زيارتي للمغرب ولأول مره .. كازا مراكش طنجه ..

أخواني المزاعيط في هذه المشاركه احببت أن أنقل لكم تجربتي ورحلتي الأولى للمغرب التقارير كثيره والمشاركات كثيره ولكن أحببت أن أدلو بدلوي واكتب عن رحلتي للمغرب وأنقل لكم تجربتي لعل وعسى ان يستفيد أحدكم منها طبعا هي الزياره الأولى وماخفيكم سرا اني قبل اسافر للمغرب بغيت اكنسل من الشيء إلي قراته يعني اشياء صراحة قراتها لا تمت للواقع بصله وفي اشياء فعلا حقيقه عموما بأختصار وعلشان ماطول ويكون موضوعي ع شكل نقاط
مدة رحلتي 15 يوم زرت فيها 3 مدن .. كازا مراكش طنجه .. راح أتكلم عن الاشياء الي يبحث عنها الشباب والي يسال عنها الشباب دائما والي سالت عنها قبل كذا وكنت ابحث عن معلومات عنها ..
الحجز .. الميزانيه .. المدن .. السكن .. الأتصالات والأنترنت . السياره .. السواق .. أماكن السهر بكل مدينه زرتها .. المشاكل الي واجهتها ..

بداية كانت مع ..
(الحجز ) ع طيران الأمارات لشخصين قيمة التذكره ذهاب وعوده من الرياض 2257 للشخص الواحد الحجز كان قبل شهرين من الرحله الأقلاع من الرياض الساعه 9.15 ترانزيت دبي تقريبا 5 او 6 ساعات .. الأقلاع من دبي لكازا 7.15 صباح الوصول الـ 2 ونصف الظهر

- (الميزانيه) كانت الميزانيه كل شخص 20 الف من غير التذكر طبعا اخذنا فلوسنا كاش معنا وحولناها في المطار كان سعر التحويل 2.50

- ( المطار ) وصلنا كازا نزلنا من الطائره وبسم الله على كونترات الجوازات طبعا قرات كثير عن طلبات موظفين الجوازات والشرطه للفلوس ماكان فيه زحمه انتظرت شوي وجاء دوري ورحت لموظف الجوازات عطيته ابتسامه صغيره قال اول مره قلت اول مره قال مرحبا بيك .. غمز لي بعيونه حرك يده يقول عطني حرك راسه وانا زي الصنم ونفس النظام مع صاحبي ماعطيناه فلس ختمنا ودخلنا استلمنا الشنط وحولنا الفلوس ورحنا على بنك وفاء كاش فتحنا حسابين وكل واحد اودع فلوسه في حسابه ارتحت صراحة لم اودعت الفلوس بالبنك بس فيه مشكله واجهتني الي هي اسحب و ماقدر اعرف كم بقي من الرصيد لازم صرافة البنك نفسه ولا ماتقدر البنك كويس بس مشكلته النقطه ذي بس

- ( السياره والسواق ) طبعا صاحبي يعرف له شخص زياراته متكرره للمغرب ويتعامل مع مكتب بالمطار لتاجير السيارات مع السواقين وتوصالنا بسواق ممتاز جدا كبير في السن بس يعجبك صراحة انه ساعدنا في اشياء كثيره وسهل علينا اشياء كثيره جدا ولو كان مش معنا السواق كانت صارت علوم السياره إستاجرنا هيونداي i30 2016 يوميتها مع السواق 650 درهم وحسبناهم اول ماستلمنا السياره كاش عن السواق وعن السياره السياره جدا ممتازه ومريحه وكويسه ديزل طبعا عبيناها يمكن 4 مرات فقط

-( الأتصالات والإنترنت ) اول ماوصلنا شرينا شريحتين اتصالات حطينها بجوال والثانيه انترنت مفتوح وحطينها بــ هواوي وشحنا كل شريحه بـ 200 درهم وشغالين عليها 24 ساعه وسافرنا ولسى ماخلصت

(كازا ) طبعا كازا زيارتنا لها كانت سريعه الي هو اول يوم ريحنا فيها واخر يومين .. طبعا بعد ماطلعنا من المطار رحنا منطقه الكل يعرفها طبعا اسمها عين دياب سكنا في فندق اسمه نادي فال دي انفا ريحنا شوي ونزلنا تمشينا ع الكورنيش تبعهم تعشينا وسهرنا في مكان سهر قريب من الفندق اسمه وناسه مكان يعني لا باس فيه ورجعنا نمنا وبعدها ع مراكش

