الثلاثاء ٦/١٨ ميلادي ( وداعية مراكش )
قمنى الساعة ١٠ أخذتنا السوالف وبعدها كل واحد راح يرتب أغراضه بصراحة من اللي بداخلي من حزن ماعرفت أرتب أخلص أغراضي أقول فيه شئ ناسيه أفتح وأطلع نص اللي بالشنطة وأحصلها أرجع أرتب أقول حاس إن فيه شئ ناقص قلت ماينفع كذا أهم شئ الجواز والتذاكر الباقي بحريقه ( قلبت النفسيه )
--
لمن خلصنا قلت لازم فطور ختامي في المحلبه ديالي الساعة ١٢:٠٠ باقي ساعة على تحرك القطار قالت صديقتي أخاف نتأخر قلت : يمدي الأمور سهالات المحلبه مو بعيد وقفنا طاكسي وعالمحلبه وصلنا مالقينا اللي تسوي ( المسمن ) سألنى قالوا مشت كان أبي أودعها، أفطرنا ورجعنا عالفندق ١٢:٤٥عالطول أخذنا الشنط ونزلنا سلمت الغرف وعلى المحطة وصلنا الساعة ١:٠٠ قصينا تذاكر الشخص ( ٩٠ درهم ) درجة أولى وطلعنا حرك القطار الساعة ١:١٠ لكازابلانكا
--
&وداعاً يالمدينة الحمراء وداعاً يا أول مدينة أسكنها خارج بلادي لم تخيبي ظني في أختيارك كأول تجربة فقد حجزتي لك مكانه بداخلي شكراً مراكش أستمتعت في كل شئ&
--
القطار كان حلو وفخم ولا توجد زحمه بس كان الحزن سيد الجو لدرجة ماعرفت أجامل أو أخرج نفسي وصديقتي العزيزة من الجو الحزين كنت أتوقع إني متمرس في هالأمور ولكن هالمره رسبت عندما أمسكت يدها وألتفتت لي وهي تحاول بكل جهد أن لا تسقط دمعتها أردت أن ألتزم الصمت ( أحياناً سؤالك لشخص عن مافيه يكون كالقنبلة تفجر ما بداخله ) خفت تنفجر لأن ما بداخلي لا يسمح لي بالسيطرة عالموقف مالها داعي دراما
--
أخرجت السماعة وسمعني ياكنترول مشتاق للمغرب ( جيتها مشتاق وأنا على أرضها ومشتاق ) لازم أسمع هالأغنية وبعدين أنتقل لأغاني ثانية ، وصلنا المحطة الساعة ٤:١٥الجو كان حلو مافيه حر بس مدينة يعيبها الزحمة مقارنة بمراكش لأنها العاصمة الإقتصادية كلها شركات والأجانب قليل جداً عكس المدينة الحمراء أخذنا طاكسي ورحنا ندور فندق طبعاً صديقتي العزيزه ما تقدر تأخذ لأنها تحمل بطاقة كازابلانكا( المدينة اللي في بطاقتك الشخصية ما يأجرون لك الفنادق نظام عندهم )
المهم حجزت في فندق ( برينس دي باريس ) ( ٣٠٠ درهم ) الساعة ٦:٠٠ دخلت أغراضنا
--
وعالطول نزلت ركبنا طاكسي قالت صديقتي بذوقك آكلات بحرية عاد أنا فكني عند هالآكلات وحنا بالطريق بدينا ناخذ عالجو وإنه ماينفع حزن وكذا ( نلعب على أنفسنا ) وسوالف والكاميرا أخذت دورها في التوثيق وصلنا مطعم ( سناك أمين ) الساعة ٧:١ ( كيف بالله دقة الوقت ) الله وكيلك طبيت في الآكل بشكل عجيب وتم تدوينه في قائمة التي يستحق الزيارة طلعنا الساعة ٧:٥٢قلت بصرف فلوس اللي معي كلها بالريال دورنا صرف عملات مافيه مقفلين مو مثل مراكش يقفلون الساعة ١١ او ١٢ كل مارحنا مكان مقفل رحنا البحر عين دياب وحنا في الطاكسي سمعت درجات الحراره في الراديو كازابلانكا ١٦ درجة وفي وقتها الرياض توصل ٥٠ درجة وصلنا الساعة ٩:١٠ وش هالروعة وجو جميل والمكان يفتح النفس نظافة وأماكن راقيه وجلسات ومطاعم بكل التصاميم وأفضل المواقع المطله عالبحر( وعندنا حقين الشرقية شايفين أنفسهم علينا علشان الواجهه البحريه ) سمعت إن الملك عبدالله رحمه الله عنده قصر في الدار البيضاء بمنطقة عين دياب ولمن مرينا من عند قصر سألت قال صديقتي هذا قصره ( قلنما ودهم يشكلون وحدة خاصة بحراسة قصر الملك وأنا منهم )
