10 ايام مابين مراكش وكازا

مزيعيط جديد · 2013-03-20T20:40:02+00:00

السلام عليكم ورحمة الله وبركاته اسعد الله اوقاتكم بكل خير اول اعتذر عن التاخير بالدخول بعد السفره لان حصلت لي ظروف منعتني من الدخول لكن الحمد لله وثاني شي والأهم وقبل ماابدا بسرد تقرير رحلتي احب اشكر كل المزاعيط اللي بالمنتدى سوا مشرفين او اعضاء على وقفتهم ونصائحهم وكل شي قدموه لي لو اشكركم العمر كله مااوفيكم حقكم عن جد الله يبيض وجيهكم ماقصرتوا وفعلاً احرجتوني بطيبكم وفزعتكم معاي والله والله اني اكتب لكم الحين وعاجز اني اعبر لكم باللي بداخلي تجاهكم عن جد كسبت رجال ينحطون على الراس وااخص بالشكر ناس لو اشكرهم لو اسوي كثير علشانهم اعتبر اني ماوفيتهم حقهم واولهم زعيم المزاعيط اهنجار خليجي ابو عبدالله اقسم بالله العظيم يااخوان هالادمي ماقصر معاي بشي لدرجة انه يدق ويتطمن علي وعلى اموري هناك من كل النواحي وموصي علي هناك توصيه كاني واحد من خوانه وانا معرفتي فيه من هالمنتدى وثانيهم اخوي زيزوم ابو تركي والله والله اني اكتب وعاجز عن الشكر ماقصرت معاي يابو تركي والله يبيض وجهك والف شكر ويعلم الله انكم تنحطون تاج على الراس مهما اكتب واتكلم مااوفيكم حقكم واشكر اخوي بندر بن محمد ماقصر معاي وتواصلت معاه وقدم لي خدماته وكذلك اخوي المقيرش الله يذكره بالخير ونعم الاخ بعد ماقصر معاي وبصراحه ماودي انسى احد لكن المعذره اذا نسيت احد .. والحين ابداء بتقرير مختصر واتمنى تعذروني عن التقصير اول شي تم الحجز ع طيران الاتحاد بمبلغ 2900 ريال ماانكر ان خدماتهم حلوه ومميزه لكن عيبها التأخير وطول الرحلة بالذهاب استغرقت الرحله من ابوظبي الى كازا عشر ساعات وهذا بسبب التأخر بالمطار وبتكون اول مره واخر مره ع هالخطوط مره ثانيه ع السعودية بإذن الله فرق ساعتين المهم وصلت كازا صباح يوم 2-مارس الساعه 7 الصباح واول ماوصلنا للجوازات بدت المغامرات وانا كنت متحرص والفضل لله ثم لكم بدا يسولف معاي وانا ارد ع كلامه بس واطنش وهو يسولف معاي يتلفت يمين وشمال المهم طنشت قالي شفيك زعلان قلت مو زعلان بس تعبان شاف مامني فايده خلصني هذا بعد ماااستفرد فيني هههههههه المهم جيت الجمارك الى قدامي وحده يطقطقون عليها وبصراحه مالهم لايم يالبيه ههههههه وخلصت بسرعه وع طول للنك الشعبي صرفت وفتحت حسابين واحد باسمي والثاني بااسم صاحبي وودعنا الفلوس بعدها ع محطة القطار وهذا اكبر خطاء لانه متعبببب وممل وتوبه مره ثانيه اخذ سياره المهم جلسنا ننتظر القطار بكافيه طلبنا اكل ساندويش تصبيره ولما خلصنا طلبت الفاتوره ولااول مره ههههههه من الحرص وفعلاً اقسم بالله حصلته مزود علينا طلب ساندويشه وحده يوم تناقشت معاه حاول ينكر بس صاحبه ماقصر نشب له ونقص القيمه صح قيمتها بسيطه بس شي يقهر خلصنا منه وركبنا القطار الساعه تسعه ونص تقريباً ع كازا وهناك انتظرنا تقريباً ساعتين الاكيد انه ممل ولا يصلح اختصرها لكم وصلنا مراكش ع الساعه 3 ونص تقريباً وكنا تعبانين ع الاخر وهناك كان فيه شخص من طرف اهنجار خليجي استقبلنا واخذنا للسكن اللي ماقصر فيه طلعنا للسكن النية كنا نبي ننام لكن هيهاااات هههههه اخذنا دش ع السريع وبعدها طلعنا ع الساعه