ( مراكش)	2021-11-07 03:08 PM
قصيدة مبتديْ	2012-11-06 03:29 AM
قصيدة سفرة	2012-08-19 06:38 AM
قصه صعب تتخيل نهايتها	2012-01-10 07:44 AM
قصة قصيدة المسافر	2011-06-19 04:00 AM

الساعة الآن 07:19 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

قصيدة غزل نهايتها زعل

Content on this page requires a newer version of Adobe Flash Player.

روابط سريعه