--
روعة البحر والمكان نسيت إني حزين وبكرة مسافر هههههههه أنبسط للأمانة وتمنيت عندي وقت أطول لأكتشف خفايا هذا الكورنيش
الجو كان بارد وهذا خلانا نبحث عن مكان آخر رحنا مول على إمتداد الكورنيش وصلنا الساعة ٩:٥٣ رفضوا الدخول لانه يقفل الساعة ١٠ برودة الجو وموعد السفر أفقد الطلعه إبتسامتنا وضحكنا أخذنا تاكسي ورحت الفندق ، الساعة ١٠:٤٠ وصلنا نزلت أغراض صديقتي العزيزة وهي تقول خايفه من الركوب لوحدها الطاكسي لأن الوقت متأخر قلت أبي أطلع معها وأوصلها وأرجع الفندق قالت : وإذا صار عليك شئ شلون أكون أنا السبب ؟ ، بعد نقاش قالت بروح والله كريم
ورحت معاها لين ركبت طاكسي ورجعت الفندق خذيت شور وجلست أكتب وأدون تفاصيل هذه الرحلة الصغيره قبل الكبيره وقد كتبت تقرير خاص بصديقتي العزيزة ، لحظات أرسلت لي أنها في وصلت البيت
--
أخذتنا السوالف بالجوال فأنا والله لا آمل من الكلام معها ، شكرتها من أعماق قلبي على كل شئ أعجز بوصف تعاملها معي لم تكن صديقة فقط
فعلاً كنت ضيف وأُكرمت بأفضل الكرم .
بعدها نمت تقريبا الساعة ١:٠٠
---------------------
الأربعاء ٦/١٩ ميلادي يوم السفر
صحيت الساعة ٨:٠٠ جلست في البلكونه شوي أكتشف كيف يكون الصباح في الدار البيضاء وكم صوره لذكرى أخذت شور وصليت الفجر نزلت الساعة ٨:٤٥ أبي أصرف عملات على بال ما تجئ صديقتي العزيزة وصلت توهم بيفتحون ( يا فتاح ياعليم ) صرفت وآملي عيني بالحلوات الي شغالين هناك ( العين بحر ) ورجعت لقيت صديقتي العزيزة بالإنتظار ، طلعت اخذت شنطتي ومشينا الساعة ٩:٤٢ متجهين المحطة
-
بداخلي فيه رضى لأن الله أتم السفريه على خير ( اللهم لك الحمد على كل حال )
مبسوط لأني أستمتعت بالرحلة والفرح كان له نصيب كبير لأني حققت أحد الأماني بمقابلة فتاة أسحرتني بأخلاقها قبل جمالها
ولكن تأتي الرياح بما لا تشتهي السفن فالحزن أنفجر بداخلي وأغرق كل شئ
لا أحد يستطيع أن ينقذني فالغرق كان سريع لكن تكفون أُريد أن أغمض عيني بالطاكسي ولا أصحى إلا بالرياض بليز أعفوني من لحظات الوداع كم أكرة الوداع ويؤلم الفراق
-
وصلنا المحطة الساعة ١٠:١٠ تقريبا دخلنا قالوا مافيه قطار للمطار ( لا أعلم ايش السبب )
وهي خيره علشان تُسْتَعجل لحظة الوداع ارتبكت وخفت تفوتني الرحلة طلعت عالطول لطاكسي وأتفقت معه وقلت لصديقتي العزيزة خلاص بما إن مافيه قطار للمطار لا أريد أن أتعبك أكثر كفيتي ووفيتي وهي قد أستسلمت لدموع وقلت لها مازلنا نتواصل مع بعض وماهذه الزيارة الا لتقوية صداقتنا وإن الله أراد راح أعود للمغرب ، قالت : أتمنى إنك أنبسط
طلبت منها الكف عن ذرف الدموع وقلت لها يالله أركبي طاكسي الله يستر عليك وذهبت بعد أن وادعتها وركبت عالطول مع الطاكسي الساعة ١٠:٢٠ ب١٥٠ درهم طبعاً سعر القطار٤٠ درهم ( للمعلومية ) ركبت والله مدري عن نفسي إلا وأنا بالمطار
--
وصلت المطار الساعة ١٠:٥٠ تقريباً
سألت عن الكونتر تسجيل طيران الإمارات فيه واحد مغربي سألته ناظر فيني كأني مو عاجبه قلتله أنا أسالك قال مابقى أعلمك قلت الله لا يبارك فيك وأعطيته إبتسامة إستهزاء ولقيته ظهري تنرفز تكلم بس مدري ايش يقول فيه شخص ثاني يأشرلي يعني أمشي وأتركه
-