خمس ونص لمقهى اللوبو كافيه يالبيه بس عن جد كافيه واااعر والناس اللي فيه واعره تكينا فيه ساعه تقريباً المهم ماطلعنا منه الى والضيوف موجودين هههههه يالربع ودي افل السبحه لكن مستحي هههههههههههههههههه بعدها تمشينا بشارع فرنسا بالكافيهات لحد ماجت الساعه ثمان الى وحنا طافين نبي النووم رجعنا الشقه شوي الى الضيوف يدقون يعني اغسل يدك مابه نوم المهم من بكره طلعنا من الصباح نبي اوريكا لكن الجو ماساعدنا كان امطار وبصراحه انخدعنا بالجو في مراكش كان برررد بقووه المهم كنسلنا اوريكا وطلعنا نتمشى مرينا ع اسيما بحكم انها قريبه وتقضينا منها وبعدها تغدينا بمطعم فيروز مشاوي ع كيفكم والعشاء نويت مطعم الفاسيه بحكم انه جنب شقتنا لكن طلع الحبيب لازم حجز فماامدانا عليه هلكونا الضيوف هههههههههههه المهم وبالمختصر ثلاث ايام نبي نروح اوريكا مانقدر من الامطار ثاني يوم لنا في مراكش كان يوم الاحد ويك اند عندهم توجهنا لساحة الفنا بعد صلاة الظهر وكانت زحمممه وبصراحه حلوه استانسنا فيها وبعدها ع جامع الفنا وع الساعه 6 المغرب طلعنا لمنطقة البلازا وجلسنا بكافيه اللايت جلسته حلوه ع الشارع بس ازعاج ويبلشونك الشحاذين فيه فاللوبو افضل منه بكثير المهم ع الساعه ثمان ونص رجعنا الشقه واحلا ترويشه وبعدها نبدل ونطلع لمقهى لبنان شيشه وطرب تكينا فيه ساعتين للساعه عشر تقريباً بعدها مرينا مرور الكرام ع الديوان زحمه لكن ولا بريال مايصلح من اللي فيه تحس انه دار عجزه هههههه بعدها قعدنا نفرفر لحد ماوصلت الساعه وحده تقريباً وطلعنا ع تياتروو ويالبيه استانست فيه لكن يوم جيت تربل فايف بصراحه يالبيه بقووه عن جد مكان حلو وفليناها فيه بعدها للسكن ونوم ومن بكره اللي هو رابع يوم كان الجو غيم الصباح وع طول لاوريكا ونصيحة اللي يروح مراكش لا تفوته من الصباح للعصريات اقسم بالله شي يرد الروح وهو اليوم الوحيد اللي استانسنا فيه بمراكش ومن بكره ع كازا ع طول نصيحة اخو مراكش بنظري انا ماتصلح لشخصين تصلح لقروب وجوهم مراقص وفلل وهذا بسبب قلة الاماكن السياحية والمجمعات رحنا المزار بس فاضي مابه احد لكن كازا وماادراك ماكازا اقسم بالله العظيم اني استانس فيها وناسه لدرجة اني تحسفت اني رحت مراكش وكل واحد وجوه يااخوان حصلت فيها مجمعات ومولات واسواق يكفيك فيها عين دياب بس واجواءه الساحره بس اللي يعيب كازا زحمتها وانها اغلا من مراكش ابي اختصر جلستي بكازا سكنت بشارع انفا والفضل يعود لااخوي زيزوم ماقصر دبر لي سكن بسعر مناسب وحلو وموقع يخدمك من ناحية مطاعم كافيهات كل شي حولك يعني تقزرها تمشيه ع رجولك منها تتمشى ومنها تعزم الضيوف ههههههههه بختصر الاماكن جيت الديوان بالصدفه لانه ع نفس الشارع دخلته الى مو بعيد عن اللي في مراكش بس ان العاملين فيه افضل بكثير المهم جيت الكاري روج قالي لازم حجز قصده يبي ادفع شاورت خويي قال معصي مو واقفه عليه ههههههه شفناه من داخل مو زحمه مشينا منه قلت اذكر اني قريت عن فندق كنزي تاور فيه بالدور ال 28 جسله يحبها قلبك طلعنا له ع الساعه 9 بالليل الى فعلاً جلسته رايقه وحلوه خصوصاً المنظر اللي تشوفه منها تشوف كازا كلها و ديجيه حلو غربي جلسنا فيه ساعه وطلعنا لعين دياب