مشارك مسابقه الضحك ((وليله كنها الليله )))
بليله من ليالي الصيف الرائعه ومع نسمات الهوى المشبعه بكميات كبيره من بخار الماء ومع لسعات الحراره و الرطوبه العاليه جدااا ومناديل كلينكس المعطره التى تقوم بمسح الجباه المبلوله من لفحات الصيف كنت على موعد مهم جداااا
موعد طال انتظاره ورغم المعناه ولكن كان لذلك الموعد اهميه لااستطيع ان اتخلف عنه حتى والصيف يعلن اشتداده وسحب الرطوبه الركاميه تغطى ارجاء المكان وشعور داخلي بالاختناق (عاد الي يسمعك يقول مولود في باريس)وكل ذلك لم ولن يثنينى عن الوفاء بذلك الموعد
بدا قرص الشمس يميل للغيوب ايذاناااا باقتراب الموعد على نغمات ابونوره وهو يغنى بليله كنها الليله وهبتك بالفرح عمري ودندنات ارددها ونا اتراقص فرحااا ,,,,وكشخت ولبست وتشيكت بالغتره وتبخرت باجمل البخور والدهون (لاحد يروح باله بعيد ترى الموعد برئ جداا)
اثناء التلبس والتبخر كانت هناك عينان فاحصتان ترقب كل حركاتى واول ماخطيت عند الباب خطوه ويدي لامست يد الباب الا اسمع زمجره وصوت ارتجت منه عضيماتي يقول على وين؟؟؟ اشوفك متكشخ ومتلبس على غير عادتك ياحلا الهيكل العظمي
رديت ابد معزوم لفرح صديق عمرى الدحمي الي طال انتظاره والدحمي مل صبره وصار عنده اربعميه سنه وهو عزوبي والليله ان شاء فرحه ونا لازم اكون معاه قلبن وقالبن حيث انه عزيز علي وسابقا قالواا الصديق بالضيق مدري بالمضيق
شوف يالهيكل لو طراا على بالك تلف او تدور علي بتشوف شي ماقبل ولابعد ولاخطر على بالك لاتسوى فيها ذكي وتسوي سواة المرحوم زوجى الاول ويكون مصيرك اسوء من مصيره
هنا انا صابتنى رعشه من اخمص راسي الي قمه اصابعي ,قلت لا يابنت الحلال والله والله انو زواج صديقي المهم انا مستعجل الوقت راح على وتاخرت خلينى اروخ ولمن اجى نتفاهم
قالت اوك بس قبل لاتروح مر السوبر ماركت وجب منه سيريلااك بالقمح للولد ,قلت اوك الحين تاخرت اجيبه ونا جاى ردت وشو عقب تجي هذا الي باقي انت شكلك ودك يصير فيك الي صار في زوج اختى قبل شهر,رجعت الرجفه وبدت عظيماتى تصافق بعض قلت خلاص بجيب وامري لله
طلعت من البيت بسرعه واتل سلف العراوى تل واخمسه خمسات ثم اتله على الخط واصفط عند اقرب سوبر ماركت ونزل بسرعه ولاقي البقاله مزوحمه ناس يشترون ولا يمك احد من العمال قلت مالها الا تدبر راسك وابرم البقاله برم واشوف علب السيلايك في الصفوف العلويه
حاولت اوصلها ولا انى ماطولها واحط عينى على درام ازرق بلاستيك واهزه هزيتين ونه مايتحرك
قلت حلو اطلع على طرفه وانتاول العلبه وانزل بسرعه البرق كنى غزال وماكذبت خبر واحط طرف اصابعي على الدرام واشلع مثل الصقر جسمى ولا السيريلاك صفوف مصفوف قدامي بس كلهم مافيهم بالقمح والمح بعينى علبه بالصف الثانى بالقمح ونا اتطاول لها والقطها ويوم لقطتها حسيت انى بعالم ثاني,طبعا انا ختل توازني والدرام لان الجنب فيه وانقشع الغطاء ونا والعلبه سقطنا كجلمود صخر حط ه السيل من علي
