اقتباس:
المشاركة الأصلية كتبت بواسطة ولدالجزيره
تكفي كلمنا عن ذيك الايام وين تسكن وين تسهر كيف كان الاسعار
زمان يامغرب
السلام عليكم ... يا صاحبي حديث الذكريات كله أشواق وحنين للماضي الجميل أيام الخير والناس الطيبة والنية الصافية ولكن راح أحاول ...
حكايتي مع المغرب بدأت قبل سفري لها بسنين يمكن 7 أو 8 سنوات ممكن 1981 عن طريق أحد اعمامي (مغامر ومزعوط كبير وخبير
قديم) اللي في السبعينات الميلادية ومن خلال برنامج الإبتعاث للدراسة بالخارج سافر للدراسة في أمريكا ووقتها ما كان فيه رحلات مباشرة
بين جدة ونيويورك ولما يسافر للدراسة يقلع من جدة لكازا على السعودية ويجلس فيها فترة وبعدين يكمل على نيويورك على الخطوط
المغربية والعودة نفس الطريق مرتين بالسنة مرة بالصيف ومرة برأس السنة الميلادية ... طبعاً كانت كامل العائلة تجتمع في بيت جدي الله
يغفر له بمكة المكرمة في بداية الإجازة الصيفية لقضاء رمضان والعيد بمكة حيث كانت فرصة كبيرة من أجل لم الشمل خصوصاً للمقيمين
خارج مكة ومهم عمي اللي أمريكا ووالدي وبعض أعمامي بالرياض ... وأنا مازلت أذكر مجلس جدي الكبير لما كان كل رجال وأولاد
العائلة نجلس فيه بعد صلاة الترويج أيام رمضان المبارك بعد الصلاة بالحرم للكلام في أحوال اللي جاي من أمريكا واللي جاي من الرياض
واللي سافر الخ ... وطبعاً ما أنسى جلسات البلوت والضحك والشيشة وجهز راس الجراك يا ولد وفين عصير التوت أو الفمتو ... وهنا أنا
بدأت اسمع عن المغرب وعن كازا والدار البيضاء والأحاديث عنها ... طبعاً أنا كنت مثل الكمبيوتر يسجل ويحفظ ويخزن ما شاء الله عليا
كنت متطور سابق عصري واجمع معلومات من الكل ... وبدأت بعض الكلمات تدخل راسي مثل عين دياب الوشيطه أبو الأشبال أطلنطيس
وكنت أحسب كازا مدينة والدار البيضاء مدينة ثانية وكنت أسمع عن الرباط وأكادير وكان كل شيء يدخل الراس ويجلس وكنت على هذا
الحال بكل إجازة نقضيها بمكة مع العائلة وكانت المغرب بقلبي وخاطري من الحكايات وحتى أذكر مرة سمعت الوالد يقول للوالدة الله يحفظها
تاج راسي ويعطيها الصحة ترا مسافرين مكة وجهزوا حالكم فقلت له ليش ما نروح للمغرب زي عمي بدل مكة وهنا أكلت كف محترم منه
وقال لي "لو سمعتك تتكلم عن اللي يصير بمجلس جدك بمكة أقطع راسك" ومر الصيف كالعادة.
لكن المهم في الموضوع هو بدأية إجازة صيف عام 1989 وكالعادة السنوية ضروري السفر لمكة في الأول ... عمي اللي في أمريكا
رجع للسعودية له قريب السنة وفي أول جلسة بلوت بالمجلس قال أنه مسافر للمغرب علشان يحضر فرح أحد أصدقائه من مغربية وبدأ
الكلام عن المغرب والمغربيات ... أنا كنت ناجح من الثاني ثانوي وكان عمري وقتها 17 سنة وجالس أخطط بعد سنة أسافر أمريكا مثل
اللي سبقوني وأبدا اسوي مثلهم ولكن جات الفرصة لعندي ... وقلت لعمي أجي معاك وقال ما عندي مانع إذا وافق أبوك ... المهم بعد
عناء ومفاوضات ومناقشات طويلة تمت الموافقة والسبب يرجع في تردد والدي هو أمي وكان الشرط أنها ما تعرف وقلت لهم ما تعرف
وراح نقول أني مسافر أتعلم لغة في بريطانيا وتمت الترتيبات بنجاح.
... فاصل ونواصل ...
__________________
الـراحـة الـنـفـسـيـة تـبـدأ عـنـد كـاونـتـرات الـجـوازات
2014-10-01, 02:30 PM
المواضيع المتشابهه للموضوع: العجيب في الزعطه
العرض الشجري
الدرهم المغربي مقابل عملات الخليج