تمشينا شوي وبعدها دخلنا مطعم فينيسيا ايس ماكولات ايطاليه تعشينا بعدها ناوي ع في اي بي لكن الوقت بدري شوي تمشينا وفرفرنا لحد الساعه 12 ونص قلت مشينا له وصلناه ع وحده الى ربع دخلنا الى توهم بادين بالسهره ومابه احد قليل الناس فيه لكن كلمة حق المكان وااعر وكلاس وروعه رحبوا فينا شفنا مابه احد قعدنا نسولف مع مديرهم قالي وين يااولادي بدري احرجني يوم قال كذا حسيت اني بالمتوسطه هههههههههه قعدنا نسولف معاه قال انتم الليله ضيوف عندي بحجز لكم طاوله ابد ع حسابي بس تو الوقت يبيلكم ساعه على ماينزحم المكان انحرجنا منه وتعذرنا قلنا لا مايمدي المهم طلعنا قلت نبي نمر وناسه دخلنا وناسه الى المكان زحمه شوي اخذنا طاوله وتكينا فيه بصراحه في البداية الجو حلو والفنان احلا بعد ساعه جا فنان جاب لنا النوم طلعنا منه الى واحد مدني مسك يدي قالي شرطه تنابشت معه عطني بطاقتك قالي ادخل هنا الى فيه كشك كانه حق بن كافيه اللي بالمحطات دخلت الى عسكر ثنين خير وش فيه قال من وين طالعين قلت وش رايك طال عمرك قالي شاربين كحول معاكم ممنوعات طبعاً كلنا لا تنابشنا شوي الى تعذروا وقعدنا نهايط هع عرفت مرادهم فلوس لكن يحلمون المهم مالكم بالطويله بعصو الجو كله رجعنا الشقه ونوم ع طول والصباح قعدنا وطلعنا لسوق اسمه القريعه تكفون يالربع لايطوفكم فيه حاجات حلوه وارخص من هنا من كل شي ملابس رياضه بدل وغيرها تقضينا فيه انا وخويي مرتين بس اغلبهم نصابين انصحكم لا تجونه الى معاكم مغربي ثقه هو يتفاهم معاهم ع السعر بعدها رجعنا لشقتنا وبدلنا وطلعنا لجامع حسن الثاني وصلينا فيه صلاة العصر وتمشينا ع البحر بعدها ع مجمع موروكو مول ويالبى الفله اللي فيه خصوصاً بصالة التزلج هع انواع الضحك والفله والتضبيط ههههههههه بعدها فرفرنا ونزلنا السينما بنفس المجمع الى كل الافلام باللغة الفرنسية امحق بعدها توجهنا لعين دياب وتكينا بمقهى ضيعت اسمه لكن جوه خووقه اغاني على اتااي يحبه قلبك يالبيه يالاتاي اقسم بالله اني فقدته:( ذي اغلب الاماكن اللي جيتها بكازا يمكن تقولون مارحت شي فيها فااقولكم لاتلوموني اول مره اروح وفيه مقاهي والله اني نسيتها اما اماكن السهر فما حرصت عليها لاني مو راعي سهر برا سهرتي بالشقه بس . واعذروني ادري التقرير مو وافي وانا مابغيت انزل شي لكن يعلم الله انه استحيت منكم اني رحت ورجعت بدون ماافيدكم بشي بالمختصر المفيد المغرب ليتني مارحت لها لاني عن جد تولعت فيها وتحسفت ع كل سفره سافرتها قبل وانا اكتب لكم الحين وتوي واصل قبل اسبوع قاعد ارتب لسفرتي الثاني ههههههههههه والله والله بدون مبالغه صراحه بلد يسحرك بجماله بغض النظر عن جمال اللي فيه لكن عن جد بلد يسحرك بااجواءه وطبيعة وناسه اللي فيه سافرة بلدان عربية كثير لكن مثل اهل المغرب ماشفت اقسم بالله بدون مبالغه صح فيهم ناس بس الاغلبيه شعب غصب عليك تحبهم ومن هالتقرير اوجه نصيحة لكل المزاعيط اللي يبي يروح مراكش لايتعدا ابو عبدالله اهنجار خليجي واللي يبي كازا عليه زيزيوم ابو تركي شهادة حق ولا هو قصور بباقي المزاعيط لكن الحق ينقال .. واي استفسار انا حااضر والمعذره عن هالتقرير ذا اول تقرير اكتبه من عرفة المنتديات . تحياتي لكم