من سوء الحظ طحت مثل الي ينطون بالمسابح والبحر على راسي داخل الدرام وكان الدرام مليان بن مطحون واثناء سقوطى اطلقت صرخه عشان تخفف السقوط بس السقوط كان مدوى وراسي كله داخل البن من مما تسبب لي باختناق لان البن قفل الخياشيم والفم والاذانى
سرت ارافس من الاختناق ورجولي تصفق القواير والعلب بالرفوف وصارت فوضى عارمه بالمحل والحريم يصارخون والرجال يكبرون ورجال الاطفاء من كل مكان يحاولون فتح معبر في خيشومي عشان اتنفس ولافي فايده مما سبب ازدياد بالفرس والتكسير جراء شعورى بالاختناق وكل ماطال الوقت طالت الرفسات كل الرفوف
تم الاتصال المسؤلين على كافه الاصعده وفرق الطواري وارسلو مبعوث خاص لانقاذي بس كان احول بدل مايدخل السوبرماركت دخل المطعم الي جنبنا, المهم سحبو المبعوث لانقاذي وجاب معاه قطره بس قطرته مانفعت ولاقدرت تفتح ولا نص خيشوم وزعل وقدمت استقالته يقول ماحد يبي يتساعد معي,,,,,
امام عجز فرق الانقاذ في الوصول لي بسبب القصف المكثف للمعلبات جرااا الترفس الي نتج عن اختناقي كان هناك شباب قاموا بالدخول وحملي على ظهر العراوى ,,,والى اقرب مستشفي وبالطؤاري والممرضات والدكاتره في حاله تاهب قصوى يجرون ويحاولون انقاذي الي يشبك مغذي والي يسحب دم والي يقيس ضغط واثنين معهم شفطات يسحبون البن من الخياشيم
كل هالهيصه والحركه الغير عاديه بالطواري ,,كان هناك حرمتين عجز جالسين يسولفون قالت وحده وشفيه الله لايبلانا,,, ردت الثانيه الظاهر انه ولد ابو عزيز جارنا يقولون كل ابودايم يمسكونه الله لايبلانا وهو في حاله سكر , رغم ان ابوه ماقصر معوه ومزوجه بس هو مو وجه زواج هامل عاطل ويشرب المشروب ات الروحيه,,, ردت العجوز الثانيه ايه الله لايبلانا انا اخبر يومنى عروس سافرت وانا وابومحمد لكسلا عاصمه فرنسا زمان وكانو يجيبون هالمشروبات بالوايتات ويحطون لها خزنات بالبيوت وبازابيز ويصبون ويشربون منها ونا احسبها عصير ليمونى فتحت الباوز واشرب في يدى من الليومنى ونى ادوووخ وابومحمد ابتلش فينى ومن يومها بطلنا نسافر لكسلا وولايه اام درمان,,, خويتها ردت اجل شاربه الليموني يام محمد ونا اشوفك منتى بصاحيه بالصلاة امس,,,,,,,,,,, ردت خويتها لاوخيتي ذا زمان الحين اتهشش من عضامي بس
المهم تحسنت حالتى وطلعت من المستشفى ونزلت على الشارع ابي تاكسي يوصلنى البيت الا ذاك التكسي الي صفط جنبي وفيه خمس هنود ,اثرهم عمال السوبر ماركت نزلو بسرعه وخمونى وفحطو بي على جه مجهوله واثناء سيرنا اسمع اصوات غريبه وطلق نار اثرنا دخلنا الهند عن طريق البر من جه كشمير الهنديه
شوى وصلنا في ادغال وشجر ولاعاد في طريق للسياره ونزلونى وطلعنا في شجره طويله فيها في راسها مطعم جلسنا بالمطعم وجابو لنا قهوه نص ونص وشباكيه وبعد نص ساعه سمعت صوت المكريفون ينادى عن اقلاع رحله متجهه الى جبل الهملاياااا وعلى جميع ركابنا المسافرين على ظهر الفيل رقم 540 والمتجه لجبل هملايا التوجه لغصن رقم 33 استعدد لصعود على ظهر الفيل مع اجمل الامانى برحله سعيده
