مساجله بين شاعرين

ارسلت قصيدهـ الى صديق لي شاعر اقول فيها :

يامحمد بن بداح مسيت بالخير
يانسل عودً ضارين بالشطاره

لاجاك خطن فيه حلو التعابير
اقره وعجل بالحلول المشاره

تعبت من طرد الهوى والغنادير
غديت مثل الي كسير الجباره

مشيت بدروب الخطر والمعاسير
وتبدلت حلو السنين بمراره

اخلص علينا يامحمد نبا نطير
نبغى على المجمول نأخذ زياره

واعلم ترى رجلن يصر الدنانير
يفنى وتبقى صرته لاهل داره


فأجاب بردهـ يقول :

يا مرحبا يامكرمين الخطاطير
يانسل منهم يعسفون المهاره

خطك وصلني وافين دون تقصير
يحمل علوم اللي مناةً دياره

تشكي علي امن الهوى يا خبر خير
وانا كليت امن الهوى كم تاره

انا ليا من ذعذع الغربي عصير
في جوف صدري تصطليني حراره

على ان وقفاتي مثل وقفة النير
الا ان قلبي مبتليني خضاره

يطري علي منهو يزيد التفاكير
اللي على شوفه نسوق البشاره

يابو سعد كانك تبي سجّةً غير
روّح وانا يمنى الطريق ويساره

انت اشعب اركابك اذا ودك اتغير
وانا على الغارات نمر النماره

حنا ترانا ما نحسب المخاسير
حياتنا من غارةً خلف غاره





وسلامتكم