رد: يامدور الهين ترى الكايد احلى .. مخيطوو والعائلة في أوروبا ..
أولاً أحييكم على المتابعة الجميلة والرائعة .. وهذا إن دل على شيء يدل على رقيكم وعلى أخلاقكم الجميلة.
ثانياً احب اشكر اخي العزيز ولد حرب على مساعدته لي في مسألة الفيزا واستخراجها وتذليل كل الصعوبات أمامي .
ثالثاً والأهم هذه رحلة عائلية فأعفوني من ذكر بعض التفاصيل .
الرحلة عبارة عن خمسة أشخاص كبار وثلاثة أطفال .. كانت في أكتوبر 2012 .
شملت هذه الرحلة زيارة إيطاليا وفرنسا وسويسرا والنمسا .. مدة الرحلة حوالي 20 يوم .
نبدأ باسم الله تعالى .
الحلقة الأولى
يامدور الهين ترى الكايد أحلى
اسأل مغنّـي كايـدات الطروقيِ
الزين غالي لكن الأزيـن أغلــى
ولكل شـرايٍ بضاعـة وسوقي
أحب أعسف المهرة اللي تغلـى
واحب أروّض كل طرفٍ يموقي
واحب أسافر مع سحاب تعــلّـى
واحب فوق الغيم لمـع البـروقي
على أنغام فنان العرب محمد عبده وحالته الرائعة والجميلة نبدأ تقريرنا ..
ذات ليلة من ليالي رمضان المبارك دخلت المنزل إلا الكونجرس منعقد ..!!
يالله عسى خير وش فيكم قالو نبي نسافر ..!! وين عسى ماشر .. قالو انت تسافر ولا حد يقولك وين رايح الآن جاء دورنا .. (غريبة مع اني ما اسافر كثير) هههههه المهم قلت ان شاء الله فالرسول صلى الله عليه وسلم يقول (خيركم خيركم لأهله ، وانا خيركم لاهلي).
المهم طلعت الجوازات وما قصر اخوي ولد حرب في موضوع الفيزا وغيرها من مواضيع بخصوص السفر كلها خدمني فيها عسى الله يوفقه .
تم الاتفاق على السفر يوم السبت .. صباحاً المهم الساعة 6 صباحاً واحنا بالمطار وعلى الخطوط السعودية اعتقد سعر التذكرة للشخص الواحد حوالي 3500ريال والأطفال اقل بقليل ، طلعنا الطيارة وانا عندي مقولة الخطوط السعودية (البيت بيتك) خصوصاً للعائلة .. كان أفراد الطاقم ودودين جداً . والرحلة ممتعة .
وصلنا مطار روما في حوالي الساعة 1 ظهراً وعلى طول الجوازات ولا بخشيش ولا غيره .. واستلام العفش بعدها على مكاتب تأجير السيارات .. عن طريق الإنترنت حجزت سيارة عائلية فبمجرد اظهار الفاوتشر تم استكمال الاجراءات واستلمت السيارة وكان الاتفاق على سيارة (مرسيدس عائلية موديل 2012) واعتقد انها بكامل المدة حوالي (13.000ريال) .
وهذي السيارة
استلمنا السيارة واركب صديقي (GBS) وعلى الفندق يامعلم .. صراحة شوارع جميلة وجو رائع وجميل ممطر .. وصلنا الفندق وكان قريب من المطار اعتقد سعر الليلة بحوالي 4000ريال لانه أخذنا 2 سويت ملكي جنب بعض .
نزلنا العفش وبعد شوي طلعنا وتفرجنا على روما وآثارها وبعدها على مرسى اليخوت .. وبعد ما اظلم الليل على مجمع تجاري بجنب الفندق وندخل على ماكدو اللي فيها ويالله نلقى حد يتكلم انجليزي لانهم مايعرفوا غير ايطالي .. ونطلب عشاء ونتعشاء وعلى الفندق .. واحلى نومه ..
صحينا الصباح بدري وألاقي لكم صديق الاطفال الجديد هههههههههههه
وبعدها على الفطور الجميل والرائع
ونفطر ونشيل الشنط وعلى المجمع اللي البارح وناخذ شرائح جوال تخبرون لازم علم الببي يتغير .. المهم بعدها على مدينة بيزا .. المسافة من روما إلى بيزا .. حوالي 410كلم لكن طريق ممتع ورائع جداً استغرق الطريق منا حوالي السبع إلى ثمان ساعات .. لوجود كافيهات وجود مناظر طبيعية ووجود اماكن ترفيه وقرى منتشرة على الطريق . ولكن يعيب الطرق في إيطاليا كثرة محطات الأداء ..
وصلنا الفندق في مدينة بيزا في الشمال الغربي لإيطاليا اخر النهار وكان عبارة عن منتجع على نظام أكواخ الكوخ ثلاثة غرف .. وسعره حوالي 3500ريال بالليلة لكن ممتع جداً ويصلح للعائلة تم استئجاره عن طريق بوكنج ..
ريحنا بعد تعب السفر وتعشينا بمطعم الفندق وكان التخطيط ليلة وحده ومن بكره إلى جنيف .. لكن سحر بيزا غصب غصب خلنا نجلس ثلاث ليالي ..
في الحلقة القادمة إن شاء الله تعالى .. نتكلم عن بيزا والبرج المائل .. واللي اشغلنا (انا ضد المخدرات) .. والسلبيات والإيجابيات ..
تحياتي لكم واسف على الإطالة .. أخوكم مخيــطــووو ..