سحبونى الهنود معهم على ظهر الفيل وبدت الرحله والفيل يتحرك وسط ادغال الهند الاستوائيه ومناظر جميله وشوى ولا القي اسد جالس مع زوجته شكلهم عرسان ونا انادى عليه ياملك الغابه وعلى طول رد هلا هلا ابوعظيمات ,المهم بعد شهر وصلنا للجبل ونزلنا من على ظهر الفيل على شجره ومنها نزلنا للارض
مشينا حتى وصلنا جبل وفيه طريق وقفوا الهنود وقالوا اطلع لوحدك احنا حدنا هنا لو طلعنا راح نروح فيها الحقيقه كلامهم خوفنى وجلست احاول معهم ولكن اصروا وقالوا اطلع الشيخ يبيك بالجبل
طلعت ونا اراعد وعظيماتى يصكن في بعض واتسلق الجبل واحيان انط من شجره لشجره حتى وصلت قمه الجبل الا القي بوابه قدامى واسمع طلقات ناررر من فوق راسي وصوت يقول مين هناك
قلت انا ابوعظيمات من السعوديه يقولون الشيخ يبينى قالوا اى الشيخ بلغنا بالفاكس اطلع طلعت ومعي خفيرين مسلحين يمشون معي حتى دخلنا قصر كبير انا اول مره حسبته قصر الباهيه بنفس تفاصيله وجلسونى بمجلس
كبير يطل على حديقه كلها فواكه وشوى جوا الخدم والحشم وقدموا لي قهوه وقذوع ومويه حاره في كاسات الحقيقه انا استغربت من المويه الحاره اول مره اعتقدت انها للشرب بس لمن لقيتها حاره قلت يمكن للغسيل,بس كان حاره بقوه وسالتهم وشوله هالمويه قالوا هذي للشاهي مد يدك على الشجره الي جنبك واقطع وحط بالكاس شاهي طازه
بعد تقهويت وعينت من اهل خير تمددت على دكه تطل على الحديقه والهوى يرفرف وال تغرد وفرشات تحوم حولي ونا نايم ولا اسمع صوت جلبه وخيل وطلق نار واقوم مفزوع من نومى ولا القي شيخ بلحيه بيضا ومعاه ثلاثين فارس على الخيول مدججين بانواع الاسلحه ونزل الشيخ من على الخيل وقال ياهلا يابوعظيمات والتفت للفرسان واشر لهم ينصرفون
قال الشيخ اكيد يابوعظيمات تبي تعرف ليش جبناك هنا قلت لاياشيخ قال عقب ضيافتك ثلاثه ايام بنعلمك ,واثناء سولفنا قام الشيخ ينادى بصوت جهوري ولا القي بنت كنها فرس طول وجسم وبياض وعيونها كنها ملاعب تنس ارضي ,,, ردت وقالت لعيونك يااابوى امرررر ؟ قال اذبحي خاروف لضيفنا ,,ولاكذبت خبر وساعه ولاهى جايبه الذبيحه بقدر والمرق بقدر كل واحد شالته بيد وقدموه لي
مديت يدى للحم وعيونى جات فعيونها الساحره والشيخ صاحي لنا ويخزنا بنظرات وابتسامه صفراء وقال عين خير يابوعظيمات تغد تغد قلت تسلم ياشيخ ونا اسحب يدي واقله لي مطلب ياشيخ ولا يحرم زادك علي قال اقول كل لااجي اترفس فبطنك مسوي فيها بدوى ماتدرى انك بالهند
هنااا مضطرين نتوقف لان الجزء الاول اكتمل على امل نلقاكم بالجزء الثانى والاخير
__________________
يلومني فيك يالمغرب
من لاعذرنا ولا شافك
جاهل ومسكين مستغرب
محروم من روعه اطيافك