(مراكش ) ومادراك مامراكش .. مراكش الحمراء جلست بها 7 ايام كانت من اجمل الأيام صراحة اليوم الثاني طبعا حركنا ع مراكش الساعه 12 وصلنا تقريبا الساعه 2 وعلى طول على مكان السكن - الروز قاردن - ومادراك مالروز قاردن بكتب عنه بالتفصيل في النقطه الي بعد هاذي المهم وصلنا للروز ريحنا شوي واخذنا الفيلا الي حجزنا طبعا نظامنا في مراكش كان كله سهر تقريبا النظام كتالي نصحى الساع 5 بالظبط ان شاء الله لو ننام الساعه 2 الظهر نصحى الساعه 5 نحصل الغداء جاهز نتغداء وبعدها نطلع نتمشى بمراكش ونحجز لنا طاوله باحد اماكن السهر ونرجع الفيلا نلبس ونروح نسهر للفجر وبعدها نرجع للفيلا نكمل فيها حتى نام متى ننام اذا تعبنا نمنا هذا كان نظامنا بمراكش كان نظام حلو صراحة وماتحس ابدا بالطفش تحس يومك مليان ماتطفش أبدا ..
مشكلتنا في مراكش ماكنا ننام يعني في اليوم يمكن ننام 3 ساعات 4 ساعات

(طنجـه ) عروس الشمال يالبا طنجه حركنا من مراكش بعد سبعة ايام ورحنا طنجه ووصلنا هناك بعد 6 ساعات متواصله استمتعنا صراحة بالطريق يعني جمال ووين ماتناظر اخضر باخضر صراحة شيء جنان وياسر القلب والله جلسنا 3 ايام بطنجه تمشينا فيها وزرنا البلد عندهم والمدينه القديمه والمناره ومغارة هرقل استمتعنا صراحة وبعدها رجعنا كازا جلسنا يومين وسافرنا

(السكن )طبعا بالنقطه ذي راح اتكلم عن السكن في الــ 3 مدن الي زرتها كازا مراكش طنجه ..

كازا .. سكنا بفندقين الأول نادي فال دي انفا .. فندق 5 نجوم اتوقع والله انه مايستاهل حتى 3 نجوم فندق اقل من عادي غرفه سريرين بـ 1100 سعره مبالغ فيه ولا يستحق وقديم واثاثه جدا قديم وديكوراته قديمه ومع ذلك تفاجات انه كله سعودين طبعا صارت لي مشكله فيه لم سويت تسجيل دخول اخذ جوازي بيحجزه عنده رفضت طبعا وقلت الجواز ماينحجز لو تموت طلع لي جوازات
السعوديين كلها قال هاذي كلها محجوزه عندي قلت له مالي دخل بغيري جوازي معي تاخذ صوره منه وترجعه بعد اخذ وعطاء وشد جذب اخذ صوره واخذت جوازي

الفندق الثاني فندق مقابله الي هو فندق السويس يعني حاله مو بعيد عن حال فال دي انفا ولكن في نظري افضل بكثير منه استاجرنا غرفه في العوده ليومين مطله على البحر والمدينه منظر جميل جدا ليلتين سعرها 1800 درهم كلها فنادق عاديه ومادري هل تسمح بدخول الزوار او لا لاني ماجربت أصلا ولا كنت ناوي بكازا ..

السكن بمراكش .. سكنت بمنتجع الروز قاردن طبعا الكثيرين مايحبون هالمنتجع لانه بعيد شوي وقدامه نقطة تفتيش مسويه قلق طبعا الحجز كان عن طريق الواتس اب .. فيلا شخصين مع الشغاله 2500 درهم لليوم الواحد حولت له اجار يومين وارسلي الفوتشر طبعا لأخفيكم سرا اني كنت متخوف من الروز بسبب ماقرات عنه وبسبب كثرة المشاكل الي واجهت المزاعيط فيه وكتبت موضوع قبل ماسافر عنه
وصلت الروز وكان في استقبالي موظفه اسمها سكينه صراحة قمه في الذوق وايضا موظفه اسمها سلمى كلهم صراحة ممتازات وتعاملهم معي كان راقي طبعا انا حجزت عندهم وكنت متخوف لذلك كلمتهم قلت بجلس يومين واحتمال امدد كان قصدي اجرب يومين اذا عجبني الوضع كان بها ومددت ماعجبني بروح اشوف لي مكان ثاني وفعلا جلست يومين وعجبني الوضع ولا واجهت اي مشاكل ولله الحمد