على بعد خطوات حصلت الكونتر وصلت قبل لا يجون الموظفين ( سجلوها لتاريخ أنا جيت قبلهم ) فتحوا التسجيل وقص تذكرة صعود الطائرة الساعة ١١:١٠مافيه تنظيم شطحات كنت اول واحد صرت رقم ١٠ ،،، قصيت البوردينغ الساعة ١١:٤٠ ورحت لمراقبة الجوازات وأنا واقف بالطابور واحد من موظيفنهم شاف الجواز الأخضر جاء قال معك دراهم !!!؟ أستغربت من السؤال سكت عاد السؤال قلت لا ماعندي عملة درهم قال تفضل معي عند الضابط رحت عند مكتب لهم مقابل شباك الجوازات طلع الضابط إلا هي بنت ( هلااا بالعيال ) قالت تحمل فلوس معك قلت لا ( طبعاً فقاش )
قالت شلون ماتحمل فلوس قلت أستخدم بطاقات فيزا فقط قالت عملة مغربيه ماعندك قلت لا وش أسوي فيهم ، قالت : لأن النظام يحدد مبلغ معين تطلع فيه الطائرة وحبينا نعرف قلت اهاا بس مافي جيبي شئ كلها بطاقات ( يعني لا تحاولون ) قالت يعطيك العافية تفضل رجعت الطابور تعديتهم الساعة ١٢:٦ طقني الجوع نزلت للمطاعم وأنا ماعندي فلوس الا بالريال رفضوا أما درهم او دولار ولا يوجد صرافين الا في الجهة الأخرى يعني لازم ترجع من عند الجوازات ( أفقشني )
--
رحت كذا محل أبقى أشتري شئ علشان يرجع باقي الفلوس بالدرهم المغربي وأروح آكل رفضوا لنفس شئ دولار أو درهم مغربي رجعت جلست عند البوابة المخصصة لرحلة ما أقتنعت قلت لازم فيه حل تدري دور أهل البلد راح يوافقون وأفر المحلات كلها أجانب شفت محل حلويات اللي يبيعون جوج بنات واضح إنهم مغربيات دخلت كانوا مشغولين بالحسابات وأنا أتلفت اذا فيه شئ حلو أخذه وأحاسبهم بالريال حاس راح يوافقون دخلوا جوج شباب سعودين عرفتهم من أشكالهم ما يحتاج يتكلمون ولكن حسافة إنهم محسوبين على بلدنا قررت الطلوع والعودة بعد مايرحون
--
المهم وأنا متجه للباب قال واحد منهم تسمحون لنا ندخن هنا وطلع البكت وأخذ زقارة وسحب الولاعة وكذلك خويه ( همجيه ولا قلت أدب ولا شنو أسميها ) البنات لا لا خويا معليش ممنوع رجاءً خاص قال الهمجي الآخر خلونا ندخن هنا وشفيها مالقينا مكان ندخن وعندكم محد يشوف وقفت عند الباب أشوف نهايتها وناوي أتدخل والبنات يحاولون فيهم قالت وحده منهم لو جاء أحد وشافكم يغرمون المحل قبل فترة غرموا جارنا ٥٠٠ دولار رد أحد الهمج بس السالفة فلوس كم تبون أعطيكم!!!! ( عينات الله يمسحهم من عالأرض ) سحبت نفسي وأخذت لفه عالمحل ورجعت حصلتهم طلعوا دخلت
رحبت فيني وحدة وتتكلم إنجليزي أبتسمت على سالفة الجنسية اللي مو راضين يعترفون فيها قلت تكلمي عربي يكون أفضل
تفأجت وقالت أنت عربي ، قلت يقولون بس أنتم شككتوني في نفسي ضحكوا ، سألتها عن الهمج قالت لا راحوا بالغصب قلت طيب كنت ناوي أخذ غرض علشان تصرفون لي العملة بس مدام بدينا بضحك آجل أصرفولي بدون ما أشتري وافقت بعد محاولة إنزال سعر الريال لكن رفضت وقلت لكم نسبة معينه اذا تبون او خلوني أمشي صرفوا المبلغ وطلعت من عندهم رحت المطعم تغديت ورجعت والساعة ٢:٨ ركبت الطائرة الساعة ٢:٣٨.
٦/١٩ يونيو الساعة ٢:٣٨وداعاً المغرب الساحرة ،مشتاق لك وأنا باقي على أراضيك
على آمل العودة لك وخوض تجربه جديدة
( الرحلة من يوم الأربعاء الساعة ١ ليلا الموافق ١٤٣٤/٨/٣هـ إلى الخميس ١٤٣٤/٨/١١هـ )
لا إله إلا أنت ربي سبحانك أني كنت من الضالمين
2016-07-09, 01:02 PM
المواضيع المتشابهه للموضوع: زيارتي للمغرب ومراكش والتي بسببها عشقت المغرب
العرض العادي
الدرهم المغربي مقابل عملات الخليج