Oscar

10 ايام مابين مراكش وكازا

المشاركات: 2,547

تاريخ التسجيل: Jul 2010

الدولة: marrakech

العمر: 39

2013-03-25, 09:35 AM

المشاركه #21

رد: 10 ايام مابين مراكش وكازا

الحمد الله عالسلامه يالطيب

بصراحه عجبني جوك وحرصك على الاستمتاع بكل دقيقه قضيتها في هذا البلد الجميل واكتشاف الجانب المشرق للسياحه في المغرب

زرت اهم الاماكن السياحيه في مراكش و كازا .. يعطيك ألف عافيه

__________________
i am a very private person, yet i am an open book
if you dont ask... i won't tell

عااشق المغرب

مزعوط مبتدء

المشاركات: 31

تاريخ التسجيل: Mar 2013

الدولة: السعودية

2013-03-25, 02:05 PM

المشاركه #22

رد: 10 ايام مابين مراكش وكازا

الحمدلله على السلامه
يااااااااااا مرحبا بالجميع

سبحانك اللهم وبحمدك اشهد ان لا اله الا انت استغفرك واتوب اليك
وصلي اللهم على عبدك ورسولك محمد عدد خلقك ورضا نفسك وزنة عرشك ومداد كلماتك الي يوم القيامة .

تقبلوا مروري

مزيعيط جديد

مزعوط نشيط

المشاركات: 80

تاريخ التسجيل: Jan 2013

2013-03-25, 06:18 PM

المشاركه #23

رد: 10 ايام مابين مراكش وكازا

اقتباس:

المشاركة الأصلية كتبت بواسطة ★ Oscar

الله يسلمك يالغالي

تسلم اخوي من ذوقك بصراحه السياحة بالمغرب سحر وعشق مايكتفي الواحد منه وصدق اللي قال المغرب بلد السحر < سحر الطبيعة لا تفهمو غلط هههههههه

الله يعافيك

مزيعيط جديد

مزعوط نشيط

المشاركات: 80

تاريخ التسجيل: Jan 2013

2013-03-25, 06:19 PM

المشاركه #24

رد: 10 ايام مابين مراكش وكازا

اقتباس:

المشاركة الأصلية كتبت بواسطة عااشق المغرب

الله يسلمك

أهنجار خليجي

مزعوط خبير

المشاركات: 6,943

تاريخ التسجيل: Feb 2011

2013-03-28, 01:42 AM

المشاركه #25

رد: 10 ايام مابين مراكش وكازا

حمد لله على سلامتك

وما اقوول الا الله يجملنا قدامكم بكل علمن غانم

والاخو اللي ما يساعد اخوه لا خير فيه

وهذا حقكم علينا

والله يجملنا معكم جميعا

اما شايبنا زيزوووم خيال كازا

ما عندي ما اقول بحقه وشهادتي فيه مجروحه

وهو تاج على الراس

__________________
اااه من قلبن جزوع نهيته ولا طاع ** يجوز لاجازت الشمس عن مطلعها

مراكش القلب يمك وفيك مطواع ** تزين فيك أحلام حياتي مع تطلعها

:Abu Ahmed (720):

مزيعيط جديد

مزعوط نشيط

المشاركات: 80

تاريخ التسجيل: Jan 2013

2013-03-28, 01:25 PM

المشاركه #26

رد: 10 ايام مابين مراكش وكازا

اقتباس:

المشاركة الأصلية كتبت بواسطة أهنجار خليجي

ارررررررررررحب هلا وغلا يالله حيه الله يسلمك من كل شر وانت الحمد لله ع سلامتك

انشهد انك تجملت وعلومك كلها غانمه ووافيه ذخر يابو عبدالله يعلم الله انك اكثر من اخو

شايبنا زيزوم < طالع منها يالحبيب هههههههه كلكم ماقصرتم وانتم تاج ع الراس .

zezuom

مزعوط ذهبي

المشاركات: 1,392

تاريخ التسجيل: Mar 2012

2013-03-28, 08:17 PM

المشاركه #27

رد: 10 ايام مابين مراكش وكازا

اقتباس:

المشاركة الأصلية كتبت بواسطة مزيعيط جديد

شفت ابوعبدالله يابدر ههههههههههههههههههه مسوي طالع منها يعني هههههههههههههههههه عجزت ياخوك افهمه بس مسندر الشايب ههههههههههه:Abu Ahmed (778):

مزيعيط جديد

مزعوط نشيط

المشاركات: 80

تاريخ التسجيل: Jan 2013

2013-03-28, 10:24 PM

المشاركه #28

رد: 10 ايام مابين مراكش وكازا

اقتباس:

المشاركة الأصلية كتبت بواسطة zezuom

ههههههههههههههههه ابو عبدالله الحين ماينلام ومحد يلومه راجع وخاطره شين وبعدين هو قايل اعذروني عن اي شي حتى الكلام القاااصح هههههههههههه اعتبر كلمة شايب

كلمه قاصحه هههههههههههههههههههههههه

صالكوط الرباط

مزعوط مميز

المشاركات: 497

تاريخ التسجيل: Nov 2012

2013-03-29, 09:06 PM

المشاركه #29

رد: 10 ايام مابين مراكش وكازا

الحمد الله على السلامه
تقرير خفيف ولطيف

مزيعيط جديد

مزعوط نشيط

المشاركات: 80

تاريخ التسجيل: Jan 2013

2013-03-29, 10:37 PM

المشاركه #30

رد: 10 ايام مابين مراكش وكازا

اقتباس:

المشاركة الأصلية كتبت بواسطة صالكوط الرباط

الحمد الله على السلامه
تقرير خفيف ولطيف

الله يسلمك يالغالي

تسلم من ذوقك تحياتي.

المواضيع المتشابهه للموضوع: 10 ايام مابين مراكش وكازا
الموضوع	آخر مشاركة
رحلتي مابين طنجه وشفشاون ومراكش وكازا	2024-02-03 11:30 PM
يااخوان اريد شقه في كازا 2 يومين و مراكش 4 ايام واكادير 8 ايام	2018-09-06 03:39 AM
بين مراكش وكازا	2016-03-21 10:45 AM
رحلتي مابين طنجه و مراكش	2016-02-17 02:12 AM
11 يوم ما بين مراكش وكازا	2012-08-28 01:31 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

10 ايام مابين مراكش وكازا

روابط سريعه

الذين يشاهدون محتوى الموضوع الآن : 1 ( الأعضاء 0 والزوار 1)