المنتجع بصفه عامه جيد من ناحية الحريه ممتاز جدا جدا جدا ومافيه اي مضايقات تاخذ حريتك بالكامل زوارك يوصلونك بدون اي مضايقه السماعات على اخر صوت ولا ابن امه يقولك كلمه تتمشى في المنتجع رايح جاي ولا احد يقولك شيء وأشياء صارت قدام عيني ماكنت اتوقع انه مثل هالاشياء بتصير كذا ومع ذلك ولا لحد يقول شيء حريه مطلقه وفظيعه صراحة

من ناحية تعامل الموظفين معي صراحة وللأمانه والله ماحد ضايقني ولا احد قالي شيء ابدا من اول مادخلت حتى طلعت حتى صارت لي مشكله عند تسجيل الخروج انفجرت موية المطبخ علينا وغرقت الفيلا وقلت بس بيدفعونا الحين ولكن علمتهم وانه مالي اي علاقه بالموضوع وتفهمو الوضع وسوا لي التشيك اوت شخص اسمه عبد الرحيم تعاملهم معي كان كويس الكثيرين مايمدحونه بس امانه تعامله كان جيد معي

طبعا فيه على المسبح جلسات ويشغلون الدي جي طبعا اسوء دي جي قد شفته بحياتي شخص كريه وشايب ولا هو داري عن شيء او يجيك مطرب غثيث يخرب ام الجلسه يجلس يمدح ويغني ويطلع فلوس قسم بالله من من ظهور هالدلوخ ويجونك هالمهايطيه وكلن يجلس يهايط بقبيلته ولعيون فلان وعيون قبيله فلان ووو وخذ لك هياط يكرهونك في الجلسه والله طبعا اذا جلست انا صار يشوفوني مايجي عندي اكرشه ولا اعطيه وجه
بالنسبه للنظافه في المنتجع فصراحة مش ولا بد يعني المنتجع يحتاج لإهتمام أكبر يحتاج لتجديد الفلل يحتاج لإهتمام بالحدائق الحشرات منتشره بكثره فيه يعني هالأشياء لازم يهتمون فيها هذا بالنسبه للروز والسكن بمراكش

السكن بطنجه .. سكنا في شقه دبرها لنا السواق في منطقة ملاباطا على البحر يعني شقه لا باس بها اخذنها 3 ايام بـ 1200 درهم مطله على البحر ومنطقه حلوه وجميله وتقدر تدخل زوارك والوضع عادي بس صوت وصراخ وازعاج مافيه يعني الوضع هدوء

(أماكن السهر ) ..

السهر بكازا ..
طبعا أنا وصاحبي لازم نطلع نسهر لأنه بنطفش بالفيلا واذا رجعنا نكمل سهرتنا بالفيلا خاصة بمراكش وايضا انا إنسان أحب الدي جي جوي جو دي جي اكره سالفه مطرب ويغني ويجلس يبربر لعيون فلان ولعيون مادري مين واهداء من مادري مين ولعيون القبيله الفلانيه يعني انا مادري الناس الي تهايط بقبايلها في الديسكوات واماكن السهر وش تحس فيه ؟؟ ايضا الشيلات ؟؟ قسم بالله اني اسمعها يجيني اكتئاب ولكن الشكوى لله قرف والله
بالنسبه لكازا سهرت ليلتين مره بوناسه الي بشارع الكورنيش والمره الثانيه بالبلاك هاوس .. وناسه جيد اخذنا طاوله بـ800 درهم بالمشروب طبعا والفاكهه وكانت السهره فيه ممتعه وجممميله ولكن زي ماذكرت يعيبه انه مطرب وبين كل مطرب ومطرب يشغلون شيلات اعوذ بالله وافضل مطرب كان السعودي جميل عبد الرحيم هو آخر واحد يشعللها صراحة وفي الخروج الواحد ينتبه يتجمعون الشحاذين والحراميه والنصابين عند الباب يعني الواحد يكون صاحي علشان لا ينشل

السهره الثانيه بكازا كانت ببلاك هاوس .. اذا قلت انه اسوء ديسكو قد دخلته بحياتي فهاذي قليله بحقه قسم بالله سيء جدا اول شيء ادارته زفت ويكلمك الواحد من راس خشمه ثاني شيء الاغاني شغل تخبيص باختصار دي جي سيء واداره سيئه وموظفين سيئين ومكان سيء ولن تتكرر عودتي له

اماكن السهر بمراكش
طبعا اليوم الأول سهرنا بـ تربل 555 .. بطل بطل بطل دي جي وغربي وأنا أحب الغربي طبعا تكيت الدخول بـ 200 للشخص بالمشروب استانسنا فيه صراحة وحلو وعجبني جوه
اليوم الثاني .. وناسه الي بالنخيل يعني مكان عادي وسيء صراحة اخذنا طاوله فيه بـ 500 درهم مشروب سهرتنا كلها كانت لعيون فلان ولعيون فلان ولعيون فلان بغيابه وعيون القبيله الفلانيه ماكملنا مشينا كملنا بالفيلا لانه بصراحة شي يرفع الظغط

اليوم الثالث سهرتنا كانت بـــ W أفضل مكان سهر ممكن إنك تسهر فيه بمراكش بطل وممتاز شيء اسطوري صراحة افضل ديسكو اخذنا طاوله سعرها بـ 3200 اخذتها بـ 2500 4 اشخاص استمتعنا متعه فظيعه ودي جي لا يعلى عليه طلعنا الساعه 5 وكملنا بالفيلا

اليوم الرابع سهرنا بـالياسمين يعني كويس مطربين بس مافيه الهياط الي بوناسه ولا بالديوان ولعيون ومادري وش كان فيه طرب وجوه حلو ولا باس به طاوله اخذناها بــ 1500 4 اشخاص

اليوم الخامس مامدانا نروح نحجز قررنا نجرب الديوان وتاخرنا اول مادخلت سمعت شيلات رجعت من عند الباب وقلت قسم بالله ماسهر فيه وارجع ونروح كاش وادخل وحصلت لي وحده تتكلم من راس خشمها قلت ابي طاوله قالت 1800 عند الباب قلت سلام عليكم ونتصل على واحد بـw اخذنا رقمه اسمه عماد قلنا عندك طاوله قال فيه بس فوق قلت احجزها حجزها رحت شفتها ماعجبني موقعها طلبت الطاوله الي اخذتها المره الأولى قال عامره قلت دبرني قال فيه وحده بـ 3200 منا منا بعد ملعنه اخذتها بـ 2000 شرط اني اسهر عندهم بقية الأيام وفعلا سهرت عندهم اليوم السادس والسابع باقي الأيام وكانت اجمل ايام السهر في w متعه فظيعه ولا تنسى


- (المشاكل ولمواقف الي واجهتها )
طبعا ولله الحمد لم اواجه اي مشكله يعني كلها اشكاليات بسيطه ممكن اي شخص يقع فيها طبعا المغرب بلد جميل واهله ناس طيبين وجمميلين الإشكاليه الي واجهتني هي الشحاذين طبعا في نهاية الامر هم بشر ولولا الحاجه والفقر ماطلبو بس ايضا الامر اعتقد انه امر مقرف الي جالس يصير وزاد عن حده ويشوهون البلد والله يجيك شحاذ ينشب لك يلزق فيك مايفكك قسم بالله الى بعد طلعة روح المصيبه تقوله ماعندي يقول ليش تقوله سير يقول وش سير تقوله ضف وجهك يقول لك ليش تعطيه يقول وش ذا بطنجه قسم بالله جلس يطردني واحد من فندق سيزر الى ماكدونالدز وتجمعو علي مادري محسبيني بنك البلاد
نزلت ساحة الفناء وتوبه مانزلها مره ثانيه نشب لي واحد جلس وراي وراي دخلت اكلت بمطعم بعد المغرب وطلعت ونشب لي عطيته مامداني اعطيه الى ويتجمع علي مليون واحد مافكني منهم والله الى الشرطه والسواق ولما افتكيت منهم طلع لي الشرطي يقول عطني يعني افتك من ذولي يطلع لي ذا وش هالبلوى
الاشكاليه الثانيه طلب الأكراميه الكل يطلبك تخش سوق يطلبك تخش مقهى يطلبك تشتري شيء يطلبك المشكله مايرضيهم تعطيهم الفلوس وتنتظر يرجع لك الباقي مايرده بس انا انشب لهم ماخلي لهم فلس


طبعا هذا ماكتبه لكم بالمختصر ... واي سؤال انا حاضر ... سلام